Lipaki ba Sikreste ba Ba Na ni Munzi wa kwa Lihalimu

“Kono wa luna munzi u kwa lihalimu.”—MAFILIPI 3:20.

 1. Ki mulelo mañi o’ makaza w’o Jehova a na ni ona ka ku ama kwa batu ba bañwi?

BATU ka buñwi ba ba pepezwi fa lifasi-mubu ba ka busa sina malena ni baprisita kwa lihalimu, mane ni fahalimu a mangeloi. (1 Makorinte 6:2, 3; Sinulo 20:6) Ki niti ye makaza hakalo yeo! Niteñi, ki sa n’a lelile Jehova, mi wa si taleleza ka Mwan’a hae wa libanda, Jesu Kreste. Ki kabakalañi Mubupi wa luna h’a eza nto ye cwalo? Mi zibo ya seo i swanela ku ama cwañi Mukreste kacenu? Ha lu boneñi ka m’o Bibele i alabela lipuzo zeo.

 2. Ki nto ifi ye nca yeo Joani Mukolobezi n’a i zibahalize kuli Jesu n’a ka i eza, mi nto ye nca yeo ne i swalisani ni nto mañi?

² Muta Joani Mukolobezi n’a lukiseza Jesu nzila, n’a zibahalize kuli Jesu n’a ka eza nto ye ñwi ye nca. Ze ñozwi zi li: “[Joani] n’a luta batu, a li: Mwamulaho a ka, ku taha yo muñwi ya ni fita kwa mata; mi ha ni lukeli ku inama ni ku tamulula kwele ya likatulo za hae. Na, ni mi kolobeza ka mezi; kono yena u ka mi kolobeza ka Moya o Kenile.” (Mareka 1:7, 8) Nako yeo i si ka fita kale, ne ku si na ya n’a kolobelizwe ka moya o kenile. Yeo n’e li tukiso ye nca ye ama moya o kenile, mi ne i ama mulelo wa Jehova o’ ne u se u bat’o patululwa ili ku b’akanya batu ba fa lifasi-mubu kwa neku la bubusi bwa kwa lihalimu.

‘Ku Pepwa Sinca’

 3. Ki lika lifi ze nca ka za Mubuso wa kwa lihalimu zeo Jesu n’a talusize ku Nekudema?

³ Ha n’a li hamoho kwa mukunda ni Mufalisi ya na zibahala hahulu, Jesu n’a patuluzi ze ñata ka za mulelo wo wa bumulimu. Mufalisi, Nekudema, n’a tile ku Jesu busihu, mi Jesu n’a mu bulelezi kuli: “Mutu h’a sa pepwi sinca, h’a koni ku bona mubuso wa Mulimu.” (Joani 3:3) Nekudema, y’o ka ku ba Mufalisi u swanela ku ba ya n’a itutile Mañolo a Siheberu, n’a ziba se siñwi ka za niti ye makaza ya Mubuso wa Mulimu. Buka ya Daniele ne i polofitile kuli Mubuso ne u ka fiwa ku “yo muñwi ya swana sina mwan’a mutu” ni kwa “sicaba sa ba ba kenile ba Muambakani-ya-Pahami.” (Daniele 7:13, 14, 27) Mubuso ne u na ni ku “ketula ni ku feza” mibuso kaufela ni ku ba teñi ku ya ku ile. (Daniele 2:44) Ka mo ku bonahalela luli, Nekudema na hupuzi kuli bona bupolofita b’o ne bu ka talelezwa kwa neku la sicaba sa Sijuda; kono Jesu n’a ize kuli ku bona Mubuso, mutu n’a na ni ku pepwa sinca. Nekudema n’a si ka utwisisa, kacwalo Jesu n’a zwezipili ku bulela kuli: “Mutu h’a sa pepwi ka mezi ni ka Moya, h’a koni ku kena mwa mubuso wa Mulimu.”—Joani 3:5.

 4. Ku bao ba ba pepwa ka moya o kenile, swalisano ya bona ni Jehova i ka cinca kamukwaufi?

⁴ Joani Mukolobezi n’a bulezi ka za kolobezo ya moya o kenile. Cwale, Jesu u ekeza kuli mutu u swanela ku pepwa ka moya o kenile haiba u na ni ku kena mwa Mubuso wa Mulimu. Ka ku pepwa ko ku ikemezi k’o, banna ni basali ba ba si ka petahala ba ba mwa swalisano ye ipitezi hahulu ni Jehova Mulimu. Ba ba bana ba hae ba ba añuzwi. Lu bala kuli: “Bona ba ba mu amuhezi [Jesu], u ba file mata a ku fetuha bana ba Mulimu, bona ba ba lumela libizo la hae, Ba ba si ka pepwa ki mali, kamba ku lata kwa nama, kamba ku lata kwa mutu, kono ba ba pepilwe ki Mulimu.”—Joani 1:12, 13; Maroma 8:15.

Bana ba Mulimu

 5. Ki lili fo balutiwa ba ba sepahala ne ba kolobelizwe ka moya o kenile, mi ki likezo mañi ze swalisani za moya o kenile ze ne li ezahalile ka nako ye swana?

⁵ Muta Jesu n’a bulezi ku Nekudema, moya o kenile ne se u li kale fahalimw’a Jesu, ku mu tozeza bulena bwa hae bwa kwapili mwa Mubuso wa Mulimu, mi Mulimu n’a itumelezi Jesu patalaza sina Mwan’a Hae. (Mateu 3:16, 17) Jehova n’a tahisize bana ba bañata ba kwa moya fa Pentekonta ka 33 C.E. Balutiwa ba ba sepahala ba ne ba kubukani mwa ndu ya fahalimu mwa Jerusalema ne ba kolobelizwe ka moya o kenile. Ka nako ye swana, ne ba pepilwe sinca ka moya o kenile ili ku ba bana ba Mulimu ba kwa moya. (Likezo 2:2-4, 38; Maroma 8:15) Hape, ne ba tozizwe ka moya o kenile ka mulelo wa kwapili wa ku ca sanda sa lihalimu, mi ne ba swailwe isali kwa makalelo ka moya o kenile sina sisupo sa buniti bwa sepo yeo ya kwa lihalimu.—2 Makorinte 1:21, 22.

 6. Mulelo wa Jehova ki ufi kwa neku la Mubuso wa kwa lihalimu, mi ki kabakalañi ha ku swanela kuli batu ba fa lifasi ba be ni kabelo mwateñi?

⁶ Bao ne ili bona batu ba pili ba ba si ka petahala ba ne ba ketilwe ki Mulimu ku kena mwa Mubuso. F’o kikuli, hasamulaho wa ku shwa kwa bona ni ku zuha, ne ba ka ba lilama za kopano ya Mubuso wa kwa lihalimu ye ne i ka busa fahalimw’a batu ni mangeloi. Jehova u lelile kuli ka Mubuso wo, libizo la hae le lituna li ka keniswa mi bubusi bwa hae bu ka bub’aniswa mwahal’a pupo kaufela. (Mateu 6:9, 10; Joani 12:28) Ki ko ku swanela hakalo kuli batu ba na ni kabelo mwa Mubuso w’o! Satani n’a itusisize batu mwa ku zusa shemaeto ya hae ya pili kwa neku la bubusi bwa Jehova kwamulaho mwa simu ya Edeni, mi cwale Jehova u lela kuli batu ba ka itusiswa mwa ku tahisa kalabo kwa shemaeto yeo. (Genese 3:1-6; Joani 8:44) Muapositola Pitrosi n’a ñolezi baketiwa ba ba ka busa mwa Mubuso w’o kuli: “Ku lumbwe Mulimu, Ndat’ahe Mulen’a luna Jesu Kreste, kakuli mwa butuna bwa sishemo sa hae u lu pepile la bubeli, kuli ka ku zuha kwa Mulena kwa bafu, lu be ni sepo ye pilisa; Mi lu fiwe sanda sa bufumu bo bu sa boli, bo bu sa nyazahali, bo bu sa undi, bo bu bulukezwi mina kwa lihalimu.”—1 Pitrosi 1:3, 4.

 7. Ki swalisano mañi ni Jesu ye ikemezi ye ikoliwa ki ba ba kolobelizwe ka moya o kenile?

⁷ Sina bana ba ba añuzwi ba Mulimu, Bakreste ba ba ketilwe bao, ne ba fitile fa ku ba banyani ba Jesu Kreste. (Maroma 8:16, 17; 9:4, 26; Maheberu 2:11) Bakeñisa kuli Jesu na bonahalize kuli ne li yena Peu ye ne i sepisizwe ku Abrahama, bona Bakreste ba ba tozizwe ka moya b’a ki kalulo ye swalisani, kamba ye bakwela yona Peu yeo, ili ye ka fa mbuyoti kwa mufuta wa mutu o na ni tumelo. (Genese 22:17, 18; Magalata 3:16, 26, 29) Mbuyoti mañi? Tohonolo ya ku liululwa kwa sibi ni ku kutiswa ku Mulimu ni ya ku mu sebeleza ka nako ya cwale mane ni kamita. (Mateu 4:23; 20:28; Joani 3:16, 36; 1 Joani 2:1, 2) Bakreste ba ba tozizwe fa lifasi-mubu ba etelela ba lipilu ze nde ku yona mbuyoti yeo ka ku eza bupaki ka za muhulwan’a bona Jesu Kreste ni ka za Ndat’a bona wa muañuli, Jehova Mulimu.—Likezo 1:8; Maheberu 13:15.

 8. “Ku patululwa” kwa bana ba ba pepilwe ka moya ba Mulimu ki nto mañi?

⁸ Bibele i bulela ka za “ku patululwa” kwa bona bana ba ba pepilwe ka moya bao ba Mulimu. (Maroma 8:19) Ka ku kena mwa Mubuso sina malena ba ba swalisana ni Jesu, ba abana mwa ku sinya muinelo wa linto wa lifasi ili wa Satani. Hasamulaho, ka lilimo ze sikiti, b’a tusa mwa ku zamaisa lituso za sitabelo sa tiululo kwa mufuta wa mutu mi kacwalo ili ku fitisa lusika lwa mufuta wa mutu fa bupetehi bo ne bu latilwe ki Adama. (2 Matesalonika 1:8-10; Sinulo 2:26, 27; 20:6; 22:1, 2) Ku patululwa kwa bona ku ama zeo kaufela. Ki nto yeo pupo ya mufuta wa mutu ye lumela i nyolwezi ka tibelelo.

 9. Bibele i ama cwañi kwa lilama za Bakreste ba ba tozizwe ba mwa lifasi kaufela?

⁹ Sitopa sa Bakreste ba ba tozizwe mwa lifasi kaufela ki “keleke ya bana ba baeli ba ba ñozwi mabizo mwa lihalimu.” (Maheberu 12:23) Ki bona ba pili kwa ku fumana tuso kwa sitabelo sa tiululo sa Jesu. Hape ba sa li “mubili wa Kreste” ili nto ye bonisa swalisano ya bona ye tuna yo muñwi ku yo muñwi ni ku Jesu. (1 Makorinte 12:27) Paulusi na ñozi kuli: “Kakuli, mubili sina ha u li u li muñwi, mi u na ni lilama ze ñata, lilama kaufela za mubili niha li li ze ñata inz’e li mubili u li muñwi; Kreste ni yena u cwalo. Kakuli luna kaufela lu kolobelizwe mwa Moya u li muñwi, kuli lu be mubili u li muñwi, nihaiba Majuda kamba Magerike, nihaiba ba ba luwilwe, kamba ba ba lukuluhile. Mi kaufela lu nwisizwe kwa Moya u li muñwi.”—1 Makorinte 12:12, 13; Maroma 12:5; Maefese 1:22, 23; 3:6.

“Isilaele wa Mulimu”

10, 11. Ki kabakalañi ha ne ku tokwiwa Isilaele yo munca mwa lilimo za mwanda wa pili, mi ki bomañi ba ne ba bile sicaba se sinca seo?

¹⁰ Ku fitelela lilimo ze eza 1,500 pili Jesu a si ka taha sina Mesiya ya na sepisizwe, sicaba sa Isilaele wa kwa nama ne li batu ba Jehova ba ba ipitezi. Ku si na taba ni likupuliso za kamita, sicaba mukatumbi ne si si ka sepahala. Muta Jesu n’a tilo esha, sicaba ne si mu hanile. (Joani 1:11) Kacwalo, Jesu na bulelezi baeteleli ba bulapeli bwa Sijuda kuli: “Mu ka amuhiwa mubuso wa Mulimu, mi u ka fiwa sicaba si sili, se si ka beya lukau lwa ona.” (Mateu 21:43) Ku lemuha sicaba seo se si “beya lukau [lwa Mubuso]” ki kwa butokwa kwa neku la puluso.

¹¹ Sicaba se sinca seo ki puteho ya Bakreste ba ba tozizwe ye pepilwe fa Pentekonta ka 33 C.E. Lilama za yona za pili n’e li balutiwa ba Jesu ba Sijuda ba ne ba mu amuhezi sina Mulen’a bona wa kwa lihalimu. (Likezo 2:5, 32-36) Niteñi, ne ba li lilama za sicaba sa Mulimu se sinca, isiñi fa mutomo wa ku ba kwa bona Majuda, kono fa mutomo wa ku ba ni tumelo ku Jesu. Kacwalo, Isilaele yo munca wa Mulimu y’o n’e li nto ye ikemezi—ili sicaba sa kwa moya. Muta buñata bwa Majuda ne ba hanile ku amuhela Jesu, memo ya ku ba silama sa sicaba se sinca ne i yandululezwi kwa Masamaria mi ku zwa f’o ni ku Balicaba. Sicaba se sinca seo ne si bizwa “Isilaele wa Mulimu.”—Magalata 6:16.

12, 13. Ne ku bonahezi cwañi hande kuli Isilaele yo munca ne isi fela sikwata sa balapeli ba Sijuda?

¹² Muta ba ne ba si Majuda ne ba bile baproselite mwa Isilaele wa ikale, ne ba na ni ku ipeya kwa Mulao wa Mushe, mi banna ne ba na ni ku bonisa seo ka ku ya kwa mupato. (Exoda 12:48, 49) Bakreste ba bañwi ba Sijuda ne ba ikutwile kuli nto ye swana ne i lukelwa ku eziwa ku bao ba ne ba si Majuda mwa Isilaele wa Mulimu. Niteñi, Jehova n’a lelile nto i sili. Moya o kenile ne u etelezi muapositola Pitrosi kwa ndu ya Mulicaba Kornele. Muta Kornele ni lubasi lwa hae ne b’a ngile muhato kwa lushango lwa Pitrosi, ne ba amuhezi moya o kenile—mane ba si ka kolobezwa kale mwa mezi. Seo ne si bonisize hande kuli Jehova n’a amuhezi Balicaba bao sina lilama za Isilaele wa Mulimu ku si na tokwahalo ya kuli ba ipeye kwa Mulao wa Mushe.—Likezo 10:21-48.

¹³ Palo ye ñwi ya balumeli ne ba fumani t’ata ku amuhela taba yeo, mi kapili-pili taba kaufela ne i na ni ku buhisanwa ki baapositola ni maeluda mwa Jerusalema. Sitopa sa tamaiso seo ne si teelelize kwa bupaki bo ne bu talusa ka butungi ka m’o moya o kenile ne u bezi ni m’ata fahalimw’a balumeli ba ne ba si Majuda. Patisiso ya mwa Bibele ne i bonisize kuli seo ne ili talelezo ya bupolofita bo ne bu buyelezwi. (Isaya 55:5; Amosi 9:11, 12) Katulo ye nepahalile ne i fitilwe ku yona ya kuli: Bakreste ba ne ba si Majuda ne ba sa tokwi ku ipeya kwa Mulao wa Mushe. (Likezo 15:1, 6-29) Kacwalo, Isilaele wa kwa moya luli ne ili sicaba se sinca mi isiñi fela sikwata sa balapeli ba Sijuda.

14. Ki sika mañi se si taluswa ki ku biza kwa Jakobo puteho ya Sikreste sina “masika a lishumi ka a mabeli a’ hasani”?

¹⁴ Ka ku swalisana ni seo, muta n’a ñolela kwa Bakreste ba ba tozizwe ba mwa lilimo za mwanda wa pili, mulutiwa Jakobo n’a ñolezi liñolo la hae kwa “masika a lishumi ka a mabeli a’ hasani.” (Jakobo 1:1; Sinulo 7:3-8) Kaniti, beñi ba munzi wa Isilaele yo munca ne ba si ka ketelwa mwa mishobo tota. Ne ku si na likalulo ze ikemezi za mishobo ye 12 mwa Isilaele wa kwa moya sina mo ne ku inezi mwa Isilaele wa kwa nama. Nihakulicwalo, pulelo ye buyelezwi ya Jakobo i bonisa kuli ka mubonelo wa Jehova Isilaele wa Mulimu na s’a yolile ka ku tala masika a 12 a Isilaele wa ka sipepo. Haiba Muisilaele wa ka sipepo na fita fa ku ba silama sa sicaba se sinca, sisimo sa hae sa kwa nama—nihaike kuli n’a li wa lusika lwa Juda kamba Livi—seo ne si sa balwi.—Magalata 3:28; Mafilipi 3:5, 6.

Bulikani Bo Bunca

15, 16. (a) Jehova u bona cwañi lilama ze si Majuda ba Isilaele wa Mulimu? (b) Ki fa mutomo mañi wa ka mulao f’o Isilaele yo munca n’a tahisizwe?

¹⁵ Mwa meto a Jehova, lilama za sicaba se sinca ba ba si Maisilaele ba fita fa ku ba Majuda ba kwa moya tenyene! Muapositola Paulusi n’a talusize kuli: “Kakuli Mujuda tota hasi ye li yena kwande; mi mupato tota hasi o ezwa kwande mwa nama. Kono Mujuda ki ye li yena mwahali; mi mupato ki wa pilu, o ezwa ka moya, isi ka mukwa fela; Mujuda yo, ku lumbwa kwa hae ha ku zwi kwa batu, kono ku zwa ku Mulimu.” (Maroma 2:28, 29) Buñata bwa Balicaba ne b’a ngile muhato kwa pizo ya ku ba kalulo ya Isilaele wa Mulimu, mi kezahalo yeo ne i talelelize bupolofita bwa Bibele. Sina ka mutala, mupolofita Hosea na ñozi kuli: “Ni ta bonisa lilato ku ba ba ne ba bizwa “Batoiwa”; mi ku ba ba ne ba bizwa “Batu ba sili”, ni ka li: “Mu batu ba ka”, mi bona ba ka alaba, ba li: “U Mulimu wa luna.”—Hosea 2:23, Bibele ye Kenile, 1984; Maroma 11:25, 26.

¹⁶ Haiba Maisilaele ba kwa moya ne ba siyo mwa tamo ya bulikani bwa Mulao wa Mushe, n’e li fa mutomo mañi f’o ne ba li kalulo ya sicaba se sinca? Jehova n’a ezize bulikani bo bunca ni sicaba sa kwa moya seo ka Jesu. (Maheberu 9:15) Muta Jesu n’a kalisize Kupuzo ya lifu la hae, ka Nisani 14, 33 C.E., n’a fitisize sinkwa ni veine kwa baapositola ba 11 ba ba sepahala ni ku bulela kuli veine ne i swaniseza “mali a bulikani.” (Mateu 26:28; Jeremia 31:31-34) Sina ha ku talusizwe mwa taba ya Luka, Jesu n’a bulezi kuli sinwiso sa veine ne si swaniseza “bulikani bo bunca.” (Luka 22:20) Ka talelezo ya manzwi a Jesu, muta moya o kenile ne u suluzwi fa Pentekonta mi Isilaele wa Mulimu na pepilwe, Mubuso ne u’ ngilwe ku Isilaele wa kwa nama ni ku fiwa kwa sicaba se sinca, sa kwa moya. Mwa sibaka sa Isilaele wa kwa nama, sicaba se sinca seo cwale ne si li mutang’a Jehova, se si kopanyizwe ka lipaki za hae.—Isaya 43:10, 11.

“Jerusalema Yo Munca”

17, 18. Ki litaluso mañi ze filwe mwa buka ya Sinulo ka za kanya ye libelezi Bakreste ba ba tozizwe?

¹⁷ Ki kanya kwa butuna hakakañi ye libelezi bao ba ba filwe tohonolo ya ku abana mwa pizo ya kwa lihalimu! Mi ki ko ku tabisa hakalo ku ituta ka ze mbwetukisa z’e ba libelezi! Buka ya Sinulo i lu fa mibelukela ye nyangumuna ya za sanda sa bona sa kwa lihalimu. Sina ka mutala, kwa Sinulo 4:4, lu bala kuli: “Lubona [lwa Jehova] ne lu beilwe mwahali ki mabona a 24; mi mwa mabona, na bona ba bahulu ba ba 24, ba ba inzi, ba apezi liapalo ze sweu, mi kwa litoho ba apezi likuwani za bulena za gauda.” Bona ba bahulu ba 24 bao ki Bakreste ba ba tozizwe, ba ba zusizwe mi cwale ba inzi mwa maluko a kwa lihalimu ao Jehova n’a ba sepisize. Likuwani za bona za bulena ni mabona li lu hupulisa ka za busepahali bwa bona. Ha mu nahane hape, ka za tohonolo ya bona ye pahami ka ku mbwetukisa ya ku sebeza kwa matuko a lubona lwa Jehova!

¹⁸ Kwa Sinulo 14:1, lu ba ni mubelukela o muñwi: “Cwale na talima, mi na bona Ngunyana a yemi fa lilundu la Sioni, a na ni batu ba ba eza 144,000, ili ba ba na ni Libizo la hae, ni Libizo la Ndat’ahe, le li ñozwi fa lipata za bona.” F’a lu bona palo ya makutela-kaufi ya ba ba tozizwe bao—ili 144,000. Mayemo a bona a silena a lemuhiwa ka ku yema kwa bona ni Mulena wa Jehova ya beilwe fa lubona, “Ngunyana,” Jesu. Mi ba inzi fa Lilundu la Sioni la kwa lihalimu. Lilundu la Sioni la fa lifasi-mubu ne li fo ne ku inzi Jerusalema, muleneñi wa silena wa Isilaele. Lilundu la kwa lihalimu la Sioni li yemela mayemo a pahamisizwe a Jesu ni bacalifa hamoho ba hae, ba ba eza Jerusalema wa kwa lihalimu.—2 Makolonika 5:2; Samu 2:6.

19, 20. (a) Ki kopano ya kwa lihalimu mañi yeo Bakreste ba ba tozizwe ba ka ba kalulo ya yona? (b) Ne ili mwahal’a silengo sa nako ye fita kai m’o Jehova n’a ketile bao munzi wa bona ne u ka ba kwa lihalimu?

¹⁹ Ka ku swalisana ni se, ba ba tozizwe mwa kanya ya bona ya kwa lihalimu hape ba bulelwa sina “Jerusalema yo munca.” (Sinulo 21:2) Jerusalema wa fa lifasi-mubu ne li “munzi wa Mulena yo mutuna” mi hape ni f’o tempele ne i tomilwe teñi. (Mateu 5:35) Jerusalema yo munca wa kwa lihalimu ki kopano ya silena ya Mubuso ili yeo ka yona Mubusi yo mutuna, Jehova, ni Mulena wa hae ya ketile, Jesu, ba sweli ku busa cwale mi ni mo sebelezo ya buprisita i sweli ku eziwa, limbuyoti ze tuna ha li nze li sweli ku buba ku zwelela kwa lubona lwa Jehova kwa neku la ku foliswa kwa mufuta wa mutu. (Sinulo 21:10, 11; 22:1-5) Mwa pono ye ñwi, Joani u utwa Bakreste ba ba tozizwe, ba ba zusizwe ili ba ba sepahala ba bulelwa sina ‘musal’a Ngunyana.’ Ki swanisezo ye nde hakalo ya silikani se ba ka ikola ni Jesu ni ku itatela kwa bona ku ipeya kwatas’a hae! Ha mu keng’ele fela tabo ye ka ba teñi muta wa mafelelezo wa ku bona kwa nalulelule ha ka amuhela mupuzo wa hae wa kwa lihalimu. Kwa mafelelezo cwale, “linyalo la Ngunyana” li kona ku ezahala! Yona kopano yeo ya bulena ya kwa lihalimu ka nako yeo cwale i ka kwanelelela.—Sinulo 19:6-8.

²⁰ Ee, limbuyoti ze makaza li bulukezwi bao muapositola Paulusi n’a bulezi kuli: “Kono wa luna munzi u kwa lihalimu.” (Mafilipi 3:20) Ibata iba lilimo ze likiti z’e peli, Jehova n’a nza sweli ku keta bana ba hae ba kwa moya ni ku ba b’akanya kwa neku la sanda sa bona sa kwa lihalimu. Ka ku ya ka bupaki bo bu li teñi kaufela, ona musebezi wa ku ketahanya ni ku b’akanya w’o se u tuha u fela. Kono ne ku na ni ze ñata ze ne li ka latelela, sina ha ne ku sinuzwi mwa pono ya Joani ye ñozwi kwa Sinulo kauhanyo 7. Kacwalo cwale, sikwata se siñwi sa Bakreste si tokwa mamelelo ya luna, mi lu ka ama kwa sikwata seo mwa taba ye tatama.

Kana Mwa Hupula?

◻ Ki likezo mañi ze fapahana za moya fahalimw’a bao ba ba na ni sanda sa kwa lihalimu?

◻ Ki silikani mañi se situna seo ba ba tozizwe ba ka ikola ni Jehova? ni Jesu?

◻ Puteho ya Bakreste ba ba tozizwe i talusizwe cwañi mwa Bibele?

◻ Ki fa mutomo ufi wa ka mulao f’o Isilaele wa Mulimu n’a tomilwe?

◻ Bakreste ba ba tozizwe ba libelezwi ki limbuyoti mañi za kwa lihalimu?

[Maswaniso a fa likepe 8]

Mwahal’a silengo sa nako ye fita fa lilimo ze likiti ze peli, Jehova n’a ketile bao ba ne ba ka busa mwa Mubuso wa kwa lihalimu