Jehova u Lata Bafani ba ba Tabile

“Mutu ni mutu a zwise mw’a hupulezi mwa pilu ya hae, isi ka ku bilaela, kamba ka ku hapelezwa; kakuli Mulimu u lata ya fana a tabile.”—2 MAKORINTE 9:7.

 1. Mulimu ni Kreste ba bile bafani ba ba tabile kamukwaufi?

JEHOVA n’a li mufani wa pili ya tabile. Na file bupilo ku Mwan’a hae wa libanda ka tabo mi na itusisize yena mwa ku tahisa ku ba teñi kwa mangeloi ni mufuta wa mutu. (Liproverbia 8:30, 31; Makolose 1:13-17) Mulimu u lu file bupilo ni puyelo ni lika kaufela, ku kopanyeleza cwalo ni pula ku zwa kwa lihalimu ni linako za kutulo, ka ku taza lipilu za luna ka tabo. (Likezo 14:17; 17:25) Ka buniti luli, Mulimu ni Mwan’a hae, Jesu Kreste, ki bafani ba ba tabile. Ba fa ba na ni nyakalalo ka moya o si na buitati. Jehova u latile lifasi la mufuta wa mutu hahulu kuli mane “u li file Mwan’a hae wa libanda, kuli mutu ufi kamba ufi ya lumela ku yena a si ke a shwa, kono a be ni bupilo bo bu sa feli.” Mi Jesu ka ku sa bilaela na ‘fanile moyo wa hae ku ba tiululo ya ba bañata.’—Joani 3:16; Mateu 20:28.

 2. Ka ku ya Paulusi, Mulimu u lata mufani ya cwañi?

² Kamukwaocwalo, batanga ba Mulimu ni Kreste, ba swanela ku ba bafani ba ba tabile. Ku fana ko ku cwalo ne ku susuelizwe mwa liñolo la bubeli la muapositola Paulusi le ne li ya kwa Bakreste ba mwa Korinte, le ne li ñozwi ibat’o ba ka 55 C.E. Ka mo ku bonahalela ka ku ama kwa linubu za mali za ka ku itatela ni za kwa mukunda ze ne li ezizwe sihulu ili ku tusa Bakreste ba ne ba li mwa butokwi ba mwa Jerusalema ni Judea, Paulusi na bulezi kuli: “Mutu ni mutu a zwise mw’a hupulezi mwa pilu ya hae, isi ka ku bilaela, kamba ka ku hapelezwa; kakuli Mulimu u lata ya fana a tabile.” (2 Makorinte 9:7; Maroma 15:26; 1 Makorinte 16:1, 2; Magalata 2:10) Batu ba Mulimu b’a ngile muhato mañi kwa linako za ku fana? Mi ki sikamañi se lu kona ku ituta ku zwelela kwa kelezo ya Paulusi ya ku fana?

Ku Susuezwa ki Lipilu ze Itatela

 3. Ki ku fita fa sipimo sifi seo Maisilaele ne ba file kemelo kwa muyaho wa tabernakele wa bulapeli bwa Jehova?

³ Lipilu ze itatela li susueza batu ba Mulimu ku ifana ili bona ka sibili ni liitusiso za bona mwa ku fa kemelo kwa mulelo wa bumulimu. Sina ka mutala, Maisilaele ba mwa lizazi la Mushe ka nyakalalo ne ba file kemelo kwa muyaho wa tabernakele wa bulapeli bwa Jehova. Lipilu za basali ba bañwi ne li ba susuelize ku ota bulizi bwa lipuli, hailif’o banna ba bañwi ne ba sebelize sina babeleki ba za mazoho. Batu ka tabo ne ba file gauda, silivera, likota, line, ni lika ze ñwi sina ‘nubu ku Jehova’ ya ka ku itatela. (Exoda 35:4-35) Ne ba bile ni sishemo hahulu kuli liyahiso ze ne zwisizwe “ne li se li likani; ni ku siyala ne ku ka siyala ze ñata.”—Exoda 36:4-7.

 4. Davida ni ba bañwi ne ba zwisize nubu kwa tempele ka mubonelo mañi?

⁴ Hamulaho wa lilimo ze miyanda-nda, Mulena Davida na file nubu ye tuna kwa tempele ya Jehova ili ye n’e ka yahiwa ki mwan’a hae Salumoni. Bakeñisa kuli Davida ‘na fumana munyaka mwa ndu ya Mulimu,’ na file “liluwo . . . la ka tota” la gauda ni silivera. Linabi, bazamaisi, ni ba bañwi ‘ne ba talize lizoho la bona ka mpo ya ku fa Jehova.’ Mi ki sifi se ne si zwile mwateñi? Ee, “sicaba kiha si tabela bufani bwa ba ba zwisize zeo ka ku lata, kakuli ne ba file [Jehova, NW] ka lipilu za bona kaufela, ka ku lata”! (1 Makolonika 29:3-9) Ne ba li bafani ba ba tabile.

 5. Maisilaele ne ba file kemelo kwa bulapeli bwa niti kamukwaufi ka lilimo ze miyanda-nda?

⁵ Ka lilimo ze miyanda-nda, Maisilaele ne ba filwe tohonolo ya ku fa kemelo kwa tabernakele, litempele za hamulaho, ni lisebelezo za buprisita ni za Bulivi za kona k’o. Sina ka mutala, mwa lizazi la Nehemia Majuda ne ba itamile ku zwisa linubu za ku zwisezapili bulapeli bo bu kenile, ne ba itemuhezi kuli ha ba swaneli ku keshebisa ndu ya Mulimu. (Nehemia 10:32-39) Ka ku swana ni kacenu, Lipaki za Jehova ka nyakalalo ba eza limpo za ku itatela ili za ku yahisa ni ku b’akanya hande libaka za mikopano ni ku fa kemelo kwa bulapeli bwa niti.

 6. Mu fe mitala ya Bakreste ba ba fana ba tabile.

⁶ Bakreste ba makalelo ne ba li bafani ba ba tabile. Sina ka mutala, Gayusi na eza ‘musebezi o sepahala’ ka ku ba ni kamuhelo ku bao ba ne ba li mwa maeto a licisehelo za Mubuso, sina Lipaki za Jehova ha ba fa kamuhelo kwa baokameli ba maeto ili bao cwale ba lumiwa ki Watch Tower Bible and Tract Society. (3 Joani 5-8) Ku tahisa lisinyehelo ze ñwi ku bona mizwale bao ku potela liputeho ni ku ba fa kamuhelo, kono seo ki se si tusa hakalo kwa neku la kwa moya!—Maroma 1:11, 12.

 7. Ba mwa Filipi ne ba itusisize kamukwaufi liitusiso za bona za kwa mubili?

⁷ Liputeho ka nañungelele li itusisize liitusiso za kwa mubili ili ku zusezapili licisehelo za Mubuso. Sina ka mutala, Paulusi na taluselize balumeli ba mwa Filipi kuli: “Mane ha ni li mwa Tesalonika, ne mu ni lumelezi nako ya pili, ni ya bubeli, ze ne ni tokwile. Isikuli ni bata limpo; kono ni bata miselo ye beiwa ki mina ka buñata.” (Mafilipi 4:15-17) Ba mwa Filipi ne ba fanile ka tabo, kono ki mabaka mañi a susueza ku fana ka tabo ko ku cwalo?

Ki Nto Mañi ye Susueza ku Fana ka Tabo?

 8. Ne mu ka bonisa cwañi kuli moya wa Mulimu u susueza batu ba hae ku ba bafani ba ba tabile?

⁸ Moya o kenile, kamba m’ata a sebeza a Jehova, a susueza batu ku ba bafani ba ba tabile. Muta Bakreste ba mwa Judea ne ba li mwa butokwi, moya wa Mulimu ne u susuelize balumeli ba bañwi ku ba tusa ka za kwa mubili. Ku tusa Bakreste ba mwa Korinte ku eza ka mo ba konela kaufela mwa ku fa linubu ze cwalo, Paulusi na hohezi teñi mutala wa liputeho ze mwa Masedonia. Nihaike kuli balumeli ba mwa Masedonia ne ba talimani ni nyandiso ni bubotana, ne ba bonisize lilato la sizwale ka ku fana ko ku fita buikoneli bwa bona. Mane ki be ne ba kupile tohonolo ya ku fana! (2 Makorinte 8:1-5) Mulelo wa Mulimu haki o itingile ka butuna fa linubu za sifumu. (Jakobo 2:5) Batanga ba hae ba ba ineezi ili ba ba botanile kwa mubili se ba bile bona ba ba fa kemelo ye tiile ya za mali mwa ku zwisezapili musebezi wa ku kutaza Mubuso. (Mateu 24:14) Niteñi, haki ba ba nyanda kabakala sishemo sa bona, kakuli Mulimu haki ya palelwa ku fumanela batu ba hae butokwi bwa bona mwa musebezi wo, mi m’ata a li teñi a ku zwelapili ni ku ekezeha ki moya wa hae.

 9. Tumelo, zibo, ni lilato li swalisani kamukwaufi mwa ku fana ka ku taba?

⁹ Ku fana ka ku taba ku susuezwa ki tumelo, zibo, ni lilato. Paulusi na bulezi kuli: “Mihe, sina [Makorinte] ha mu atezwi ki ze ñwi kaufela, ili tumelo, ni ku bulela, ni zibo, ni ku ikataza kaufela, ni lilato le mu lu lata ka lona, ni li, mu atelwe ni ki za musebezi wo wa sishemo. Ha ni buleli ze ku mi laela; kono ilikuli, ka ku ikataza kwa ba bañwi, ni like niti ya lilato la mina.” (2 Makorinte 8:7, 8) Ku zwisa nubu kwa musebezi wa Jehova, sihulu muta mufani a na ni liitusiso ze nyinyani, ku tokwa ku ba ni tumelo mwa litukiso za kwapili za Mulimu. Bakreste ba ba na ni zibo ye ñata ba bata ku sebeleza fa mulelo wa Jehova, mi bao ba ba atezwi ki lilato la ku mu lata ni ku lata batu ba hae ka nyakalalo ba itusisa liitusiso za bona ku zwisezapili musebezi wa hae.

10. Ki kabakalañi ha ku konwa ku bulelwa kuli mutala wa Jesu u susueza Bakreste ku fana ka nyakalalo?

¹⁰ Mutala wa Jesu u susueza Bakreste ku fana ka tabo. Hamulaho wa ku susueza ba mwa Korinte ku fana ka lilato, Paulusi na bulezi kuli: “Kakuli mu ziba sishemo sa Mulen’a luna Jesu Kreste, kuli niha n’a fumile, u ikezize mubotana kabakala mina, kuli mu fume ka bubotana bwa hae.” (2 Makorinte 8:9) Niha na li mufumi mwa lihalimu ku fita mwan’a Mulimu ufi ni ufi, Jesu a itoboha ku sa na li sona mi a ikungela bupilo bwa mutu wa lifasi. (Mafilipi 2:5-8) Ka ku fita fa ku ba mubotana ka nzila yeo ye si na buitati, nihakulicwalo, Jesu na ekelize kwa ku kanyiswa kwa libizo la Jehova mi na file bupilo bwa hae sina sitabelo sa tiululo ilikuli batu ba fumane tuso bao ba ne ba ka si amuhela. Ka ku swalisana ni mutala wa Jesu, kana ha lu swaneli ku fana ka nyakalalo ku tusa ba bañwi ni ku ekezeha kwa ku kanyiswa kwa libizo la Jehova?

11, 12. Ku itukiseza hande ku kona ku lu eza bafani ba ba tabile kamukwaufi?

¹¹ Ku itukiseza hande ku tahisa kuli ku fana ka tabo ku konahale. Paulusi na taluselize ba mwa Korinte kuli: “Ka lizazi la pili la sunda, mutu ni mutu ku mina a beye kwatuko ku yena, s’a kopanyize, ka tikanyo ya s’a filwe; kuli likoleko li si ke za ezwa ha ni taha.” (1 Makorinte 16:1, 2) Ka nzila ye swana ya kwa mukunda ni ka ku itatela, bao ba ba tabela ku eza limpo za ku zwisezapili musebezi wa Mubuso kacenu ne ba ka eza hande ku beya kwatuko se siñwi sa tuelo ya bona ka ona mulelo wo. Kabakala ku itukiseza hande cwalo, Lipaki ka buñwi, mabasi, ni liputeho ba kona ku eza limpo za ku zusezapili bulapeli bwa niti.

¹² Ku taleleza litukiso za ku zwisa linubu ku ka lu fa tabo. Jesu na bulezi kuli, “ku na ni mbuyoti mwa ku fana, ye fita ye mwa ku fiwa.” (Likezo 20:35) Kacwalo ba mwa Korinte ne ba kona ku ekeza tabo ya bona ka ku latelela kelezo ya Paulusi ya ku zwisezapili tukiso ya bona ya kale ya ka silimo ni silimo ya ku lumela linubu kwa Jerusalema. “Mutu u lumelelwa ka s’a sweli, isi ka s’a tokwile,” k’o na mwa na taluselize. Muta mutu a fa linubu ka ku ya ka sa na ni sona, li swanela k’u ngiwa ka butuna. Haiba lu na ni sepo ku Mulimu, w’a kona ku likanyeleleza lika ilikuli bao ba ba na ni ze ñata ba be ni sishemo, isi ku ba ni businyi, mi bao ba ba na ni ze likani fela ba si ke ba ba ni bupalelwi bo bu kusufaza m’ata ni buikoneli bwa ku mu sebeleza.—2 Makorinte 8:10-15.

Ku Sebelisa ka Tokomelo ku Fana

13. Ki kabakalañi ba mwa Korinte ha ne ba na ni buikolwiso mwa ketelelo ya Paulusi mwa linubu?

¹³ Nihaili kuli Paulusi na etelezi tukiso ya linubu ilikuli balumeli ba ba li mwa butokwi ba kone ku ikola kimululo ya lika za kwa mubili ni ku ikenya ka m’ata mwa musebezi wa ku kutaza, ne ku si na mutu nihaili yena kamba yo muñwi ya n’a ngile kwa linubu zeo ku yo sebelisa ku ili bona. (2 Makorinte 8:16-24; 12:17, 18) Paulusi na sebelize ili ku taleleza butokwi bwa hae bwa kwa mubili ku fita ku lwesa mulwalo wa za mali fa puteho ifi ni ifi. (1 Makorinte 4:12; 2 Matesalonika 3:8) Ka ku tisa linubu ku yena, kacwalo, ba mwa Korinte ne ba li fa ku mutang’a Mulimu ya sepahala, ili ya sebeza t’ata.

14. Ka za ku itusiswa kwa linubu, ki bupaki bufi bo i na ni yona Watch Tower Society?

¹⁴ Haisali ku zwiwa fo ne i ñoliselizwe Watch Tower Bible and Tract Society ka mulao ka 1884, bafani ba linubu se ba bile ni bupaki bwa kuli ki ye sebelisa ka busepahali limpo kaufela ze i filwe kwa neku la musebezi wa Mubuso wa Jehova. Ka ku ya ka tumelelano ya yona ni mulonga, Sosaiti i lika ku taleleza butokwi bo butuna ka ku fitisisa bwa batu kaufela, butokwi bwa lika za kwa moya. Seo si ezwa ka libuka ze tomile fa Bibele ni ka taelo ka mo ku fumanelwa puluso. Kacenu, Jehova u sweli ku akufisa ku kubukanywa kwa batu ba ba swana sina lingu mwa kopano ya hae ye sweli ku yanduluka, mi ku fuyaula kwa hae bakeñisa ku itusisa ka butali limpo mwa musebezi wa ku kutaza Mubuso ki bupaki bo bu utwahala bwa tumelezo ya bumulimu. (Isaya 60:8, 22) Lu ba ba ikolwisa kuli u k’a zwelapili ku susueza lipilu za bafani ba ba tabile.

15. Ki kabakalañi yona magazini ye ka linako ze ñwi ha i bulela ka za linubu?

¹⁵ Sosaiti ka linako ze ñwi i itusisanga ona mibamba ya magazini ye mwa ku lemusa babali ba yona ka za tohonolo ya bona ya ku eza linubu za ku itatela kwa musebezi wa ku kutaza Mubuso mwa lifasi kamukana. Yeo haki kupo ya tuso, kono ki kupuliso ku bao ba ba lakaza ku fa kemelo kwa ‘musebezi o kenile wa evangeli’ sina Mulimu ha nz’a ba kondiseza lika. (Maroma 15:16; 3 Joani 2) Sosaiti i itusisa mali kaufela a filwe ka nzila ya pabalelo ye tuna ili ku zibahaza libizo la Jehova ni Mubuso. Linubu kaufela li amuhelwa ka buitumelo, ni manzwi a buitebuho, mi li itusiswa kwa ku hasanya taba ye nde ya Mubuso wa Mulimu. Sina ka mutala, ka zona lituso zeo misebezi ya balumiwa ya petiwa mwa linaha ze ñata, ni miyaho ya ku hatiseza ya butokwa mwa ku hasanya zibo ye fumanwa mwa Bibele ya b’akanyiwa hande ni ku ekeziwa. Fahalimu a seo, linubu za kwa musebezi wa lifasi kamukana ki ze itusiswa kwa ku kwahela lisinyehelo ze tuna ze mwa ku hatiswa kwa Libibele ni lihatiso ze swalisani ni Bibele hamohocwalo ni makaseti a mulumo ni makaseti a maswaniso. Ka zona linzila zeo licisehelo za Mubuso za zwisezwapili ki bafani ba ba tabile.

Isi ka ku Hapelezwa

16. Nihaike kuli ki b’a sikai fela ba Lipaki za Jehova ba ba fumile kwa lika za kwa mubili, ki kabakalañi linubu za bona ha li itebuhiwa?

¹⁶ Ki Lipaki za Jehova b’a sikai fela ba ba fumile ku za kwa mubili. Nihaike kuli ne ba kana ba fana likalulo-nyana kwa ku zusezapili licisehelo za Mubuso, nihakulicwalo limpo za bona ki za butokwa. Muta Jesu na boni mbelwa ya shebile a nepela mapeni a mabeli mwa likwati la ku beya mali kwa tempele, na bulezi kuli: “Kaniti ni li ku mina, musali yo wa mbelwa, ya shebile, u zwisize ku fita ba bañwi kaufela. Kakuli bao kaufela [bazwisi ba linubu ba bañwi] ha ba zwisize linubu, ba ngile ku ze ba sa tokwi; kanti yena u file ku za bubotana bwa hae, s’a n’a ka pila ka sona kaufela.” (Luka 21:1-4) Nihaike kuli mpo ya hae ne ili ye nyinyani, n’a li mufani ya tabile—mi nubu ya hae ne i itebuhilwe.

17, 18. Ki ifi kutwisiso ya manzwi a Paulusi kwa 2 Makorinte 9:7, mi linzwi la Sigerike le li itusisizwe la ya “tabile” li bonisa nto mañi?

¹⁷ Ka ku ama kwa musebezi o imulula kwa neku la Bakreste ba mwa Judea, Paulusi na bulezi kuli: “Mutu ni mutu a zwise mw’a hupulezi mwa pilu ya hae, isi ka ku bilaela, kamba ka ku hapelezwa; kakuli Mulimu u lata ya fana a tabile.” (2 Makorinte 9:7) Ku bonahala kuli muapositola na ama kwa kalulo ye fumanwa kwa Liproverbia 22:8 mwa toloko ya Septuagint, ili ye talusa kuli: “Mulimu u fuyaula mufani ya tabile; mi u ka mu fumanela za palelwa mwa misebezi ya hae.” (The Septuagint Bible, ye tolokilwe ki Charles Thomson) Paulusi u itusisa ya “lata” mwa sibaka sa ku “fuyaula,” kono ku na ni ku swalisana, kakuli ku fumana limbuyoti ku ba teñi ka ku lata kwa Mulimu.

¹⁸ Mufani ya tabile kaniti luli ki ya wabelelwa mwa ku fana. Ee, ku zwelela kwa mubulelelo o itusisizwe wa Sigerike wa ya “tabile” o kwa 2 Makorinte 9:7 ku taha linzwi la “mangwelula”! Hamulaho wa ku talusa seo, c’aziba R. C. H. Lenski na bulezi kuli: “Mulimu u lata mufani ya bunolo, ya nyakalala, ya wabelelwa . . . [ili y’o] tumelo ya hae i talizwe ka lumenyo muta a ba ni tohonolo ye ñwi ya ku fana.” Mutu ya na ni moya o cwalo wa nyakalalo haki ya fana ka pilaelo kamba ka ku hapelezwa kono ki ka ku zwelela kwa pilu ha fana. Kana mu ba ba tabile cwalo ka za ku fa kemelo kwa licisehelo za Mubuso?

19. Bakreste ba makalelo ne ba eza linubu kamukwaufi?

¹⁹ Bakreste ba makalelo ne ba sa zamayi ni mikeke kamba ku eza mukwa wa ku fa nubu ka ku zwisa kalulo ya bulishumi kwa tuelo ya bona ili ku fa kwa litukiso za bulapeli. Ka ku fapahana, linubu za bona ne li za ka ku itatela. Tertullian, ili y’o na fitile fa ku ba Mukreste ibat’o ba ka 190 C.E., na ñozi kuli: “Nihaike kuli ne lu na ni likwati la ku beya mali, ne li si ka ezwa ka mulelo wa ku leka puluso ka mali, sina teko ya bulapeli. Ka lizazi le liñwi kweli ni kweli [ka mo ku bonahalela ne i li hañwi ka kweli ni kweli], ili f’o mutu kaufela ya tabela, na kona ku beya mpo-nyana; kono ki haiba fela a fumana munyaka, mi a kona ku eza cwalo; kakuli ha ku na hapelezo; kaufel’a zona ki ka ku itatela.”—Apology, Kauhanyo XXXIX.

20, 21. (a) Musulo wa magazini ye wa kwamulaho ne u bulezi nto mañi ka za tohonolo ya ku fa kemelo ya za mali kwa musebezi wa Mulimu, mi seo si sebeza kamukwaufi nihaiba cwale? (b) Ki sikamañi se si ezahala ha lu kuteka Jehova ka maluwo a luna?

²⁰ Ku fana kwa ku itatela kamita se ku bile ona muinelo mwahal’a batanga ba mwa lizazi la cwale ba Jehova. Ka linako ze ñwi, nihakulicwalo, ba bañwi ha ba si k’a nga muhato o tezi kwa tohonolo ya bona ya ku fa kemelo kwa musebezi wa Mulimu ka ku fa linubu. Sina ka mutala, mwa February 1883, yona magazini ye ne i bulezi kuli: “Ba bañwi ba lwezi hahulu buima bwa za mali kabakala ba bañwi, kuli mane m’ata a bona a ku fana tuso ya za mali a fokola ka ku sebeza hahulu ni ku katala hahulu, mi kacwalo tuso ya bona ya pongana; mi haki cwalo fela, kono bao ba . . . ba si ka talimana kale ni muinelo ka ku tala, se ba palezwi ku fumana limbuyoti kabakala ku tokwa sishemo kwa neku la seo.”

²¹ Sina buñata bo butuna ha ba selehanela mwa kopano ya Jehova kacenu, mi sina musebezi wa Mulimu ha u zwelapili mwa Kalulo ya Yurope ya kwa Upa ni linaha ze ñwi ili mo pili ne u haniswa, ku ba ni tokwahalo ye ekezeha ya ku yandulula libaka za ku hatiseza ni miyaho ye miñwi. Libibele ze ñata ni lihatiso ze ñwi li lukela ku hatiswa. Miyaho ye miñata ya teokratiki i sweli ya yahiwa; nihakulicwalo, ye miñwi neikana ya zwelapili kapili-pili kambe ku na ni linubu ze likani. Ka mo ku inezi fela, lu na ni tumelo ya kuli Mulimu u ka fumanela kaufela se si ka tokwahala, mi lwa ziba kuli bao ‘ba ba kuteka Jehova ka maluwo a bona’ ba ka fuyaulwa. (Liproverbia 3:9, 10) Ka niti luli, “ya cala hahulu u ka kutula hahulu.” Jehova u ka ‘lu shemuba ka sishemo kaufela,’ mi ku fana kwa luna lu tabile ku ka tahisa ba bañata ku itumela ni ku mu lumbeka.—2 Makorinte 9:6-14.

Mu Bonise Buitumelo Bwa Mina kwa Limpo za Mulimu

22, 23. (a) Ki ifi mpo ya Mulimu ya fela ye sa konwi ku taluswa? (b) Bakeñisa kuli lwa itebuha limpo za Jehova, ki sikamañi se lu swanela ku eza?

²² Ka ku susuezwa ki buitumelo bo butungile, Paulusi yena ka sibili na bulezi kuli: “Ku iswe buitumelo ku Mulimu ka mpo ya hae ye sa konwi ku taluswa.” (2 Makorinte 9:15) Sina “sitabelo se si lifa” libi za Bakreste ba ba tozizwe ni za bao ba lifasi kamukana, Jesu ki mutomo ni nzila ya mpo ya fela ye sa konwi ku taluswa ya Jehova. (1 Joani 2:1, 2) Mpo yeo ki “sishemo sa Mulimu” ili sa bonisize kwa batu ba hae fa lifasi-mubu ka Jesu Kreste, mi ki se si tezi ka za puluso ya bona ni ka za ku kanyiswa ni ku zibahazwa kwa Jehova.—2 Makorinte 9:14.

²³ Buitumelo bwa luna bo butungile bu liba ku Jehova kabakala mpo ya fela ye sa konwi ku taluswa mi hape ni limpo ze ñwi ze ñata za lika za kwa moya ni limpo za lika za kwa mubili kwa batu ba hae. Ee, bunde bwa Ndat’a luna wa kwa lihalimu kwa neku la luna ki bo bu komokisa hahulu kuli bu fita poniso ya m’ata a butu! Mi ka niti luli bu swanela ku lu susueza ku ba bafani ba ba tabile. Ka buitebuho bo bu zwelela kwa pilu, cwale, haike lu eze ka mo lu konela kaufela ku zwisezapili musebezi wa Mulimu ya sishemo, Jehova, Mufani ya tabile wa pili ni yo mutuna ka ku fitisisa!

Kana Mwa Hupula?

◻ Lipilu ze itatela li susuelize batu ba Jehova ku eza nto mañi?

◻ Ki sikamañi se si susueza ku fana ka tabo?

◻ Watch Tower Society i itusisa cwañi linubu kaufela ze i amuhela?

◻ Mulimu u lata mufani ya cwañi, mi lu swanela ku bonisa kamukwaufi buitumelo bwa luna kwa limpo ze ñata za Hae?