TUTO 57
Muswanela Kuezañi Haiba Muezize Sibi Sesituna?
Nihaike kuli mulata hahulu Jehova mi mulika ka taata kuambuka lika zatoile, mukaezanga mafosisa ka linako zeñwi. Nihakulicwalo, libi zeñwi ki zetuna hahulu kufita zeñwi. (1 Makorinte 6:9, 10) Haiba mueza sibi, muhupule kuli Jehova usa milata; watabela kumiswalela ni kumitusa.
1. Muswanela kuezañi kuli Jehova amiswalele?
Batu babalata Jehova baikutwanga hahulu bumaswe muta baeza sibi sesituna. Kono baomba-ombiwanga ki sepiso yanaafile Jehova kwa batu bahae, yeli: “Libi zamina niha likaba za bufubelo bobutona, likafetuha zesweu sina litwa.” (Isaya 1:18) Haiba lubakela libi zaluna luli, Jehova uka luswalela. Lukona kubonisa cwañi kuli lubakile? Bakeñisa kuli lukaikutwa bumaswe bakeñisa sibi seluezize, lukatuhela kueza nto ifi kamba ifi yemaswe ni kukupa Jehova kuli aluswalele. Mi hasamulaho lukaeza ka taata kucinca mikwa kamba minahano yaluna yemaswe yelutahiselize kueza sibi, mi lukalika molukonela kaufela kupila ka kulatelela likuka zekenile za Jehova.—Mubale Isaya 55:6, 7.
2. Jehova uitusisanga cwañi baana-bahulu kuli balutuse haluezize sibi?
Haiba luezize sibi sesituna, Jehova ulubulelela kuli ‘lubize baana-bahulu ba puteho.’ (Mubale Jakobo 5:14, 15.) Baana babaketilwe ba, balata Jehova ni lingu zahae. Bakona kulutusa kuli lube ni silikani sesinde ni Jehova hape.—Magalata 6:1.
Baana-bahulu bakona kulutusa cwañi haluezize sibi sesituna? Baana-bahulu bababeli kamba babalaalu baka lueleza ka kuitusisa Mañolo. Kuzwa fo, baka lufa liakalezo zeka lutusa ni kulususueza ilikuli lusike lwakutela kueza sibi hape. Mwendi baka lulilimanisa kueza misebezi yemiñwi mwa puteho kufitela silikani saluna ni Jehova sitiya hape. Haiba mutu uezize sibi sesituna kono habakeli sibi seo, baana-bahulu bazwisanga mutu yacwalo mwa puteho kuli mizwale ni likaizeli mwa puteho basike baeza nto yeswana.
MUBATISISE
Muitebuhe hahulu ku Jehova bakeñisa mwalutusezanga haluezize sibi sesituna.
3. Kuipulela libi zaluna kulutusa kutiisa silikani saluna ni Jehova hape
Haiba lueza sibi, lufoseza Jehova, kacwalo, lutokwa kutaluseza Jehova libi zaluna. Mubale Samu 32:1-5, mi kihona mukanyakisisa puzo yelatelela:
Ki kabakalañi hakuli kokunde kuipulelanga libi zaluna ku Jehova kufita kupata libi zeo?
Kwandaa kutaluseza Jehova libi zaluna, lukaikutwa kuimuluha haiba lukupa baana-bahulu kuli balutuse. Mubuhe VIDIO, mi kihona mukanyakisisa puzo yelatelela.
Mwa vidio, baana-bahulu nebatusize cwañi bo Canon kutiisa silikani sabona ni Jehova hape?
Luswanela kulukuluha kutaluseza baana-bahulu sibi saluna kusina kupata litaba zeñwi; baana-bahulu baitukiselize kulutusa. Mubale Jakobo 5:16, mi kihona mukanyakisisa puzo yelatelela:
Ki kabakalañi kusepahala kwa baana-bahulu hakukona kutahisa kuli kube bunolo ku bona kulutusa?
Muipulele libi zamina, mutaluseze baana-bahulu litaba kaufela, ni kuamuhela tuso yaka mifa Jehova
4. Kuzwisa mutu mwa puteho kwatusa
Mutu yaezize sibi hahana kulatelela likuka za Jehova, hakoni kuzwelapili kuswalisana ni puteho. Ukazwisiwa mwa puteho, mi haluna kuswalisana ni yena kamba mane kubulela ni yena. Mubale 1 Makorinte 5:6, 11 ni 2 Joani 9-11, mi kihona mukanyakisisa puzo yelatelela:
Sina feela mumela hautundulukisanga fulaulo yelubilwe, kukaezahalañi haiba luswalisana ni mutu yazwisizwe mwa puteho?
Babañata bane bazwisizwe mwa puteho, bakutile bakeñisa kuli kalimelo yene bafilwe, niha nei bautwisize butuku, nei batusize kulemuha kuli nebafoselize Jehova. (Samu 141:5) Mubuhe VIDIO, mi kihona mukanyakisisa puzo yelatelela.
VIDIO: Muyemele Likatulo za Jehova ka Busepahali (9:28)
Mwa vidio yelubuhile, bo Sonja nebatusizwe cwañi hane bazwisizwe mwa puteho?
Kuzwisa mutu yasika baka mwa puteho . . .
kukutekehisa cwañi libizo la Jehova?
kubonisa cwañi kuli Jehova unani kutwisiso mi walulata?
5. Jehova waluswalelanga haiba lubaka
Jesu naaitusisize swanisezo yelutusa kuutwisisa mwaikutwelanga Jehova muta mutu abakela libi zahae. Mubale Luka 15:1-7, mi kihona mukanyakisisa puzo yelatelela:
Taba ye kwa timana ye imilutañi ka za Jehova?
Mubale Ezekiele 33:11, mi kihona mukanyakisisa puzo yelatelela:
Ki nto mañi ya butokwa yelutokwa kueza kuli lubonise kuli lubakile?
Ka kuswana ni mulisana, Jehova wababalela lingu zahae
BABAÑWI BABULELANGA KULI: “Nasaba kuipiha kwa baana-bahulu bakeñisa kuli baka nizwisa mwa puteho.”
Mukona kubulelelañi mutu yaikutwa cwalo?
LITABA KA BUKUSWANI
Haiba luezize sibi kono lwabakela libi zeo luli ni kuzwelapili kuambuka lika zemaswe, Jehova uka luswalela.
Mulundulule
Ki kabakalañi hakuli kokunde kuipulela libi zaluna ku Jehova?
Luswanela kuezañi kuli Jehova aswalele libi zaluna?
Ki kabakalañi haluswanela kuipiha kwa baana-bahulu haiba luezize sibi sesituna?
MUBONE LITABA ZEÑWI
Mubone mo muuna yomuñwi naaboniselizwe makeke ki Jehova sina moitaluseza Isaya 1:18.
Kuzwisa mutu mwa puteho kukona kutusa cwañi sifosi ni babasika fosa?
“Libaka Kuzwisa Sifosi Mwa Puteho Haili Kezo Yelilato” (Tawala ya Mulibeleli, April 15, 2015)
Muitute momukona kutaluseza mutu yasi Paki ka za taba ya kuzwisa mutu mwa puteho.
“Kana Lipaki za Jehova Baambukanga Batu Bane Babanga Mwa Bulapeli Bwabona?” (Taba ya fa webusaiti)
Mwa likande lelili, “Nenitokwa Kukutela ku Jehova,” muitute libaka muuna yomuñwi yanaatuhezi kulapela Mulimu haikutwa kuli Jehova naamutusize kukutela ku yena hape.
“Bibele Yacincanga Bupilo Bwa Batu” (Tawala ya Mulibeleli, April-June, 2012)