U Sepe Jehova!

“U sepe [Jehova, NW ] ka pilu ya hao kaufela.”—LIPROVERBIA 3:5.

 1. Liproverbia 3:5 ne i amile cwañi munahano wa mutangana yo muñwi, mi ki ka ku ba ni ze ne li zwile mwateñi lifi za ka nako ye telele?

YA N’A LI mulumiwa ka nako ye telele u ñola kuli: “‘U SEPE MUÑ’A BUPILO KA PILU YA HAO KAUFELA, MI U SI KE WA TIYELA FA BUTALI BWA HAO.’ Manzwi ao a mwa Bibele, a n’a beilwe mwa sibulukelo sa maswaniso se ne si pahekilwe fa limota mwa ndu ye ñwi ko ne ni pota, n’a sweli mamelelo ya ka. Ka nako kaufela ye ne i siyezi mwa lizazi leo ne ni nyakisisize ka za ona. Na ipuza kuli, kana na, ne ni ka kona ku sepa Mulimu ka pilu ya ka kaufela?” Mutu y’o ka nako yeo n’a na ni lilimo za buhulu ze 21. Fa lilimo za buhulu ze eza 90 mi ili ya sebeza ka busepahali sina eluda mwa Perth, Australia, u kona ku talima kwamulaho kwa bupilo bo bu tezi siselo sa ku sepa Jehova kwa ka pilu kaufela, ku kopanyeleza cwalo ni lilimo ze 26 za musebezi-tuna wa ku tatula likalulo ze nca za bulumiwa mwa Ceylon (ye bizwa cwale sina Sri Lanka), Burma (ye bizwa cwale sina Myanmar), Malaya, Thailand, India, ni Pakistan.a

 2. Liproverbia 3:5 i swanela ku hulisa ku luna buikolwiso mañi?

² “Sepa Jehova ka pilu ya hao kaufela”—manzwi ao a kwa Liproverbia 3:5, ka mo a taluselizwe mwa New World Translation, a swanela ku susueza kaufel’a luna ku zwelapili ku beya bupilo bwa luna ka pilu kaufela ku Jehova, lu na ni buikolwiso bwa kuli w’a kona ku tiisa tumelo ya luna, ku fita mane fa sipimo sa ku tula mikwalelo ye swana sina malundu. (Mateu 17:20) Cwale ha lu tatubeñi Liproverbia 3:5 fa mutomo wa taba ya yona.

Taelo ya Bundate

 3. (a) Ki susuezo mañi ye konwa ku fumanwa mwa likauhanyo za makalelo ze ketalizoho ka z’e ne za Liproverbia? (b) Ki kabakalañi ha lu swanela ku fa mamelelo ye tuna kwa Liproverbia 3:1, 2?

³ Likauhanyo za makalelo ze ketalizoho ka z’e ne za buka ya mwa Bibele ya Liproverbia li tezi maikuto a taelo ya bundate, ili kelezo ye butali ye zwa ku Jehova ya bao kaufela ba ba libelela ku ikola mayemo a ku ba bana mwa mahalimu kamba ku ba ni “tukuluho ya kanya ya bana ba Mulimu,” fa lifasi-mubu le li li paradaisi. (Maroma 8:18-21, 23) Ye ki kelezo ye butali ye neikana ya itusiswa ki bashemi mwa ku hulisa bana. Kelezo ye zwile mubano ki ye kwa Liproverbia kauhanyo 3, ye kalisa ka temuso ye li: “Mwan’a ka, u si ke wa libala milao ya ka, kono pilu ya hao i hupule litaelo za ka.” Mazazi a mafelelezo a lifasi le li maswe la Satani ha nze a liba kwa maungulo a ona, haike lu fe mamelelo ye tuna ni ku fita kwa likupuliso za Jehova. Nzila neikana i bonahezi ku ba ye telele, kono sepiso ku bao kaufela ba ba itiisa ki ya kuli ‘ba ka ekelezwa kwa mazazi ni kwa myaha’—ili bupilo bwa kamita mwa muinelo o munca wa Jehova.—Liproverbia 3:1, 2.

 4, 5. (a) Ki swalisano mañi ye tabisa ye taluswa kwa Joani 5:19, 20? (b) Kelezo ye kwa Deuteronoma 11:18-21 ki ye sebeza cwañi ku t’o fita ni mwa lizazi la luna?

⁴ Swalisano ye tabisa mwahal’a ndate ni mwan’a hae i kona ku ba ye nde luli. Mubupi wa luna, Jehova Mulimu, n’a lukisize kuli ku be cwalo. Kreste Jesu n’a bulezi ka za swalisano ya hae luli ni Jehova ye silikani hahulu kuli: “Mwana h’a koni ku eza se siñwi ili yena, haisi s’a boni Ndate a si eza. Kakuli z’a eza kaufela, ni yena Mwana u li eza cwalo. Kakuli Ndate u lata Mwana, mi u mu bonisa z’a eza kaufela.” (Joani 5:19, 20) Jehova n’a lelile kuli silikani se si swana si be teñi mwahal’a hae ni b’ote ba mwa lubasi lwa hae lwa fa lifasi-mubu, hamohocwalo ni mwahal’a bondate ba butu ni bana ba bona.

⁵ Swalisano ya ka ku sepa ya mwa lubasi ne i susuelizwe mwa Isilaele wa kwaikale. Teñi m’o Jehova n’a elelize bondate kuli: “Mu kenye manzwi e ni mi bulelela mwa lipilu za mina, ni mwa lingana za mina; mu a tame ku ba poniso fa mazoho a mina, a be inge lwamuhelo lwa fa pata, fahali a meto a mina. Mu a lute bana ba mina; u a eze ngambolo ha u inzi mwa ndu ya hao, niha u zamaya u li mwa nzila, niha u y’o lobala, niha u zuha. U a ñole fa mabala a mwa minyako ya ndu ya hao ni fa likwalo za ndu ya hao. Kuli mazazi a mina, ni mazazi a bana ba mina, a ekezehe mwa naha y’a sepisize [Jehova, NW] bokuku a mina ka luci, kuli u ka ba fa yona; a likanelele ni mazazi e li ka nga lihalimu inze li kwahela lifasi.” (Deuteronoma 11:18-21) Linzwi le li buyelezwi la Muluti wa luna ya Makaza, yena Jehova Mulimu, ka mo li inezi fela li kona ku sebeza ku mu swalisanisa ka mukwa o silikani kwa bashemi ni bana ba bona, hamohocwalo ni ku ba bañwi kaufela ba ba mu sebeleza mwa puteho ya Sikreste.—Isaya 30:20, 21.

 6. Ne lu kana lwa fumana cwañi libubo le linde ku Mulimu ni kwa batu?

⁶ Kelezo ye butali ya bundate kwa batu ba Mulimu, ba bahulu ni banana, i zwelapili mwa Prv 3 litimana 3 ni 4 za Liproverbia kauhanyo 3: “Sishemo ni niti li si ke za kauhana ni wena, u li tamelele mwa mulala wa hao, u li ñole fa litapa la pilu ya hao; Ka zeo u ka kutekiwa, u be ni libubo le linde, fapil’a Mulimu ni batu.” Jehova Mulimu yena ka sibili ki ya zwile mubano mwa ku bonisa sishemo ni niti. Ka mo i bulelela Samu 25:10, “linzila kaufela za [Jehova, NW] ki sishemo ni niti.” Ka ku likanyisa Jehova, lu swanela ku ikungela tona tulemeno t’o ni m’ata a tona a’ sileleza, ni ku l’i nga ka butokwa ka mo ne lu k’a ngela sifaha sa mwa mulala se si tula hahulu ni ku li beya ka ku s’a konwa ku takulwa fa pilu ya luna. Kacwalo he, lu kona ku lapela ka buniti kuli: “Wena [Jehova, NW], . . . sishemo sa hao, ni niti ya hao, li ni babalele kamita.”—Samu 40:11.

Ku Sepa ko ku Inelela

 7. Ki ka linzila lifi Jehova a bonisize ku ba kwa hae ya konwa ku sepiwa?

⁷ Ku sepa ku taluswa ki Webster’s Ninth New Collegiate Dictionary sina “ku itinga kwa ka buikolwiso fa muinelo, buikoneli, m’ata, kamba niti ya mutu yo muñwi kamba nto ye ñwi.” Muinelo wa Jehova u tomile ka ku tiya fa sishemo sa hae. Mi lu kona ku ba ni buikolwiso bo bu tezi mwa buikoneli bwa hae bwa ku eza s’a sepisize, kakuli libizo la hae luli, la Jehova, li mu bonisa ku ba Y’a Lela yo mutuna. (Exoda 3:14; 6:2-8) Ka ku ba Mubupi, ki yena Liweluwelu la ku tiya ni m’ata. (Isaya 40:26, 29) Ki yena mutala luli wa niti, kakuli ‘Mulimu h’a koni ku eza lishano.’ (Maheberu 6:18) Kacwalo, lu susuezwa ku ba ni sepo ye tezi ku Jehova, Mulimu wa luna, yena Simbule se situna sa niti kaufela, ya na ni m’ata kaufela a ku sileleza ba ba mu sepa ni ku tisa milelo ya hae kaufela ye makaza kwa ku konda ka kanya.—Samu 91:1, 2; Isaya 55:8-11.

 8, 9. Ki kabakalañi ka bumai ha ku si na ku sepa mwa lifasi, mi batu ba Jehova ba fa cwañi nto ye fapahana ku yeo?

⁸ Mwa lifasi le li silafezi le li lu potolohile, ka bumai ku sepa ha ku yo. Mwa sibaka sa seo, lu fumana mukwañuli ni buputeleli kai ni kai. Fa likepe la fahalimu la musulo wa May 1993 wa magazini ya World Press Review ne ku ñozwi ka ku bonahala hande-nde lushango lo lu li: “KU ATA KWA BUPUTELELI—Mali A’ Fumanwa ka Mikwa ye Maswe mwa Tukiso ye Nca ya Lifasi. Kalulo ya buputeleli i fumanwa ku zwa mwa Brazil ku ya kwa Germany, ku zwa mwa United States ku ya kwa Argentina, ku zwa mwa Spain ku ya kwa Peru, ku zwa mwa Italy ku ya kwa Mexico, ku zwa mwa Vatican ku ya kwa Russia.” Ka ku ba ye tomile fa sitoyo, mukwañuli, ni ku s’a sepana, nto ye bizwa tukiso ye nca ya lifasi ya mutu ha i tahisi nto ni ye kana kwa mufuta wa mutu kwand’a maswenyeho a’ sweli ku ekezeha.

⁹ Ka ku fapahana kwa linaha za bupolitiki, Lipaki za Jehova ba tabile ku ba “sicaba seo, [Jehova, NW] a li Mulimu wa sona.” Ki bona fela ba ba kona ku bulela ka niti kuli, “Lu sepile Mulimu.” Yo muñwi ni yo muñwi wa bona u kona ku huwa ka tabo kuli: “Ni itumba ka Mulimu, ka linzwi la hae;  . . . Mulimu ki Yena ye ni sepile, ha ni sabi se siñwi.”—Samu 33:12; 56:4, 11.

10. Ki sika mañi se si tiisize Bakreste ba banca ba bañata kuli ba buluke busepahali?

¹⁰ Mwa naha ye ñwi ya mwa Asia m’o likiti-kiti za Lipaki ba banca ba natilwe hahulu ni ku beiwa mwa litolongo, ku sepa Jehova ku konisize buñata bwa bona ku tiyela zeo. Busihu bo buñwi mwa tolongo, Paki yo munca ya n’a s’a ipumani mwa ku tukufazwa ko ku maswe hahulu n’a ikutwile kuli h’a s’a na ku tiyela tukufazo ye ekezehile. Kono yo munca yo muñwi a shosholokela ku yena mwa lififi. A shobota kuli: “U si ke wa palelwa; ne ni sheng’okile mi ha ni si ka ba ni kozo ya mwa munahano ni hanyinyani haisali ni eza cwalo.” Yo munca wa pili y’o a uncafaza katulo ya hae ya ku itiisa. Lu kona ku sepa Jehova ka ku tala kuli u ka lu tusa ku tula buikatazo bufi kamba bufi ni bo buñwi ni bo buñwi bwa Satani bwa ku ululula busepahali bwa luna.—Jeremia 7:3-7; 17:1-8; 38:6-13, 15-17.

11. Lu nyangumunwa cwañi kuli lu sepe Jehova?

¹¹ Kalulo ye ñwi ya mulao wa pili i bala kuli: “Lata [Jehova, NW] Mulimu wa hao ka pilu ya hao kaufela.” (Mareka 12:30) Ha lu nze lu fa nahanisiso ye tuna fa Linzwi la Mulimu, liniti ze tuna ze lu sweli ku ituta z’a kena ka butungi mwa pilu ya luna kuli lu susuezwe ku sebelisa za luna kaufela mwa sebelezo ya Mulimu wa luna ya makaza, Mulena Mubusi Jehova. Ki ka pilu ye tezi buitebuho ku yena—kwa neku la z’a lu lutile kaufela, z’a lu ezelize, ni z’a sa na ni ku lu ezeza—ha lu nyangumunwa ku sepa ka ku tala ku pulusa kwa hae.—Isaya 12:2.

12. Mwahal’a lilimo-limo, Bakreste ba bañata se ba tusizwe cwañi ku tahisa ku sepa Jehova?

¹² Ku sepa k’o ku konwa ku tahiswa mwahal’a lilimo-limo. Paki ya Jehova ya ikokobeza ya n’a sebelize ka lilimo ze fitelela ze 50 kwa sibaka se situna sa tamaiso sa Watch Tower Society mwa Brooklyn, ku kala ka April 1927, n’a ñozi kuli: “Kwa mafelelezo a kweli yeo na amuhela mali a ku itusisa a eza $5.00 a beilwe mwa ingulopu ni kadi ye nde ye ne i na ni taba ye mwa Bibele kwa Liproverbia 3:5, 6 . . . Ne ku na ni mabaka a mañata a ku sepa Jehova, kakuli kwa sibaka se situna sa tamaiso hañi-hañi ne ni fitile fa ku itebuha kuli Jehova u na ni ‘mutanga ya sepahala, ya na ni kutwisiso’ ya babalela ka busepahali licisehelo kaufela za Mubuso fa lifasi-mubu fa.—Mateu 24:45-47.”b Pilu ya Mukreste y’o ne i tomile, isiñi fa lilato la ku lata mali, kono fa ku fumana “bufumu bo bu sa feli, kwa lihalimu.” Ka ku swana mwa mazazi a cwale, likiti-kiti ba ba sebeza mwa mahae a Betele a Watch Tower Society ku potoloha lifasi-mubu kamukana ba eza cwalo mwatas’a mufuta wa buitamo bwa ka mulao bwa bubotana. Ba sepa Jehova kuli u ka ba fumanela ze ba tokwa za ka zazi ni zazi.—Luka 12:29-31, 33, 34.

Mu Tiyele ku Jehova

13, 14. (a) Ki kakai fela k’o kelezo ye nahanisizwe hande neikana ya fumanwa? (b) Ki sika mañi se si lukelwa ku pimiwa kuli lu punyuhe nyandiso?

¹³ Ndat’a luna wa kwa lihalimu u lu eleza kuli: “U si ke wa tiyela fa butali bwa hao.” (Liproverbia 3:5) Baelezi ba silifasi ni baituti ba za minahano ni kamuta ha ba koni ku ba ni sepo ya ku fumana butali ni kutwisiso ye li bukaufi ni zeo Jehova a bonisa. “Butali bwa hae ha bu na mo bu felela.” (Samu 147:5) Mwa sibaka sa ku tiyela fa butali bwa banna ba ba bub’ana ba lifasi kamba fa maikuto a luna a’ si na hande zibo, haike lu talime ku Jehova, Linzwi la hae, ni kwa maeluda mwa puteho ya Sikreste kwa neku la kelezo ye nahanisizwe hande.—Samu 55:22; 1 Makorinte 2:5.

¹⁴ Butali bwa butu kamba buikuhumuso bo bu tiswa ki mayemo a pahami ha bu na ku lu isa ko kuñwi mwa lizazi la tiko ye tuna le li sweli ku atumela ka bubebe. (Isaya 29:14; 1 Makorinte 2:14) Mwa Japan mwahal’a Ndwa ya Lifasi ya II, mulisana wa batu ba Mulimu ya na ni buikoneli kono ili ya ikuhumusa n’a ketile ku tiyela fa butali bwa hae. Mwatas’a sineneketo n’a fitile fa ku ba mukwenuheli, mi ba bañata ba mutapi ni bona ba palelwa mwatas’a nyandiso. Kaizeli ya sepahala wa mwa Japan, ili y’o ka bundume n’a punyuhile mwa ku nyandiswa ko ku maswe mwa mizuzu ye masila hahulu ya mwa tolongo, n’a bulezi kuli: ‘Ba ne ba siyezi ba sepahala ne ba si na buikoneli bo bu ipitezi mi ne li batu-tu fela. Ka buniti fela kaufel’a luna kamita lu lukela ku sepa Jehova ka pilu ya luna kaufela.’c

15. Ki kalemeno kafi ka bumulimu ka ka tokwahala kuli lu kone ku tabisa Jehova?

¹⁵ Ku sepa Jehova, ku fita butali bwa luna, ku ama buikokobezo. Kalemeno kao ki ka butokwa hakalo ku bao kaufela ba ba bata ku tabisa Jehova! Ee, mane ni Mulimu wa luna, nihailikuli ki Mulena Mubusi wa pupo kamukana, u bonisa buikokobezo mwa ku sebelisana kwa hae ni pupo ya hae ye butali. Lu kona ku itumela ka seo. ‘U inamela ku ukumela ze mwa lihalimu ni lifasi, ya maibile, u mu zwisa mwa liluli.’ (Samu 113:6, 7) Ka mukekecima wa hae o mutuna, u lu swalela bufokoli bwa luna ka mutomo wa mpo ya hae ye tuna kwa mufuta wa mutu, ili sitabelo se sinde hahulu sa tiululo sa Mwan’a hae y’a latiwa, yena Jesu Kreste. Lu swanela ku itumela hakalo ka sishemo se si si ka libelelwa seo!

16. Mizwale ne ba kana ba bata cwañi ku fita ku ze konisa za matohonolo mwa puteho?

¹⁶ Jesu yena ka sibili u lu hupulisa kuli: “Mutu ni mutu ya ipahamisa u ka kokobezwa; mi ya i kokobeza u ka pahamiswa.” (Mateu 23:12) Ka buikokobezo, mizwale ba ba kolobelizwe ba swanela ku bata ku fita ku ze konisa za k’u nga buikalabelo mwa puteho ya Sikreste. Niteñi, baokameli ba swanela k’u nga ku ketiwa kwa bona, isiñi sina ku fiwa mayemo a pahami, kono sina sibaka sa ku eza musebezi, ka buikokobezo, ka ku itebuha, ka buniti, sina mwa n’a ezelize Jesu, ya n’a bulezi kuli: “Ndate wa sebeza ku fitela cwale; ni na, na sebeza.”—Joani 5:17; 1 Pitrosi 5:2, 3.

17. Ki sifi seo luna kaufela lu swanela ku itebuha, ili se si isa kwa musebezi mañi?

¹⁷ Haike kamita lu itebuhe ka buikokobezo ni ka buniti kuli mwa meto a Jehova lu liluli fela. Kacwalo, lu kona ku taba hakalo, kuli “sishemo sa [Jehova, NW] si nze si li teñi ku ya ku ile ku ba ba mu saba, ni niti ya hae kwa bana ba bana ba bona”! (Samu 103:14, 17) Kacwalo kaufel’a luna lu swanela ku ba baituti ba ba cisehela hahulu ba Linzwi la Mulimu. Nako ye felezwa mwa tuto ya ka butu ni ya lubasi, ni mwa mikopano ya puteho, i swanela ku ba mwahal’a lihora za luna ze nde ka ku fitisisa ka viki ni viki. Ka nzila yeo lu hulisa “ku ziba Ya-Kenile.” Mi k’o “ki ku talifa.”—Liproverbia 9:10.

“ . . . Mwa Milelo ya Hao Kaufela . . .”

18, 19. Ne lu kana lwa sebelisa cwañi Liproverbia 3:6 mwa bupilo bwa luna, mi ki ka ku ba ni ze zwa mwateñi lifi?

¹⁸ Ka ku lu supeza ku Jehova, yena Simbule sa bumulimu sa butali, Liproverbia 3:6 ka ku tatama i bulela kuli: “U beye [Jehova, NW] mwa milelo ya hao kaufela, mi Yena u ka lukisa linzila za hao.” Ku beya Jehova mwa milelo kaufela ku ama ku ipuluka bukaufi ni yena ka tapelo. Lu be kai kamba kai mi ku si na taba ni muinelo o ne u ka zuha, lu kona ku fita ku yena kapili-pili ka tapelo. Ha lu nze lu eza misebezi ya luna ya ka zazi ni zazi, ha lu nze lu itukiseza sebelezo ya mwa simu, ha lu nze lu ya fa ndu ni ndu lu shaela Mubuso wa hae, tapelo ya luna ya kamita i kona ku ba ya kuli a fuyaule musebezi wa luna. Kacwalo, lu kona ku ba ni tohonolo ni tabo ye sa konwi ku likanyiwa ya ku “zamaya ni Mulimu,” lu na ni buikolwiso bwa kuli u ka ‘lukisa linzila za luna,’ sina mwa n’a ezelize ku ba ne ba saba Mulimu bo Enoke, Nuwe, ni Maisilaele ba ba sepahala, ba ba cwale ka Joshua ni Daniele.—Genese 5:22; 6:9; Deuteronoma 8:6; Joshua 22:5; Daniele 6:23; mu bone hape ni Jakobo 4:8, 10.

¹⁹ Ha lu zibahaza likupo za luna ku Jehova, lu kona ku ba ni buikolwiso bwa kuli ‘kozo ya Mulimu ye fita kutwisiso kaufela, i ka buluka lipilu za luna ni mihupulo ya luna ku Jesu Kreste.’ (Mafilipi 4:7) Kozo ya Mulimu, ye bonwa ka mubonahalelo wa ku wabelwa, i kona ku paka hande lushango lwa luna kwa bañi ba mandu bao lu katana mwa musebezi wa luna wa ku kutaza. (Makolose 4:5, 6) Hape i kona ku susueza ba ba kana ba nyandiswa ki lisineneketo kamba ku tokwa katulo ye lukile ze atile mwa lifasi la kacenu, sina ka mo i boniseza taba ye tatama.d

20, 21. (a) Mwahal’a nako ya likezo ze sabisa za Nazi, busepahali bwa Lipaki za Jehova ne bu susuelize cwañi ba bañwi? (b) Ki ku ikatulela kufi k’o linzwi la Jehova li swanela ku zusulusa ku luna?

²⁰ Max Liebster, Mujuda wa ka sipepo ili y’o ka muinelo o bonahala inge makazo n’a punyuhile ku Bulaya kwa ba Nazi, n’a talusize musipili wa hae wa ku liba kwa munganda wa ba Nazi wa ku bulaela teñi ka manzwi a: “Ne lu kiyezwi mwa matolokisi a ne a cincizwe ku ba mizuzunyana ye miñata mo ku ina mapantiti ba babeli ku o muñwi ni o muñwi. Ha ne ni latezwi ku o muñwi wa yona, na talimana ni lipantiti y’o meto a hae n’a bonahala ku ba ni muinelo wa buiketo. N’a li m’o bakeñisa likute la hae la ku kuteka mulao wa Mulimu, ili ku keta tolongo ni ku ba mwa mayemo a ku kona ku bulaiwa mwa sibaka sa ku sulula mali a batu ba bañwi. Ne li yo muñwi wa Lipaki za Jehova. N’a amuhilwe bana ba hae, mi musal’a hae na s’a bulailwe. Ni yena n’a libelela ku bulaiwa. Musipili w’o wa mazazi a’ 14 ne u tisize kalabo kwa litapelo za ka, kakuli ne li mwahal’a ona musipili wo wa ku liba kwa lifu mo ne ni fumani sepo tenyene ya bupilo bwa kamita.”

²¹ Hamulaho wa ku pila ku sa n’a bizize “musima wa litau” wa mwa Auschwitz, ni ku kolobezwa, muzwale y’o a nyala yo muñwi wa Lipaki za Jehova ili y’o ni yena n’a kile a beiwa mwa tolongo mi ili y’o bondat’ahe ne ba nyandisizwe mwa munganda wa tukufazo mwa Dachau. Bondat’ahe ha ne ba li k’o, ne ba utwile kuli bo musal’a bona ni mwan’a bona wa musizana ni bona ne ba tamilwe. Ne ba talusize mo ne i ba amezi taba yeo cwana: “Ne ni bilaezi hahulu. Mi cwale kazazi le liñwi ha ne ni li mwa mundandwe wa ku tapa fa mubili, na utwa linzwi le li bulela manzwi a kwa Liproverbia 3:5, 6 . . . La luma inge linzwi le li shulumuka ku zwa mwa mahalimu. Ne li yona nto ye ne ni tokwa luli kuli ni fumane sinca mayemo a ka a buitikanelelo.” Ka mo ku inezi fela, linzwi leo ne li la lipantiti yo muñwi ya n’a ama litaba za liñolo leo, kono kezahalo yeo i koñomeka m’ata ao Linzwi la Mulimu li kona ku ba ni ona ku luna. (Maheberu 4:12) Haike linzwi la Jehova li bulele ka m’ata ku luna kacenu ka manzwi a liñolo la luna la silimo sa 1994, a’ li: “U sepe [Jehova, NW] ka pilu ya hao kaufela”!

[Litaluso za kwatasi]

Ka ku Kusufaza Taba

◻ Ki mufuta mañi wa kelezo ye tahisizwe mwa Liproverbia?

◻ Ku sepa Jehova ku lu tusa cwañi?

◻ Ki sika mañi se si amiwa mwa ku tiyela ku Jehova?

◻ Ki kabakalañi ha lu swanela ku beya Jehova mwa milelo ya luna kaufela?

◻ Jehova u lukisa cwañi linzila za luna?

[Maswaniso a fa likepe 25]

Lushango lwa Mubuso lo lu tisa tabo ki lo lu tabelwa ki batu ba lipilu ze sepahala