Ku Pila ka Mulao wa Kreste

“Mu lwalisane milwalo, mi mu pete cwalo mulao wa Kreste.”—MAGALATA 6:2.

 1. Ki kabakalañi ha ne ku kana kwa bulelwa kuli mulao wa Kreste ki m’ata a susueza kwa neku la bunde kacenu?

MWA Rwanda, Lipaki za Jehova za Mahutu ni Matutsi ne ba beile bupilo bwa bona mwa lubeta kuli ba silelezane kwa pulao ya ka mushobo ye sa z’o tanyela naha yeo. Lipaki za Jehova kwa Kobe, mwa Japan, ba ne ba latehezwi ki lilama za lubasi mwa ku shandaulwa ki zikinyeho ne ba lobilwe lipilu ki lisinyehelo za bona. Niteñi, ne b’a ngile muhato wa ka bubebe kuli ba yangwele ba bañwi. Ee, mitala ye nyangumuna ku potoloha lifasi kamukana i bonisa kuli mulao wa Kreste ki o m’ata kacenu. Ki m’ata a susueza hahulu kwa neku la bunde.

 2. Krestendomu u palezwi cwañi ku utwisisa mulao wa Kreste, mi ki sifi se lu kona eza kuli lu pete mulao w’o?

² Ka nako ye swana, bupolofita bwa Bibele ka za mazazi a maungulelo” a a’ tat’a bu sweli ku talelezwa. Ba bañata ba na ni “mukwa wa bulumeli” kono ‘m’ata a bulumeli ba a latuzi.’ (2 Timotea 3:1, 5) Sihulu mwa krestendomu, bulapeli hañata ki taba ya muezezo fela, isi taba ya mwa pilu. Kana seo ki ka libaka la kuli ku t’ata hahulu ku pila ka mulao wa Kreste? Kutokwa. Jesu n’a si ke a lu fa mulao o ne u si ke wa latelelwa. Krestendomu u palezwi fela ku utwisisa mulao w’o. U palezwi ku utwa manzwi a a’ buyelezwi a li: “Mu lwalisane milwalo, mi mu pete cwalo mulao wa Kreste.” (Magalata 6:2) Lu ‘peta mulao wa Kreste’ ka ku lwalisana milwalo, isiñi ka ku likanyisa Bafalisi ni ku ekeza kwa milwalo ya mizwale ba luna ka ku tokwa nahanisiso.

 3. (a) Ki litaelo lifi ze ñwi ze kopanyelelizwe mwa mulao wa Kreste? (b) Ki kabakalañi ha neikaba mafosisa ku atula kuli puteho ya Sikreste ha i swaneli ku ba ni milao i sili kwand’a litaelo ze zwelela fela ku Kreste?

³ Mulao wa Kreste u kopanyeleza litaelo kaufela za Kreste Jesu—ibe za ku kutaza ni ku luta, ku ba ni liito le li kenile ni le li bunolo, ku sebeleza fa ku bukeleza kozo ni bomuyahwa ni luna, kamba ku zwisa masila mwa puteho. (Mateu 5:27-30; 18:15-17; 28:19, 20; Sinulo 2:14-16) Ka buniti fela, Bakreste ba tamehile ku buluka litaelo kaufela ze mwa Bibele ze filwe kwa balateleli ba Kreste. Mi hape ku sa na ni ze ñwi. Kopano ya Jehova, hamohocwalo ni liputeho ka buñwi, li na ni ku toma milao ni miezezo ye tokwahala ilikuli ku be ni tamaiso ye nde. (1 Makorinte 14:33, 40) Ee, Bakreste ne ba si ke ba kona nihaiba ku kopana hamoho kambe kikuli ne ba si na milao ya ka za nako, sibaka, ni ka mwa ku zamaiseza mikopano ye cwalo! (Maheberu 10:24, 25) Ku swalisana ni litaelo ze utwahala ze tomilwe ki bao ba ba filwe m’ata a tamaiso mwa kopano ki kalulo ye ñwi ya ku peta mulao wa Kreste.—Maheberu 13:17.

 4. Ki afi m’ata a susueza bulapeli bwa niti?

⁴ Nihakulicwalo, Bakreste ba niti ha ba lumelezi bulapeli bwa bona ku ba muinelo wa milao ye si na taluso. Ha ba sebelezi fela Jehova bakeñisa kuli batu ba bañwi kamba kopano i ba bulelela ku eza cwalo. Ka ku fapahana, m’ata a’ ba susueza mwa bulapeli bwa bona ki lilato. Paulusi n’a ñozi kuli: “Lilato la Kreste la lu susueza.” (2 Makorinte 5:14, NW, litaluso za kwatasi) Jesu n’a laezi balateleli ba hae kuli ba latane. (Joani 15:12, 13) Lilato la ku ifana sitabelo ki mutomo wa mulao wa Kreste, mi li susueza Bakreste ba niti kai ni kai, mwa lubasi hamohocwalo ni mwa puteho. Ha lu boneñi seo mo si ezezwa.

Ku Pila ka Mulao wa Kreste mwa Lubasi

 5. (a) Bashemi ba kona ku peta cwañi mulao wa Kreste mwa lapa? (b) Ki sifi seo bana ba tokwa kwa bashemi ba bona, mi ki mikwalelo mañi yeo bashemi ba bañwi ba lukela ku tula kuli ba si fe?

⁵ Muapositola Paulusi n’a ñozi kuli: “Banna, mu late basali ba mina, sina Kreste mw’a latezi Keleke mi a itobohile bakeñisa yona.” (Maefese 5:25) Munna ha likanyisa Kreste ni k’u nga musal’a hae ka lilato ni ka ku mu utwisisa, u peta kalulo ya butokwa ya mulao wa Kreste. Fahalimu a seo, Jesu n’a bonisize lilato kwa banana ka ku sa pata-pata, ka ku ba ngela mwa mazoho a hae, a beya mazoho a hae fahalimw’a bona, mi a ba fuyaula. (Mareka 10:16) Bashemi ba ba peta mulao wa Kreste ni bona ba bonisa lilato kwa bana ba bona. Ki niti kuli, ku na ni bashemi ba ba fumana ku ba likulutendano ku likanyisa mutala wa Jesu mwa kalulo yeo. Ba bañwi ha ba bonisi muinelo w’o ka sipepo. Bashemi, mu si ke mwa tuhelela mibonelo ye cwalo ku mi tibela ku bonisa bana ba mina lilato le mu ikutwa ku ba ni lona ku bona! Haki ko ku likani ku mina ku ziba kuli mu lata bana ba mina. Ni bona ba lukela ku ziba seo. Mi ha ba na ku ziba seo konji haiba mu bata linzila za ku bonisa ka lona lilato la mina.—Mu bapanye Mareka 1:11.

 6. (a) Kana bana ba tokwa milao ya bashemi, mi ki kabakalañi ha mu alaba cwalo? (b) Ki lifi libaka le lituna la milao ya fa lapa leo bana ba tokwa ku utwisisa? (c) Ki mabeta afi a pimiwa muta mulao wa Kreste u ba teñi mwa lapa?

⁶ Ka nako ye swana, bana ba tokwa ketelelo, ili ku talusa kuli bashemi ba bona ba tokwa ku toma milao mi ka linako ze ñwi ba tiise yona milao yeo ka kalimelo. (Maheberu 12:7, 9, 11) Nihakulicwalo, bana ba lukela ku tusiwa ka ku zwelapili ku bona butokwa bwa yona milao yeo: bashemi ba bona ba ba lata. Mi ba lukela ku ituta kuli lilato ki lona libaka le linde ka ku fitisisa ha ba swanela ku ipeya ku utwa bashemi ba bona. (Maefese 6:1; Makolose 3:20; 1 Joani 5:3) Sikonkwani sa mushemi ya lemuha lika ki ku luta bana ba banyinyani ku itusisa ‘m’ata a bona a ku nahana’ ilikuli mwa nako ya kwapili ba ikezeze likatulo ze lukile. (Maroma 12:1, NW; mu bapanye 1 Makorinte 13:11.) Kwa neku le liñwi, milao ha i swaneli ku ba ye miñata hahulu kamba kalimelo ye buhali hahulu. Paulusi u li: “Bondate, mu si ke mwa halifisa bana ba mina, kuli ba si ke ba fela pilu.” (Makolose 3:21; Maefese 6:4) Muta mulao wa Kreste u ba teñi mwa lapa, ha ku na sibaka sa ku fa kalimelo ya bunyemi bo bu si na buiswalo kamba mashendekela a’ holofaza. Mwa lapa le li cwalo, bana ba ikutwa ku silelezwa ni ku yahiwa, isi ku imezwa kamba ku shubulwa.—Mu bapanye Samu 36:7.

 7. Ki mwa linzila mañi m’o mahae a Betele a kona ku fela mutala ha ku amiwa ka za ku toma milao mwa lapa?

⁷ Ba bañwi ba ba se ba potezi mahae a Betele ku potoloha lifasi ba bulela kuli mahae a cwalo ki mitala ye minde ya buitikanelelo mwa litaba za milao kwa lubasi. Nihaike kuli ku fumaneha fela ba bahulu, libaka ze cwalo li sebeza sina mabasi.a Misebelezo ya fa Betele ki ye tatezani mi i tokwa milao ye miñatanyana—ka buniti fela ku tokwiwa ye fita ya mabasi. Nihakulicwalo, maeluda ba ba etelela mwa mahae a Betele, maofisi, ni misebezi ya mwa fakitoli ba lika ka t’ata ku sebelisa mulao wa Kreste. Ba u’ nga ku ba sina kalulo ya musebezi isi fela ku zamaisa musebezi kono hape ni ku hulisa zwelopili ya kwa moya ni “tabo ya Jehova,” mwahal’a ba ba sebeza ni bona. (Nehemia 8:10, NW) Kacwalo, ba lika ka t’ata ku eza lika ka nzila ye buniti ni ye susueza mi ba cisehezi ku ba ni nahanisiso. (Maefese 4:31, 32) Ha ku komokisi mabasi a Betele ha zibwa ka moya wa ona wa tabo!

Ku Pila ka Mulao wa Kreste mwa Puteho

 8. (a) Ki sifi se si swanela ku ba sikonkwani sa luna kamita mwa puteho? (b) Ki mwa miinelo mañi ye miñwi m’o ba bañwi ba se ba kupile katulo kamba ku lika ku eza milao?

⁸ Ka mukwa o swana, ki sikonkwani sa luna kuli lu yahisane ka moya wa lilato mwa puteho. (1 Matesalonika 5:11) Kacwalo Bakreste kaufela ba swanela ku ba ni tokomelo ya ku sa ekeza kwa milwalo ya ba bañwi ka ku ikwameka ku ba limba ka mihupulo ya bona mwa litaba ze ama keto ya ka butu. Ka linako ze ñwi, ba bañwi ba ñolela kwa Watch Tower Society ili ku kupa katulo fa litaba ze cwale ka za mubonelo o ba swanela ku ba ni ona fa maswaniso a zamaya, libuka, mane ni libapaliso ze ñwi. Niteñi, Sosaiti ha i si ka fiwa m’ata a ku tatubisisa lika ze cwalo ni ku fa likatulo ka za teñi. Mwa miinelo ye miñata, zeo ki litaba zeo mutu ni mutu kamba toho ya lubasi a swanela ku atula, ka ku toma fa lilato la hae kwa likuka za Bibele. Ba bañwi ba tengamela fa ku cinca liakalezo ni likuka za Sosaiti ku li bisa milao. Sina ka mutala, mwa musulo wa The Watchtower, wa March 15, 1996, ne ku na ni taba ye nde ye ne susueza maeluda ku eza lipoto za bulisana za kamita kwa lilama za puteho. Kana mulelo ne li wa ku toma milao? Kutokwa. Nihaike kuli bao ba ba kona ku latelela liakalezo zeo ba fumana lituso ze ñata, maeluda ba bañwi ha ba yo mwa mayemo a ku kona ku eza cwalo. Ka ku swana, taba ya “Lipuzo ze Zwa kwa Babali” mwa musulo wa Tora ya ku Libelela, ya April 1, 1995, ne i file mamela ya za ku fokolisa ku kutekeha kwa kezahalo ya kolobezo ka likezo ze tulile tikanyo, ze cwale ka ku eza tukitinyana twa ku tokwa buiswalo kamba ku zela munyololo wa tulo. Ba bañwi se b’a ngile yona kelezo ye tusa yeo ka ku tula tikanyo, nihaiba ku eza milao, kuli ku lumela kadi ya ku fa susuezo fa kezahalo yeo neikaba mafosisa!

 9. Ki kabakalañi ha ku li kwa butokwa kuli lu tokolomohe ku ba ba ba nyaza ni ku bata milatu ka ku tula tikanyo?

⁹ Ha mu nyakisise hape kuli, kuli “Mulao o petehile, ona Mulao wa tukuluho” u be teñi mwahal’a luna, lu lukela ku lumela kuli mazwalo a Bakreste kaufela haki a swana. (Jakobo 1:25) Kana lwa swanela ku filikana haiba batu ba na ni liketo za ka butu ze sa lobi likuka za mwa Mañolo? Batili. Ha lu eza cwalo lu tahisa likauhano. (1 Makorinte 1:10) Paulusi, ha n’a lu lemusa ka za ku atula Mukreste sina luna, n’a bulezi kuli: “Nih’a tiya kamba a wa, ki taba ya mulen’a hae. Kono u ka tiya, kakuli mulen’a hae u ka mu tiisa.” (Maroma 14:4) Lu ipeya mwa lubeta lwa ku sa tabisa Mulimu haiba lu bulelana maswe fa litaba ze swanelwa ku talimwa ki lizwalo la mutu ka buñwi.—Jakobo 4:10-12.

10. Ki bomañi ba ba filwe musebezi wa ku tokomela puteho, mi lu swanela ku ba fa kemelo ka mukwa ufi?

¹⁰ Hape, ha lu hupuleñi kuli maeluda ba filwe musebezi wa ku tokomela mutapi wa Mulimu. (Likezo 20:28) Ba lukiselizwe ku lu tusa. Lu swanela ku ikutwa ku lukuluha ku ba atumela kwa neku la tuso, kakuli ki baituti ba Bibele mi ba twaelani ni se se si buhisanwi mwa lihatiso za Watch Tower Society. Muta maeluda ba bona muzamao o bonahala ku isa kwa ku loba likuka za Bibele, ka bundume ba fa kelezo ye tokwahala. (Magalata 6:1) Lilama za puteho li latelela mulao wa Kreste ka ku swalisana ni bona balisana bao ba ba lateha, ba ba zamaisa mwahal’a bona.—Maheberu 13:7.

Maeluda Ba Sebelisa Mulao wa Kreste

11. Maeluda ba sebelisa cwañi mulao wa Kreste mwa puteho?

¹¹ Maeluda ba cisehezi ku peta mulao wa Kreste mwa puteho. Ba etelela mwa ku kutaza taba ye nde, ku luta ku zwelela mwa Bibele ilikuli ba fite kwa lipilu, mi ka ku ba balisana ba ba lilato, ba ba musa, ba omba-omba ba “lipilu ze shekesha.” (1 Matesalonika 5:14) Ba pima mibonelo ye si ya Sikreste ye li teñi mwa bulapeli bo buñata bwa Krestendomu. Ki niti kuli lifasi le, li sweli ku sinyeha ka bubebe hahulu, mi ka ku swana sina Paulusi, maeluda ne ba kana ba bilaela ka za mutapi; kono ba bukeleza buitikanelelo ha ba nze ba nga muhato mwa miinelo ye cwalo.—2 Makorinte 11:28.

12. Muta Mukreste a atumela eluda kwa neku la tuso, eluda n’a ka nga cwañi muhato?

¹² Sina ka mutala, Mukreste n’a kana a tabela ku bonana ni eluda ka za taba ya butokwa ye si ka taluswa ka ku nonga luli ki ze amiwa za mwa Mañolo kamba ye tokwa ku likanyeza likuka za Sikreste ze fapahana. Mwendi u filwe situlo se situna kwa mubeleko ili sa tuelo ye tuna kono ili se si na ni buikalabelo bo butuna hahulu ni ku fita. Kamba mwendi bondate ba ba si ka lumela ba Mukreste yo munca ne ba kana ba bata litokwahalo ku mwan’a bona ili ze ne ka kona ku ama maswe bukombwa bwa hae. Mwa miinelo ye cwalo eluda u ka tokolomoha ku fa maikuto a ka butu. Mwa sibaka sa seo, mwendi u ka apula Bibele ni ku tusa mutu y’o ku nahanisisa fa likuka ze ama taba yeo. N’a kana a itusisa Watch Tower Publications Index, haiba i teñi, ku bata seo “mutanga ya sepahala, ya na ni kutwisiso” a si bulezi fa taba yeo mwa makepe a Tora ya ku Libelela ni lihatiso ze ñwi. (Mateu 24:45) Ku cwañi haiba hasamulaho Mukreste a eza katulo ye sa bonahali ku ba ye butali ku eluda? Haiba katulo yeo ha i lobi ka ku nonga luli likuka kamba milao ya Bibele, Mukreste y’o u ka fumana kuli eluda u ka kuteka tukelo ya mutu ka za ku eza katulo ye cwalo, ka ku ziba kuli “mutu ni mutu u ka lwala mulwalo wa hae.” Nihakulicwalo, Mukreste y’o u swanela ku hupula kuli “s’a cala mutu, ki sona s’a ka kutula.”—Magalata 6:5, 7.

13. Mwa sibaka sa ku fa likalabo ze nongile luli kwa lipuzo kamba ku fa maikuto a bona tota, ki kabakalañi maeluda ha ba tusa ba bañwi ku nahanisisa fa litaba?

¹³ Ki kabakalañi eluda ya na ni yeloseli ha nga muhato ka nzila yeo? Ibata iba ka mabaka a mabeli. La pili, Paulusi n’a bulelezi puteho ye ñwi kuli n’a sa ‘busi tumelo ya bona.’ (2 Makorinte 1:24) Eluda, ka ku tusa muzwale wa hae ku nahanisisa fa Mañolo ni ku ezisa katulo ya hae ye tomile fa zibo, u likanyisa mubonelo wa Paulusi. U lemuha kuli ku na ni maciñekelo kwa m’ata a hae a tamaiso, sina fela Jesu ha n’a lemuhile kuli ne ku na ni maciñekelo kwa m’ata a hae a tamaiso. (Luka 12:13, 14; Juda 9) Ka nako ye swana, maeluda ba itukiselize ku fa tuso, nihaiba kelezo ye tiile ya mwa Mañolo fo i tokwahala. La bubeli, u luta Bakreste sina yena. Muapositola Paulusi n’a bulezi kuli: “Lico ze tiile ki za ba ba hulile, ba ba na ni kutwisiso ya ku keta ze nde ku ze maswe, kabakala ku itwaelisa cwalo.” (Maheberu 5:14) Kacwalo, kuli lu hule ku fita fa buhulu, lu tokwa ku itusisa kutwisiso ya luna, isiñi ku sepa mutu yo muñwi ku lu fa likalabo kamita. Ka ku bonisa Mukreste sina yena ka mwa ku nahanisiseza fa Mañolo, eluda ka nzila yeo u mu tusa ku eza zwelopili.

14. Ba ba hulile ba kona ku bonisa cwañi kuli ba sepile Jehova?

¹⁴ Lwa kona ku ba ni tumelo ya kuli Jehova Mulimu ka moya wa hae o kenile u ka susueza lipilu za balapeli ba niti. Kacwalo, Bakreste ba ba hulile ba cisehisa lipilu za mizwale ba bona, ku ba kupa ka t’ata, sina mwa n’a ezelize muapositola Paulusi. (2 Makorinte 8:8; 10:1; Filemoni 8, 9) Paulusi n’a ziba kuli hañata ki ba ba si ka luka, isiñi ba ba lukile, ba ba tokwa libunda la milao kuli ba kene mwa folo. (1 Timotea 1:9) N’a si ka bonisa lutondeleti kamba ku sa sepa ba bañwi, kono n’a bonisize tumelo kwa mizwale ba hae. N’a ñolezi kwa puteho ye ñwi kuli: “Lu sepile Mulena bakeñisa mina.” (2 Matesalonika 3:4) Tumelo, sepo, ni buikolwiso za Paulusi ka buniti fela ne li na ni ku ama ko kutuna kwa Bakreste bao. Maeluda ni baokameli ba maeto kacenu ba na ni milelo ye swana. Banna ba ba sepahala b’a ki ba ba wetulusa hakalo ha ba nze ba lisa ka lilato mutapi wa Mulimu!—Isaya 32:1, 2; 1 Pitrosi 5:1-3.

Ku Pila ka Mulao wa Kreste

15. Ki lipuzo mañi ze ñwi ze lu kona ku ipuza ili ku bona ka za haiba lwa sebelisa mulao wa Kreste mwa swalisano ya luna ni mizwale ba luna?

¹⁵ Kaufel’a luna lu tokwa ku itekula kamita ili ku bona haiba lu pila ka mulao wa Kreste ni ku u yemela. (2 Makorinte 13:5) Ka buniti luli, kaufel’a luna lwa kona ku fumana tuso ka ku ipuza kuli: ‘Kana ni y’a yahisa kamba y’a nyaza-nyaza? Kana ni y’a itikanelezi kamba y’a tulile tikanyo? Kana ni y’a beya ba bañwi mwa munahano kamba ni ñañelela fela fa litukelo za ka?’ Mukreste ha liki ku fa mihato yeo muzwale wa hae a swanela kamba a sa swaneli k’u nga mwa litaba ze si ka taluswa ka ku nonga luli mwa Bibele.—Maroma 12:1; 1 Makorinte 4:6.

16. Lu kona ku tusa cwañi ba ba na ni mibonelo ye si ka luka ka za bona beñi, kacwalo ili ku peta kalulo ya butokwa ya mulao wa Kreste?

¹⁶ Mwa linako ze t’ata ze, ki kwa butokwa kwa neku la luna kuli lu bate linzila za ku susuezana ka zona. (Maheberu 10:24, 25; mu bapanye Mateu 7:1-5.) Muta lu bona mizwale ni likaizeli ba luna, kana tulemeno to tunde twa bona tu bonahala hahulu ku luna ku fita mifokolo ya bona? Mañi ni mañi ki wa butokwa hahulu ku Jehova. Ka ku sa tabisa, haki bote ba ba ikutwa ka nzila yeo, nihaiba ka za bona beñi. Ba bañata ba tengamezi fa ku bona fela mifokolo ni ku sa petahala kwa bona kwa ka butu. Kuli lu susueze ba ba cwalo—ni ba bañwi—kana lwa kona ku lika ku ambola ni yo muñwi kamba ba babeli fa mukopano o muñwi ni o muñwi, ili ku ba bonisa libaka ha lu nga ka butuna ku ba teñi kwa bona ni kabelo ya butokwa ye ba eza mwa puteho? Ki tabo hakalo ku ezisa milwalo ya bona ku ba ye bubebe ka nzila yeo mi kacwalo ili ku peta mulao wa Kreste!—Magalata 6:2.

Mulao wa Kreste Wa Sebeza

17. Ki mwa linzila mañi ze shutana m’o mu bona mulao wa Kreste u nze u sebeza mwa puteho ya mina?

¹⁷ Mulao wa Kreste u sweli wa sebeza mwa puteho ya Sikreste. Lwa iponela ona ka zazi—muta Lipaki sina luna ba abana ka cisehelo taba ye nde, muta ba omba-ombana ni ku susuezana, muta ba lika ka t’ata ku sebeleza Jehova ku si na taba ni butata bo butuna, muta bashemi ba satalala ku hulisa bana ba bona kuli ba late Jehova ka lipilu ze tabile, muta baokameli ba luta Linzwi la Mulimu ka lilato ni ka mufutumala, ili ku susueza mutapi ku ba ni cisehelo ye tuna ya ku sebeleza Jehova ku ya ku ile. (Mateu 28:19, 20; 1 Matesalonika 5:11, 14) Muta luna si na batu ka buñwi lu sebelisa mulao wa Kreste mwa bupilo bwa luna tota, pilu ya Jehova ya taba hakalo! (Liproverbia 23:15) U bata kuli bao kaufela ba ba lata mulao wa hae o petehile ba pile ku ya ku ile. Mwa Paradaisi ye taha, lu ka bona nako yeo mufuta wa mutu kaufela u ka ba o petehile, nako ye ku si ke kwa ba ni balobi ba milao, ni nako yeo muta tengamo kaufela ya lipilu za luna ikaba mwatas’a tamaiso. Ki mupuzo o makaza hakalo wa ku pila ka mulao wa Kreste!

[Litaluso za kwatasi]

Ki Sifi Se Mu Hupula?

◻ Ki kabakalañi Krestendomu ha palezwi ku utwisisa sisupo sa mulao wa Kreste?

◻ Ne lu kana lwa sebelisa cwañi mulao wa Kreste mwa lubasi?

◻ Ki sifi se lu lukela ku tokolomoha, mi ki sifi se lu lukela ku eza, kuli lu sebelise mulao wa Kreste mwa puteho?

◻ Maeluda ne ba kana ba ipeya cwañi ku utwa mulao wa Kreste mwa ku sebelisana kwa bona ni puteho?

[Siswaniso se si fa likepe 30]

Mwan’a mina u n’a ni butokwi bo butuna bwa lilato

[Siswaniso se si fa likepe 31]

Balisana ba luna ba ba lilato ki ba ba wetulusa hakalo!