Ku Susuezana Lizazi ha li nze li Sutelezi

“Lu [susuezane, “NW”] sihulu ka ku bona kuli lizazi le lituna li sutelezi.”—MAHEBERU 10:25.

 1, 2. Ki lizazi lifi le li sutelezi bukaufi, mi ki ufi o swanela ku ba ona mubonelo wa batu ba Jehova?

BAO kacenu ba ba abana mwa ku bulela kuli, ‘Taha ni ku to nga mezi a bupilo,’ ha ba ikauhanyi ka ku zwa ku ba bañwi. Lizazi le lituna la Jehova ili la tulo ha li nze li atumela, ba sebelisa kelezo ye mwa Bibele ye li: “A lu babalelane, kuli lu susumezane mwa lilato ni mwa misebezi ye minde. Lu si ke lwa tuhela liputeho za luna, mo ba ezeza ba bañwi; kono lu [susuezane, NW], sihulu ka ku bona kuli lizazi le lituna li sutelezi.”—Maheberu 10:24, 25.

² Mañolo a polofita lona “lizazi” le sina “Lizazi la [Jehova, NW]” (2 Pitrosi 3:10) Bakeñisa kuli Jehova ki Ya Pahami ka ku Fitisisa, Mulimu ya na ni m’ata kaufela, ha ku na lizazi le li kona ku fita lizazi la hae. (Likezo 2:20) Li talusa ku bubeka bubusi bwa hae sina Mulimu fahalimw’a pupo kamukana. Lona lizazi leo la butokwa bo bu si na bo bu likana ni bona se li sutelezi bukaufi.

 3. Lizazi la Jehova ne li sutelezi cwañi bukaufi kwa Bakreste ba mwa lilimo za mwanda wa pili, mi ku cwañi kwa neku la luna kacenu?

³ Muapositola Paulusi na taluselize Bakreste mwa lilimo za mwanda wa pili wa Nako ya luna ye Zibahala kuli lizazi la Jehova ne li atumela. Ne ba talimezi kwapili mwa ku taha kwa lona lizazi leo, kono kwamulaho k’o, ne ku sa na ni lilimo ze fitelela 1,900 kuli li fite. (2 Matesalonika 2:1-3) Ku si na taba ni sisupo seo, ne ba na ni ku susuezwa kakuli lona lizazi leo kaniti luli ne li na ni ku taha, mi haiba Bakreste ka tundamo ne ba ka zwelapili mwa tumelo yeo, ne ba ka kena mwa lizazi leo le li fuy’ozwi. (2 Timotea 4:8) Kwamulaho k’o, lona lizazi leo ne li bonahala ku sutelela bukaufi. Haili kwa neku la luna kacenu, lizazi la Jehova kaniti luli se li sutelezi bukaufi. Litalelezo kamukana ze makaza za bupolofita bwa Bibele li fa buniti bwa sona sisupo seo se si tahisa tabo. Ona cwale-cwale fa, libizo la Mulimu wa luna, Jehova, li ka keniswa ku ya ku ile.—Luka 11:2.

Ku Susuezwa ki Libizo la Bumulimu

 4. Ka ku ya ka Sinulo 19:6, ki mañi ya ka fita fa ku ba Mulena, mi libizo la hae li kona ku lemuhiwa kamukwaufi?

⁴ Libizo la bumulimu li swanela ku ba taba ye hoha mamelelo ya lubasi lwa mufuta wa mutu kaufela. Toloko ye bizwa Today’s English Version i talusa kuli: “Mu lumbeke Mulimu! Kakuli Mulena, Mulimu wa luna Ya M’ata O’te, ki Mulena!” (Sinulo 19:6) Ka ku ya ka yona toloko yeo ya Bibele ya mwa lilimo za myanda ye mashumi a mabeli, ki Mulena, Mulimu ya m’ata ote. Yona toloko yeo, hamohocwalo ni litoloko ze ñwi za mwa lizazi la cwale, ha i fi libizo la yena Mutu y’o wa bumulimu ya kalisa ku busa sina Mulena. Niteñi, libizo la bumulimu li kopanyizwe mwa pulelo ya ku makala ya “Hallelujah!” (“Mu lumbeke Jah” kamba, “Mu lumbeke Jehova”) ye fumanwa mwa Revised Standard Version, New International Version, ni toloko ya Moffatt ya Sinulo 19:6. Mwahal’a butuna bwa Nako ya luna ye Zibahala, libizo la bumulimu ka mutomo se li patilwe mwa litoloko za Bibele. Niteñi, sina ha lu ka bona, lona libizo leo se li bile ni susuezo ye tuna kwa batu ba Mulimu, mwa linako za kwaikale ni za mwa lizazi la cwale.

 5, 6. (a) Ki kabakalañi Mushe ha na tokwa ku ziba libizo la Mulimu y’o na yemela? (b) Seo ne si lukela ku ama cwañi Maisilaele muta Mushe na koñomekile libizo la bumulimu?

⁵ Lwa hupula kuli Mushe ha n’a lumilwe ki Mulimu Ya Pahami ka ku Fitisisa kwa batu ba Isilaele ba ne ba inzi mwa butanga mwa naha ya Egepita, puzo ya kuli ki mañi ya n’a mu lumile ne i zuhile ili yona mwa minahano ya batu bao Mushe na lumilwe ku bona. Mushe na libelezi kuli batu ba Sijuda ba ne ba nyanda ne ba ka tokwa ku ziba libizo la Mulimu ya n’a yemelwa ki yena. Ka seo lu bala kwa Exoda 3:15 kuli: “Mulimu a ekeza a li ku Mushe: S’o ka bulelela bana ba Isilaele ki se, u y’o li: [Jehova, NW] Mulimu wa bokuku a mina, Mulimu wa Abrahama, Mulimu wa Isaka, Mulimu wa Jakobo, ki Yena ya ni lumile ku mina. Ki lona Libizo la ka la kamita, mi ka lona mu ka ni hupula mwa linako kaufela, ku ya ku ile.”

⁶ Yona taba yeo ha ne i koñomekilwe ku bona, Maisilaele ne ba lukela ku ikutwa ku susuezwa hahulu. Ku lukululwa kwa bona ne ku filwe buniti ki Mulimu wa niti a nosi, Jehova. Mi ne ku lukela ku ba ko ku susueza hakalo ku ba ni tibelelo ya ku twaelana ni Mulimu ha n’a ka bonisa taluso ya libizo la hae la ka butu—isiñi ku ikauhanya ili yena kwa batu ka buikuhumuso!—Exoda 3:13; 4:29-31.

 7. (a) Lu ziba cwañi kuli balutiwa ba Jesu ne ba twaelani ni libizo la bumulimu? (b) Libizo la Mulimu ne li kashelizwe kwatuko kamukwaufi?

⁷ Balutiwa ba Mulena Jesu Kreste ni bona hape ne ba susuelizwe hahulu ki libizo la bumulimu, Jehova, ni seo ne li si yemela. (Joani 17:6, 26) Mwahal’a bukombwa bwa Jesu bwa fa lifasi-mubu, kaniti luli n’a si ka kasheza libizo la bumulimu kwatuko, mi ne si mulelo wa hae kuli libizo la hae ka sibili, Jesu, li be mwa sibaka sa pili. Ne li fela hamulaho wa ku kalisa kwa bukwenuheli bo ne bu talusizwe cimo bwa ku zwa kwa tumelo ya Sikreste ya niti ko na fo ne li kashelizwe kwatuko libizo la bumulimu, ee, ku li zwisa luli mwa ku ambolisana kwa Sikreste. (Likezo 20:29, 30) Libizo la Mwan’a Mulimu ha ne li ka kalisa ku fiwa mamelelo ye tuna, ku kutiseza mwamulaho leo la Ndate, bao ba ne ba ipapata ku ba Bakreste ne ba ka fumana kuli ku lapela kwa bona Ndate ku ekezeha ku ba ko ku si kwa ka butu, ko ku si na swalisano ya lubasi, mi kacwalo ko ku sa susuezi hahulu.

 8. Ki ku amiwa kufi ko ku zwelapili fahalimw’a batu ba Mulimu mwa ku ikungela libizo la Lipaki za Jehova?

⁸ Kacwalo, ne li libaka le ne li tisa tabo ye tuna muta Baituti ba Bibele ba mwahal’a Macaba ba ne ba swalisani ni Watch Tower Sosaiti ne ba ngile libizo la Lipaki za Jehova ka 1931. Ne ku sa tahisi fela tabo kono ne ku susueza hahulu. Ka seo, baituti ba Bibele ba ne ba na ni libizo le linca cwale ne ba kona ku susuezana.—Mu bapanye Isaya 43:12.

 9. Bakreste ba niti ba ikutwa cwañi ka za Y’o ba li Lipaki za hae?

⁹ Ka lona libaka leo, Bakreste ba niti kacenu ba fumana kuli kwa swanela ku ziba yena Y’o ba li Lipaki za hae ze ne li talusizwe cimo, sina mwa n’a ezelize Jesu Kreste Mueteleli wa bona ha n’a sa li fa lifasi-mubu fa. (Sinulo 1:1, 2) Ee, ba mu ziba yena a nosi sina y’o libizo la hae ki Jehova.—Lisamu 83:18.

Ku Tala ka Tabo ni Moya o Kenile

10-12. (a) Ki sifi se ne si ka ezahala kwa balateleli ba Jesu m’ata a sebeza ha na ka ba fahalimw’a bona? (b) Lipaki za Jehova ba ba filwe susuezo ya tabo ba bata ku nga yo muñwi ku yo muñwi kamukwaufi?

¹⁰ Jesu Kreste mwa manzwi a hae a ku laeza baapositola ba hae na bulezi kuli: “Mu ye cwale, mu lute macaba kaufela, mu ba kolobeze ka Libizo la Ndate, ni la Mwana, ni la Moya o Kenile; Mu ba lute ku mamela ze ni mi laezi kaufela. Mi, a mu bone, na, ni inzi ni mina ka mazazi kaufela, ku isa kwa mafelelezo a lifasi.”—Mateu 28:19, 20.

¹¹ Mu lemuhe kuli Bakreste ba ba sa z’o lutwa ne ba na ni ku kolobezwa mwa libizo la moya o kenile. Ona moya o kenile wo haki mutu kono ki m’ata a sebeza a Jehova Mulimu, ao A itusisa ona ka Jesu Kreste. Fa Pentekonta, Jehova Mulimu, ka Jesu, n’a suluzi ona m’ata a sebeza ao fahalimw’a balateleli ba Jesu Kreste ba ne ba ineezi. (Likezo 2:33) Ne ba tezi ka moya o kenile, mi ye ñwi ya lika ze tiswa, kamba miselo, ya moya o kenile ki tabo. (Magalata 5:22, 23; Maefese 5:18-20) Tabo ki muinelo o susueza. Balutiwa ne ba na ni ku tala tabo ya moya o kenile. Tapelo ye ne i ñozwi ki muapositola Paulusi ki ye swanela hahulu ye li: “Cwale, Mulimu Muñ’a sepo a mi taze tabo ni kozo kaufela mwa tumelo, kuli mu tale sepo ka mata a Moya o Kenile.”—Maroma 15:13.

¹² Ka ku tala moya o tahisa tabo, Lipaki za Jehova kacenu, ku kopanyeleza cwalo ni “buñata bo butuna,” ba ka bata, ee, ba ka susuezwa, ku susuezana mwahal’a muinelo wo wa linto o’ si wa silikani. Ka ku swana, muapositola Paulusi n’a bulezi ka za ku ‘kutazana.’—Sinulo 7:9, 10; Maroma 1:12; 14:17.

Mabaka Kaufela a ku Susuezwa

13. Ki mabaka afi a lu na ni ona a ku susuezwa ni a ku susuezana?

¹³ Ka ku ipumana isali bona mwahal’a muinelo wo wa linto, ili w’o mulwanisi wa nto kaufela ye lukile ki yena mubusi mi mane ni mulimu wa ona, Bakreste ba ka bata ku susuezana mwahal’a puteho ya Sikreste ya lifasi kamukana, ili ye tezi moya o kenile wa Jehova Mulimu. (Maheberu 10:24, 25; Likezo 20:28) Lu na ni mabaka kaufela a ku susuezwa. Ee, lu ba ba itumela hakalo mwa ku ba ni zibo ye nepahezi ya Jehova ni ya Mwan’a Hae ni ya m’ata a sebeza ao ba itusisa, fo kikuli, moya o kenile! Lu ba ba itumela hakalo fa sepo ye ba lu fa! Ku lapela kwa luna kacwalo ku tezi tabo. Muapositola Paulusi na bulelezi Bakreste bao na ñolezi liñolo la hae kuli ba swanela ku susuezana ni ku tiisana mwa tumelo ya bona ye kenile ka ku fitisisa. Ne ba na ni ku eza seo ‘hahulu sina ka swanisezo ha ne ba bona lizazi kuli ne li sutelezi bukaufi.’ Ka ku ekeza, muta lipuso za mañañazwana za lifasi-mubu le li ka zwisa Bukreste bwa buhata, hamohocwalo ni bulapeli kamukana bwa buhata, muinelo u ka tokwa kuli lu susuezane hahulu ni ku fita.

14. Ki bomañi ba ba swanela ku susuezana, mi ki kamukwaufi?

¹⁴ Hailifo maeluda ba etelela mwa ku susueza mutapi mwa liputeho za bona ka buñwi, Bakreste kaufela ba tokwa ku susuezana, sina Maheberu 10:25 ha i eleleza cwalo. Ka buniti fela, wo ki mulao wa Sikreste. Haiba mu silama sa puteho, kana mwa fa susuezo ye cwalo? Ne mu kana mwa makala kuli, ‘Ni ka kona kamukwaufi? Ki sifi se ni kona ku eza?’ Sa pili, ka ku fumaneha fela kwa mina kwa mikopano ni kemelo ya mina kwa tukiso ya Sikreste, kana mizwale ba bañwi kaufela ni likaizeli ha ba susuezwi, sina mina ka sibili ka mo ku inezi fela ha mu susuezwa muta mu bona ba bañwi ha ba nze ba fumaneha ka busepahali kwa mikopano ya puteho? Ba kona ku susuezwa hape ki mutala wa mina wa tundamo ya ka busepahali. Ka ku zwelapili kwa mina mwa nzila ya Sikreste ku si na taba ni butata bwa mwa bupilo ni makandauko, ka ku sa kutela mwamulaho, mwa kona ku beya mutala o susueza.

Mu Tule ze Zwafisa ze Zwelela ku Diabulosi

15. Ki kabakalañi Diabulosi a “halifile maswe,” mi u halifezi mañi?

¹⁵ Haki luna fela lu li nosi ba ba ziba kuli lizazi la Jehova li fakaufi. Satani Diabulosi ni yena wa ziba. Sinulo 12:12 i lu taluseza kuli cwale se ku na ni bumai fa lifasi-mubu “kakuli Diabulosi u shetumukezi ku mina a halifile maswe, ka ku ziba kuli nako ya hae ki ye nyinyani.” Sina Sinulo 12:17 ha i bonisa, buhali bwa hae bu libisizwe ku bao “ba ba buluka milao ya Mulimu, ni ba ba sweli bupaki bwa Jesu.” Ha ku na ku kakanya ka za teñi—Diabulosi u bata ku lu zwafisa! Mi wa ziba ka mwa ku likela ku eza seo. Wa ziba bufokoli ni butata bwa luna, mi u ka ceb’okela ku zona zeo.

16. Ki kabakalañi Satani ha itusisa ku zwafa sina silwaniso?

¹⁶ Ki kabakalañi Diabulosi ha itusisa ku zwafa sina silwaniso? Kakuli hañata sa sebeza. Nihaiba mutu ya n’a tiyezi twaniso ni nyandiso ka sibili n’a kana a ngandumunwa ki ku zwafa. Satani u bata ku nyaza Jehova Mulimu ni ku lika ku bonisa kuli wa kona ku kwenula batu ka ku ba zwisa mwa ku sebeleza Jehova. (Liproverbia 27:11; mu bapanye Jobo 2:4, 5; Sinulo 12:10.) Haiba a kona ku mi zwafisa, n’a kana a mi ezisa ku kuyuka mwa sebelezo ya mina ku Mulimu; mane n’a kana a mi ezisa kuli mu tuhele, ni ku fita fa ku ba besi ba kamita mwa ku kutaza taba ye nde ya Mubuso.—2 Makorinte 2:10, 11; Maefese 6:11; 1 Pitrosi 5:8.

17. Ze maswe ze ne li zwile mwa ku zwafa ne li bonahezi cwañi mwa lizazi la Mushe?

¹⁷ Nto ye maswe ye kona ku zwa mwa ku zwafa i kona ku lemuhiwa mwa muinelo wa Maisilaele mwa Egepita wa kwaikale. Mushe ha s’a bulezi ku Faro, yena muhateleli y’o a ekeza kwa milwalo ya bona ni ku hatelelwa kwa bona. Mulimu a taluseza Mushe kuli a koñomeke kwa Maisilaele kuli kaniti luli N’a ka ba lukulula, ku ba eza batu ba Hae, ku tahisa ku banduka kwa bona, ni ku ba tisa mwa naha ya sepiso. Mushe a bulela seo kwa bana ba Isilaele. Kono Exoda 6:9 i biha kuli: “Ha ba si ka teeleza Mushe kabakala butuku bwa pilu, ni kabakala buzike bo bu tata.” Ona muhato wo ne u zwafisize nihaiba Mushe mwa ku bata ku bulela ku Faro sina ka mwa na laelezwi, konji Jehova ha n’a file Mushe buikolwiso ni ku mu susueza.—Exoda 6:10-13.

18. Ki kabakalañi ha ku na ni tokwahalo ye tuna kwa batu ba Mulimu ku tiyela ku zwafa ko ku tiswa ki Diabulosi?

¹⁸ Satani Diabulosi wa ziba hande ze maswe ze kona ku taha fahalimw’a mutanga wa Mulimu bakeñisa ku zwafa. Sina Liproverbia 24:10 ha ili: “Ha u fokola mwa lizazi la ziyezi, mata a hao ki a manyinyani.” Bakeñisa kuli lu ndumbwikezi ka butungi mwa nako ya maungulo, lu tokwa ku ba ni m’ata ni ku tiya kwa moya. Se ku fosahezi kale kuli lu na ni ku tiyela ku sa petahala kwa luna, mifokolo, ni lifoso ze ne li kana za lu kutisa mwamulaho; kono bakeñisa kuli Satani u lika ku sebelisa zona lifoso zeo, lu tokwa tuso.

Mu Tiyele ka Tata fa Sitabelo sa Kreste

19. Ki sifi se si ka lu tusa mwa ku tiyela ku zwafa, mi ki kabakalañi?

¹⁹ Tuso ye tuna kwa neku la se ki tukiso ya tiululo ya ezize Jehova kuli i be teñi ka Jesu Kreste. Lwa kona ku ba batuli ka ku tiyela fa tiululo. Ku na ni kozi ye tuna ku keshebisa yona tukiso ye. Ee, lu kabe lu ezize mafosisa, kamba ku eza sibi, bakeñisa kuli ha lu si ka petahala. Kono ha lu tokwi ku zwafa kamba ku tuhela, ka ku ikutwa kuli ha ku na sepo, mi ni ku wela mwa lilaba la Satani. Lwa ziba kuli lu na ni sitabelo se si tezi kwa neku la sibi. Tiululo ya kona ku takula libi. Haiba lu ba “buñata bo butuna,” lu lukela ku ba ni tumelo ye tiile ni ku sepa kuli lwa kona ku tapisa liapalo za luna ni ku li sweufaza mwa mali a Ngunyana.—Sinulo 7:9, 14.

20. Sinulo 12:11 i bonisa cwañi kuli muzwafisi yo mutuna, Diabulosi, wa konwa ku tulwa?

²⁰ Kwa Sinulo 12:10 Satani u talusizwe sina “mutami wa banyani ba luna, ya n’a ba tamanga litaba fapil’a Mulimu wa luna, musihali ni businu.” Lu kona ku tula cwañi yena mutami ya maswe wa mufuta o cwalo ni muzwafisi yo mutuna? Timana 11 ya yona kauhanyo yeo i fa kalabo ye li: “Ba mu tuzi ka mali a Ngunyana, ni ka manzwi a bupaki bwa bona; ha ba si ka lata bupilo bwa bona, ha ba si ka saba lifu.” Kacwalo batu ba Jehova ba tokwa ku ba ni sepo ye tezi mwa sitabelo sa tiululo, mwa mali a Ngunyana. Mu buluke ka ku tiya susuezo ye zwelela mwa ku fa bupaki, ku abana kamita taba ye nde ya Mubuso wa Mulimu ni mañi ni mañi ye mu kona ku fumana.

21. Ne lu kana lwa abana kamukwaufi ka ku sa lemuha mwa musebezi wa Diabulosi wa ku zwafisa mizwale ba luna?

²¹ Fokuñwi, nihaiba ka ku sa ziba, ne lu kana lwa abana mwa musebezi wa Diabulosi wa ku zwafisa mizwale ba luna. Kamukwaufi? Ka ku batisisa milatu, ku libelela ze ñata ni ku fita, kamba ku ba ya lukile ka ku tula tikanyo. (Muekelesia 7:16) Kaufel’a luna lu na ni mapalelwi ni bufokoli. Haike lu si ke lwa ceb’okela ku zona sina mwa ezeza Diabulosi. Ka ku fapahana, haike lu bulele ka nzila ye susueza ka za mizwale ba luna ni batu ba Jehova sina sikwata se si tamani. Lu bata ku zwelapili ku tiisana ni ku zwa kwa ku tepelelisana.

Ku Susuezana Lizazi ha li nze li Sutelezi

22, 23. (a) Ki kabakalañi ha lu sa tuheleli maeluda fela kuli bona ba be simbule sa susuezo? (b) Baokameli mwa puteho ya Sikreste ba kona ku susuezwa cwañi?

²² Lu swanela ku eza buitamo bo bu tiile bwa ku susuezana kamita lizazi ha li nze li sutelezi bukaufi. Mu susueze ba bañwi ka mutala wa mina wa busepahali ni manzwi a ku omba-omba. Mu likanyise Jehova ni Mulena Jesu Kreste kwa neku la se. Mu si ke mwa tuhelela seo kwa maeluda fela ba mwa puteho kuli ba be simbule sa susuezo. Ee, maeluda bona ka sibili ba tokwa susuezo. Ba na ni mifokolo ni mapalelwi sina ba bañwi kaufela ba ba inzi mwa mutapi, mi ba na ni ku tiyela butata bo bu swana mwa ku babalela mabasi a bona mwa lifasi le li sweli ku sinyeha. Fahalimw’a seo, ba na ni seo Paulusi a si biza sina ze mu tahela za ku babalela liputeho. (2 Makorinte 11:28, 29) Musebezi wa bona ki o tata—ba tokwa susuezo.

²³ Mwa kona ku susueza ka butuna bao ba ba mwa buikalabelo bwa buokameli mwa puteho ya Sikreste ka ku swalisana ni bona. Kacwalo mu ka latelela kelezo ye kwa Maheberu 13:17: “Mu utwe bazamaisi ba mina, mi mu ipeye kwatas’a bona; kakuli ba tonela [mioyo, NW] ya mina, hailifo ba ka buzwa za yona. Mu ba utwe; kuli ba eze musebezi wo ka tabo, isi ka ku tonga ko ku si na ku mi tusa se siñwi.”

24. Mwa lizazi le la ku zwafa, ki sifi se lu swanela ku eza, mi ki kabakalañi?

²⁴ Lu pila mwa lizazi la ku zwafa. Lipilu za batu li omelezi bakeñisa ku saba ni ku libelela lika ze ka taha mwa lifasi le li yahilwe, sina mwa n’a taluselize cimo Jesu. (Luka 21:25, 26) Ka ku ba ni butata bo buñata bo bu tengamezi kwa ku tisa ñoñoleho ni ku tepeleza, mu “[susuezane, NW], sihulu ka ku bona kuli lizazi le lituna li sutelezi.” Mu latelele kelezo ya muapositola Paulusi ye kwa 1 Matesalonika 5:11 ye li: “Mu tiisane lipilu, mi mu yahisane, sina ha mu nze mu eza.”

Ne Mu Ka Alaba Cwañi?

◻ Ki kabakalañi Bakreste ha ba swanela ku susuezana, ku fita ka mo ne ba ezeza kwa makalelo?

◻ Zibo ya libizo la bumulimu se i bile ye susueza kamukwaufi kwa batu ba Jehova?

◻ Ki mwa linzila lifi m’o luna ka butu lu kona ku susuezana?

◻ Ki kabakalañi ha lu lukela ku pima ku abana mwa musebezi wa Diabulosi wa ku zwafisa mizwale ba luna?

[Siswaniso se si fa likepe 29]

Maeluda ba etelela mwa ku susueza mutapi mwa liputeho za bona