Mu Pile Bupilo bo bu Itikanelezi, bo bu Bunolo

“Cwale mu tokomele mo mu zamaela, mu si ke mwa ba sina likuba, kono mu be sina ba ba butali . . . kakuli mazazi s’a li a maswe.”—MAEFESE 5:15, 16.

 1, 2. Ki sifi se si li musebezi o mutuna kacenu, mi ne si kana sa bapanyiwa kwa nto mañi?

KI MUSEBEZI o mutuna ku keta lika ze swanelwa ku ezwa pili, ku taleleza buikalabelo, ni ku neela nako ni m’ata kwa likalulo ze butokwa za bupilo ka nzila ye utwahala. Ki musebezi o mutuna hape ku pima ku eza lika ka nzila ye fitelezi ni ku buluka buitikanelelo bo bu tiile bwa munahano ni maikuto.—Maefese 5:17; 1 Timotea 4:8; 1 Pitrosi 1:13.

² Ona musebezi o mutuna wo ne u kana wa bapanywa ku o talimani ni mubapali ya lika ku zamaya fa waya ye sisani ye tamezwi mwahalimu. Ku palelwa ku eza lika ka buitikanelelo ne ku ka tisa kozi ku yena. Ka ku swana, ku palelwa ku ba ni buitikanelelo bwa kwa moya ne ku ka tisa kozi ku luna. Mutu ya zamaya fa waya ye kwahalimu kaniti luli n’a si ke a ikimezwa ili yena ka lika ze ñata. U lwala fela lika za butokwa. Kacwalo, kuli lu buluke buitikanelelo bwa luna bwa kwa moya, lu tokwa ku pila bupilo bo bu bunolo, bo bu si ka imezwa.—Maheberu 12:1, 2.

 3. Ki sifi se lu lukela ku eza kuli lu pile bupilo bo bu bunolo?

³ Kuli lu pile bupilo bo bu bunolo, lu lukela ku ikenya ili luna mwa lika zeo fela ze tokwahala mwa ku buluka buiketo bo bu utwahala. Ka ku fapahana ni seo balutiwa ba hae ba swanela ku si bata—Mubuso wa Mulimu ni ku luka kwa Hae—Jesu Kreste n’a bulezi ka za “linto [ze] batwa ki bahedeni.” (Mateu 6:32, 33) Kacwalo Jesu na lu elelize ku pima ku ikubukanyeza ze ñata za zona linto zeo. Ki kabakalañi? Kakuli li ezisa bupilo bwa luna ku ba bo bu tatezani ni ku lu yendulela ku sili. (Luka 12:16-21; 18:25) Ye ki kelezo ye nde, ku si na taba ni kuli lu fumile kamba lu shebile, ba ba itutile kamba ku tokwa.

Libaka Ha Ku Li Kwa Butokwa Hahulu Cwale

 4. Ki kabakalañi ku pila bupilo bo bu itikanelezi, bo bu bunolo ha ku li kwa butokwa hahulu kacenu?

⁴ Ku pila bupilo bo bu itikanelezi, ili bo bu bunolo ki kwa butokwa hahulu cwale kakuli Satani ni madimona a hae ba lelekezwi fa lifasi-mubu mi ba lelile ku lu imezwa ni ku hoha mamelelo ya luna ka ku i zwisa kwa sebelezo ya Mulimu. (Sinulo 12:7-12, 17) Kacwalo, taelo ya Bibele i se i bile ya butokwa hahulu ku fita lili kaufela ye li: “Cwale mu tokomele mo mu zamaela, mu si ke mwa ba sina likuba, kono mu be sina ba ba butali. Mu yolise linako kakuli mazazi s’a li a maswe.” (Maefese 5:15, 16) Ee, lu pila mwa lifasi la Satani le li maswe, isiñi mwa lifasi le linca la Mulimu. Kacwalohe, ha lu koni ku ba mwa muinelo wa nyambwanaleka.—2 Makorinte 4:4; 2 Pitrosi 3:7, 13.

 5. Batanga ba Mulimu ba mwa linako za kwaikale ba lu beezi cwañi mutala o munde?

⁵ Batanga ba Mulimu ba ne ba pilile mwa lifasi le le li busiwa ki Diabulosi mwa linako za kwaikale ba lu beezi mutala o munde. Ne “ba ipulezi kuli, bona, ki ba ku sili mi ki baenyi fafasi.” Kacwalo, ba bata “naha ye nde ku fita, ili ya kwa lihalimu.” (Maheberu 11:13-16) Ne ba file kemelo ya bona kwa Mubuso wa lihalimu wa Mulimu, sina ni luna ha lu swanela ku eza cwalo. Ka lona libaka le, muapositola Pitrosi na bizize Bakreste sina “ba ku sili ni baenyi.” (1 Pitrosi 2:11; Mafilipi 3:20) Ka buniti fela, Jesu na bulezi kuli balateleli ba hae ba niti “hasi ba lifasi.” Se si talusa kuli, sina ka mwa na bulelezi muapositola Paulusi, Bakreste ha ba swaneli ‘ku itusisa lifasi ka nzila ye tezi.’—Joani 17:16; 1 Makorinte 7:31.

 6. (a) Ki sifi se lu tokwa ku hupula, mi muinelo wa luna u kona ku bapanyiwa kwa nto mañi? (b) Ki ufi mutala wa temuso w’o kaufel’a luna lu swanela ku mamela?

⁶ Kacwalo kamita lu tokwa ku hupula kuli lifasi le la Satani ki sibaka se si lubeta ku pila ku sona. Ku sitatala ku kona ku tahisa kozi. (1 Joani 5:19; 1 Pitrosi 5:8) Muinelo wa luna ne u kana wa swanisezwa ku mutu ya zamaya mwa simu ye calilwe ka lindalamiti. Ka ku fa mutala wa temuso kwa Bakreste, muapositola Paulusi na bulezi ka za Maisilaele ba ne ba li bukaufi ni ku kena mwa Naha ya Sepiso. Ba bañata ne ba latehezwi ki buitikanelelo bwa bona bwa kwa moya, ba ikenya mwa buozwa, mi ne ba bulailwe ki Mulimu. “Hakulicwalo,” Paulusi n’a ñozi, “ya hupula kuli u yemi, a itibelele, kuli a si ke [a latehelwa ki buitikanelelo bwa kwa moya mi] a wa.”—1 Makorinte 10:12.

Libaka Ha Ku Li Silelezo

 7. Ki tatubisiso ifi ya ka butu ye lu swanela ku eza ka butali?

⁷ Ku pila bupilo bo bu itikanelezi, ili bo bu bunolo ku ka mi sileleza kakuli ku ka mi lumeleza ku ba ni nako ye tuna ni m’ata kwa neku la lika za kwa moya. Kacwalo ka butali mu ipuze ili mina kuli: Kana na nolofaza bupilo bwa ka, kamba ni bu eza bo bu tatezani? Ki lika lifi luli ze li za pili mwa bupilo bwa ka? Ba bañwi ne ba kana ba bulela kuli nako ye ba na ni yona ki ye nyinyani fela mwa ku ituta Bibele kamba mwa ku abana mwa bukombwa bwa mwa simu. Kono libaka ki lifi? Ka mo ku bonahalela, ki ku palelwa kwa bona ku pila bupilo bo bu itikanelezi, bo bu bunolo. Ki kabakalañi ha mu sa bapanyi nako ye mu itusisa mwa lika za ku itabisa, ze cwale ka ku buha televishini, ni nako ye mu itusisa mwa ku sebeleza Jehova mwa kalulo ye ñwi ya musebezi wa Sikreste? Kana ku itusisa kwa mina nako ku itikanelezi? Ku nolofaza bupilo bwa mina ku ka mi fa nako ya ku eza lika ze butokwa ni ku fita, ze kopanyeleza cwalo ku abana ka butuna mwa musebezi wa kutulo ya kwa moya o butokwa ka ku fitisisa.—Mafilipi 1:9, 10; Mateu 9:37.

 8. Mutu u kona ku buluka kamukwaufi kelezo ya Jesu ya ku bata pili Mubuso, mi ki sifi se si fa mutala ka za butokwa bwa muhato wa ku ya fapili?

⁸ Ka buniti fela, musebezi wa mina wa kwa moya ki sisupo se si bonisa haiba mu pila bupilo bo bu itikanelezi, bo bu bunolo. Bakreste ba ba buluka kelezo ya Jesu ya ku bata pili Mubuso wa Mulimu ba zwelapili ka muhato o munde mwa tuto ya kamita ya Bibele, ku fumaneha kwa mikopano, ni mwa bukombwa bwa mwa simu. Muhato wa ku zwelapili wa mufuta o cwalo ki silelezo luli mwa ku pima ku wa. Ne ku kana kwa bapanyiwa kwa ku coba njinga. Bao ba ba likile ku ina fa njinga ye se bat’o fita fa ku yema luli ba itebuha butokwa bwa muhato wa ku zwelapili ku coba. Ka ku swana, haiba fela mu zwelapili ku zamaya ka muhato o munde mwa misebezi ya kwa moya, mu silelelizwe mwa ku latehelwa ki buitikanelelo bwa mina ni ku wa.—Mafilipi 3:16.

 9. (a) Ki ifi temuso ye nde ku luna kaufela? (b) Muta lu singanyeka ka za musebezi, ki lipuzo mañi ze ne lu kana lwa ipuza zona?

⁹ Niteñi, ku na ni tokwahalo ya ku ba ba ba tona, ku hupula kuli ku ikimulula ili luna lika ku kona ku lu fa nako ye tuna ya ku ituta, ku itukiseza mikopano, ni ku tusa ba bañwi. “Muta ni ba mwa muliko wa ku leka nto ye ni sa tokwi, kamba ku nga musebezi o ni sa tokwi,” kona mwa na bulelezi Mukreste yo muñwi wa lipisinisi, “na i kanisa ili na ka zibiso ya ku buluka lika ka bunolo. Ka linako ze ñwi ni na ni ku ba wa ngambu ku ili na.” Kana yeo haki temuso ye nde ku luna kaufela? Muta mu singanyeka ka za musebezi, mwendi ku ekeza kwa ndu ya mina kamba nto ye ñwi, ki kabakalañi ku sa ipuza ili mina kuli: Kana se si ka ekeza kwa mayemo a ka a kwa moya ni a lubasi lwa ka kamba si ka paleliswa mayemo ao? Kana ni ya tokwa luli lika kaufela ze ndongwamwi ki batu ba lifasi, kamba kana na kona ku zwelapili ni si na zona?

10. Mibonelo ya “mutu fela” i fapahana cwañi ni yeo ya “mutu wa moya”?

¹⁰ Nihakulicwalo, ba bañwi ne ba kana ba kanana kuli: ‘Kana muinelo o cwalo wa ku ifana sitabelo luli wa tokwahala? Kana lwa tokwiwa ku pila bupilo bo bu itikanelezi, bo bu bunolo?’ Ki hande, Paulusi n’a bulezi ka za lika “za mutu” ni “litaba za Mulimu” ni ku talusa kuli: “Kono mutu fela h’a amuheli za moya wa Mulimu; kakuli ku yena ki butanya; mi h’a koni ku li ziba, kakuli li lemuhiwa ka moya. Kono mutu wa moya, u atula linto kamukana.” (1 Makorinte 2:11, 14, 15) Mwa kona ka bubebe ku fita fa ku ba “mutu fela” ka ku ndongwama ni ku ikubukanyeza linto za kwa nama ze sa tokwahali. Mwa muinelo o cwalo, ku ifana sitabelo ku bonahala ku ba nto ye fitelezi tikanyo, ni ye bukuba. Kono w’o ki mubonelo wa “mutu fela,” isiñi mubonelo wa “mutu wa moya.”

11. Ki ifi ye ne i ka be i bile nzila ye si ya buitikanelelo ku Nuwe, mi lu pila cwañi bupilo bwa buitikanelelo kacenu?

¹¹ Mutu wa moya ki y’o ya bona lika ka liito la tumelo. U bona lika ka mubonelo wa Mulimu. A mu hupule Nuwe. Kana na ka ba ya itikanelezi haiba, hamulaho wa ku lemuha ka za mulelo wa Mulimu wa ku timeza lifasi ka munda, n’a ka itusisa nako ya hae mwa ku yaha ndu ye tuna ni ye nde ni ku kubukanya liluo la kwa mubili le li ñata? Batili ka mo ku inezi fela! Buiketo bwa hae bwa niti ne bu li kwa aleka. Kwa neku la Nuwe, ku pila bupilo bo bu itikanelezi, bo bu bunolo ne ku ama ku neela mamelelo ye tezi kwa ku yaha aleka ni ku ba “mubuleli wa ku luka,” ku si na taba ni ku sehiwa ki ‘batu fela’ ba ne ba si na tumelo. (2 Pitrosi 2:5; Mateu 24:37-39) Ka ku swana, bakeñisa kuli lu se lu tonisizwe ka za ku atumela kwa mafelelezo a lifasi, nzila fela ye itikanelezi ya bupilo ku luna ki ku beya mamelelo ya luna kwa ku eza tato ya Mulimu ni ku zibahaza taba ye nde, nihaike seo ne si kana sa ama se si bonwa ki ba bañata sina ku hana nzila ya bupilo ye lukile.—1 Joani 2:17.

Jesu U Lu Lutile Mwa Ku Ezeza

12. (a) Ki sifi seo Jesu na bulezi kuli lu tuhele ku si eza, mi ki sifi se lu swanela ku eza ka ku fapahana? (b) Ki kabakalañi cinceho yeo ya mulelo ha i tokwahala?

¹² Mwa Ngambolo ya hae ya fa Lilundu, Jesu na file kelezo ye nde fa ku pila bupilo bo bu itikanelezi, bo bu bunolo. Na bulezi kuli: “Mu si ke mwa ikubukanyeza bufumu mwa lifasi, fo ku na ni maswele ni mafumi a’ ca fateñi, ni fo ku na ni masholi ba ba punya mwateñi, ba ba uzwa.” Jesu na itusisize linzwi la “mu si ke” kakuli batu hañata ba zwelapili ku “ikubukanyeza” lika za kwa mubili. Kono mutu ya fita fa ku ba mulutiwa wa Jesu ha koni ku eza seo ni kamuta. Bupilo bwa hae bu lukela ku ba ni mulelo u sili, sina ha ku bonisizwe ki taelo ya Jesu ye ne i latelela: “Kono mu ikubukanyeze bufumu kwa lihalimu, fo ku si na maswele a’ ca fateñi, ni fo ku si na masholi ba ba punya kwateñi, ba ba uzwa.” Ka ku fa libaka cinceho ya mulelo ye cwalo ha i tokwahala, Jesu na bulezi kuli: “Kakuli fo bu inzi bufumu bwa hao, ki fo i inzi ni pilu ya hao.”—Mateu 6:19-21.

13. Haiba mu na ni ku buluka bufumu kwa lihalimu, ki sifi se mu swanela ku ba ni buikolwiso ka za sona?

¹³ Sifumu sa hao ki nto yeo u hupula kuli ki ya butokwa hahulu. Kana liluo la mina la kwa mubili ki sona sifumu sa mina? Kamba kana ki ku keniswa kwa libizo la Jehova Mulimu ni mupuzo wa hae o sepisizwe? Ku itusisa bupilo bwa mina mwa ku kubukanya bufumu kwa lihalimu isiñi fa lifasi-mubu, mu lukela ku ba ba ba na ni buikolwiso bo butuna ka za buniti bwa Mubuso. Lifasi le linca li lukela ku ba la niti luli kuli mane mwa kona ku li bona ka liito la mina la kutwisiso ni ku ipona teñi isali mina inze mu sebeleza fa ku peta milelo ya Jehova kwa neku la lifasi-mubu. Ka ku swana sina Mushe, mu lukela ku ‘bona Y’o ya sa bonahali’ ni ku ikolwisa ka ku tala kuli ‘u ka fa mupuzo ku bao ba ba mu bata mwa niti luli.’—Maheberu 11:6, 27.

14. Ki lifi ze kona ku ezahala haiba lipilu za luna li ndongwami lika za kwa mubili?

¹⁴ Kono ku cwañi haiba pilu ya mina, ili ye kopanyeleza cwalo ni litakazo ni maikuto a lilato, i ndongwami bufumu bwa kwa mubili? Bibele i talusa kuli: “Kakuli lilato la bufumu ki mubisi wa ze maswe kamukana; mi ba bañwi ka ku hanelela ku bu lakaza, ba keluhile tumelo, mi ba itabile ili bona ka manyando a mañata.” Ku ndongwama lika za kwa mubili ze kona ku lekiwa ki mali ka bunolo fela ha ku koni ku tisa buikolwiso bwa niti ni bo bu inelela. (1 Timotea 6:10; Muekelesia 5:10) Kono kozi ye tuna ni ku fita ki ya kuli, lilato la mali ni lika za kwa mubili li ka sinya swalisano ya hao ni Mulimu, y’o a lu libelela kuli lu mu sebeleze ka “pilu ya [luna] kaufela.”—1 Makolonika 28:9.

15. (a) Ki ufi mutala wa na file Jesu ka ku ama fa liito? (b) Mwa kutwisiso ya kwa nama ni ya kwa moya, mutu u kona ku buluka liito le li bona hande kamukwaufi? (c) Haiba liito la luna la bona hande, pono ya luna ya kwa moya i ka swana cwañi ni ya baapositola ba balalu ba Jesu?

¹⁵ Ku lu tusa ku pima lilaba la lilato la sifumu, Jesu n’a file mitala ye mibeli. Pili, na bulezi kuli: “Lumonyi lwa mubili ki liito. Mi cwale liito la hao ha li bona hande, mubili wa hao kaufela u ka ba ni liseli. Kono liito la hao ha li na ni suyi, mubili wa hao kaufela u ka ba ni lififi.” (Mateu 6:22, 23) Mwa kutwisiso ya kwa nama, liito le li “bona hande” ki liito le li talima ka ku nonga fa sika, ku fa kwa booko mubonahalelo wa lika o lukile. Liito le li sa boni hande li tahisa maswaniso a lyanganisa ni a unsufezi. Ka ku swana, liito la kwa moya le li “bona hande,” kamba le li talima ka ku nonga fa sika, li fa mubonahalelo o lukile wa Mubuso wa Mulimu, isiñi siswaniso fo ku na ni suyi, se si sa bonahali hande se si tahisa kuli lifasi le linca li bonahale sina litangu kamba taba ya mbwashula. Haiba liito la mina la kwa moya li nongile fa sika, lifasi le linca la Mulimu le li sepisizwe li ka ba la niti ku mina sina mo ne u bezi Mubuso kwa baapositola ba balalu ba ne ba bile ni tohonolo ya ku u bona cimo mwa pono ya ka makazo ya ku fetuha kwa Jesu.—Mateu 16:28—17:9; Joani 1:14; 2 Pitrosi 1:16-19.

16. Mwa mutala wa bubeli, Jesu na bonisize kamukwaufi tokwahalo ya ku ba ni buñwi bwa mulelo?

¹⁶ Jesu n’a file mutala wa bubeli. “Ha ku na mutu ya kona ku sebeleza malena a mabeli,” ko na mwa na bulelezi, “kakuli u ka toya yo muñwi, a late yo muñwi, kamba u ka kumalela yo muñwi, a shwaule yo muñwi.” Ka ku tunafaza sisupo, hape na koñomekile tokwahalo ya ku ba ni buñwi bwa mulelo, ka ku bulela kuli: “Ha ku konahali kuli mu sebeleze Mulimu ni Bufumu.” (Mateu 6:24) Seo ka bunolo fela ha si na ku sebeza. Kacwalo Jesu n’a zwezipili kuli: “Kifo, ni mi bulelela, ni li: Mu si ke mwa bilaela ka za bupilo bwa mina, ka se mu ka ca, ni ka se mu ka nwa; nihaiba ka za mibili ya mina, ka se mu ka apala. . . . Kakuli linto zeo kaufela li batwa ki bahedeni; kono Ndat’a mina ya kwa lihalimu u ziba kuli mwa li tokwa kamukana.”—Mateu 6:25-32.

17. (a) Ki sisupo sifi seo Jesu n’a si bonisa ka litaelo za hae ze ama lika za kwa mubili? (b) Ki sifi seo Jesu n’a si koñomeka fa, mi ku pila bupilo bo bu itikanelezi, bo bu bunolo ku ama nto mañi?

¹⁷ Jesu n’a sa talusi kuli balateleli ba hae ba tuhele ku bata lika za kwa mubili ze tokwahala kuli kuti li ka taha ka sipundumukela kamba kuli ba swanela ku ba ni buzwa ni ku hana ku sebeza ili kuli ba kone ku ipabalela ili bona ni mabasi a bona. (1 Timotea 5:8) Batili, kono sisupo ki sa kuli zona lika ze za kwa mubili ze ndongwamwi ki macaba ha li swaneli ku ba mwa sibaka sa pili. Ka ku fapahana, Jesu na elelize kuli: “Kono mu bate pili mubuso wa Mulimu ni ku luka kwa hae, mi linto zeo kamukana mu ka li ekelezwa kwateñi.” (Mateu 6:33) Kacwalo Jesu fa na bulela ka za likonkwani mwa bupilo mi n’a koñomeka mbango ya ku ndongwama lika za kwa mubili. Ku pila bupilo bo bu itikanelezi, bo bu bunolo ku ama ku talimisa meto a luna ka ku nonga ka buñwi fa milelo ya Mubuso, ku beya nto ifi kamba ifi ye ñwi mwa sibaka sa bubeli.

Mutala wa Jesu ni Ba Bañwi

18. Jesu na lu beezi mutala o munde kamukwaufi?

¹⁸ Ha n’a susueza Bakreste kuli lu “tuhele kaufela ze lu imela, ni sibi [sa ku tokwa kamba ku latehelwa ki tumelo] se si lu hanelela fakaufi,” Paulusi n’a susuelize kuli: “Lu zamaye inze lu mata ka ku itiisa mwa siyano ye lukiselizwe luna, lu nze lu talimile Jesu, yena Mutateki ni Mufelelezi wa tumelo.” (Maheberu 12:1, 2) Jesu n’a ineezi ka ku tala kwa milelo ya Mubuso kuli mane muinelo wa hae ne u swana si na ka mwa na u taluselize kuli: “Bo luwawa ba na ni misima, ni linyunywani za lihalimu li na ni liyaleto; kono Mwan’a mutu u tokwile f’a ka samela toho ya hae.” (Mateu 8:20) Ka nako ye swana, Jesu n’a si muimbeyuli. Mañolo a bonisa kuli n’a ikola lico ze nde ni liapalo, niteñi sikonkwani se situna mwa bupilo bwa hae ne li ku peta bukombwa bwa hae. Ka yona nzila yeo Jesu n’a pilile bupilo bo bu itikanelezi, bo bu bunolo.—Luka 5:29; Joani 19:23, 24.

19, 20. (a) Ki mutala ufi wa na beile Paulusi kwa neku la lika za kwa mubili? (b) Ki tuto ifi yeo ba bañata ba itutile yona kacenu, mi ba ikutwa cwañi ka za nzila ya bupilo bwa bona?

¹⁹ Muapositola Paulusi ni yena na beile zeo n’a swanela ku eza pili mwa sibaka sa zona. Na talusize kuli: “Bupilo bwa ka ha ni bu babaleli; ni li, ni feleleze musipili wa ka, ni musebezi o ni filwe ki Mulena Jesu, wa ku paka [taba ye nde, NW] ya sishemo sa Mulimu.” (Likezo 20:24) Ee, ku taleleza bukombwa bo bu butokwa ka ku fitisisa, Paulusi n’a kozwi ka lika ze nyinyani za n’a na ni zona kono ka linako ze ñwi n’a ikolanga ku atelwa. Na ñozwi kuli: “Kai ni kai, ni mwa linto kaufela, ni itutile ku pila nihaiba ka ku kula lico kamba ku lapa, ku atelwa kamba ku taelelwa.”—Mafilipi 4:12.

²⁰ Ka buniti fela batu ba ba fita fa likiti-kiti ze mashumi-shumi ba itutile nto ye swana kacenu. Buñata bwa bona ki likombwa za nako ye tezi za Lipaki za Jehova, ku kopanyeleza cwalo ni balumiwa, mapaina, baokameli ba maeto, ni bao ba ba sebeza kwa sibaka sa mwahal’a macaba sa tamaiso sa kopano ni kwa liofisi za mitai. Hamulaho a lilimo ze ñata mwa sebelezo ya nako ye tezi, ba bañata ba bulela kuli: “Kambe ne ni ka kalisa sinca hape, ne ni si ke na eza nto i sili.”

Limbuyoti Ze Mu Kona Ku Ikola

21, 22. (a) Ki mipuzo mañi ye ikoliwa nihaiba ona cwale ha lu pila bupilo bo bu itikanelezi, bo bu bunolo? (b) Ki limbuyoti mañi za kwapili ze mu kona ku ikola?

²¹ Hailifo ku pila bupilo bo bu itikanelezi, bo bu bunolo ku ama ku eza sitabelo, limbuyoti ni tabo ha li konwi ku likanyezwa. Ka nzila ye cwalo mu ka kona ku ba ni nako ye tuna mwa ku zusezapili milelo ya Mubuso ni sibaka se situna sa ku fumana batu ba ba tabela ni ku ba luta milelo ya Mulimu. Buikolwiso ni tabo ya niti li ka ba za mina, ku kopanyeleza cwalo ni kozo ya mwa munahano ni ku ba ni buniti bwa kuli mu tabisa Jehova Mulimu. Yeo ki mbuyoti ye ne mu kana mwa ikola yona nihaiba ona cwale.—Mafilipi 4:6, 7.

²² Kono limbuyoti za kwapili li ka ba ze tuna ni ku fita, ili ku ezisa litabelo za cwale ze ne mu kana mwa eza ku ba ze nyinyani hahulu ha li bapanywa. Limbuyoti za Jehova li kopanyeleza cwalo ni “bupilo bo bu sa feli.” Ee, yeo i kona ku ba yona mbuyoti ya hao—bupilo bwa kamita mwa tabo mwa lifasi le linca le li lukile la Jehova. Mu pile bupilo bo bu itikanelezi, bo bu bunolo, ni kamuta mu si ke mwa tuhelela lika za lifasi le kuli li mi yendule. Mu hupule kuli Mulimu u ka mi fa ze shukelwa ki pilu ya mina.—Lisamu 21:3, 4; 37:4; 133:3.

Lipuzo za Lundululo

◻ Ki mitala ni liswanisezo lifi ze mu lemuhile kuli li kona ku mi tusa ku pila bupilo bo bu itikanelezi, bo bu bunolo?

◻ Ku pila bupilo bo bu itikanelezi, bo bu bunolo ku kona ku lu sileleza kamukwaufi?

◻ Haiba liito la luna la kwa moya li bona hande, seo si ka talusa nto mañi ku luna?

◻ Jesu n’a lu lutile ku pila bupilo bo bu bunolo kamukwaufi?

◻ Ki lifi limbuyoti za ku pila bupilo bo bu itikanelezi, bo bu bunolo?