“Mu Si Ke Mwa Itatafaza Lipilu”

13. Paulusi n’a file temuso ifi, mi n’a amile cwañi Samu 95?

¹³ Paulusi ha sa bulezi ka za ku fuyaulwa kwa Bakreste ba Maheberu, a fa temuso ye: “Ki s’o bulela Moya o Kenile, ha u li: Kacenu ha mu utwa linzwi la hae, mu si ke mwa itatafaza lipilu, mo ne mu ezelize ha mu ni shemaeta, zazi la muliko, mwa lihalaupa.” (Maheberu 3:7, 8) Paulusi n’a ama Samu 95, mi kacwalo n’a kona ku bulela kuli “Moya o Kenile, ha u li.”b (Samu 95:7, 8; Exoda 17:1-7) Mañolo a buyelezwi ki Mulimu ka moya wa hae o kenile.—2 Timotea 3:16.

14. Maisilaele ne b’a ngile cwañi seo Jehova n’a ba ezelize, mi ki kabakalañi?

¹⁴ Maisilaele ha se ba lukuluzwi mwa butanga bwa Egepita, ne ba filwe tohonolo ye tuna ya ku kena mwa swalisano ya bulikani ni Jehova. (Exoda 19:4, 5; 24:7, 8) Niteñi, mwa sibaka sa ku itebuha za n’a ba ezelize Mulimu, hañihañi ba kwenuha. (Numere 13:25–14:10) Seo ne si kona cwañi ku ezahala? Paulusi n’a file libaka: ku itatafaza lipilu. Kono lipilu ze lemuha Linzwi la Mulimu ni ku li utwa li kona cwañi ku tatafala? Mi lu lukela ku ezañi kuli lu tibele seo?

15. (a) ‘Linzwi la Mulimu’ li utwilwe cwañi, kwamulaho ni kacenu? (b) Lu tokwa ku ipuza lipuzo lifi ka za ‘linzwi la Mulimu’?

¹⁵ Paulusi n’a kalile temuso ya hae ka pulelo ye talusa fo ku itingile taba a’ li “ha mu utwa linzwi la hae.” Mulimu n’a bulela kwa batu ba hae ka Mushe ni bapolofita ba bañwi. Ku zwa f’o, Jehova a bulela ku bona ka Mwan’a hae, Jesu Kreste. (Maheberu 1:1, 2) Kacenu, lu na ni Linzwi la Mulimu mukatumbi le li buyelezwi, yona Bibele ye Kenile. Hape lu na ni “mutanga ya sepahala, ya na ni kutwisiso,” ya ketilwe ki Jesu ku fa ‘lico za kwa moya ka nako ye lukela.’ (Mateu 24:45-47) Kacwalo, Mulimu u sa bulela. Kono kana lwa utwa? Sina ka mutala, l’u nga cwañi kelezo ka za mutinelo ni mubonahalelo kamba keto ya za ku itabisa ka zona ni lipina? Kana lwa “utwa,” f’o kikuli, ku tokomela ze lu utwa ni ku li eza? Haiba lu na ni mukwa wa ku itatula kamba ku hana kelezo, lu ipeya mwa lubeta lo lu sa lemusehi lwa ku itatafaza lipilu.

16. Ki ifi nzila ye ñwi yeo lipilu za luna li kona ku tatafala?

¹⁶ Lipilu za luna hape li kona ku tatafala haiba lu hana ku eza ze lu kona ku eza mi ili ze lu swanela ku eza. (Jakobo 4:17) Ku si na taba ni lika kamukana zeo Jehova n’a ezelize Maisilaele, ne ba si na tumelo, ba kwenuhela Mushe, ba keta ku lumela piho ye maswe ka za Kanana, mi ba hana ku kena mwa Naha ya Sepiso. (Numere 14:1-4) Kacwalo Jehova a laela kuli ne ba ka ba mwa lihalaupa lilimo ze 40—nako ye ne ka lumeleza batu ba ne ba si na tumelo ba lusika l’o ku fela ku shwa. Ka ku nyemiswa ki bona, Mulimu n’a ize: “Ba yauluka kamita mwa lipilu za bona, mi ha ba si ka ziba linzila za ka; kiha na itama ka luci mwa buhali bwa ka, na li: Ha ba na ku kena mwa pumulo ya ka.” (Maheberu 3:9-11) Kana lwa ituta se siñwi ku seo?

19. Ku sa utwa kelezo ku kona cwañi ku isa ku ze maswe hahulu? Mu fe mutala.

¹⁹ Kacwalo, tuto kikuli haiba lu ba ni mukwa wa ku sa “utwa linzwi la hae,” ku keshebisa kelezo ya Jehova ka Linzwi la hae ni sitopa sa mutanga ya sepahala, hañihañi lipilu za luna za cinela, ku tatafala. Sina ka mutala, batu ba babeli ba ba si ka nyalana ba kana ba ba ni silambeti. Ku cwañi haiba ba keshebisa taba yeo? Kana ku ka ba sileleza kwa ku kutela ku eza cwalo, kamba kana ku ka ba bisa hahulu bunolo ku kutela seo? Ka ku swana, sitopa sa mutanga ha si fa kelezo ka za tokwahalo ya ku keta lipina za luna ni za ku itabisa ka zona, ni ze ñwi cwalo, kana lwa i amuhela ka buitumelo ili ku eza licinceho fo ku tokwahala? Paulusi n’a lu susuelize ku ‘sa tuhela liputeho za luna.’ (Maheberu 10:24, 25) Ku si na taba ni kelezo yeo, ba bañwi ba keshebisa mikopano ya Sikreste. Ba kana ba ikutwa kuli ku sa fumaneha ku ye miñwi kamba mane ku tuhela ka ku tala mikopano ye miñwi ha ku na taba.