KA KU YA KA BIBELE
Somano Mutu Ha Si Ka Kena Kale Mwa Linyalo Somano Mutu Ha Si Ka Kena Kale Mwa Linyalo
Kana somano pili mutu a si ka kena kale mwa linyalo i fosahalile?
“Kakuli tato ya Mulimu kikuli . . . mu ambuke buhule.”—1 Matesalonika 4:3.
ZE BA BULELA BATU Mwa lizo ze ñwi, somano mwahalaa batu ba bahulu ba ba si ka nyalana ya lumelezwa. Mwa libaka ze ñwi, banana ba ba sa nonoboka ba ba si ka nyalana, ba lumelezwa ku ikenya mwa likezo za ku bonisana lilato.
ZE I BULELA BIBELE Bibele i itusisa linzwi la “buhule” ku ama kwa mifuta ye miñwi ya likezo za somano mwahalaa batu ba ba si ka nyalana. Mulimu u tokwa kuli balapeli ba hae ba “ambuke buhule.” (1 Matesalonika 4:3) Buhule bu balelwa kwa libi ze tuna, ze cwale ka bubuki, tumelo ya mioya, bucakolwa, ku lapela milimu ya maswaniso, bubulai, ni busholi.—1 Makorinte 6:9, 10; Sinulo 21:8.
KI KABAKALAÑI TABA YE HA I LI YA BUTOKWA KU MINA? Libaka le liñwi ki la kuli Bibele i fa temuso ya kuli “Mulimu u ka atula mahule.” (Maheberu 13:4) Libaka la butokwa ni ku fita ki la kuli ka ku mamela mulao wa Mulimu wa za somano, lu bonisa kuli lwa lata Jehova Mulimu. (1 Joani 5:3) Mi yena u fuyaula ba ba mamela milao ya hae.—Isaya 48:18.
Kana ku fosahalile batu ba ba si ka nyalana ku ikenya mwa likezo lifi kamba lifi za ku bonisana lilato?
“Buhule ni mufuta kaufela wa masila kamba mukwañuli, nihaiba feela ku bulelwa li si ke za bulelwa mwahalaa mina.”—Maefese 5:3.
ZE BA BULELA BATU Batu ba bañata ba lumela kuli ha ku na ze fosahalile batu ba ba si ka nyalana ha ba eza likezo za ku bonisana lilato ha i bile feela ha ba ezi somano.
ZE I BULELA BIBELE Bibele ha i bulela ka za likezo ze maswe za somano, ha i talusi feela buhule kono hape i ama ni kwa mikwa ye “masila” ni “muzamao wa ku sa swabela bufosi.” (2 Makorinte 12:21) Taba yeo i bonisa hande kuli, ku na ni likezo ze ñata za ku bonisana lilato ka zona ze fosahezi mwa meeto a Mulimu ha li eziwa ki batu ba ba si ka nyalana, niha ba sa ezi somano.
Lushango lwa Bibele ka za somano kikuli likezo za ku bonisana lilato li swanela feela ku eziwa ki muuna ni musali ba ba nyalani. Bibele hape i nyaza “litakazo za buozwa ze tiswa ki moya wa mukwañuli.” (1 Matesalonika 4:5) Seo si talusañi? Mu nyakisise mutala wo, o kona ku ama muuna kamba musali: Musali a kana a ikatulela kuli ha na ku eza somano ni muuna ya mwa libato ni yena. Niteñi, u ikenya mwa likezo ze ñwi za ku bonisana lilato ni yena. Ka ku eza cwalo, ba lakaza ku eza nto ye ba sa swaneli ku eza. Kabakaleo, ba na ni mulatu wa ku ba ni “litakazo za buozwa ze tiswa ki moya wa mukwañuli.” Litakazo ze cwalo za somano za nyaziwa mwa Bibele.—Maefese 5:3-5.
Mu kona ku ambuka cwañi likezo ze maswe za somano?
“Mu sabe kwa buhule”—1 Makorinte 6:18.
KI KABAKALAÑI TABA YE HA I LI YA BUTOKWA KU MINA? Ka ku ya ka Bibele, batu ba ba ikenya mwa likezo za somano ba si ka nyalana kale ba mwa kozi ya ku latehelwa ki silikani sa bona ni Mulimu.—Makolose 3:5, 6.
ZE I BULELA BIBELE Bibele i eleza batu kuli ba “sabe kwa buhule.” (1 Makorinte 6:18) Fo ku talusa kuli mutu u tokwa ku ikambusa ka ku tala kwa nto ifi kamba ifi ye kona ku mu tahiseza ku ikenya mwa likezo ze maswe za somano. (Liproverbia 22:3) Ka mutala, kuli mutu a be ni muzamao o kenile, ki kwa butokwa kuli a ambuke ku eza siango ni batu ba ba sa lateleli likuka za Mulimu ka za somano. Bibele i fa temuso ye, ye li: “Ya kopana ni ba ba butali, ni yena u ka talifa; kono ya twaelana ni matanya u ka utwa butuku.”—Liproverbia 13:20.
Hape ku taza minahano ka litaba ze maswe ku kona ku tahiseza mutu ku ikenya mwa likezo ze maswe za somano. (Maroma 8:5, 6) Kamukwaocwalo, ki hande ku ambuka lipina, mavidio, litaba ze ñozwi, kamba nto ifi kamba ifi ye bonisa likezo ze maswe za somano kamba ye susueza batu ka nzila ifi kamba ifi ku ikenya mwa likezo ze maswe za somano ze sa tabisi Mulimu.—Samu 101:3.