Mutala o’ Buyelezwi wa Musebezi wa Bulumiwa Bwa Sikreste

“Mu be ba ba ni likanyisa, sina na, ha ni li ya likanyisa Kreste.”—1 MAKORINTE 11:1.

 1. Ki linzila mañi ze ñwi ka zeo Jesu n’a siile mutala o’ zwile mubano ili w’o balutiwa ba hae ba kona ku latelela? (Mafilipi 2:5-9)

KI MUTALA o zwile mubano hakalo w’o Jesu n’a siyezi balutiwa ba hae! N’a siile kanya ya hae ya mwa lihalimu ka ku tabela mi a shetumukela fa lifasi-mubu ni ku t’o pila mwahal’a batu ba baezalibi. N’a itatezi ku fita mwa manyando a matuna kwa neku la ku puluswa kwa mufuta wa mutu mi, ka butokwa ni ku fita, kwa neku la ku keniswa kwa libizo la Ndat’ahe wa kwa lihalimu. (Joani 3:16; 17:4) Ha n’a zekisiwa mwa muzeko o n’o ka mu tahiseza lifu, Jesu ka ku tiya n’a zibahalize kuli: “Ki sona se ni pepezwi, ni se ni tezi mwa lifasi: kuli ni t’o paka niti.”—Joani 18:37.

 2. Ki kabakalañi Jesu ya n’a zuhile kwa bafu ha n’a kona ku laela balutiwa ba hae ku zwisezapili musebezi wa n’a kalisize?

² Pili a si ka shwa kale, Jesu n’a twaelize hande balutiwa ba hae ilikuli ba kone ku zwisezapili musebezi wa ku fa bupaki ka za niti ya Mubuso. (Mateu 10:5-23; Luka 10:1-16) Kacwalo, hamulaho wa ku zuha kwa hae, Jesu n’a kona ku fa taelo ye li: “Mu ye . . . mu lute macaba kaufela, mu ba kolobeze ka Libizo la Ndate, ni la Mwana, ni la Moya o Kenile; Mu ba lute ku mamela ze ni mi laezi kaufela.”—Mateu 28:19, 20.

 3. Musebezi wa ku tahisa balutiwa ne u ekezehile cwañi, kono ki mwa libaka lifi m’o ne u eziwa hahulu ka butuna?

³ Ka lilimo ze talu ni licika ze ne li tatami, balutiwa ba Jesu ne ba ipeile ku utwa taelo yeo kono ne ba ciñekelize musebezi wa bona wa ku tahisa balutiwa kwa Majuda fela, maproselite ba Sijuda, ni Masamaria ba ne ba ile kwa mupato. Cwale, ka 36 C.E., Mulimu a fa ketelelo ya kuli taba ye nde i kutaziwe ku munna ya si ka ya kwa mupato, Kornele, ni b’a ndu ya hae. Mwahal’a lilimo ze lishumi ze ne li tatami, ba bañwi Balicaba ne ba tahisizwe mwa puteho. Nihakulicwalo, buñata bwa musebezi u bonahala kuli ne u ciñekela fala mwa libaka ze kwa upa wa liwate la Mediterranean.—Likezo 10:24, 44-48; 11:19-21.

 4. Ki likezahalo mañi ze butokwa ze ne li ezahezi i bata i’ba ka 47- 48 C.E.?

⁴ Nto ye ñwi ne i tokwahala ye ne i ka nyangumuna kamba ku konisa Bakreste ku tahisa balutiwa ba Majuda ni Balicaba mwa libaka ze kwahule ni ku fita. Kacwalo, i bata i’ba ka 47-48 C.E., maeluda ba mwa puteho ya mwa Antioke ya mwa Siria ne ba amuhezi lushango lwa bumulimu lo: “Mu ni ketele Barnabasi ni Saule, ba ye kwa musebezi o ni ba bizelize ona.” (Likezo 13:2) Mu lemuhe kuli ka nako yeo Paulusi n’a zibahala ka libizo la hae la makalelo, la Saule. Mu lemuhe, hape, kuli Mulimu n’a bulezi libizo la Barnabasi fapil’a la Paulusi, mwendi kabakala kuli ka nako yeo Barnabasi n’a bonwa sina yena ya fapili mwahal’a ba babeli bao.

 5. Ki kabakalañi taba ya musipili wa bulumiwa wa Paulusi ni Barnabasi ha i li ya butokwa bo butuna kwa Bakeste kacenu?

⁵ Litaba ze tungile ka za musipili wa bulumiwa wa Paulusi ni Barnabasi ki ze fa susuezo ye tuna kwa Lipaki za Jehova, sihulu kwa balumiwa ni mapaina ba ba zwile mwa libaka za habo bona ku y’o sebeleza Mulimu mwa maino a sili. Fahalimu a seo, lundululo ya Likezo likauhanyo 13 ni 14 kaniti i ka nyangumuna ba bañata hape ku likanyisa Paulusi ni Barnabasi ni ku ekeza kabelo ya bona mwa musebezi o’ butokwa ka ku fitisisa wa ku tahisa balutiwa.

Sooli sa Sipera

 6. Ki mutala ufi w’o balumiwa ne ba tomile mwa Sipera?

⁶ Ku si na tiyeho balumiwa ba f’ula ku zwa mwa likamba la Selusia la mwa Siria ku liba kwa sooli sa Sipera. Hamulaho wa ku fita mwa Salamisi, ne ba si ka yaululwa kono “ba bulela Linzwi la Mulimu mwa masinagoge a Majuda.” Ka ku latelela mutala wa Kreste, ne ba si ka ikolwisa ka ku ina fela mwa muleneñi w’o ni ku litela batu ba fa sooli seo ku taha ku bona. Mwa sibaka sa ku eza cwalo, ne “ba zamaile mwa sooli” kamukana ba sebeza. Ku si na ku kakanya seo ne si ama ku zamaya hahulu ni ku cinca maino hañata-ñata, bakeñisa kuli Sipera ki sooli se situna, mi musipili wa bona ne u ba isize mwa butelele bwa kalulo ya sona ye tuna ka ku fitisisa.—Likezo 13:5, 6.

 7. (a) Ki kezahalo mañi ye zwile mubano ye ne i ezahalile mwa Pafosi? (b) Taba yeo i lu susueza ku ba ni mubonelo mañi?

⁷ Kwa mafelelezo a ku ina m’o kwa bona, banna ba babeli bao ne ba fuy’ozwi ka se ne si bonwi se si makalisa mwa muleneñi wa Pafosi. Mubusisi wa sooli seo, Sergiusi Paulusi, a teeleza kwa lushango lwa bona mi “a lumela.” (Likezo 13:7, 12) Paulusi hamulaho n’a ñozi kuli: “Banabahesu, mu lemuhe ku bizwa kwa mina, kakuli ku mina ba ba na ni butali ka mukwa wa batu, ha ba yo ba bañata; ba ba mata, ha ba yo ba bañata; ba lusika lwa bulena, ha ba yo ba bañata.” (1 Makorinte 1:26) Nihakulicwalo, mwahal’a ba ba m’ata ba ne b’a ngile muhato ne li Sergiusi Paulusi. Sona se si bonwi seo si swanela ku susueza luna kaufela, sihulu balumiwa, ku ba ni mubonelo o’ tiile ka za ku fa bupaki kwa makwambuyu ba mulonga, mane sina ha lu susuezwa ku eza cwalo kwa 1 Timotea 2:1-4. Banna ba ba na ni m’ata a tamaiso ka linako ze ñwi se ba file tuso ye tuna kwa batanga ba Mulimu.—Nehemia 2:4-8.

 8. (a) Ki ku cinca kufi kwa swalisano ya mwahal’a Barnabasi ni Paulusi ye bonahala ku zwelela onafo? (b) Ki ka nzila ifi Barnabasi n’a li mutala o munde?

⁸ Mwatas’a susuezo ya moya wa Jehova, Paulusi n’a petile kalulo ye tuna ni ku fita mwa ku lumela kwa Sergiusi Paulusi. (Likezo 13:8-12) Hape, ku zwelela onaf’o, ku bonahala kuli Paulusi n’a ngile ketelelo. (Mu bapanye Likezo 13:7 ni Likezo 13:15, 16, 43.) Seo ne si lumelelana ni musebezi wa bumulimu wa n’a filwe Paulusi ka nako ya n’a bile mulumeli. (Likezo 9:15) Mwendi muinelo o cwalo ne u beile buikokobezo bwa Barnabasi mwa tiko. Niteñi, mwa sibaka sa k’u nga cinceho yeo sina kezo ya ku nyemisa mutu ka butu, Barnabasi ka mo ku kana kwa bela fela n’a ezize sina ka taluso ya libizo la hae, ya kuli “Mwan’a ku Omba-omba,” ni ku zwelapili ku yemela Paulusi ka ku sepahala mwahal’a musipili kamukana wa bulumiwa mi ni hamulaho muta Bakreste ba bañwi ba Sijuda ne ba hanyelize bukombwa bwa bona ku Balicaba ba ne ba si ka ya kwa mupato. (Likezo 15:1, 2) Seo ki mutala o munde hakalo ku luna kaufela, ku kopanyeleza cwalo ni ku ba ba pila mwa mahae a balumiwa ni a Betele! Lu swanela ku itatela kamita ku amuhela licinceho za teokratiki ni ku fa kemelo ya luna ye tezi ku bao ba ba ketilwe k’u nga ketelelo mwahal’a luna.—Maheberu 13:17.

Sibaka se si Lumbile sa mwa Asia Minor

 9. Ki sifi se lu ituta kwa ku itatela kwa Paulusi ni Barnabasi ku zamaya ku yo fita kwa Antioke wa mwa Pisidia?

⁹ Ku zwa mwa Sipera, Paulusi ni Barnabasi ba f’ula ku liba mutulo kwa nahatuna ya Asia. Ka libaka le liñwi le li si ka taluswa, balumiwa bao ne ba si ka ina mwa silalo sa kwa likamba kono ne ba tamile musipili o mutelele ili o’ lubeta o’ bata i’ba o’ eza likilomita ze 180 ku liba kwa Antioke wa mwa Pisidia, ye fumaneha fa sibaka se si lumbile sa fahal’a Asia Minor. Seo ne si ama ku pahama nzila ye mwahal’a malundu ni ku shetumukela mwa libala le li bata i’ba limita ze 1,100 fahalimu a avereji ya bupahamo bwa mezi a liwate. C’aziba wa litaba za Bibele J. S. Howson u bulela kuli: “Mikwa ya ku tokwa mulao ni bulengwami bwa bayahi ba malundu ao a n’a kauhanya sibaka se si lumbile . . . ku zwa kwa mabala a likamba la kwa mboela, ne i ile nkuwa mwa likalulo kaufela za litaba za kwaikale.” Fahalimu a seo, balumiwa ne ba talimani ni lubeta lwa kozi ye zwelela kwa lika za ka taho. “Ha ku na sikiliti mwa Asia Minor,” ki mw’a ekeleza Howson, “se si zibahala ka ku ipitela ka ‘miunda ya mezi’ ya sona ku fita mo si zibahalela silalo sa malundu sa Pisidia, k’o linuka li punya kwat’asa minanga ya zona, kamba ku ipubela fela ka mikokolombwa ye tungile ili ye kumbami.” Zona litaba ze tungile zeo li tusa ku lu bonisa mufuta wa misipili yeo balumiwa ne ba itatela ku tama kwa neku la ku yandulula taba ye nde. (2 Makorinte 11:26) Ka ku swana kacenu, ba bañata ba batanga ba Jehova b’a ndumeba mwahal’a mikwalelo ya mifuta ye fapahana-fapahana ilikuli ba fite kwa batu ni ku abana taba ye nde ni bona.

10, 11. (a) Paulusi n’a landalalile cwañi mwa mutomo wa kutwisiso ye lumelelana ni ya bateelezi ba hae? (b) Ki kabakalañi Majuda ba bañata ka mo ku kana ku bezi ha ne ba komokile ka za manyando a Mesiya? (c) Ki mufuta mañi wa ku piliswa w’o Paulusi n’a beile fapil’a bateelezi ba hae?

¹⁰ Bakeñisa kuli ne ku na ni sinagoge ya Majuda mwa Antioke wa mwa Pisidia, balumiwa ne ba ile k’o pili ili ku fa sibaka sa ku amuhela taba ye nde ku bao ba ne ba ziba se siñwi ka ku fitisisa ka za Linzwi la Mulimu. Ha ba memilwe ku bulela, Paulusi a yema mi a fa ngambolo ya buc’aziba luli. Mwahal’a ngambolo yeo kaufela, n’a kumalezi kwa mutomo wa kutwisiso ye lumelelana ni ya Majuda ni maproselite ba ne ba mu teeleza. (Likezo 13:13-16, 26) Hamulaho wa mukalisezo wa hae, Paulusi a lundulula litaba za kwamulaho za Majuda, ku ba hupulisa kuli Jehova n’a ketile bokukululu ba bona ni ku ba lukulula mwa Egepita, hamohocwalo ni mwa n’a ba tuselize ku tula bayahi ba Naha ya Sepiso. Mi cwale Paulusi a koñomeka ku sebelisana kwa Jehova ni Davida. Litaba ze cwalo ne li nahanisiswa hahulu ki Majuda ba mwa lilimo za mwanda wa pili kakuli ne ba libelela Mulimu ku tahisa mutu ya simuluha ku Davida sina mupilisi ni mubusi wa ku ya ku ile. Fa sisupo seo, Paulusi ka ku tiya a zibahaza kuli: “Mwa lusika lwa hae [Davida], sina ha n’a sepisize, Mulimu u tahisize Mupilisi wa Isilaele, yena Jesu.”—Likezo 13:17-23.

¹¹ Nihakulicwalo, mufuta wa mupilisi y’o Majuda ne ba libelezi ne li muhali wa limpi ya n’a ka ba lukulula kwa puso ya Maroma ni ku pahamisa sicaba sa Majuda fahalimu a macaba a mañwi kamukana. Kacwalo, ku si na ku kakanya ne ba komokile ku utwa Paulusi a bulela kuli Mesiya n’a filwe ki baeteleli ba bulapeli bwa bona luli kuli a bulaiwe. “Kono Mulimu u mu zusize kwa bafu,” ki mwa n’a zibahazelize Paulusi ka ku tiya. H’a atumela kwa mafelelezo a’ ngambolo ya hae, n’a bonisize baputehi ba ne ba mu teeleza kuli ne ba ka kona ku fumana mufuta wa ku piliswa ko ku makalisa. “Mu zibe . . . kuli,” ki mwa n’a bulelezi, “ka yena, mu bulelelwa swalelo ya libi, Ni kuli mutu ni mutu ya lumela, u fiwa ki yena ku ba ya lukile, mwa litaba kaufela ze ne mu sa koni ku ba ba ba lukile ka mulao wa Mushe.” Paulusi a feleleza ngambolo ya hae ka ku susueza bateelezi ba hae ku s’a itumeleza ku balelwa mwahal’a ba bañata bao Mulimu n’a bulezi cimo kuli ba ka keshebisa yona tukiso ya ku piliswa ka yona ye makalisa hahulu yeo.—Likezo 13:30-41.

12. Ki sifi se ne si zwile mwa ngambolo ya Paulusi, mi seo si swanela ku lu susueza cwañi?

¹² Ki ngambolo ye tomile mwa Mañolo ye ne i filwe hande hakalo! Bateelezi ne b’a ngile cwañi muhato? “Majuda ba bañata ni baproselite ba ba sebeleza Mulimu, ba latelela Paulusi ni Barnabasi.” (Likezo 13:43) Ki taba ye lu susueza hakalo kacenu! Haike ni luna ka ku swana lu eze hande ka mo lu konela kaufela ku tahisa niti ka buanyu, niha lu li mwa bukombwa bwa fa nyangela kamba mwa ku fa maikuto ni mwa lingambolo kwa mikopano ya luna ya puteho.—1 Timotea 4:13-16.

13. Ki kabakalañi balumiwa ha ne ba zwile mwa Antioke wa mwa Pisidia, mi ki puzo mañi ye zuha ka za balutiwa ba banca?

¹³ Ba ba sa z’o tabela ba mwa Antioke wa mwa Pisidia ne ba sa koni ku ipulukela taba ye nde yeo. Kacwalo, “ka la Pumulo le li tatama, munzi u batil’o kopana kamukana, ku utwa litaba za [Jehova, NW].” Mi hañi-hañi lushango lwa yandulukela kwande a muleneñi w’o. Ka mo ne ku bezi fela, “linzwi la [Jehova, NW] la hasana mwa naha yeo kaufela.” (Likezo 13:44, 49) Mwa sibaka sa ku amuhela taba ya niti yeo, Majuda ba ba muna ba fita fa ku kona ku tahisa kuli balumiwa bao ba lelekelwe kwande a muleneñi. (Likezo 13:45, 50) Kana seo ne si amile cwañi balutiwa ba banca? Kana ne ba fitile fa ku zwafisiwa ni ku palelwa ku zwelapili?

14. Ki kabakalañi balwanisi ha ne ba sa koni ku yundisa musebezi w’o balumiwa ne ba kalisize, mi ki sikamañi se lu ituta ku seo?

¹⁴ Ku tokwa, kakuli w’o ne li musebezi wa Mulimu. Hape, balumiwa ne ba tomile mutomo o’ tiile wa tumelo ku Mulena Jesu Kreste ya zuhile kwa bafu. Ka bupaki, hakulicwalo he, balutiwa ba banca ne b’a nga Kreste, isiñi balumiwa, sina yena Mueteleli wa bona. Kacwalo, lu bala kuli “ne ba tezi tabo ni Moya o kenile.” (Likezo 13:52) Ki nto ye susueza hakalo kwa balumiwa ni bañwi ba ba tahisa balutiwa kacenu! Haiba lu eza kalulo ya luna ka ku ikokobeza ni ka tukufalelo, Jehova Mulimu ni Jesu Kreste ba ka fuy’ola bukombwa bwa luna.—1 Makorinte 3:9.

Ikone, Listra, ni Derba

15. Ki muezezo mañi w’o balumiwa ne ba itusisize mwa Ikone, mi ki lifi ze ne li zwile mwateñi?

¹⁵ Paulusi ni Barnabasi cwale ba zamaya likilomita ze bata i’ba ze 140 ku liba kwa mboela-upa kwa muleneñi o’ tatama, wa Ikone. Sabo ya ku saba nyandiso ne i si ka ba tibela ku latelela muezezo o’ swana sina wa mwa Antioke. Ka seo, Bibele i bulela kuli: “Kwa lumela batu ba bañata, kwa Majuda ni kwa Magerike.” (Likezo 14:1) Hape, Majuda ba ne ba si ka amuhela taba ye nde ba tahisa twaniso. Kono balumiwa ba tundamena mi b’a nga nako ye ñatanyana mwa Ikone ba tusa balutiwa ba banca. Cwale, hamulaho wa ku ziba kuli balwanisi ba bona ba Sijuda ne ba li bukaufi ni ku ba pobaula ka macwe, Paulusi ni Barnabasi ka butali ba tobela kwa kalulo ye tatama, ili “Listra ni Derba, ni naha ye bapani.”—Likezo 14:2-6.

16, 17. (a) Ki sifi se ne si ezahezi ku Paulusi mwa Listra? (b) Ku sebelisana kwa Mulimu ni muapositola ne ku amile cwañi mutangana wa kwa Listra?

¹⁶ Ka bundume “ba bulela Evangeli” mwa kalulo yeo ye nca, ye si ka sebelezwa kale. (Likezo 14:7) Muta Majuda ba mwa Antioke wa mwa Pisidia ni Ikone ne ba utwile ka za seo, ba zamaya musipili w’o kaufela ku taha kwa Listra mi ba t’o kukueza likwata ku pobaula Paulusi ka macwe. Ka ku tokwa nako ya ku baleha, Paulusi a pobaulwa ka macwe, kuli mane balwanisi ba hae ne ba ikolwisize kuli n’a shwile. Ba mu hohololela kwande a muleneñi.—Likezo 14:19.

¹⁷ Kana mwa kona ku nahana ka za matomola ao seo ne si tiselize balutiwa ba banca? Kono ka ku komokisa luli, ha ba mu potolohile, Paulusi a yema! Bibele ha i talusi haiba mutangana ya bizwa Timotea n’a li yo muñwi wa balutiwa ba banca bao. Ka buniti fela ku sebelisana kwa Mulimu ni Paulusi ka nako ye ñwi ne ku bile ni ku ama ko ku tungile mwa munahano wa hae wa bwanana. Paulusi n’a ñozi mwa liñolo la hae la bubeli ku Timotea kuli: “U zibile tato ya ka luli, ni mo ni ezezanga, . . . ku nyandiswa ni ku utwiswa butuku ko ne ku ni tahezi kwa Antioke, ni Ikone, ni Listra; mwa manyando ao ni itiisize, mi Mulena u ni lamulezi ku ona kamukana.” (2 Timotea 3:10, 11) I bata i’ba silimo si li siñwi kamba ze peli hamulaho wa ku pobaulwa ka macwe kwa Paulusi, n’a kutezi kwa Listra mi a y’o fumana kuli Timotea ya n’a li yo munyinyani n’a li Mukreste ya fa mutala o munde, ya “n’a pakwa ki balumeli ba ba mwa Listra ni Ikone.” (Likezo 16:1, 2) Kacwalo Paulusi a mu keta sina wa ku zamaya hamoho ni yena. Seo ne si tusize Timotea ku hula mwa ku toma hande kwa moya, mi kwa nalulelule n’a fitile ku ze konisa za ku lumiwa ki Paulusi ku potela liputeho ze fapahana-fapahana. (Mafilipi 2:19, 20; 1 Timotea 1:3) Ka ku swana, kacenu, batanga ba Mulimu ba ba na ni cisehelo ba na ni susuezo ye nde hahulu ku ba banyinyani, ili bao ba bañata ku bona ba hula ku ba batanga ba Mulimu ba ba butokwa hahulu, sina Timotea.

18. (a) Ki sika mañi se ne si ezahezi kwa balumiwa mwa Derba? (b) Ki sibaka sa ku eza sika mañi se ne si kwaluhile ku bona cwale, kono ki nzila mañi ye ne ba ketile?

¹⁸ Kakusasana hamulaho wa ku banduka lifu kwa hae mwa Listra, Paulusi n’a fundukile ni Barnabasi ku ya kwa Derba. Ka nako ye, ne ku si na balwanisi ba ne ba latelezi, mi Bibele i bulela kuli ‘ne ba tahisize balutiwa ba bañata.’ (Likezo 14:20, 21) Ha se ba tomile puteho mwa Derba, Paulusi ni Barnabasi ne ba na ni ku eza katulo ye ñwi. Mukwakwa wa Siroma o zamaiwa ki ba bañata ne u zwelapili ku zwa mwa Derba ku liba kwa Tarese. Ku zwa k’o ne ili fela musipili o mukuswani ku kuta kwa Antioke wa mwa Siria. Mwendi yeo ne li yona nzila ye nde ka ku fitisisa ya ku kuta ka yona, mi balumiwa bao ne ba kana ba ikutwile kuli cwale ne ba lukezi pumulo. Nihakulicwalo, ka ku likanyisa Mulen’a bona, Paulusi ni Barnabasi ba lemuha butokwi bo butuna ni ku fita.—Mareka 6:31-34.

Ku Eza Musebezi wa Mulimu ka ku Tala

19, 20. (a) Jehova n’a fuy’ozi cwañi balumiwa kabakala ku kutela kwa Listra, Ikone, ni Antioke? (b) Ki tuto ifi yeo seo si fa batu ba Jehova kacenu?

¹⁹ Mwa sibaka sa k’u nga nzila yeo ye kuswani ye liba kwa hae, balumiwa ka bundume ba minuha mi ba potela sinca yona mileneñi y’ani m’o bupilo bwa bona ne bu bile mwa kozi. Kana Jehova n’a ba fuy’ozi kabakala ku iyakatwa ko ku si na buitati ka za lingu ze nca k’o? Ee, luli, kakuli taba i bulela kuli ne ba kondisize mwa ku “tiisa lipilu za balutiwa, ni ku ba kutaza kuli ba tundamene mwa tumelo.” Ka ku swanela, ne ba bulelezi balutiwa ba banca bao kuli: “Lu kena mwa mubuso wa Mulimu ka manyando a mañata.” (Likezo 14:21, 22) Paulusi ni Barnabasi hape ne ba ba hupulisize ka za pizo ya bona sina bacalifa mwa Mubuso wa Mulimu. Kacenu, lu swanela ku fa susuezo ye swana kwa balutiwa ba banca. Lw’a kona ku ba tiisa ku tundamena mwa litiko ka ku ba tunumekela tibelelo ya bupilo bo bu sa feli fa lifasi-mubu mwatas’a puso ya ona Mubuso wa Mulimu o swana ka za w’o Paulusi ni Barnabasi ne ba kutalize.

²⁰ Pili ba si ka siya kale muleneñi o muñwi ni o muñwi, Paulusi ni Barnabasi ne ba tusa puteho ya fa sibaka ku swalisana hande ni ku fita. Ka bupaki, ne ba twaeza banna ba ba fitile ku ze konisa ni ku ba keta kuli b’a nge ketelelo. (Likezo 14:23) Ha ku na kakanyo ka za kuli seo ne si tisize kekezeho ye tuna ni ku fita. Ka ku swana kacenu, hamulaho wa ku tusa ba ba si na yeloseli ku zwelapili ku fitela ba kona ku lwala buikalabelo, balumiwa ni ba bañwi, fokuñwi ba funduk’anga ni ku y’o zwelapili mwa musebezi wa bona o munde mwa libaka ze ñwi k’o butokwi bu li bo butuna ni ku fita.

21, 22. (a) Ki sifi se ne si ezahalile hamulaho Paulusi ni Barnabasi se ba felize musipili wa bona wa bulumiwa? (b) Seo si zusa lipuzo mañi?

²¹ Muta balumiwa kwa nalulelule ne ba kutile kwa Antioke wa mwa Siria, ne ba kona ku ikutwa ba ba ikolwisize ka butungi. Ka mo ku inezi fela, taba ya Bibele i bulela kuli ne ba “felelelize” musebezi w’o Mulimu n’a ba file. (Likezo 14:26) Ka ku utwahala, ku talusa kwa ze bonwi za bona kwa “tabisa hahulu balumeli.” (Likezo 15:3) Kono ku cwañi ka za nako ya kwapili? Kana cwale ne ba ka ishumusa ni ku pumula ka ku itinga makata, sina ka mo ku bulelelw’anga? Ku tokwa ni hanyinyani. Hamulaho wa ku potela sitopa se si busa mwa Jerusalema kuli ba fumane katulo fa taba ya kananisano ka za mupato, bubeli bwa bona ba funduka hape mwa misipili ya bulumiwa. Nako ye ne ba ile kwa likalulo ze fapahana. Barnabasi a lwala Joani Mareka mi a ya kwa Sipera, hailif’o Paulusi a fumana wa ku zamaya ni yena yo munca, Silasi, mi ba liba mwa Siria ni Silisia. (Likezo 15:39-41) Ne li mwa musipili wo ha n’a ketile Timotea yo munyinyani ni ku mu lwala.

²² Bibele ha i talusi ze ne li zwile mwa musipili wa bubeli wa Barnabasi. Kono hailii ka za Paulusi, n’a zwezipili mwa kalulo ye nca mi a toma liputeho mwa mileneñi yeo ka bunyinyani i kona ku ba ye ketalizoho—Filipi, Berea, Tesalonika, Korinte, ni Efese. Ki sika mañi se ne si li sinotolo kwa ku kondisa lika ko ku zwile mubano kwa Paulusi? Kana likuka ze swana za sebeza ni kwa Bakreste ba ba tahisa balutiwa kacenu?

Kana Mwa Hupula?

◻ Ki kabakalañi Jesu h’a li mutala o’ zwile mubano wa ku likanyisa?

◻ Barnabasi n’a li mutala ka nzila ifi?

◻ Ki sifi se lu ituta kwa ngambolo ya Paulusi mwa Antioke wa mwa Pisidia?

◻ Paulusi ni Barnabasi ne ba felelelize cwañi musebezi wa bona?

[Siswaniso se si fa likepe 8]

Ku tiyela nyandiso kwa muapositola Paulusi ne ku bile ni ku ama ko ku s’a feli mwa munahano wa mutangana Timotea