Bufumu bwa Luna, Bukombwa bwa mwa Lizazi la Cwale bwa Kanya

“Kono bufumu bo, lu na ni bona mwa lipiza za lizupa, kuli mata ao a matuna hahulu ibe a Mulimu, isi a luna.”—2 MAKORINTE 4:7.

 1. (a) Ki bufumu bufi bo bu kanya bo ne lu kana lwa ba ni bona, mi ki kabakalañi? (b) Bibele i talusa cwañi ku fiwa kwa Mulao wa Mushe?

BUKOMBWA bwa ku kutaza “evangeli ye ya mubuso” mwahal’a mafelelezo a muinelo wa linto kaniti luli ki bufumu, siluwo se si butokwa ka ku fitisisa. Bakeñisa kuli Jehova ki Mulimu wa kanya, sebelezo ku Mulimu ki bukombwa bwa kanya, kacwalo ki bufumu. (Mateu 24:14; 2 Makorinte 3:18–4:1) Ka ku ama fa ku fiwa kwa Mulao wa Mushe, ku ñozwi kwa Exoda 34:29, 30 kuli: “Mushe h’a shetumuka fa lilundu la Sinai n’a sweli matapa a mabeli a Bupaki mwa mazoho a hae; h’a shetumuka fa lilundu, n’a sa zibi kuli litalo la pata ya hae la benya kabakala ku ambaula ni [Jehova, NW]. Mi Aruni ni bana ba Isilaele kaufela ha ba talima Mushe, ba bona litalo la pata ya hae kuli la benya, mi ba saba ku sutelela ku yena.”

 2. Ki sifi se ne si swanisezwa ki sebelezo ya Mulao wa Mushe, mi ki kabakalañi bukombwa bwa mwamulaho ha bu na ni kanya hahulu ni ku fita?

² Litimana 32 ku isa 34 li ekeza kuli: “Bana ba Isilaele kaufela kiha ba sutelela; a ba kandekela litaba kaufela z’a mu bulelezi [Jehova, NW] fa lilundu la Sinai. Mushe h’a s’a felize ku bulela ni bona, a ikwahela lisila kwa pata. Mushe h’a n’a kenanga fapil’a [Jehova, NW] ku bulela ni Yena, n’a tubula lisila kwa pata ku fitela mane h’a zwa.” Sebelezo ya Mulao wa Mushe ne i swaniseza bukombwa bwa bulikani bo bunca ka Muyema-mwahali, Jesu Kreste. Kacwalo, haiba bukombwa bwa kwa makalelo ne bu na ni kanya, b’o bwa mwamulaho, bwa “sebelezo ya Moya,” bu lukela ku ba bo bu kanya hakalo ni ku fita! (2 Makorinte 3:7-11) Bu na ni kanya hahulu ni ku fita kakuli bu na ni kanya ye inelela, mi balateleli ba Jesu Kreste ba abana teñi.—Maroma 12:11.

 3. (a) Ki sifi se si lukela ku ba sa niti ka za bukombwa bwa Lipaki za Jehova, kono ki kabakalañi seo ha si sa lemuhiwi ki batu ba bañata? (b) Ki sifi se ne si fa buniti bwa kuli Mushe n’a li fapil’a kanya ya Jehova?

³ Kacwalohe, ku fita fa kuli, bukombwa bwa Lipaki za Jehova ki bwa kanya. Niteñi, seo, ha si lemuhiwi ki batu ba bañata ili ba ba foufalizwe ki bulapeli bwa buhata. Nihaike ba bañata ba na ni Bibele mi ne ba kana ba i bala, ha ba na ‘meto a kona ku bona.’ (2 Pitrosi 1:5-9) Ku zwisa kapai ka ka inzi fa meto a bona, ba lukela ku fetuhela ku Jehova Mulimu ka tumelo, kakuli Mushe ha n’a ile fapil’a Jehova, n’a zwisize lisila le ne li patile pata ya hae kwa Majuda. (2 Makorinte 3:16) Maisilaele ne ba sabile ku bona kanya ya Mulimu mwa pata ya muyema-mwahali wa bona mi ba kupa kuli i kwahelwe ka lisila kuli ba si ke ba i bona. Sina mane nto ye bizwa phosphorescent haiba i beiwa kwa liseli i kona ku benya hamulaho haiba i beiwa mwa lififi, kacwalo Mushe, muyema-mwahali wa bona, n’a benya ka kanya ya Jehova, ili ku fa buniti bwa kuli n’a li fapil’a Jehova.

 4. Batu ba ba sa lumeli kacenu ba likanyisa cwañi Majuda ba kwaikale, kono ki sifi seo balateleli ba Mushe yo Mutuna ba sa sabi?

⁴ Mushe n’a swaniseza Mupolofita yo mutuna wa Mulimu, Jesu Kreste. Ka ku swana ni ya n’a bile teñi pili ku yena, yena Mushe yo Mutuna yo h’a sabi ku bona kanya ya Jehova ka sibili. Niteñi, ku to fita ni la kacenu, batu ba ba sa lumeli ba ba foufalizwe ki Diabulosi ni bulapeli bwa hae bwa Sibabilona ba likanyisa bona Majuda bao ba kwaikale mi ba hana ku bona, kamba ku lemuha, kanya ya Mushe yo Mutuna, Jesu Kreste. (2 Makorinte 3:12-15) Niteñi, balateleli ba hae ba niti ha ba sabi ku talimela kwa liseli la kanya ya Jehova sina ha li benya mwa pata ya Jesu Kreste. Ka ku lukululwa kwa susuezo ya Sibabilona, ba fiwa bundume mwa ku bonisa kanya ya Mulimu. Paulusi n’a ñozi kuli, “Mi kabakala kuli lu na ni sepo ye cwalo, lu bulela ka mata hahulu.”—2 Makorinte 3:12.

Babenyisi ba Kanya ya Mulimu

 5. Lu kona ku benyisa cwañi kanya ya Mulimu ni ku ba sina Mushe fa ngo ya lilundu fapil’a Jehova?

⁵ Jesu Kreste u zwisize lisila ka ku sinula ni ku zibahaza Jehova Mulimu ku luna. (Joani 1:14, 17, 18) Kacwalo lu lukela ku benya, mi ka yona nzila yeo kanya ya Mulimu i benya ka “liseli la Evangeli ya kanya ya Kreste ye li siswaniso sa Mulimu,” ili ye lu lukela ku zibahaza. Ku benya kwa yona ki “zibo ya kanya ya Mulimu ye mwa pata ya Kreste.” Lu lukela ku benyisa yona kanya yeo ka ku bulela ka za kanya ya Jehova ni kanya ya Mubuso wa hae ka Mwan’a hae. (2 Makorinte 4:4-6) Sina Mushe ya n’a li fa ngo ya lilundu fapil’a Jehova, Lipaki za Hae fa lifasi-mubu ha ba pati lipilu za bona kwa kanya ya Jehova. Ba lata kanya ye benya mwa pata ya Mwana ni Mulena ye li wa Jehova, Jesu Kreste. Kacwalo, ba lukela ku benyisa liseli la kanya ya Mulimu ku ba bañwi.

 6. Paulusi u talusa cwañi bukombwa bwa luna bwa kanya kwa 2 Makorinte 3:18, mi ki ka linzila lifi zeo lu fita fa ku “fetuha”?

⁶ Ka ku ama kwa lipaki kamukana za kanya ya Jehova, muapositola Paulusi u talusa taba mwa manzwi a: “Cwale luna kaufela ba ba talima nge mwa siiponi kanya ya [Jehova, NW] ka meto a’ si na kapai, lu fetuha ku ba siswaniso si li siñwi ni Yena, ku zwa kwa kanya, ku ya kwa kanya, ili ka [Jehova, yena y’a li Moya, NW].” (2 Makorinte 3:18) Ka m’o lu amuhelela liseli la yona kanya yeo, hape ki ka m’o lu lukela ku i benyisa, mi kacwalo ki ka m’o hape lu fita fa ku fetuha. Mihupulo i fita fa ku uncafazwa ni ku kondolokiswa, nihaike kuli ha ku na licinceho za kwa mubili kamba mwa pata ze ne li kana za bonahala. Ki liseli la taba ye kanya le lu benyisa le li tisa muinelo o fapahana ku luna. Bupilo bwa luna bwa fetuha ni ku fita fa ku ba sina Kreste, ha lu nze lu zwisezapili tohonolo ya luna ya sebelezo ya ku hasanya liseli la kanya kwahule ku ba bañwi.—Maheberu 13:15.

 7. Kanya ye buniti i simuluha kai, mi lu kona ku tahisa cwañi kanya ye cwalo?

⁷ Ona ku fetuha ko ku cwalo kaufela ki kabakala moya, kamba m’ata a sebeza, a Mulimu. Bahulu ba bulapeli ba Krestendomu ha ba benyisi kanya ya Jehova Mulimu kono ba fetuhela fa ku iponahaza kwa batu ili kuli batu ba buhe. Kanya haki kanya ya luna, mi ha lu tokwi ku ikabisa ili luna mwa litino za bulapeli za masila a buheha, za gauda, ni macwe a butokwa ili a benya. Kanya ye buniti i zwelela kwa moya wa Mulimu mi i tahiswa ka ku fiwa kwa bupaki bo bu kanya bo bu ama Jehova yena Mutu wa Moya.

Kaufela ba na ni Tohonolo ya ku ba Balwali ba Liseli

 8, 9. Ki ifi susuezo ya lu fa Paulusi kwa 2 Makorinte 4:1, 2, mi seo si tokwa tundamo ifi kwa neku la luna?

⁸ Kwa 2 Makorinte 4:1, 2, lu bala kuli: “Hakubacwalo, ka ku bona kuli lu beilwe fa sebelezo yeo ka sishemo se lu ezizwe, ha lu fokoli. Kono lu tuhezi linto ze patwa, ili ze swabisa; ha lu zamayi ka mano a maswe, ha lu zwakanyi Linzwi la Mulimu; kono ka ku bonahaza niti, lu ipaka hande kwa lizwalo la mutu ni mutu, fapil’a Mulimu.” Mulimu u bonisize sishemo ku luna ka ku lu fa bukombwa bo. Yeo ki taelo ya ku lu susueza ku zwelapili ka bundume, mi lu ka eza ona cwalo fela! Bakeñisa kuli lu shemubilwe ka liseli le li zwelela mwa Linzwi la Mulimu, lu tamehile ku li benyisa ku ba bañwi.—Mu bapanye Mateu 5:14-16.

⁹ Lika ze ba swabela batu, ze cwale ka buputeleli, ba li pata ka bupumi ni mano a maswe. Kono ha lu na nto ni ye kana ya ku ikutwa maswabi ka yona kakuli taba ni musebezi wa luna haki za buputeleli kono ki ze lukile ni za niti. Ka lona libaka le, lwa kona ku benyisa kanya ye tezi ya liseli. Ha lu zamaisi Linzwi la Mulimu ka bupumi. Ku eza cwalo ne ku ka talusa ku li zamaisa ka buitati kuli mutu a fumane se siñwi ka butu, kanya ya ka butu, tuso ya ka butu, ni m’ata a silifasi ni ku ñweha kwa twaniso ni nyandiso ze zwelela kwa lifasi. Bao ba ba sa sabi ku taha ku Jehova ka lipata ze si ka kwahelwa lisila ni ku talimela kwa liseli la niti le li benya kacwalo ha ba na ku saba ku talimana ni buikalabelo bwa bona. Ba ka tuhelela liseli kuli li benye ka ku zwelela ku bona.

10. Ki kabakalañi ha isi mulatu wa Lipaki za Jehova haiba batu ba bañwi ba sililwe kwa taba ye nde ya Mubuso?

¹⁰ Haiba ku na ni batu ba ba sililwe kwa taba ye nde ya Mubuso, haki mulatu wa Lipaki za Jehova kono ki mulatu wa bona. Taba ye nde ya Mubuso ha i si ka patiwa. Musebezi wa Lipaki za Jehova wa ku kutaza lifasi kamukana u zibahala hahulu. Kacwalo, ba kona ku bulela sina mwa n’a ezelize muapositola Paulusi kuli: “Kakuli ku zeo ha ku na se siñwi se si ezizwe kwa mukunda.” Ee luli, sina ha n’a ñozi, taba ye nde se i “bulezwi ku ba ba li teñi kaufela mwatas’a lihalimu.”—Likezo 26:26; Makolose 1:23.

11. Ki kabakalañi taba ye nde ya kanya ha i kwahelezwi ba bañata cwalo ba mufuta wa mutu?

¹¹ Batu bao taba ye nde ya Mubuso wa Mulimu i patilwe ku bona ki balwanisi, ba ba foufalizwe ki Diabulosi. (Mu bapanye Mateu 12:30.) Haiba ba sa ikayutuli kwa bulapeli bwa buhata ni malaba a Diabulosi, ba kabe ba timelizwe. Ka ku ba mwa susuezo ya sidimona, batu ba ba cwalo ba beya kapai kwa meto a bona ka sibili, kakuli muapositola Paulusi u talusa kwa 2 Makorinte 4:3-5 kuli: “Evangeli ya luna haiba i kwahezwi, i kwahelezwi ba ba shwa; Ili ba ba sa lumeli, bao mulimu wa lifasi le u foufalize kutwisiso ya bona, kuli ba si ke ba bonisezwa liseli la Evangeli ya kanya ya Kreste ye li siswaniso sa Mulimu. Kakuli ha lu ipuleli; kono lu bulela Jesu Kreste, Mulena; ka luna, ha lu ipulela lu li, ki luna batanga ba mina kabakala Jesu.”

12. Ka ku fapahana ni ba ba foufalizwe mwa munahano, ki ufi muhato o ba nga batu ba Jehova fa manzwi a kwa 2 Makorinte 4:6?

¹² Ba ba foufalizwe mwa munahano ha ba lati ku lumela. Ku sa lumela kwa bona ku tahisa kuli madimona a to kena mwa mihupulo ya bona ye kwaluhile. (1 Timotea 4:1) Ha ba koni ku bona kanya ya Jehova kamba ku benya kwa yona mwa pata ya Jesu, yena Mushe yo Mutuna. Batu ba Jehova ba yaka liseli la kanya ku zwelela mwa Bibele ni ku li benyisa ku ba bañwi. Kacwalo batanga ba Mulimu kaufel’a bona ki balwali ba liseli, mi Mulimu u laelela kuli liseli li benye. Liseli li lukela ku benya kwa batu ba Mulimu ni ku monyehela ku ba bañwi ba ba inzi mwa lififi ni mwa kozi ya ku timezwa. Seo si swana fela sina ka mo i boniseza 2 Makorinte 4:6 kuli: “Kakuli Mulimu ya n’a ize: Liseli li benye mwa lififi, ki Yena ya benyisize mwa lipilu za luna liseli la zibo ya kanya ya Mulimu ye mwa pata ya Kreste.” Ka ku beya seo mwa munahano, Lipaki za Jehova ba buluka taelo ya bumulimu ni ku tuhelela liseli la bona kuli li benye ku ba bañwi, ili ku tisa kanya ku Mulimu.

Bufumu bwa Kanya mwa Lipiza ze Fokola

13. Ku beya sebelezo ye fuy’ozwi ya ku ba balwali ba liseli fahalimw’a libupiwa za nama ku tahisa nto mañi?

¹³ Mwa tohonolo ye ya sebelezo ye makaza ye sa konwi ku bulelwa, ki kwa butokwa hahulu kuli balwali ba liseli ba fumanehe ku ba ba ba swanela mwa ku ba ni liseli ka ku buluka busepahali bwa bona ku Mulimu. Ku taleleza yona tohonolo yeo ya sebelezo ye makaza, Mulimu ha si ka itusisa mangeloi a kenile, ili ao a shukezwi ku ukumela mwa linto zeo, kono u beile yona sebelezo ye fuy’ozwi yeo fahalimw’a libupiwa za nama. (1 Pitrosi 1:12) U ezize seo ili ku tunafaza m’ata a hae ka sibili mwahal’a bufokoli bwa batu. Sina 2 Makorinte 4:7 ha i talusa kuli: “Kono bufumu bo, lu na ni bona mwa lipiza za lizupa, kuli mata ao a matuna hahulu ibe a Mulimu, isi a luna.”

14. (a) Ki bufi “bufumu bo, lu na ni bona mwa lipiza za lizupa”? (b) Ki kabakalañi Mushe ni Jesu Kreste ha ba li mitala ye butali ku luna ka ku ama kwa bufumu?

¹⁴ Lipiza mwa linako za kwaikale hañata ne li itusiswa sina libulukelo za lika ze butokwa. Ki bufi bufumu bwa kanya b’o Lipaki za Jehova ba na ni bona mwa lipiza ze fokola, za lizupa—bona ka sibili, ka ku ba libupiwa ze fokola ze zwelela kwa liluli la lifasi-mubu? Bona bufumu b’o haki liseli fela le li benyize mwa lipilu za bona. Ki bukombwa bwa lona liseli leo, ili bukombwa, kamba sebelezo, ye lukela ku ezwa inze ba li mwa mibili ya bona ya fa lifasi-mubu. Bukombwa b’o ki bwa ku zamaisa liseli leo Mulimu a benyisize fa lipilu za bona. Bona bukombwa bo ki sifumu se sinde kakuli ki tohonolo ya sebelezo ye butokwa hahulu ye abanwa kacenu isiñi ki bomasiyaleti fela ba “mutapinyana” kono hape ni “buñata bo butuna” bwa “lingu ze ñwi” za Mulisana yo Munde, Jesu Kreste. (Luka 12:32; Joani 10:14-16; Sinulo 7:9) Mushe ni y’o n’a yemelwa ki yena, Jesu Kreste, ki mitala ye butali ku luna, ku toma lipilu za luna fa bufumu bo bwa sebelezo ya bumulimu, “kakuli fo bu inzi bufumu bwa hao, ki fo i inzi ni pilu ya hao.”—Mateu 6:19-21; Maheberu 11:26.

15, 16. (a) M’ata a matuna hahulu a bonisizwe cwañi ku ba a Mulimu isi a luna? (b) Ki kabakalañi twaniso kamukana ya lifasi ha i ka palelwa ku tuba lipiza za Mulimu za lizupa?

¹⁵ Ku taha cwañi, kacwalohe, kuli m’ata a matuna hahulu a bonahale ku ba a Mulimu isi a luna? Ka nzila ye: Lipiza za mufuta o cwalo ze fokola, ili za lizupa sina luna ba ba sweli sebelezo ni musebezi wa sifumu se si cwalo ha lu swaneli mi ni kamuta ne lu si ke lwa ba ni likute le li cwalo ka ili luna. Fahalimw’a seo, luna Lipaki za Jehova lu ipumana mwa lisineneketo za sila za mifuta kaufela ku lika ku tahisa m’andala ku luna kuli lu pazuhe ili kuli lu be ba ba sa swaneli musebezi o zwelela ku Mulimu. Ka lona libaka le, a lukela ku ba m’ata a Mufani wa Musebezi yo Mutuna a’ lu tusa ku talimana ni matibili a matuna ku zwelela kwa lifasi le ni ku ndondwela fa musebezi ili ku fumaneha kuli lwa swanelwa ku bulukiwa mwa sebelezo ya hae. Kacwalo, twaniso kaufela ya lifasi i ka palelwa ku tuba lipiza za Mulimu za lizupa ni ku ba uzweza sifumu sa bona se si butokwa hahulu, kakuli ku ñozwi kwa 2 Makorinte 4:8-12 kuli:

¹⁶ “Lu mwa butata mwa maneku kaufela, kono ha lu honehi luli; lu ziyelehile maswe, kono ha lu felelwi ki sepo; Lwa nyandiswa, kono ha lu fulalelwi; lu wisezwa fafasi, kono ha lu shwi; Lu nze lu lwala kamita mwa mubili wa luna lifu la Jesu, kuli bupilo bwa Jesu ni bona bu bonahale mwa mubili wa luna. Kakuli luna ba ba pila, lu nze lu iswa kwa lifu kabakala Jesu, kuli bupilo bwa Jesu bu bonahale mwa nama ya luna ye shwa. Hakulicwalo lifu li sebeza ku luna, kanti bupilo bu sebeza [ka ku kutaziwa kwa taba ye nde ya Mubuso] ku mina.”

Buñata bo Butuna b’u nga “Bufumu bo” ka Butuna

17. Buñata bo butuna bu bona cwañi “bufumu bo” bwa bukombwa bwa kanya?

¹⁷ “Lifu li sebeza ku luna, kanti bupilo bu sebeza ku mina.” Pulelo ye i ama kwa Bakreste ba ba tozizwe ka moya. Niteñi, ne i kana ya lu ezisa ku nahana ka za swalisano ya bomasiyaleti ba ba tozizwe ba Mulimu ni buñata bo butuna bwa lingu ze ñwi. Ba ba tozizwe ba ziba kuli nako ha inze i ya ba lukela ku feza bukombwa bwa bona bwa fa lifasi mwa lifu sina mwa n’a ezelize Jesu, kono ba na ni balikani ba ku abana ni bona sifumu sa sebelezo ya kanya, mwa ku ba tusa ka ku taleleza kalulo ye tuna ya musebezi wa ku kutaza taba ye nde ya Mubuso. Ka ku swana ni bomasiyaleti ba ba tozizwe, buñata bo butuna bwa lingu ze ñwi kacenu ba itebuha kuli bufumu fela bo bu ka punyuha ndwa ye tuna ya Armagedoni ni ku zwelapili ku si na ku babulwa ni ku ciswa ni ku kena mwa lifasi le linca ki sona sifumu se sa bukombwa bo bu fuy’ozwi, sebelezo ya ku Jehova Mulimu ni Mulena wa hae ya filwe kanya, Jesu Kreste. Buñata bo butuna bu ka ndondwela ku yona, ku “sebeleza [Mulimu] musihali ni busihu mwa Tempele ya hae.”—Sinulo 7:15.

18. (a) Ki sifi se si ka ezahala ona cwale-cwale fa kwa kanya ya mbwashula ya lifasi le? (b) Ki “kanya” ifi ya n’a hanile Jesu, mi ne li ka ku eza nto mañi ha n’a fumani kanya ye tuna ni ku fita?

¹⁸ Ona cwale-cwale fa, Mulimu u ka tuha a felisa kanya ya mbwashula ya muinelo wo wa linto ili o maswe—“kanya” ye se i zwezipili ku zwelela f’o Satani Diabulosi n’a isize Jesu fa lilundu le li pahami ni ku mu bonisa mibuso kamukana ya lifasi ni “kanya ya yona.” (Luka 4:5, 6, NW) Jesu na hanile kanya ye ne i zwelela kwa simbule se si cwalo ni ku zwelapili ku nga muhato fa lifasi mwa nzila ye ne i lumelelwa ki Mulimu. Ka ku eza cwalo, na ka fiwa kanya ye fitela kwahule kanya ili yeo yena, ka ku ba Mwana wa libanda wa Mulimu, n’a ikozi yona mwa lihalimu pili a si k’a nga musebezi wa hae wa fa lifasi-mubu ka ku ya ka mo ne u lukiselizwe ki Jehova.—Joani 5:36; 17:5; Mafilipi 2:9-11.

19. Ki tohonolo ifi ya sebelezo ye kutekeha ye se ili fakaufi ni ku petwa ko ku tezi, mi ki ifi tundamo ya luna kwa neku la se?

¹⁹ Ona mafelelezo ao a talusizwe cimo a muinelo wo o maswe hahulu h’a na ku taha pili bupaki bwa Mubuso bu si ka fiwa kale mwa lifasi-mubu kamukana sina mafelelezo a tezi a musebezi wa balateleli ba Jesu Kreste, Lipaki za Jehova. (Mateu 24:14) Bupaki bwa Mubuso cwale se bu filwe ka lilimo ze fita fa mashumi a supile ka ze ketalizoho, mi sina ha ku boniswa ki likezahalo za lifasi za mwa linako za luna, ona mafelelezo ao a talusizwe cimo a lukela ku ba fakaufi hahulu. Kacwalo, tohonolo ye kutekeha ya ku abana mwa bukombwa bwa mulonga wa silena, o kenile i swanela ku atumela fa ku petwa kwa yona ko ku tezi. (Mateu, likauhanyo 24, 25; Mareka, kauhanyo 13; Luka, kauhanyo 21) Tohonolo ya luna ya ku abana mwa ku fa bupaki lifasi kamukana ka za ku tomiwa kwa Mubuso kaniti luli ki bufumu bwa kanya b’o Lipaki za Jehova, b’a nga ka butuna, ka ku ba balateleli ba Mwan’a hae ya beilwe fa lubona, Jesu Kreste. Ba na ni takazo ye tuna ya ku ndondwela ku ona ku fitela bupaki bwa Mubuso bu petiwa mi Mulimu Ya M’ata O’te, Jehova, a feza muinelo wa mwa pupo kaufela ka bupaki bwa hae bwa ka butu kwa bubusi bwa hae bwa pupo kamukana.—Zefania 3:8.

Ki Lifi Likalabo za Mina?

◻ Ki kabakalañi bukombwa bwa Lipaki za Jehova ha bu li bwa kanya?

◻ Ki kabakalañi taba ye nde ha i patilwe ku ba bañata cwalo kacenu?

◻ Ki bufi “bufumu bo, lu na ni bona mwa lipiza za lizupa”?

◻ Ki kabakalañi Mulimu ha itusisa lipiza ze fokola, za lizupa mwa sebelezo ya hae ye butokwa hahulu?

◻ Batu ba Jehova b’a nga cwañi “bufumu bo,” mi ki kabakalañi?

[Siswaniso se si fa likepe 17]

Kanya ya Mulimu i benya mwa pata ya Jesu Kreste, Mushe yo Mutuna. Lipaki za Jehova ba na ni tohonolo ya ku yaka liseli la kanya ya Mulimu ku zwelela mwa Bibele ni ku li benyisa ku ba bañwi