Buikalabelo Bu Zamaelela ni ku Ziba Bulapeli Bo Bu Nepahezi

“Ba ba na ni mbuyoti ki ba ba utwa Linzwi la Mulimu, mi ba li mamela.”—LUKA 11:28.

 1. Ha se ba zibile bulapeli bo bu nepahezi, ki batu ba ba cwañi ba ba toma bupilo bwa bona fa ku bu sebelisa?

HAKI ko ku likani ku fita fela fa ku ziba bulapeli bo bu nepahezi. Haiba lu lata se si lukile ni sa niti, ha lu se lu bu fumani, lu ka toma bupilo bwa luna fa ku bu sebelisa. Bulapeli bwa niti haki muhupulo fela wa mwa munahano; ki nzila ya bupilo.—Samu 119:105; Isaya 2:3; mu bapanye Likezo 9:2.

 2, 3. (a) Jesu n’a koñomekile cwañi butokwa bwa ku eza tato ya Mulimu? (b) Ki buikalabelo mañi bo bu ku mañi ni mañi y’a ziba bulapeli bo bu nepahezi?

² Jesu Kreste n’a koñomekile butokwa bwa ku eza seo Mulimu a bonisize sina tato ya Hae. Ha n’a feleleza se si fitile fa ku zibahala sina Ngambolo ya fa Lilundu, Jesu n’a zibahalize kuli haki bao kaufela ba ne ba mu biza Mulena (kacwalo ili ku ipala ku ba Bakreste) ba ne ba k’a kena mwa Mubuso; kono ki bao fela ba ba eza tato ya Ndat’ahe ba ne ba k’a u kena. N’a bulezi kuli, ba bañwi ne ba k’a haniwa sina “ba ba tul’anga mulao.” Ki kabakalañi ha ku li ku tula mulao? Kakuli sina ka mo i bulelela Bibele, ku s’a eza tato ya Mulimu ki sibi, mi sibi kaufela ki ku tula mulao. (Mateu 7:21-23, NW; 1 Joani 3:4; mu bapanye Maroma 10:2, 3.) Mutu n’a kana a ziba bulapeli bo bu nepahezi, n’a kana a babaza ba ba bu luta, mi n’a kana a bulela ze nde ka za ba ba bu sebelisa, kono hape ni yena u na ni buikalabelo bwa ku bu sebelisa mwa bupilo bwa hae tota. (Jakobo 4:17) Haiba a amuhela buikalabelo b’o, u k’a fumana kuli bupilo bwa hae bu k’a ba bo bunde ni ku fita, mi u ka fumana tabo ye s’a koni ku taha ka nzila ye ñwi ifi kamba ifi.

³ Mwa taba ye felile, ne lu nyakisisize ze silezi za lisupo ze bonisa bulapeli bwa niti. Se siñwi ni se siñwi sa zeo hasi lu tusi fela ku fita fa ku ziba bulapeli bo bu nepahezi kono hape si tahisa ku luna ka buñwi lishemaeto ni matohonolo a mañwi. Kamukwaufi?

M’u Nga Cwañi Muhato kwa Linzwi la Mulimu?

 4. (a) Ba banca ha ba kalisa ku swalisana ni Lipaki za Jehova, ki sifi se ba lemuha hañi-hañi ka za ku itusisa Bibele kwa Lipaki? (b) Ku fepeha hande kwa moya ku ama cwañi batanga ba Jehova?

⁴ Lipaki za Jehova ha ba nze ba ituta Bibele ni ba ba sa z’o cisehela, ba bañata ba ba banca bao kapili-pili ba fita fa ku lemuha kuli se si lutiwa si zwa mwa Bibele. Ha ku alabiwa lipuzo za bona, ha ba libiswi kwa likuka za keleke, kwa lizo za batu, kamba kwa mihupulo ya batu ba ba zibahala. Linzwi la Mulimu tota ki lona le li puma litaba. Ha ba ya kwa Ndu ya Mubuso, ba bona kuli teñi k’o hape Bibele ki yona buka ye tuna ya tuto. Ha k’u ngi nako ye telele ku ba ba bata niti ka busepahali ku lemuha kuli muinelo o mutuna o’ tisa tabo ye ba bona mwahal’a Lipaki za Jehova ki taba ya kuli ba fepeha hande kwa moya ku zwelela mwa Linzwi la Mulimu.—Isaya 65:13, 14.

 5. (a) Ki shemaeto mañi ye tahiswa ku ba ba bona Lipaki za Jehova? (b) Ba kona ku abana cwañi mwa tabo ya Lipaki?

⁵ Haiba mu lemuha seo, m’u nga cwañi muhato ku sona? Haiba mwa si utwisisa, ne ku si ke kwa luka ha ne mu k’a ba bashalimeli fela ba ba s’a ezi se siñwi, mi ha mu swaneli ku bata ku ba cwalo. Bibele i bonisa kuli ba ba li “bautwi fela” kono isi “baezi ba Linzwi” ba sweli “ba ipuma.” (Jakobo 1:22) Ba ipuma ka libaka la kuli ba palelwa ku lemuha kuli ku si na taba ni se ne ba kana ba bulela, bupalelwi bwa bona bwa ku sa ipeya ku utwa Mulimu bu bonisa kuli ha ba mu lati luli. Ku ipapata fela ku ba ni tumelo ye s’a boniswi ka misebezi ki tumelo ye shwile. (Jakobo 2:18-26; 1 Joani 5:3) Ka ku fapahana, y’a susuezwa ki lilato la ku lata Jehova kuli a be “muezi ya eza musebezi” yena “u ka fuyaulwa ku z’a eza kaufela.” Ee, sina ka mwa n’a taluselize Jesu Kreste, “ba ba na ni mbuyoti ki ba ba utwa Linzwi la Mulimu, mi ba li mamela.”—Jakobo 1:25; Luka 11:28; Joani 13:17.

 6. Haiba ka niti luli lu itebuha Linzwi la Mulimu, ki matohonolo mañi ao luna ka butu lu k’a lika ka t’ata ku ikungela?

⁶ Yona tabo yeo i ekezeha ha mu nze mu hula mwa zibo ya tato ya Mulimu ni ku sebelisa lika ze ekezehile ze mu ituta. Ki buikatazo bo bu kuma kai bo mu k’a itusisa mwa ku ituta Linzwi la Mulimu? Batu ka buñwi ba ba eza likiti ze mashumi-shumi ba ne ba s’a zibi ku bala ni ku ñola ba sebelize ka t’ata ili ku ituta ku bala, mi ba ezize seo ka mulelo tota wa kuli ba kone ku bala Mañolo ni ku a luta kwa batu ba bañwi. Ba bañwi ba pakela kakusasana ni kakusasana ilikuli ba kone ku sebelisa nako ye ñwi ka zazi ni zazi mwa ku bala Bibele ni lituso za ku ituta Bibele ka zona, ze cwale ka Tora ya ku Libelela. Mina ka butu ha mu bala kamita Bibele kamba ku bala mañolo a’ bonisizwe mwa taba ye ñwi ye itutiwa, mu lemuhe ka tokomelo milao ni litaelo za Jehova, mi mu bate ku lemuhisisa likuka ze ñata ze li teñi za ku lu etelela. Mu fe nahanisiso ye tuna ku seo kalulo ye ñwi ni ye ñwi i patulula ka za Mulimu, mulelo wa hae, ni ku sebelisana kwa hae ni mufuta wa mutu. Mu fe seo nako ya ku susueza pilu ya mina. Mu nyakisise ka za haiba ku na ni linzila ze mu kona ku sebelisa ka zona kelezo ya Bibele ka ku tala ni ku fita mwa bupilo bwa mina luli.—Samu 1:1, 2; 19:7-11; 1 Matesalonika 4:1.

Kana Buipeyo bwa Mina ku Jehova ki Bo Bu Tezi?

 7. (a) Tuto ya Silalu i bile ni susuezo mañi fa buikatazo bwa batu bwa ku lapela Mulimu? (b) Ki sifi se ne si kana sa ezahala mutu h’a ituta niti ka za Jehova?

⁷ Ku bolule-lule ba batu, i bile kimululo ku ituta kuli Mulimu wa niti haki Silalu. Taluso ya kuli “ki kunutu” ni kamuta ne i si k’a ba kolwisa. Ne ba ka sutelela cwañi bukaufi ni Mulimu y’a s’a konwi ku utwisiswa? Kabakala tuto yeo, ne ba tengamezi kwa ku s’a lemuha Ndate (ili y’o libizo la hae ne ba si k’a li utwa ni kamuta mwa keleke) ni ku lapela Jesu sina Mulimu kamba ku libisa ku lapela kwa bona ku Maria (ye ne ba lutilwe kuli ne li yena “M’ahe Mulimu”). Kono lipilu za bona ne li nyakalalile muta yo muñwi wa Lipaki za Jehova n’a apuzi Bibele ni ku ba bonisa libizo la Mulimu la ka butu, la Jehova. (Samu 83:18) Musali yo muñwi wa mwa Venezuela n’a tabile hahulu ha n’a bonisizwe libizo la bumulimu kuli mane a kumbata luli Paki yo munca ya n’a abani niti ye nde hahulu yeo ni yena mi a lumela ku ba ni tuto ya Bibele ya fa ndu. Batu ba ba cwalo ha ba ituta kuli Jesu n’a bulezi ka za Ndat’ahe sina “Mulimu wa ka, Yena Mulimu wa mina” ni kuli Jesu n’a bizize Ndat’ahe sina “Mulimu a nosi wa niti,” ba fita fa ku lemuha kuli seo Bibele i luta ka za Mulimu haki se si s’a konwi ku utwisiswa. (Joani 17:3; 20:17) Ha ba fita fa ku ziba tulemeno twa Jehova, ba ikutwa ku hohelwa ku yena, ba kalisa ku lapela ku yena, mi ba bata ku mu tabisa. Ki sifi se si zwa mwateñi?

 8. (a) Bakeñisa lilato la bona la ku lata Jehova ni takazo ya bona ya ku mu tabisa, ki sifi seo batu ba ba fita ku bolule-lule ba ezize? (b) Ki kabakalañi kolobezo ya Sikreste ha i li ya butokwa hahulu?

⁸ Mwahal’a lilimo ze lishumi ze felile, batu ba ba eza 2,528,524 mwa likalulo-tuna ze silezi za lifasi-mubu ni lioli ze ñata-ñata ba neezi bupilo bwa bona ku Jehova mi hamulaho ba bonisize buineelo b’o ka kolobezo ya mwa mezi. Kana ne mu li yo muñwi wa bona, kamba kana se mu itukiseza kolobezo cwale? Kolobezo ki muhato wa butokwa mwa bupilo bwa Mukreste kaufela wa niti. Jesu n’a file balateleli ba hae musebezi wa ku tahisa balutiwa ba batu ba macaba kamukana ni ku ba kolobeza. (Mateu 28:19, 20) Ki ko ku lemuseha hape kuli ne li hamulaho fela wa kolobezo ya Jesu Jehova yena ka sibili ha n’a bulezi ku zwelela kwa lihalimu, kuli: “Ki wena Mwan’a ka ya latwa, ye ni katelwa.”—Luka 3:21, 22.

 9. Kuli lu buluke swalisano ya ka ku lumelelwa ki Jehova, ki sifi se si tokwahala ku luna?

⁹ Swalisano ya ka ku lumelelwa ki Jehova ki nto ye na ni ku latiwa hahulu. Haiba se mu keni mwa swalisano ye cwalo ka buineelo ni kolobezo, mu pime nto ifi kamba ifi ye ne i ka i sinya. Mu si ke mwa lumeleza pilaelo ka za bupilo ni mamelelo kwa lika za kwa mubili ku i kasheza mwa sibaka sa bubeli. (1 Timotea 6:8-12) Mu pile ka niti ka kelezo ya Liproverbia 3:6: “U beye Muñ’a Bupilo mwa milelo ya hao kaufela, mi Yena u ka lukisa linzila za hao.”

Lilato la Kreste Li Mi Ama ka Butungi Bo Bu Kuma Kai?

10. Ki kabakalañi ku lapela Jehova kwa luna ha ku s’a lu tahisezi ku kasheza Jesu kwatuko?

¹⁰ Ku itebuha ka swanelo Jehova sina yena Mulimu a nosi wa niti, ka mo ku inezi fela, ha ku tisezi mutu ku libala Jesu Kreste. Ka ku fapahana, Sinulo 19:10 i bulela kuli: “Ku paka Jesu, ki Moya wa bupolofita.” Ku zwa Genese ku ya Sinulo, bupolofita bo bu buyelezwi bu fa litaba ka za kalulo ya Jesu Kreste mwa mulelo wa Jehova. Mutu ha nze a ziba litaba zeo, mubonelo o’ makalisa w’a taha ili o’ si ka kopama ni mihupulo ye fosahezi ye tahile ka lituto za buhata za Krestendomu.

11. Ku ituta seo Bibele i luta luli ka za Mwan’a Mulimu ne ku amile cwañi musali yo muñwi mwa Poland?

¹¹ Ku ziba hande niti ka za Mwan’a Mulimu ku kona ku ama mutu ka butuna. Ne ku li cwalo ku Danuta, musali yo muñwi mwa Poland. Na s’a zibile Lipaki za Jehova ka lilimo ze ketalizoho ka ze talu, n’a ikola ze ne ba luta, kono na s’a tahisi kuli bulapeli bwa niti bu be nzila ya bupilo bwa hae. Hamulaho a amuhela kopi ya buka ya The Greatest Man Who Ever Lived, ye tahisa bupilo bwa Kreste ka mukwa o’ konwa ku utwisiswa ka bunolo.a Manzibwana hahulu, a apula buka yeo, ka mulelo wa ku bala fela kauhanyo i liñwi. Nihakulicwalo, n’a si k’a i tuhela ku fitela habusa, ha n’a s’a i balile kamukan’a yona. A kalisa ku lila. “Jehova, u ni swalele,” ki mwa n’a kupezi. Kabakala sa n’a balile, n’a boni hande ku fita l’ili kaufela lilato le li bonisizwe ki Jehova ni Mwan’a hae. N’a lemuhile kuli ka lilimo ze ketalizoho ka ze talu n’a nze a zwa ka ku tokwa buitumelo kwa tuso yeo Mulimu n’a nze a mu fa ka pilu-telele. Ka 1993 n’a kolobelizwe ka ku fa sisupo sa buineelo bwa hae ku Jehova fa mutomo wa tumelo ku Jesu Kreste.

12. Zibo ye nepahezi ya ku ziba Jesu Kreste i ama cwañi bupilo bwa luna?

¹² “Zibo ya Mulen’a luna Jesu Kreste” i swalisanisizwe ni ku ba Mukreste y’a na ni misebezi ni y’a tahisa siselo. (2 Pitrosi 1:8) Ki ka sipimo mañi mu ka ba ni kabelo mwa musebezi w’o, ili ku abana lushango lwa Mubuso ni ba bañwi? Butuna bwa seo batu ka buñwi ba kona ku eza bu amiwa ki miinelo ye miñata. (Mateu 13:18-23) Ha lu koni ku cinca miinelo ye miñwi; ye miñwi lwa kona ku i cinca. Ki sika mañi se si k’a lu susueza ku lemuha ni ku eza licinceho ze konwa ku eziwa? Muapositola Paulusi n’a ñozi kuli: “Lilato la Kreste li lu sweli”; ka mubulelelo o muñwi, lilato la n’a bonisize mwa ku fa bupilo bwa hae kwa neku la luna ki le li zwile hahulu mubano kuli buitebuho bwa luna ku lona ha bu nze bu hula, lipilu za luna tota li k’a susuezwa ka butuna. Ka seo, lu lemuha kuli ne ku k’a ba ko ku s’a swaneli hahulu ku luna ku zwelapili ku ndongwama likonkwani za buitati ni ku pilela hahulu ku itabisa. Ka ku fapahana ni seo, lu cinca litomahanyo za luna ili ku fa sibaka sa pili kwa musebezi w’o Kreste n’a lutile balutiwa ba hae ku u eza.—2 Makorinte 5:14, 15.

Ku Kauhana kwa Lifasi—Ka ku Fita fa Sipimo Mañi?

13. Ki kabakalañi ha lu s’a swaneli ku bata kabelo ni ye kana ya bulapeli bo bu li kalulo ya lifasi?

¹³ Haki ko ku t’ata ku bona s’a ezize Krestendomu ni bulapeli bo buñwi ka libaka la kuli ba bata ku ba kalulo ya lifasi. Mali a keleke a itusisizwe kwa ku tusa mwa likezo za bufetuheli. Baprisita se ba bile masole ba ba lwanisa mulonga. Ka lizazi le liñwi ni le liñwi, mapampili a makande a bonisa lipiho ka za likwata za bulapeli ze lwanisana mwa likalulo ze fitana-fitana za lifasi-mubu. Mazoho a bona a lota mali. (Isaya 1:15) Mi mwa lifasi kamukana ba bahulu ba bulapeli ba zwelapili ku lika ku zamaisa ka sikupuki miinelo ya bupolitiki. Balapeli ba niti ha ba na kalulo ku seo.—Jakobo 4:1-4.

14. (a) Ki sifi seo luna ka buñwi lu swanela ku pima kuli lu kone ku zwelapili mwa ku kauhana ni lifasi? (b) Ki sifi se si kona ku lu tusa ku pima ku swasiwa ki mibonelo ni likezo za silifasi?

¹⁴ Kono ku kauhana ni lifasi ku ama nto ye fita seo. Lifasi li tezi tato ya mali ni lika ze lekwa ka mali, takazo ya ku zibahala kwa ka butu, ni ndongwamo ye zwelapili ya munyaka, hamohocwalo ni lika ze cwale ka ku tokwa mamelelo ye buniti ku ba bañwi, ku bulela lishano ni lipulelo ze lwaha, ku kwenuhela m’ata a tamaiso, ni bupalelwi mwa buiswalo. (2 Timotea 3:2-5; 1 Joani 2:15, 16) Bakeñisa sa ku s’a petahala kwa luna, ka linako ze ñwi ne lu kana lwa bonisa ka nzila ye ñwi ze ñwi za litengamo zeo. Ki sifi se si kona ku lu tusa mwa ndwa ya luna ya ku pima malaba a’ cwalo? Lu tokwa ku ikupuza ka za y’a simulula zeo kaufela. “Lifasi kamukana li lapalezi mwatas’a ya maswe.” (1 Joani 5:19) Ha ku na taba kuli nzila ye ñwi ne i ka bonahala ku ba ye lakazeha cwañi, ha ku na taba kuli ki batu ba bañwi ba bakai ba ba pila ka yona, ha lu bona sila sa Jehova se situna, yena Satani Diabulosi, ku ba yena y’a i tahisa, lu lemuha ka m’o i bezi ye maswe luli.—Samu 97:10.

Lilato la Mina Li Fita fa Sipimo Mañi?

15. Lilato le li si na buitati le ne mu boni ne li mi tusize cwañi ku lemuha bulapeli bo bu nepahezi?

¹⁵ Ha ne mu kalisize ku swalisana ni Lipaki za Jehova lwa pili, lilato le ne li bonahezi mwahal’a bona ku si na kakanyo ne li mi tabisize kabakala ku fapahana kwa lona kwa moya wa lifasi. Koñomeko fa lilato le li si na buitati i fapahanya bulapeli bwa Jehova bo bu kenile kwa mifuta ye miñwi kaufela ya bulapeli. Ne ku kana kwa ba kuli seo ki sona se ne si mi kolwisize kuli Lipaki za Jehova ka mo ku inezi fela ba sebelisa bulapeli bo bu nepahezi luli. Jesu Kreste yena ka sibili n’a bulezi kuli: “Se ba ka ziba batu kaufela kuli mu balutiwa ba ka ka sona, ki ha mu latana.”—Joani 13:35.

16. Ki libaka mañi ze ne li kana za ba teñi za kuli luna ka buñwi lu atame mwa lilato la luna?

¹⁶ Kana kalemeno kao ka mi bonahaza ni mina ku ba yo muñwi wa balutiwa ba Kreste? Kana ku na ni linzila ze mu kona ku atama ka zona mwa ku bonisa lilato kwa mina? Ku si na kakanyo kaufel’a luna lu kona ku eza cwalo. Ku na ni ze ñata ze amiwa ku seo ku fita fela silikani ku ba bañwi kwa Ndu ya Mubuso. Mi ha ne lu ka fa fela lilato ku ba ba lu lata, ne lu ka fapahana cwañi ni lifasi? “Sihulu mu latane ka lilato le lituna,” ki mo i susueleza Bibele. (1 Pitrosi 4:8) Ki ku bomañi ko ne lu kana lwa bonisa lilato le lituna ni ku fita? Kana ki muzwale kamba kaizeli wa Sikreste wa simuluho ye fapahana ku ya luna ni y’o nzila ya hae ya ku eza lika ka yona i li ye s’a lu tabisi? Kana ki mutu y’o, kabakala la makulanu kamba busupali, ha si k’a kona ku fumaneha kwa mikopano kamita? Kana ki sinyalana ni luna? Kamba, mwendi, kana ki bashemi ba luna ba ba se ba supala? Ba bañwi ba ne ba eza hande mwa ku bonisa muselo wa moya, ku kopanyeleza cwalo ni lilato, ne ba ikutwile inge ne ba ituta zona zeo sinca ha ne ba talimani ni miinelo ye t’ata hahulu ye kona ku taha ka ku fa pabalelo ye bat’o ba ya ka ku tala ku silama sa lubasi y’a fitile fa ku ba siyanga ka mukwa o mutuna luli. Ka mo ku inezi fela, mane niha lu talimana ni miinelo yeo, lilato la luna hape li swanela ku fita ni ku ba ba si ba mwa lapa la luna.

Ku Kutaza Mubuso—Ki kwa Butokwa Cwañi ku Mina?

17. Haiba luna ka butu lu fumani tuso kwa ku pota kwa Lipaki za Jehova, cwale lu swanela ku ikutwa ku susuezwa ku eza nto mañi?

¹⁷ Nzila ya butokwa yeo lu bonisa ka yona lilato la ku lata batu ba bañwi ki ka ku fa bupaki ku bona ka za Mubuso wa Mulimu. Ki sikwata si li siñwi fela sa batu se si eza musebezi w’o Jesu n’a bulezi cimo. (Mareka 13:10) Bona bao ki Lipaki za Jehova. Luna ka butu lu fumani tuso ku ona. Cwale se lu na ni tohonolo ya ku tusa ba bañwi. Haiba lu abana mubonelo wa Mulimu wa taba yeo, musebezi w’o u k’a ba wa mayemo a butokwa mwa bupilo bwa luna.

18. Ku bala kwa luna buka ya Jehovah’s Witnesses—Proclaimers of God’s Kingdom ne ku kana kwa susueza cwañi kabelo ya luna mwa ku fa bupaki bwa Mubuso?

¹⁸ Taba ye nyangumuna ya ka m’o lushango lwa Mubuso ne lu iselizwe kwa libaka ze kwahule hahulu za lifasi-mubu mwahal’a mazazi a maungulo a’ i talusizwe mwa buka ya Jehovah’s Witnesses—Proclaimers of God’s Kingdom. Haiba mw’a ziba Sikuwa, mu si ke mwa palelwa ku i bala. Mi ha mu nze mu i bala, mu lemuhe hande linzila kaufela zeo ka zona batu ka buñwi ba abani mwa ku fa bupaki ka za Mubuso. Kana ku na ni ba bañwi bao mutala wa bona mu kona ku likanyisa? Ku na ni libaka ze ñata ze kwaluhile ku luna kaufela. Haike lilato la luna la ku lata Jehova li lu susueze ku li sebelisa hande.

19. Lu fumana cwañi tuso ha lu amuhela buikalabelo bo bu zamaelela ni ku ziba bulapeli bwa niti?

¹⁹ Kacwalo ha lu itiisa mwa ku eza tato ya Mulimu, lu fumana kalabo kwa puzo ye li, Taluso ya bupilo ki ifi? (Sinulo 4:11) Ha lu sa li ba ba bubutela, ba ba siyezi ni maikuto a ku ba mukungulu. Ha ku na musebezi o mu kona ku ipeya teñi o k’a tisa buikolwiso bo butuna ku fita bo bu tiswa ki wa ku itiisa ka pilu kaufela mwa sebelezo ya Jehova Mulimu. Mi ona w’o u fa nako ya kwapili ye makalisa hakalo! Ili nako ya ku ya ku ile ya bupilo bo bu kolwisa mwa lifasi la hae le linca, m’o lu k’a kona ku itusisa buikoneli bwa luna ka ku tala ili ka ku lumelelana ni mulelo o’ lilato w’o Mulimu n’a bupezi mufuta wa mutu.

[Litaluso za kwatasi]

Ne Mu K’a Alaba Cwañi?

◻ Ki kabakalañi ha ku li kwa butokwa kuli bulapeli bu amuhele Bibele sina Linzwi la Mulimu ni ku kuteka Jehova sina yena Mulimu wa niti?

◻ Ki sifi seo bulapeli bwa niti bu luta ka za kalulo ya Jesu sina Muliululi?

◻ Ki kabakalañi Bakreste ha ba swanela ku ikauhanya kwa lifasi ni ku sebelisa lilato le li si na buitati?

◻ Ki kalulo mañi yeo ku fa bupaki ka za Mubuso ku na ni yona mwa bulapeli bo bu nepahezi?

[Siswaniso se si fa likepe 16]

Kolobezo ki muhato wa butokwa hahulu mwa ku amuhela buikalabelo bwa bulapeli bwa niti. Ka kweli ni kweli, batu ba ba bat’o ba 25,000 mwa lifasi kamukana b’a nga muhato w’o

Russia

Senegal

Papua New Guinea

U.S.A.

[Siswaniso se si fa likepe 17]

Ku abana niti ya Bibele ni ba bañwi ki kalulo ya bulapeli bwa niti

U.S.A.

Brazil

U.S.A.

Hong Kong