Kutazo Ye Sebeza

MAELUDA ba Sikreste ba lukela ku kona ku “kutaza ka tuto ye pilisa.” (Tite 1:9) Fokuñwi seo si lukelwa ku ezwa mwa miinelo ye t’ata hahulu. Ku butokwa ku fa kelezo ye lumelelana ni likuka za Mañolo. Kacwalo, maeluda ba lukela ku mamela kelezo ye: “U ineele . . . ku kutaza.” (1 Tim. 4:13) Nihaike kuli puhisano ya luna fa i ama sihulu maeluda kamba ba ba itiisa ku fita fa bueluda, bashemi fokuñwi ba lukela ku kutaza bana ba bona kamba ba ba zamaisa lituto za Bibele ba tokwa ku kutaza be ba luta Bibele. Mwa miinelo ye cwalo, likuka ze swana li ka sebeza.

Miinelo Mo I Tokwahala. Kuli mu zibe fo i tokwahalela kutazo, mu ka tuseha ku tatuba miinelo ye ñozwi mwa Bibele fo ne i fezwi kutazo. Muapositola Pitrosi n’a kutalize maeluda ku isa muhupulo kwa buikalabelo bwa bona bwa ku lisa mutapi wa Mulimu. (1 Pit. 5:1, 2) Paulusi n’a elelize Tite ku kutaza micaha kuli “ba pile ka kutwisiso.” (Tite 2:6) Paulusi n’a elelize Bakreste sina yena kuli ba “bulele taba i liñwi” ni ku ambuka be ne ba lika ku tahisa lifapano mwahal’a mizwale. (1 Makor. 1:10; Maro. 16:17; Mafil. 4:2) Paulusi niha n’a lumbile lilama za puteho ya mwa Tesalonika kabakala lika ze nde ze ne ba eza, n’a ba kutalize ku sebelisa ka ku tala litaelo ze ne ba filwe. (1 Mates. 4:1, 10) Pitrosi n’a kupile Bakreste ba bañwi kuli ba “sabe litakazo ze maswe.” (1 Pit. 2:11) Juda n’a kutalize mizwale ba hae ku “lwanela tumelo” kabakala kukuezo ya ba ba sa sabi Mulimu be ne ba eza buozwa. (Juda 3, 4) Bakreste kaufela ne ba elelizwe ku kutazana ilikuli ku si ke kwa ba ni ya n’a ka tatafazwa pilu ka ku shongwa ki sibi. (Maheb. 3:13) Pitrosi n’a kutalize Majuda be ne ba si ka lumela kale ku Kreste kuli: “Mu ipabalele kwa mushobo o sitani wo.”—Lik. 2:40.

Ku tokwahala mikwa ifi mwa ku kutaza batu ba ba mwa miinelo ye cwalo? Ya kutaza u kona ku bonisa cwañi putako ya kutazo ya hae a sa limbi kamba ku utwahala ku halifa?

“Kabakala Lilato.” Haiba kutazo ya luna i sa ezwi “kabakala lilato,” i kana ya utwahala ku ba ye buhali. (Fil. 9) Ki niti, ha ku tokwahala ku nga muhato honaf’o, mubulelelo wa mubuleli u swanela ku bonisa putako ya muinelo. Ku bulela ka ku iketa hahulu ku kona ku utwahala inge mwa inyaza kuli mu ba foselize. Ka nako ye swana, kutazo i swanela ku ezwa ka tukufalelo ni kutwelo-butuku. Kutazo ye lilato ki yona ye ka susumeza bateelezi. Paulusi ha n’a bulela ka ku icemela ni ku yemela balikani ba hae, n’a bulelezi ba kwa Tesalonika kuli: “Mu ziba kuli lu ezize mutu ni mutu wa ku mina sina mushemi mw’a ezeza bana ba hae.” (1 Mates. 2:11) Baokameli ba Bakreste bao ne ba kupile mizwale ka lilato. Ze mu bulela mu li bulele kabakala ku iyakatwa ha buniti bateelezi ba mina.

Mu eze ka maseme. Mu si nyemisi be mu lika ku susumeza ku nga muhato. Kono hape mu si kata-kati ku bulelela bateelezi ba mina “mulelo kaufela wa Mulimu.” (Lik. 20:27) Ba ba itebuha ha ba na ku nyema kamba ku tuhela ku mi lata hahulu ha mu ba eleza ha sishemo ku eza ze lukile.—Samu 141:5.

Hañata, kwa tusa kuli mu si ka kutaza kale mutu, mu mu lumbe h’a buniti fa nto ye ñwi. Mu nahane za lika ze nde ze ba eza mizwale ba mina—ili lika zeo Jehova a lukela ku tabela: tumelo ye bonwa ka misebezi ya bona, lilato le li ba susumeza ku itiisa, ni tundamo ya bona mwa miinelo ye t’ata. (1 Mates. 1:2-8; 2 Mates. 1:3-5) Seo si ka tahisa kuli mizwale ba mina ba ikutwe kuli ba itebuhiwa ni ku utwisiswa, mi si ka ba tusa ku t’o amuhela kutazo ye ba ka fiwa.

“Ka Pilu-Telele Kaufela.” Kutazo i swanela ku fiwa “ka pilu-telele kaufela.” (2 Tim. 4:2) Seo si amañi? Pilu-telele i kopanyeleza ku tiyela bufosi kamba shemaeto ka ku wa pilu. Wa pilu-telele u sepa kuli bateelezi ba hae ba ka eza z’a bulela. Ku fa kutazo ka moya w’o ku ka tibela bateelezi ba mina ku nahana kuli mu ba nahanela hahulu bumaswe. Tumelo ya mina ya kuli mizwale ni likaizeli za mina ba bata ku sebeleza Jehova ka mo ba konela kaufela i ka ba susumeza ku bata ku eza ze lukile.—Maheb. 6:9.

Ka “ku Kutaza ka Tuto Ye Pilisa.” Eluda u kona cwañi “ku kutaza ka tuto ye pilisa”? Ka ku “kumalela tuto ya niti, yona ye li ku lutwa.” (Tite 1:9) Ku fita ku bulela maikuto a mina beñi, mu kutaze ka m’ata a Linzwi la Mulimu. Bibele i ame mo mu bonela ze tokwa ku bulelwa. Mu taluse lituso za ku sebelisa ze i bulela Bibele fa taba ye ambolwa. Mu hupule hande-nde ze ka ezahala cwale ni ze ka ezahala kwapili ku mutu ya sa lateleli Linzwi la Mulimu, mi mu itusise zeo kwa ku kolisa bateelezi ba mina ka za butokwa bwa ku eza ze swanelwa ku ezwa.

Mu bone teñi kuli mwa taluseza hande-nde bateelezi ba mina ze ba swanela ku eza ni mo ba swanela ku li ezeza. Mu ba bonise hande-nde kuli litaluso za mina li tomile ka ku tala fa Mañolo. Haiba Mañolo a lumelela tukuluho mwa katulo ifi kamba ifi ye ka ezwa, mu taluse fo i kuma tukuluho yeo. Mi, kwa mafelelezo, mu fe kutazo ya maungulo ye ka tiisa katulo ya bateelezi ya ku nga muhato.

Ka “M’ata.” Kuli mutu a kutaze ba bañwi hande, u lukela ku ba ni “mata mwa tumelo.” (1 Tim. 3:13) Ki sifi se si tusa mutu ku bulela ka m’ata? Ki taba ya kuli “mutala [wa hae] wa misebezi ye minde” u lumelelana ni z’a eleza mizwale ba hae ku li eza. (Tite 2:6, 7; 1 Pit. 5:3) Ha ku li cwalo, ba ba elezwa ku nga muhato ba ka lemuha kuli ya ba kutaza h’a bati kuli ba eze lika zeo yena ka sibili a sa ezi. Ba ka bona kuli ba kona ku likanyisa tumelo ya hae sina yena h’a nze a lika ku likanyisa Kreste.—1 Makor. 11:1; Mafil. 3:17.

Kutazo ye tomile fa Linzwi la Mulimu ili ye fiwa ka lilato ya kona ku peta ze tuna. Ba ba filwe buikalabelo bwa ku fa kutazo ye cwalo ba lukela ku itiisa ku i fa hande.—Maro. 12:8.