18, 19. Ki kalulo mañi yeo maeluda ba Sikreste ba peta ka ku swalisana ni Magalata 6:2, 5?

¹⁸ Maeluda ba Sikreste ba lukela ku lwala buikalabelo bwa bona kwa mutapi wa Mulimu. Ba swanela ku fa kemelo. Sina ka mutala, Paulusi n’a bulezi kuli: “Banabahesu, mutu h’a swelwi a eza mulatu, mina ba ba na ni Moya, mu mu kutise ka moya o musa; mi u tokomele, u ka suhana u likwa ni wena. Mu lwalisane milwalo, mi mu pete cwalo mulao wa Kreste.” Muapositola y’o hape n’a ñozi kuli: “Mutu ni mutu u ka lwala [mushimbo, NW] wa hae.”—Magalata 6:1, 2, 5.

¹⁹ Lu kona cwañi ku lwalelana milwalo mi niteñi inze lu lwezi mushimbo wa luna? Fapahano ye mwa taluso ya manzwi a Sigerike a’ tolokilwe “milwalo” ni “mushimbo” i fa sinotolo ku seo. Haiba Mukreste a ba mwa but’ata bwa kwa moya bo bu li mulwalo o mutuna ku yena, maeluda ni balumeli ba bañwi ne ba ka mu tusa, kacwalo ili ku mu tusa ku lwala “milwalo” ya hae. Niteñi, mutu y’o yena ka buñwi u libelelwa ku itwalela “mushimbo” wa hae wa buikalabelo ku Mulimu.a Maeluda ka tabo ba lwala “milwalo” ya mizwale ba bona ka susuezo, kelezo ya mwa Mañolo, ni ka tapelo. Niteñi, maeluda ha ba zwisi teñi “mushimbo” wa luna wa ka butu wa buikalabelo bwa kwa moya.—Maroma 15:1.