Ku Itebuha Mikopano ya Sikreste

“A lu babalelane, kuli lu susumezane mwa lilato ni mwa misebezi ye minde. Lu si ke lwa tuhela liputeho za luna.”—MAHEBERU 10:24, 25.

 1, 2. (a) Ki kabakalañi ku fumaneha kwa mukopano wa Bakreste ba niti ha ili tohonolo? (b) Jesu u banga teñi kwa mikopano ya balateleli ba hae ka nzila ifi?

KI tohonolo hakalo ku fumaneha kwa mukopano wa Sikreste, ibe kuli ki wa balapeli ba Jehova ba ba sa fiteleli lishumi kamba ba likiti ze sikai, kakuli Jesu n’a ize: “Mo ku na ni ba babeli kamba ba balalu ba ba kopani ka Libizo la ka, ni mwateñi mwahal’a bona”! (Mateu 18:20) Ki niti, ha n’a sepisa seo, Jesu n’a sweli ku nyakisisa litaba za buatuli ze ne tokwa ku talimwa ka swanelo ki ba ba na ni buikalabelo mwa puteho. (Mateu 18:15-19) Kono kana manzwi a Jesu a kona ku ama hape ka mutomo kwa mikopano kaufela ya Sikreste ye kwalulwa ni ku kwalwa ka tapelo ili ka libizo la hae? Ee. Mu hupule kuli, Jesu ha n’a laezi balateleli ba hae ku eza musebezi wa ku tahisa balutiwa, n’a sepisize kuli: “A mu bone, na, ni inzi ni mina ka mazazi kaufela, ku isa kwa mafelelezo a lifasi.”—Mateu 28:20.

² Ha ku na kakanyo ya kuli Toho ya puteho ya Sikreste, yena Mulena Jesu Kreste, u cisehela hahulu ka za mikopano kaufela ya balateleli ba hae ba ba sepahala. Fahalimw’a seo, lwa kona ku ikolwisa kuli u teñi mwahal’a bona ka moya o kenile wa Mulimu. (Likezo 2:33; Sinulo 5:6) Jehova Mulimu ni yena u cisehela ka za ku kopana kwa luna. Mulelo o mutuna wa mikopano yeo ki ku lumbeka Mulimu “mwa Mikopano.” (Samu 26:12) Ku fumaneha kwa luna kwa mikopano ya puteho ki bupaki bwa lilato la luna ku yena.

 3. Lu itebuha mikopano ya Sikreste bakeñisa mabaka afi a butokwa?

³ Lu itebuha mikopano ya Sikreste kabakala mabaka a mañwi a mande. Pili a si ka zwa kale fa lifasi-mubu, Jesu Kreste n’a ketile balutiwa ba hae ba ba tozizwe ku sebeza sina “mutanga ya sepahala, ya na ni kutwisiso” mwa ku fa lubasi lwa tumelo sico sa kwa moya sa ka bunako. (Mateu 24:45) Nzila ya butokwa yeo ka yona ku fepiwa kwa kwa moya ku ezahala ki ka mikopano ya puteho hamohocwalo ni mikopano ye minyinyani ni ye mituna. Mulena Jesu Kreste u etelela mutang’a hae ya sepahala ku fa litaba za butokwa kwa mikopano yeo ku bote ba ba bata ku punyuha mafelelezo a muinelo wo o maswe ni ku fumana bupilo mwa lifasi le linca la Mulimu la ku luka.

 4. Ki ufi ‘mukwa’ o lubeta o bulezwi mwa Bibele, mi ki sifi se si ka lu tusa ku u pima?

⁴ Kacwalo, Mukreste ha swaneli ku hulisa mukwa o lubeta wa n’a bulezi muapositola Paulusi, ya n’a ñozi kuli: “A lu babalelane, kuli lu susumezane mwa lilato ni mwa misebezi ye minde. Lu si ke lwa tuhela liputeho za luna, mo ba ezeza ba bañwi; kono lu kutazane, sihulu ka ku bona kuli lizazi le lituna li sutelezi.” (Maheberu 10:24, 25) Ku nyakisisa tohonolo ni lituso za ku fumaneha kwa mikopano ya Sikreste ku ka lu tusa ku fumaneha kwa mikopano yeo ka busepahali ni ka pilu kaufela.

Mikopano ye Yahisa

 5. (a) Lipulelo za luna li swanela ku ba ni ku ama kufi kwa mikopano? (b) Ki kabakalañi ha lu sa swaneli ku zina-zina ku mema ba ba tabela kuli ba fumanehe kwa mikopano?

⁵ Bakeñisa kuli Bakreste ba lapelela moya o kenile wa Jehova kuli u sebeze fa mikopano ya Sikreste, yo muñwi ni yo muñwi ya fumaneha teñi u swanela ku eza ze nde ka ku fitisisa ka ku lumelelana ni moya mi ‘isi ku swabisa moya o kenile.’ (Maefese 4:30) Muapositola Paulusi ha n’a ñola ona manzwi a buyelezwi ao, n’a sweli ku nyakisisa ka za ku itusisa mubulelelo o swanela. Ze lu bulela kamita li swanela ku sebeza mwa ku ‘yahisa, kuli li batiseze ba ba li utwa sishemo.’ (Maefese 4:29) Seo sihulu ki sa butokwa kwa mikopano ya Sikreste. Mwa liñolo la hae kwa Makorinte, Paulusi n’a koñomekile tokwahalo ya kuli mikopano ibe ye yahisa, ku luta, ni ku susueza. (1 Makorinte 14:5, 12, 19, 26, 31) Baputehi kaufela ba fumana tuso kwa mikopano ye cwalo, ku kopanyeleza cwalo ni ba ba sa zo kalisa ku kopana, ba ba kana ba atula kuli: “Luli Mulimu u mwateñi ku mina.” (1 Makorinte 14:25) Ka lona libaka leo, ha lu swaneli ku zina-zina ku mema ba ba sa zo tabela kuli ba kopane ni luna, kakuli ku kopana ni luna ku ka akufisa zwelopili ya bona ya kwa moya.

 6. Ki ifi miinelo ye miñwi ye tusa ku bisa mukopano ku ba o yahisa?

⁶ Bote ba ba filwe ku fa lingambolo, lipuhisano, kamba liponiso kwa mukopano wa Sikreste ba bata ku ikolwisa kuli lipulelo za bona za yahisa mi hape za lumelelana ni Linzwi la Mulimu le li ñozwi, yona Bibele. Fahalimw’a ku bulela lipulelo ze nepahezi, lu swanela ku fa maikuto a lumelelana ni butu bo bu lilato bwa Mulimu ni Kreste. Bote ba ba fa lingambolo fa tukiso ya mukopano ha ba iyakatwa ku bonisa ‘miselo ya moya,’ ye cwale ka tabo, pilu-telele, ni tumelo, f’ohe baputehi kaufela ka buniti luli ba ka ikutwa ku yahiwa.—Magalata 5:22, 23.

 7. Baputehi kaufela ba kona cwañi ku peta se siñwi kwa neku la mukopano o yahisa?

⁷ Nihaike ki ba sikai fela ba ba kana ba fa lingambolo fa tukiso ya mikopano ya puteho, bote ba kona ku peta se siñwi kwa mukopano o yahisa. Hañata ku banga ni linako zeo baputehi ba alaba lipuzo. Zeo ki linako za ku zibahaza tumelo ya luna fa nyangela. (Maroma 10:9) Ni kamuta li si ke za itusiswa ku ba zona linako za ku zwisezapili mihupulo ya luna ya ka butu, ku itumba ka ze lu petile ka butu, kamba ku nyaza-nyaza mulumeli sina luna. Kana seo ne si si ke sa swabisa moya o kenile? Lifapano ni balumeli sina luna li talimwa hande ka ku fitisisa kwa mukunda ka moya wa lilato. Bibele i li: “Mu ezane ka musa, mu utwelane butuku, mu swalelane, sina Mulimu ni Yena h’a mi swalezi ka Kreste.” (Maefese 4:32) Mikopano ya Sikreste i lu fa sibaka se sinde hakalo sa ku sebelisa yona kelezo ye nde yeo! Kuli ba eze cwalo, ba bañata ba fitanga kwa mikopano ka ku itahanela ni ku siyalela ha se i felile. Seo hape si tusa ba ba sa zo tabela, ili bao ka ku ipitela ba tokwa ku ikutwa ku amuhelwa. Kacwalo Bakreste kaufela ba ba ineezi ba peta kalulo ye ñwi mwa ku bisa mikopano ku ba ye yahisa ka ‘ku babalelana, ni ku susumezana mwa lilato ni mwa misebezi ye minde.’

Mu Itukiseze Hande

 8. (a) Ki buitomboli bufi bo bu babazeha bo ba ezanga ba bañwi kuli ba fumanehe kwa mikopano? (b) Jehova u toma mutala ufi ka ku ba mulisana?

⁸ Hailif’o ba bañwi ne ba kana ba fumaneha kwa mikopano ya puteho ka bunolo, ku ba bañwi buitomboli ka nako kaufela bwa tokwahala. Sina ka mutala, me wa Mukreste ya na ni ku beleka kuli a fumanele lubasi lwa hae ze tokwahala hañata u tahanga kwa hae ku zwa kwa musebezi a katezi. Cwale n’a kana a lukisa lico ni ku tusa bana ba hae kuli ba itukiseze ku ya kwa mukopano. Bakreste ba bañwi ba kana ba zamaya misipili ye mitelele ku ya kwa mikopano, kamba ba kana ba fokoliswa ni makulanu kamba busupali. Ka buniti fela, Jehova Mulimu wa utwisisa muinelo wa yo muñwi ni yo muñwi ya fumaneha kwa mukopano ka busepahali, sina mulisana ya lilato ha utwisisa butokwi bo bu ipitezi bwa ngu ye ñwi ya mwa mutapi wa hae. Bibele i li: “[Jehova, NW] u ka lisa mutapi wa hae sina mulisana; u ka kubukanya lingunyana mwa mazoho a hae, a li lwale mwa sifuba sa hae; mi ze anyisa, u ka li soteza ka musa.”—Isaya 40:11.

 9, 10. Lu kona cwañi ku fumana tuso ye tuna kwa mikopano?

⁹ Ba ba itombola hahulu kuli ba fumanehe kamita kwa mikopano ba kana ba ba ni nako ye nyinyani ya ku itukiseza litaba ze ka nyakisiswa. Ku zamaelela ni tomahanyo ya viki ni viki ya ku bala Bibele ku bisa ku fumaneha kwa Sikolo sa Bukombwa sa Teokratiki ku ba ko ku tusa hahulu. Ka ku swana, ku itukiseza cimo mikopano ye miñwi, ye cwale ka Tuto ya Tora ya ku Libelela ni Tuto ya Buka ya Puteho, ku i bisa ye tusa hahulu. Ka ku balela cimo litaba za tuto ni ku nyakisisa mañolo a mañwi a mwa Bibele a’ bonisizwe, ba ba sa fumani nako kabakala lubasi ba ka itukiseza ku ba ni kabelo ye buniti mwa lipuhisano za Bibele zeo za butokwa.

¹⁰ Ba bañwi, ba ba na ni miinelo ye sa pitihanyi, ba kona ku itusisa nako ye ñata mwa ku itukiseza mikopano. Sina ka mutala, ba kona ku eza patisiso ya mañolo a bonisizwe kono ili a si ka amiwa. Kacwalo bote ba kona ku itukiseza kuli ba fumane lituso ze ñata kwa mikopano ni ku ba ni kabelo ye nde mwa ku yaha puteho ka lingambolo ni likalabo za bona. Ka ku itukiseza hande, maeluda ni batanga ba bukombwa ba ka toma mutala o munde wa ku fa likalabo ze kuswani, ili ze nongile fa taba. Ka ku kuteka litukiso za Jehova, baputehi ba ka pima mikwa ya ku filikanya mwahal’a mikopano.—1 Pitrosi 5:3.

11. Ki kabakalañi kalimelo ya ka butu ha i tokwahala kuli lu itukiseze mikopano?

¹¹ Lipapali ni ku itabisa ko ku si kwa butokwa kwa buikangulo bwa luna bwa kwa moya ne ku kana kwa feza nako ya luna ye ñata. Haiba ku cwalo, lu tokwa ku itatuba mi ‘lu si ke lwa tokwa kutwisiso’ ka za mwa ku itusiseza nako ya luna. (Maefese 5:17) Mulelo wa luna u swanela ku ba wa ku ‘yolisa linako’ za likezo ze si za butokwa ilikuli lu itusise nako ye ñata mwa tuto ya Bibele ya ka butu ni ku itukiseza mikopano, hamohocwalo ni mwa sebelezo ya Mubuso. (Maefese 5:16) Ka mo ku inezi luli, seo haki se si bunolo kamita mi si tokwa buikalimelo. Ba banca ba ba tokomela seo ba sweli ku yaha mutomo o munde wa zwelopili ya kwapili. Paulusi n’a ñolezi Timotea wa mukulwani ya n’a sebeza ni yena kuli: “Tokomela zeo, u li tukufalelwe; ku zwelapili kwa hao ku lemuhiwe ki batu kaufela.”—1 Timotea 4:15.

Mitala ya mwa Linzwi la Mulimu

12. Lubasi lwa Samuele ne lu tomile mutala ufi o zwile mubano?

¹² Ha mu nyakisise mutala o munde o ne u tomilwe ki lubasi lwa Samuele, lo ne lu abana kamita mwa litukiso za ku kopana ni balapeli ba bañwi tabernakele ya Mulimu ha ne i li kwa Shilo. Ki banna fela ba ne ba tokwiwa ku ya kwa mikiti ka silimo ni silimo. Kono Elikana, ndat’ahe Samuele, n’a yanga ni lubasi lwa hae kaufela ha n’a “zwanga mwa munzi wa habo ka mwaha ni mwaha, ku y’o lapela ni ku ezeza [Jehova, NW] wa limpi, matabelo mwa Shilo.” (1 Samuele 1:3-5) Munzi wa Samuele, wa Ramataimi-Zofimi, mwendi ne u li kwatuko a likamba le li kwa Rentis ya mwa lizazi la cwale ili kwa njetumuko ya “naha ya malundu a Efraimi.” (1 Samuele 1:1) Kacwalo musipili wa ku ya kwa Shilo ne u kana u bile likilomita ze 30, ili musipili o ne u katalisa mwa miteñi yeo. Seo ki sona se ne lu ezanga ka busepahali lubasi lwa Elikana ‘ka mwaha ni mwaha, ha ne lu ya kwa Ndu ya [Jehova, NW]’—1 Samuele 1:7.

13. Ki ufi mutala o ne ba tomile Majuda ba ba sepahala Jesu ha n’a li fa lifasi-mubu?

¹³ Jesu ni yena n’a hulile a li silama sa lubasi lo lutuna. Ka silimo ni silimo lubasi l’o ne lu zwanga kwa Nazareta ku zamaya likilomita ze bat’o ba 100 ku liba kwa Jerusalema kwa mukiti wa Paseka. Ku na ni linzila ze peli ze ne ba kana ba itusisize. Nzila ye nongile luli ne li ya ku shetumukela mwa Musindi wa Megido ku zwa f’o ni ku kambama limita ze bat’o ba 600 ku fita mwa naha ya Masamaria ku ya cwalo kwa Jerusalema. Nzila ye ñwi ye ne latwa hahulu ki yeo Jesu n’a itusisize mwa musipili wa hae wa mafelelezo ha n’a ya kwa Jerusalema ka 33 C.E. Yeo ne i ama ku zamaya kwatasi-tasi mwa Musindi wa Jordani ku fitela h’a fita “mwa naha ya Judea . . . mwa buse bwa Jordani.” (Mareka 10:1) Ku zwa m’o, ku “ya kwa Jerusalema” ki musipili wa likilomita ze bat’o ba 30 ili wa ku kambama limita ze fitelela 1,100. (Mareka 10:32) Kamita, nyangela ya baabani mwa mukiti ba ba sepahala ne ba zamaya musipili o botehisa ku zwa kwa Galilea ku ya kwa Jerusalema. (Luka 2:44) Ki mutala o munde hakalo kwa batanga ba Jehova ba mwa linaha ze zwezipili kacenu, bao buñata bwa bona ba kona ku fumaneha kwa mikopano ya Sikreste ka bunolo, kabakala litanansipoti za cwale!

14, 15. (a) Anna n’a tomile mutala ufi? (b) Lu kona ku itutañi kwa mubonelo o munde wa baputehi ba banca?

¹⁴ Mutala o muñwi ki wa Anna ya n’a li mbelwa wa lilimo ze 84. Bibele i bulela kuli n’a “sa zwi mwa Tempele.” (Luka 2:37) Fahalimw’a seo, Anna n’a bonisa cisehelo ye lilato ku ba bañwi. Ha n’a boni Jesu ya n’a li mbututu ni ku lemuha kuli ne li yena Mesiya ya n’a sepisizwe, n’a ezizeñi? A lumba Mulimu mi a kalisa ku “bulela za Jesu kwa batu kaufela ba ba libelezi ku liuluka kwa Jerusalema.” (Luka 2:38) Ki mubonelo o munde hakalo, ili mutala kwa Bakreste kacenu!

¹⁵ Ee, ku kopana kwa luna ni ku abana mwa mikopano ku swanela ku tabisa hahulu kuli mane, sina Anna, ni kamuta lu si ke lwa bata ku tondahala teñi. Ba banca ba bañata ni bona ba ikutwa ka nzila ye swana. Ka ku ba ba ba tile mwa liseli la Mulimu le li makaza ku zwa mwa lififi, ba bata ku ituta ze ñata, mi ba bañata ba bonisa cisehelo ye tuna kwa mikopano ya Sikreste. Kwa neku le liñwi, ba b’a ngile nako ye telele mwa niti ba lukela ku tokomela ku sa ‘tuhela lilato la bona la pili.’ (Sinulo 2:4) Makulanu kamba miinelo ye miñwi ye sa pimiwi ki mutu fokuñwi neikana ya fokolisa ku kopana. Kono ku lata sifumu, ku itabisa, kamba ku sa ba ni cisehelo ni kamuta ha ku swaneli ku lu tahiseza ku sa itukiseza, ku sa iseza teñi pilu, kamba ku sa kopana kamita.—Luka 8:14.

Mutala o Munde ka ku Fitisisa

16, 17. (a) Ki ufi o ne u li mubonelo wa Jesu kwa neku la mikopano ya kwa moya? (b) Bakreste kaufela ba swanela ku lika ku likanyisa mukwa ufi o munde?

¹⁶ Jesu n’a tomile mutala o zwile mubano wa ku itebuha mikopano ya kwa moya. Ha n’a li mwanana wa lilimo ze 12, n’a bonisize lilato la hae kwa neku la ndu ya Mulimu mwa Jerusalema. Bashemi ba hae ne ba sa zibi kwa n’a inzi kono kwa mafelelezo ba mu fumana mwa tempele inze a buhisana Linzwi la Mulimu ni baluti. Ka ku alaba pilaelo ya bashemi ba hae, Jesu n’a buzize ka likute kuli: “Ne mu sa zibi kuli ni swanezi ku ba kwa litaba za Ndate?” (Luka 2:49) Ka ku ipeya kwatasi, Jesu ya n’a li mwanana a kuta kwa Nazareta ni bashemi ba hae. Teñi k’o a zwelapili ku bonisa lilato la hae kwa neku la mikopano ya bulapeli ka ku fumaneha kamita kwa sinagoge. Kacwalo, ha n’a kalile bukombwa bwa hae, Bibele i biha kuli: “A taha ni mwa Nazareta mw’a n’a hulezi. Ka mukwa wa hae, ka lizazi la Pumulo, a kena mwa sinagoge, mi a yema kuli a bale.” Jesu ha s’a balile ni ku talusa Isaya 61:1, 2, baputehi ba kala ku ‘komoka manzwi a musa a n’a zwa mwa mulomo wa hae.’—Luka 4:16, 22, litaku li siyamisizwe ki luna.

¹⁷ Kacenu mikopano ya Sikreste i latelela muezezo o mutomo wo o swana. Mukopano ha se u kwaluzwi ka pina ya tumbo ni tapelo, litimana za mwa Bibele (kamba litimana ze amilwe mwa litaba za tuto ya Bibele) za balwa ni ku taluswa. Bakreste ba niti ba mwa tamo ya ku likanyisa mukwa o munde wa Jesu Kreste. Ka ku ya ka miinelo ya bona, ba fumana tabo mwa ku fumaneha kamita kwa mikopano ya Sikreste.

Mitala ya mwa Lizazi la Cwale

18, 19. Ki mitala ifi ye minde yeo mizwale ba mwa linaha ze si ka zwelapili ba tomile kwa neku la mikopano ya puteho, mikopano ye minyinyani ni ye mituna?

¹⁸ Mwa libaka za lifasi-mubu ze si ka zwelapili, mizwale ni likaizeli ba luna ba bañata ba toma mutala o munde wa ku itebuha mikopano ya Sikreste. Mwa Mozambique ne k’u ngezi muokameli wa sikiliti, Orlando, ni musal’a hae, Amélia, lihora ze 45 ku zamaya ka mahutu likilomita ze 90 fahalimw’a lilundu le li telele kuli a yo sebeleza mukopano. Ku zwaf’o ne ba na ni ku kuta hape kuli ba yo sebeleza mukopano o tatama. Orlando ka buishuwo n’a bihile kuli: “Ha se lu kopani ni mizwale ba kwa Puteho ya Bawa lwa ikutwa kuli luna mane ne lu si ka eza se siñwi. Kuli ba tahe kwa mukopano ni ku kutela kwa mahae a bona ne ba na ni ku zamaya ka mahutu musipili wa likilomita ze bat’o ba 400 ka mazazi a 6, mi mwahal’a bona ne ku na ni muzwale wa lilimo ze 60!”

¹⁹ Ku cwañi ka za ku itebuha mikopano ya puteho ya ka viki ni viki? Kashwashwa Njamba ki kaizeli wa lilimo ze mwa ma-70 ili ya sina buikangulo bo bunde. U pila mwa Kaisososi, ili kanzi ka ka bat’o ba likilomita ze 5 ku zwa kwa Ndu ya Mubuso ya Rundu, kwa Namibia. Kuli a fumanehe kwa mikopano, u zamayanga musipili wa ku ya ni ku kuta wa likilomita ze 10 mwahal’a mushitu. Ba bañwi ba natezwi mwa nzila yeo, kono Kashwashwa yena u zwelapili ku tahanga. Mikopano ye miñata i eziwa mwa lipuo za sa zibi. Kacwalo ku fumaneha teñi ku mu tusa cwañi? Kashwashwa u li: “Ka ku latelela mañolo, na likanga ku lemuha se i bulela ngambolo.” Kono ha zibi ku bala ni ku ñola, kacwalo u latelela cwañi mañolo? U alaba kuli: “Na teelezanga kwa mañolo eni petile.” Mi ka lilimo-limo, sa petile mañolo a mañata. Kuli a hulise buikoneli bwa hae bwa ku itusisa Bibele, u sweli ku kena kwa sikolo sa ku ituta ku bala ni ku ñola seo puteho i lukisize. U bulela kuli: “Ni lata ku kopana. Kamita ku banga lika ze nca za ku ituta. Ni lata ku swalisana ni mizwale ni likaizeli. Nihaike ha ni koni ku ambola ni bote, kamita ba tahanga ku to ni lumelisa. Mi sa butokwa ka ku fitisisa, na ziba kuli ka ku fumaneha kwa mikopano, ni tabisa pilu ya Jehova.”

20. Ki kabakalañi ha lu sa lukeli ku tuhela mikopano ya luna ya Sikreste?

²⁰ Sina Kashwashwa, balapeli ba Jehova ba ba bolule-lule mwa lifasi kamukana ba bonisa buitebuho bo bu babazeha kwa neku la mikopano ya Sikreste. Lifasi la Satani ha li nze li atumela sinyeho ya lona, ha lu swaneli ku tuhela ku kopana hamoho kwa luna. Kono, ha lu toneñi kwa moya ni ku bonisa buitebuho bo bu tungile kwa neku la mikopano ya puteho, mikopano ye minyinyani ni ye mituna. Seo si ka tabisa pilu ya Jehova ni ku lu tahiseza lituso ze ñata ha lu nze lu ifepa ka tuto ya bumulimu ye isa kwa bupilo bo bu sa feli.—Liproverbia 27:11; Isaya 48:17, 18; Mareka 13:35-37.

Lipuzo za Lundululo

◻ Ki kabakalañi ku fumaneha kwa mikopano ya Sikreste ha ili tohonolo?

◻ Baputehi kaufela ba kona cwañi ku ekeza kwa mukopano o yahisa?

◻ Ki ufi mutala o zwile mubano wa n’a tomile Jesu Kreste?

◻ Ki ifi tuto ye kona ku itutiwa kwa mizwale ba mwa linaha ze si ka zwelapili?

[Mbokisi fa likepe 31]

Ba Itebuha Mikopano Ya Ka Viki Ni Viki

Bolule-lule ba batu ba pila mwa mileneñi mo ku na ni bunjebwe ni bukebenga. Ku si na taba ni miinelo yeo, Bakreste ba niti mwahal’a bona ba bonisa buitebuho bo bu babazeha kwa neku la mikopano ya Sikreste. Eluda ya sebeleza ku ye ñwi ya liputeho za mwa Soweto za Gauteng, kwa South Africa, u biha kuli: “Mwa puteho ya Lipaki ni bahasanyi ba ba si ka kolobezwa ba 60, ba 70 kamba 80, mi fokuñwi ba ba fitelela f’o, ba fumanehanga kwa mikopano ya luna. Nihaike kuli mizwale ni likaizeli ha ba zamayangi musipili o mutelele kuli ba fumanehe teñi, muinelo u maswe hahulu mwa sibaka se sa Soweto. Muzwale yo muñwi n’a tabilwe mwa mukokoto ha n’a ya kwa mukopano. Likaizeli ba ba fitelela ba babeli ne ba fwañatilwe mwa ku bata ku ba uzweza. Kono seo hasi ba tuhelisi ku tahanga. La Sunda ni la Sunda, lu itutanga lipina ka nakonyana ha se lu kwalile mukopano ka tapelo. Ba ba eza 95 pesenti kamba ku fitelela ba siyalelanga kamita ili ku opela lipina kaufela ze ka opelwa fa mikopano viki ye tatama. Seo si tusa ba ba sa zo tabela kuli ba itute lipina ni ku abana mwa ku li opela.”

Ba ba pila mwa matakanyani ba na ni mikwalelo ye miñwi, ye cwale ka ku zamaya misipili ye mitelele kuli ba fumanehe kwa mikopano halalu ka viki. Bosinyalana ba bañwi ba ba tabela ba pila likilomita ze 15 ku zwa kwa Ndu ya Mubuso mwa Lobatse, kwa Botswana. Mwa nako ye felile ye kwana silimo, se ba fumanehile kamita kwa mikopano ni bana ba bona ba babeli. Munna u lukisanga makatulo kuli a babalele lubasi. Musali u lekisanga tuka to tuñwi kuli a ekeze fa mali a lubasi ilikuli ba kone ku lifa mali a nzila ha ba ya ni ku kuta kwa mikopano.

Cwanoñu fa manzibuana a mañwi mwa mbumbi, hamulaho wa mukopano ni muokameli wa mupotoloho, lubasi l’o lwa tokwa nzila fa sitishini sa limbasi ka 21:00 hrs. Limbasi ne li itahanezi ku ya kabakala muinelo wa mbyumbyulu o maswe. Mupokola a yemisa simbayambaya sa hae mi a ba buza ze ne ba eza. Ha s’a utwile ka za manyando a bona, a ba shwela makeke mi a ba isa kwa hae ili musipili wa likilomita ze 15. Musali, ya li muhasanyi ya si ka kolobezwa, a bulelela munn’a hae kuli: “Mwa bona, ha lu beya mikopano mwa sibaka sa pili, Jehova wa tusa kamita.” Cwale, ni munna sa bonisize takazo ya ku ba mukutazi wa taba ye nde.

[Siswaniso se si fa likepe 32]

Lipaki ba ba cwale ka bao ba mwa Romania ba toma mutala o munde wa ku itebuha mikopano ya Sikreste