Ki Moya O Cwañi O Mu Bonisa?

¹ Paulusi n’a felize liñolo la hae kwa puteho ya Filipi ka kelezo ye li: “Sishemo sa Mulena Jesu Kreste si be ni moya wa mina.” (Mafil. 4:23) N’a ba babalize ka cisehelo ya bona ye buniti mwa ku kutaza taba ye nde hamohocwalo ni mamelelo ya bona ye mufutumala, ili ye lilato kwa neku la buiketo bwa yo muñwi ku yo muñwi.—Mafil. 1:3-5; 4:15, 16.

² I swanela ku ba yona takazo ya luna ku bonisa moya o swana mwa puteho ya luna. Muta bote ba bonisa tukufalelo, sishemo, ni kamuhelo, seo si tahisa moya o’ fita fa ku lemuhiwa ki bashalimeli. Moya o buniti ni wa lilato u tahisa swalisano ni zwelopili ya kwa moya. (1 Makor. 1:10) Moya o’ si o munde u tahisa ku zwafa ni ku s’a ba wa pilu-kaufela.—Sin. 3:15, 16.

³ Maeluda M’u Nge Ketelelo: Maeluda ba na ni buikalabelo bwa ku buluka moya o munde, o’ buniti mwahal’a bona ni mwahal’a puteho ya bona. Ki kabakalañi? Kakuli puteho i konwa ku susuezwa ki mubonelo ni muzamao wa bona. Lwa itebuha ku ba ni maeluda ba ba na ni tukufalelo mwa sebelezo ya mwa simu, ba ba lu lumelisa ka lumenyo lo lu mufutumala ni linzwi le li sishemo, ni ba ba na ni buniti ni ba ba yahisa mwa kelezo ya bona, ibe ye fiwa kwa mukunda kamba ku zwelela fa libulelelo.—Maheb. 13:7.

⁴ Ka mo ku inezi fela, kaufel’a luna lu swanela ku taleleza kalulo ya luna mwa ku tahisa kuli puteho i be ye silikani, ya kamuhelo, ya tukufalelo, ni ya mubonelo wa kwa moya. Ka buñwi, lwa kona ku bonisa mufutumala ni lilato mwa swalisano ya luna ni ba bañwi. (1 Makor. 16:14) Ha ku swaneli ku ba ni likauhano ka za buhulu, mubala, tuto, kamba mayemo a za sifumu mwahal’a luna. (Mu bapanye Maefese 2:21.) Bakeñisa sepo ya luna, lwa kona ku bonahaza moya wa tabo, kamuhelo ye sishemo, ni tukufalelo mwa bukombwa.—Maro. 12:13; Makolo. 3:22, 23.

⁵ Bao kaufela ba ba abana ni luna, ku kopanyeleza cwalo ni ba banca, ba swanelwa ku eziwa kuli ba ikutwe ku amuhelwa ni ku ipumana mwa lilato ni buipeyo bwa mizwale kaufela. Ka bukombwa bwa luna ni ka ku bonahaza tulemeno to tunde twa Sikreste, lu fa bupaki bwa kuli puteho ki “musumo ni sehezo ye seheza niti.” (1 Tim. 3:15) Hape lu ipumana mwa silelezo ya kwa moya ka “kozo ya Mulimu” ye sileleza lipilu ni mihupulo ya luna. (Mafil. 4:6, 7) Haike kaufel’a luna like ka t’ata ku bonisa mufuta wa moya o ka tahisa kuli lu ikole sishemo sa Jehova se si si ka libelelwa ka Mulen’a luna Jesu Kreste.—2 Tim. 4:22.