Ku Tahisa Munko o Munde wa Zibo ya Mulimu

“Ku isiwe buitumelo ku Mulimu ya lu fa ku tula kamita ka Kreste, ya tahisa ka luna munko wa zibo ya hae, kai ni kai.”—2 MAKORINTE 2:14.

 1. Ki munko mañi o munde o lu buhisana fa, mi tohonolo ya ku u tahisa i swanela ku bonwa kamukwaufi?

KU NUNKELELA-nunkelela! U-m-m-m! Kana mwa utwa munko o munde o munati? Fa ha lu talusi munko o munde wa lipalisa ze tubuzi kono, ka ku fapahana, kwa munko o munde wa swanisezo o zwelela ku ze ñozwi ze nde ka ku fitisisa fa lifasi-mubu. Zona ze ñozwi zeo ha li simuluhi kwa batu-tu fela kono ki sishañata sa lipalisa za swanisezo se si zwelela ku Yena y’o ya bupile hape lipalisa ze kabisa lifasi-mubu. Tohonolo ya ku tahisa ona munko o munde wo wa zibo ya Mulimu ki sifumu se situna. Ee, ki sebelezo ye butokwa hahulu—ye sa fumanehi ku mañi ni mañi, ili ye sa abanwi ki mufuta wa mutu ka nañungelele.

 2. Ki l’ili fo ne ba kalezi balutiwa ba Kreste ku tahisa munko o munde wa swanisezo, mi ki sifi se ne si zwile mwateñi?

² Sona sifumu se si butokwa hahulu seo ne si filwe kwa balutiwa ba Kreste ha ne ba tisizwe mwa sebelezo ye tiile ku Jehova Mulimu fa lizazi la Pentekonta ya silimo sa bu 33 sa Nako ya Luna ye Zibahala. Ka ku tala moya o kenile, ba kalisa ku tahisa munko o munde wa swanisezo, ku “bulela ze tuna za Mulimu.” (Likezo 2:1-4, 11) Ka bona munko o munde wa zibo ya Mulimu ne u ka ya ku ba bañwi, isiñi fela kwa Majuda ba ka sipepo ili ba ba ile kwa mupato kono hape ni ku bamacaba, mishobo, masika, ni lipuo ba ne ba si ka ya kwa mupato. (Likezo 10:34, 35) Balutiwa ba niti ne ba talimile yona sebelezo yeo sina ye butokwa hahulu ku fita sifumu kamukana sa kwa mubili ili seo batu ba ipundekela sona.

 3. Musebezi wa ku tahisa munko o munde wa zibo ya Mulimu u zwisezwapili ka ku fita fa sipimo sifi, mi ki puzo ifi ye lu tokwa ku ipuza ili luna?

³ Kacenu, musebezi o makaza wa ku tahisa munko o munde wa zibo ya Mulimu u eziwa lifasi kamukana—ka sipimo se situna ku fita l’ili kaufela mwa litaba za mufuta wa mutu. U ama ku fa bupaki kwa mufuta wa mutu kaufela ka za Mubuso wa Mulimu o tomilwe cwale mwatas’a Mulena wa hae ya ketilwe, Jesu Kreste. (Mateu 6:10; Likezo 1:8) Kana mu bona sebelezo ya ku zibahaza Mulena ni Mubuso wa hae sina sifumu se si tula hahulu kuli mane ha si na teko? Jesu Kreste, ya n’a etelezi ku kutaziwa kwa taba ye nde ya ona Mubuso w’o, n’a itebuhile yona ka nzila yeo, ili ku fa mutala.—Mateu 4:17; 6:19-21.

Ku Nunkisa Sende mwa Nzila ya Mundandwe wa Tulo

 4. Ka ku ya ka 2 Makorinte 2:14, Mulimu cwale u zamaisa cwañi batanga ba hae fa lifasi-mubu, mi ki kwa mukwa ufi wa kwaikale w’o manzwi a Paulusi a supa teñi?

⁴ Ki kabakalañi ku sebeleza Mulimu ha ku li nto ye na ni ku ngiwa ka butuna hahulu? Libaka le liñwi ki la kuli nihaiba ona cwale bao ba ba sebeleza Jehova ba na ni tohonolo ye nde hahulu ya ku etelelwa ki Mulimu mwa mundandwe wa tulo o makaza. Ka ku ya ka New International Version, 2 Makorinte 2:14 i talusa kuli: “Lu itumela ku Mulimu, ili y’o a lu zamaisa kamita mwa mundandwe wa tulo ku Kreste mi ka luna u yandulukiseza kai ni kai munko o munde wa zibo ya hae [“u ezisa zibo ya luna ya ku mu ziba ku yandulukela mwa lifasi kamukana sina sende ye nde!” Phillips].” Ona manzwi ao a muapositola Paulusi a bonahala ku ama kwa mukwa wa kwaikale wa ku ba ni mindandwe ya tulo.a

 5, 6. (a) Ki sifi se ne si ezahala mwahal’a ku zamaya kwa mindandwe ya tulo ya kwaikale mwa Roma, mi munko o munati ne u talusañi ku ba ba fapahana-fapahana? (b) Ki ku sebeliswa kufi kwa kwa moya kwa swanisezo ye kwa 2 Makorinte 2:14-16?

⁵ Mwahal’a mazazi a puso ya Roma, kalulo ye ñwi ya likute le lituna ka ku fitisisa yeo Mulonga ne u ka fa kwa mueteleli wa ndwa ya tuzi ne li ku mu tuhelela kuli a eze mukiti wa tulo ya hae ka ku eza tukiso ye tula hahulu ya mundandwe wa tulo. Mundandwe wa Siroma ne u zamaya ka bunya ka ku fita mo ku bizwa Via Triumphalis ni ku kambamela mwa nzila ye miny’oka ku liba kwa tempele ya Jupiter ye fahalimw’a Lilundu la Capitoline. Malena, linabi, ni bazamaisi ba ndwa ba ba hapilwe mwa ndwa, ni bana ba bona ni bababaleli, ne ba zamaiswa mwa mawenge, hañata inze ba li njenje, ili nto ye ne i tisa kashwau ni maswabi ku bona.

⁶ Mundandwe ha ne u nze u fita mwa muleneñi wa Roma, sicaba ne si poseza lipalisa fapil’a koloi ya mutuli, mi insense ye ne i ciswa ne i tisa munko o munde mwa nzila kaufela. Ona munko o munati wo ne u talusa likute ni bupilo bwa buiketo ni ku fita kwa masole ba ba tuzi. Kono ne u talusa lifu kwa lihapwa ba ne ba si ka swalelwa ba ba ka bulaiwa kwa mafelelezo a mukiti. Seo si beya liseli fa ku itusisa kwa Paulusi swanisezo ye kwa 2 Makorinte 2:14-16. Sona siswaniso seo si tahisa Paulusi ni Bakreste ba bañwi sina babusiwa ba ba ineezi ba Mulimu “ka Kreste,” kaufela ba latelela mwa mundandwe wa Mulimu wa tulo ni ku zamaiswa ki Yena mwa mundandwe wa tulo ili mwa nzila ye nunkisizwe hande.

Munko o Munde wa Bupilo kamba Munko wa Lifu

 7, 8. (a) Lipaki za Jehova ba tahisa cwañi munko o munati wa zibo ya Mulimu? (b) Lipaki ha ba nze ba tahisa munko o munde wa swanisezo, ki ufi muhato wa bao ba ba piliswa? (c) Ki muhato ufi wa bao ba ba shwa?

⁷ Ka ku hasanyeza kai ni kai liniti za Bibele ze ama Mubuso wa Mulimu o mwatas’a Kreste, Lipaki za Jehova ba tahisa, ku bonisa, ni ku beya fa ngandaleza kai ni kai munko o munati wa zibo ya Mulimu y’a sishemo y’o niti ya hae i ba lukuluzi kwa bulapeli bwa buhata. Ba zamaya ka tulo mwa sebelezo ya Jehova. Ku fa kwa bona sebelezo sina Lipaki za hae ni za Mulena wa hae ku swana sina insense ye tabisa ku Jehova. Kacwalo, lwa kona ku itebuha seo muapositola n’a si talusa ha n’a bulezi kuli: “Ku Mulimu lu munko o munati wa Kreste, mwahali a ba ba piliswa ni mwahali a ba ba shwa; Ku ba bañwi lu munko wa lifu o isa kwa lifu; mi ku ba bañwi lu munko wa bupilo o isa kwa bupilo [“munko o munde o butokwa hahulu o tisa bupilo,” The New English Bible; “munko o munde o imulula wa bupilo bona ka sibili,” Phillips].”—2 Makorinte 2:15, 16.

⁸ Batu ba ba sepahala ba mayemo a swana sina lingu ba lemuha munati wa zibo ya Jehova ha inze i tahiswa ki Lipaki za hae. Kwa batu ba ba cwalo musebezi wa ku fa bupaki u na ni munko wa buikangulo ni bupilo, wa ku pila, niti ye fa bupilo. Ba fa buitumelo ku Jehova ni ku Mulena ye li wa hae, ili y’o ba kena mwa mundandwe wa hae wa tulo, ni ku huwa ka m’ata ba li: “Ku pilisa ki kwa Mulimu wa luna ya inzi mwa Lubona, ni kwa Ngunyana!” (Sinulo 7:10) Ba buyela moya wa niti ya Mubuso, ili munko o munde wa bupilo o imulula o isa kwa bupilo. Kono Satani ni badimona ba hae ba sinyize m’ata a ku kona ku nunkelela lika a bao ba ba ndondwezi fa bulapeli bwa buhata, kuli mane ba swala kwa lingo za bona ni ku hana ka ku nyaziseza niti. Ku “ba ba shwa,” niti ni bao ba ba i shimbile ka busepahali ba tahisa munko wa lifu o isa kwa lifu. Kamba sina ka mo i taluseza New International Version kuli: “Ku yo muñwi lu munko wa lifu.” Toloko ya Phillips i talusa sina cwana: “Ku ba bubeli bao ku bonahala sina munko wa lifu o bulaya.”

 9. Ki puzo mañi ya buza Paulusi cwale, mi ne mu ka i alaba cwañi, mi ki kabakalañi?

⁹ “Mi ki mañi ya ka lukela litaba ze kuma fa?” muapositola wa buza. (2 Makorinte 2:16) F’o ki ku bulela kuli, “mi ki mañi ya kona ku fita ku ze konisa za musebezi o swana sina wo?” (The Jerusalem Bible) “Mi kwa neku la sebelezo ye swana sina ye ki mañi ya i talifezi?” (Weymouth) Kalabo ya mwa Mañolo ki ya kuli: Ki Lipaki za Jehova! Kabakalañi? Kakuli ki ba ba ineezi fela ba ba sepahala, ba ba na ni buniti, ni ba ba sa bati ku fumana se siñwi ka buitati ni ba ba bulela niti, ka ku utwahala mi ku si na ku yendukela kwa bulapeli bwa buhata, ba ba fitile ku ze konisa kwa neku la musebezi wa ku hasanya munko o munde wa zibo ya Mulimu.—Makolose 1:3-6, 13; 2 Timotea 2:15.

10. Ki kabakalañi bahulu ba bulapeli ha ba sa fiti ku ze konisa za musebezi wa ku tahisa munko o munde wa zibo ya Mulimu?

¹⁰ Bahulu ba bulapeli ba Krestendomu, ba ba bata mayemo a mande ni lifasi le, ba palelwa ku fita ku ze konisa ni ku talifela yona sebelezo yeo ye si na buitati. Ki kabakalañi? Bakeñisa kuli ba palelwa ku fita ku ze tokwahala ze bonisizwe ki pulelo ya Paulusi ye li: “Kakuli ha lu swani sina ba bañata ba ba zwaka Linzwi la Mulimu; kono lu li bulela lu na ni niti; Mulimu mw’a lu fela Linzwi, lwa li bulela fapil’a Mulimu, lu li ku Kreste.” (2 Makorinte 2:17) Kamba sina ka mo i taluseza New International Version kuli: “Ka ku sa swana ni ba bañata, ha lu lekisi linzwi la Mulimu kuli lu fumane siselo. Ka ku fapahana, ku Kreste lu bulela fapil’a Mulimu ka buniti, sina batu ba ba lumilwe ki Mulimu.”

11, 12. (a) Ki kabakalañi Lipaki ha ba si “ba ba zwaka Linzwi la Mulimu” mwa ku amuhela linubu? (b) Ka ku fapahana ni mufuta wa Bukreste bo bu zwakani bo bu lekiwa ki ba bañata, ki sifi seo Lipaki za Jehova ba si tahisa?

¹¹ Lipaki za Jehova ba lumilwe ki Mulimu, mi ba eza musebezi wa bona wa ku fa bupaki fapil’a Mulimu. Hailifo ba fa batu ba ba tabela libuka ze butokwa hahulu ni lihatiso ze ñwi ze talusa Linzwi la Mulimu ni ku amuhela linubu za ka ku itatela kwa neku la musebezi wa ku kutaza Mubuso wa lifasi kamukana, kezo ya mufuta o cwalo haki ku lekisa kamba ku zwaka Linzwi la Mulimu. Ka buniti fela, linubu ze cwalo ka bunolo fela ki nto ye tusa mwa ku hasanya zibo ya Mulimu ku ba bañwi.

¹² Batu ba bañata kacenu, ka ku ziba kamba ka ku sa ziba, ba itekezi mufuta wa Bukreste bo bu zwakani, kakuli u swalisana ni litakazo za bona za buitati mi ha u hateleli mufuta wa bupilo bwa bona. Ba lumela kuli Mulimu wa ba amuhela bakeñisa ku ipapata kwa bona kuli ba mu lata mwa lipilu za bona. Niteñi, muta Linzwi la Mulimu li boniswa kuli la lwanisana ni litumelo ni muzamao wa bona, ba biula Mañolo ili ku tunafaza maikuto a ka butu fahalimw’a kutwisiso ye lukile ya Bibele. (Mateu 15:8, 9; 2 Pitrosi 3:16) Kono Lipaki za Jehova ba tahisa niti ye kenile, ye si ka zwakana ku zwelela mwa Bibele, kacwalo ba tahisa munko o munati o amuheleha ku Mulimu ni kwa balapeli ba hae ba niti. Kamukwaocwalo ba zwisa lizo kamukana za bulapeli ni mikwalelo ye tibela ku fumana zibo ya niti ya Mulimu.

13. Ki bomañi, kwand’a Bakreste ba ba tozizwe, ba ba inzi mwa mundandwe wa tulo wa Mulimu, mi ki sikamañi se ba eza kai ni kai ko ba ya?

¹³ Kaniti, ku ba mwa mundandwe wa Mulimu wa tulo ni Kreste ki tohonolo ye sa konwi ku likanyezwa ye ikoliwa isiñi fela ki Bakreste ba ba tozizwe kono hape ni “buñata bo butuna” bwa “lingu ze ñwi” nihaiba ona cwale, kakuli ku tula kwa Mubuso ku fakaufi. (Sinulo 7:4, 9; Joani 10:16) Ha lu nze lu libelezi litulo ze zwelapili za Mulen’a luna ya tula, kai ni kai ko lu ya lu tahisa zibo ya Mulimu ye fa bupilo sina sende, kamba insense ye butokwa hahulu, ku bao lipilu za bona li nyolezwi niti ni ku luka. Ki tohonolo hakalo ku bao ba ba fitile ku ze konisa za musebezi wo o makaza!—Joani 17:3; Makolose 3:16, 17.

Ku Fiwa M’ata a ku ba Batahisi ba Sende ba Butu

14. Ki kabakalañi bao ba ba tahisa munko o munde wa zibo ya Mulimu ha ba sa tokwi liñolo la ku ba paka kuli ba lumelelizwe ki batu?

¹⁴ Kono kana bao ba ba tahisa munko o munde wa zibo ya Mulimu ni Mubuso wa hae ba tokwa mañolo a bucaziba kamba a ku ba paka kuli ba lumelelizwe ku zwelela kwa batu? Batili! Lu filwe kale musebezi, kamba ku ketiwa, sina Lipaki za Ya M’ata O’te wa pupo kamukana. Kacwalo, ha lu tokwi ku kata-kata mwa ku ya mwa simu ku yo hasanya munko o munde wa taba ye nde ya Mubuso wa Mulimu. Mu beye mwa munahano kuli ki Jehova ya lu zamaisa. Bukombwa bwa Jesu ne bu ezizwe mwatas’a ku “hanyezwa . . . ki baezalibi.” (Maheberu 12:3) Niteñi, taba ya Jesu ya musebezi wa mwa simu, sina ha i fumanwa mwa Bibele, i sa li ya niti, mi musebezi wa hae mwa simu u bulela ka ku mu babaza ni ku fa mabaka a ku mu yemela sina ya n’a li sikombwa sa niti sa Jehova Mulimu.

15. Muapositola Paulusi n’a bonisize cwañi kuli Bakreste ba niti ha ba tokwi “mañolo a ku [ba] paka”?

¹⁵ Muapositola Paulusi n’a talimani ni muinelo o swana ili o tata mwa lizazi la hae ka ku fa libaka le: “Kikuli lu kala hape ku ipaka ili luna? Kamba, sina ba bañwi, lu tokwa mañolo a ku lu paka, a ku isa ku mina, kamba a’ zwa ku mina? Ki mina liñolo la luna, le li ñozwi mwa lipilu za luna, le li zibiwa mi li balwa ki batu kaufela. Kakuli mu bonahala ku ba liñolo la Kreste, le li ñozwi ka sebelezo ya luna; isi ka inke, kono ka Moya wa Mulimu Ya-Pila; isi fa matapa a licwe kono fa matapa a nama, a lipilu za luna.”—2 Makorinte 3:1-3.

16. Ki liñolo la mufuta mañi leo Lipaki za Jehova ba li tahisa sina bona bupaki bwa kuli bukombwa bwa bona bu zwelela ku Mulimu?

¹⁶ Ba m’ata a tamaiso ya silifasi ha ba lemuhi musebezi wa luna sina Lipaki za Jehova. Kono ha mu tuhele musebezi wa luna wa ku tahisa munko o munde wa zibo ya Jehova u ipulelele ili ona! Ona musebezi wo ha u konwi ku takulwa, nihaike kuli batu ba bañwi ba hana ku bala ona bupaki b’o bwa bukombwa bwa luna. Bahulu ba bulapeli ba tahisa mañolo a bona a ku lumelezwa a’ zwelela kwa likopano ze busa za lituto. Niteñi, tona t’o, ki tukalulo fela twa mapampili, ki linzwi la mutu. Lipaki za Jehova, fahalimw’a ku ama fa Linzwi la Mulimu kwa neku la kemelo, ba yemi sina mañolo a bupaki mwa nama ni mali. Buñata bo butuna bwa lingu ze ñwi ba ba fitilwe ku bona ka taba ye nde ya Mubuso se ba kubukanyizwe hape kwa lineku la bulyo la Mulena ye li wa Jehova. (Mateu 25:33, 34) Kaufel’a bona bao ki liñolo la luna la bupaki, liñolo leo luna ka ku ba Lipaki za Jehova lu shimbile kai ni kai mwa lipilu ni mwa minahano ya luna mi lwa kona ku li bonahaza ka buikolwiso. Bao ba ba yema kwa lineku la bubusi bwa Mulimu bwa pupo kamukana ni ku abana mwa ku sebeleza Mulimu ka ku swalisana ni Lipaki za Jehova bona ka sibili ki liñolo la bupaki leo mutu a sa koni ku picuka ku li bala ni ku zibiwa ki batu kaufela.

17. “Liñolo la Kreste” la luna li ñozwi kamukwaufi, mi ki kabakalañi Paulusi ha bulela kuli li ñozwi fa lipilu?

¹⁷ Ka mo ku inezi fela, seo si halifisa batu ba bulapeli bwa buhata mi ba shwa muna ha ba li bala. Niteñi, buñata bo butuna bo bu zamaya bu ekezeha bwa lingu ze ñwi ki liñolo la bupaki ku zwelela ku Jesu Kreste, Mulisana yo Munde, y’a itusisa Lipaki za Jehova kaufela mwa musebezi wa hae wa bueteleli. Lu siñoliso, kamba siitusiso sa butu, seo a sebelisa mwa ku ñola lona liñolo le. Liñolo ha li ñolwi ka inke ili ye konwa ku takulwa, kono li ñolwa ka m’ata a sebeza ili ni m’ata a sebeza, kamba moya, wa Mulimu, o sebeza ku luna. Ha ku swani sina mwa muinelo wa Mushe muta mulao wa Litaelo ze Lishumi ne u ñozwi ka munwana wa Mulimu fa macwe a mabeli. Liñolo la luna li ñozwi fa macwe a kwa nama a lipilu za batu, bakeñisa kuli bukombwa bwa luna bu tahisa licinceho mwa minahano ni lipilu za ba ba amuhela munko o munde wa taba ye nde.

18. Ki sifi se si zwa mwateñi se si ezisa baamuheli ba taba ye nde ku ba liñolo la bupaki?

¹⁸ Musebezi wa luna ka Linzwi la Mulimu se u amile hahulu baamuheli ba taba ye nde ba ba na ni buitebuho mi se u tisize licinceho ze makaza. Keto ya bona ya ku sebeleza Mulimu ha i si ka fumaneha ku ba nto ya mayemo a ka sipundumukela fela bakeñisa ku tukukiswa ki licowezo za mukutazi wa bulapeli ya sulaetwa ki moya wa limb’amba. Ka ku fapahana, i yemela cinceho ya bupilo bwa bona ya ku ya ku ile ye tomile fa liniti ze twekile sina kristale ze mwa Bibele ye Kenile. Lilato la ku lata Mulimu wa niti, Jehova, li ba susueza ku ‘tubula butu bwa kale bo bu na ni litakazo ze puma ni ku apala butu bo bunca,’ bo bu tahisa “muselo wa Moya.” (Maefese 4:20-24; Magalata 5:22, 23) Se si zwa mwateñi, kacwalo, si ba bisa liñolo la bupaki. Li bulela ka ku utwahala ku fita liñolo lifi kamba lifi le li ñozwi ka lizoho ki luna kamba kopano ifi kamba ifi ye bonahala ye kona ku lu luma.

19. Paulusi u talusa cwañi ze konisa za ‘likombwa za bulikani bo bunca,’ mi musebezi wa bona se u amile cwañi buñata bo butuna?

¹⁹ Kwa 2 Makorinte 3:4-6 Paulusi wa zwelapili kuli: “Ki yona sepo ya luna ku Mulimu, ka Kreste; Isikuli lu ka kona ku hupula se siñwi lu nosi, inge taba i ka izwela ku luna; kono ku kona kwa luna ku zwa ku Mulimu; Hape ki Yena ya lu fa ku kona ku ba fa sebelezo ya bulikani bo bunca.” Nihaike kuli ki bomasiyaleti fela ba ba tozizwe ba ba li ‘likombwa za bulikani bo bunca,’ musebezi wa bona se u amile buñata bo butuna bwa lingu ze ñwi, mi u ka zwelapili ku ama lipalo ze sa konwi ku balwa za lingu ze ñwi, ba ba sa na ni ku kubukanywa. Bo ki bona buikolwiso b’o Lipaki za Jehova kamukan’a bona ba na ni bona ka Kreste Jesu kwa neku la Jehova Mulimu. Bomasiyaleti ka buitumelo ba susueza buñata bo butuna bwa lingu ze ñwi kuli ba abane ka pilu kaufela mwa bukombwa bwa ku ‘ñola liñolo’ b’o Jesu Kreste n’a talusize cimo kwa Mateu 24:14 ni Mateu 28:19, 20.

20. (a) Ki sifi seo piho ya Yearbook i si bonisa ka za bao ba ba tahisa munko o munde wa zibo ya Mulimu? (b) Ki sifi seo luna kaufela lu kona ku si bulela ka ze lu konisa mwa bukombwa bwa ku ñola liñolo?

²⁰ Seo ki sona se ba ezize, sina bupaki ha bu konwa ku fumanwa mwa piho ye mwa 1990 Yearbook m’o Lipaki za Jehova ba bonisizwe inze ba tahisa munko o munde wa zibo ya Mulimu mwa manaha a 212. Mwa palo ba fitelela bahasanyi ba 3,787,000 ili ba ba na ni tukufalelo, mi ñohola-tula fela ne ba itusisize mahora a bat’o fita fa 835,000,000 mwa ku kutaza yona taba ye nde ye ya Mubuso. Kwa Mulalelo wa Mulena ñohola-tula, ne ku putehani ba ba fita fa 9,479,064. Bomasiyaleti ba ba tozizwe hamohocwalo ni lilama za buñata bo butuna bwa lingu ze ñwi ba kona ku bulela kuli: “Ku kona kwa luna ku zwa ku Mulimu.” Kamba sina The Jerusalem Bible ka mo i beela manzwi kuli: “Ze lu konisa kaufela li zwelela ku Mulimu.”

21. Ki sifi seo luna kaufela lu swanela ku si eza, mi ki kabakalañi?

²¹ Kacwalohe, a mu hasanye munko o munde ili o munati, o fa bupilo wa zibo ya Mulimu mwa sibaka kaufela! Mu ezise moya wa kalulo ya puteho ya mina ku ba o tezi munko o munde wa zibo ya Jehova. Kacwalo, sina Mueteleli wa ndwa wa teokratiki y’a li mutuli, u ka mi zamaisa mwa mundandwe wa hae wa tulo Lipaki za hae kaufela ha ba nze ba hatela fapili mwa bukombwa bwa mwa lizazi la cwale bwa kanya!

[Litaluso za kwatasi]

Ne Mu Ka Alaba Cwañi?

◻ Ki swanisezo ifi yeo Paulusi a itusisa kwa 2 Makorinte 2:14-16?

◻ Ba bañwi ba amiwa cwañi ki ku tahisa munko o munde wa zibo ya Mulimu?

◻ Ki bomañi fela ba ba fitile ku ze konisa za ona musebezi wo, mi ki kabakalañi?

◻ Ki kabakalañi batahisi ba sende ha ba sa tokwi mañolo a ñozwi ka lizoho a bupaki kwa neku la musebezi wa bona?