Mu Fe Bupaki ka za Jehova mi Mu Si Ke mwa Katala

“Mu mu lemuhe yena ya itiisize niha n’a hanyezwa cwalo ki baezalibi, kuli mu si ke mwa katala ni ku fela pilu.”—MAHEBERU 12:3.

 1, 2. Ki bufi buniti bo bu kolwisa b’o Jesu n’a file kwa balutiwa ba hae ka za kuli n’a zusizwe?

“NI BONANI ni Mulena!” Ka ona manzwi ao a komokisa, Maria Magdalena a zibahaza taba ya zuho ya Jesu. (Joani 20:18) Seo ne si fitile fa ku ba ona makalelo a mazazi a 40 a n’a tezi likezahalo ze nyangumuna kwa balutiwa ba Kreste, ili bao kwa makalelo ne ba li mwa maswabi a lifu la hae.

² Jesu n’a s’a bati ku siya katowati ni ka ka kana mwa mihupulo ya balutiwa ba hae ka za buniti bwa kuli n’a li y’a pila luli. Kacwalo, sina Luka h’a talusa: “[Jesu] u kile a iponisa ku bona inz’a pila, ka liponiso ze ñata; ba mu bona mazazi a mashumi a mane.” (Likezo 1:3) Ka buniti fela, muta o muñwi “a bonwa ka nako i liñwi ki balumeli ba ba fita fa mianda iketalizoho.” (1 Makorinte 15:6) Kaniti luli, cwale ne ku si na sibaka ni se si kana sa ku ba ni ku honona. Jesu n’a li ya pila!

 3. Ki puzo ifi yeo balutiwa ba Jesu ne ba mu buzize ka ku ama kwa Mubuso, mi ki kabakalañi kalabo ya hae ha ne i ba komokisize?

³ Balutiwa ba Jesu cwale ne ba hupula fela ka za “mubuso wa Mulimu” wa fa lifasi-mubu, o’ kutisizwe sinca ku Isilaele. (Luka 19:11; 24:21) Kacwalo ne ba buzize Jesu kuli: “Mulena, kikuli se li cwale u ka zusa mubuso wa Isilaele?” Ku si na ku kakanya ne ba komokisizwe ki kalabo ya hae, kakuli n’a bulezi kuli: “Ha mu si ka fiwa ku ziba linako kamba myaha ye Ndate a itaulezi yona a nosi. Kono mu ka amuhela mata, moya o kenile ha u ka ta ku mina; mi mu ka ba lipaki za ka mwa Jerusalema, ni mwa naha kaufela ya Judea ni ya Samaria, ni ku isa kwa mafelelezo a lifasi.” (Likezo 1:6-8) Ki likulutendano cwañi cwale le ne li beilwe fapil’a balutiwa! Mi ki buikalabelo kwa butuna! Ne ba ka kona ku peta musebezi wa mufuta o cwalo kamukwaufi? Kalabo hañi-hañi ne i tile ka mukwa o komokisa.

Ku Amuhela Likulutendano

 4. Ha mu taluse se ne si ezahezi fa lizazi la Pentekonta.

⁴ Luka u zibahaza kuli: “Lizazi la Pentekonta ha li tile, ne ba inzi kamukana mwa sibaka si li siñwi. Mi ka nako i liñwi fela, kwa utwiwa mulumo o zwa kwa lihalimu, inge wa moya wa liñungwa, mi wa t’o tala ndu kaufela ye ne ba inzi ku yona. Malimi a’ kauhana, a’ swana sina malimi a mulilo a ba tahela, a t’o ina fahalimw’a yo muñwi ni yo muñwi wa bona. Mi kamukan’a bona ba tala moya o kenile, mi ba kala ku bulela lipuo li sili, mo moya n’o ba buleliseza.” Mulumo ne li o mutuna hahulu kuli mane ne u hohile mamelelo ya buñata bwa Majuda ba ne ba tile kwa mukiti mwa Jerusalema. Ne ba komokile hahulu ku utwa ‘ze makaza za Mulimu mwa lipuo za bona.’—Likezo 2:1-11.

 5. Ki ka ku fita fa sipimo sifi seo bupolofita bwa Jesu kwa Likezo 1:8 hañi-hañi ne bu talelelizwe?

⁵ Pitrosi n’a si ka sinya nako mwa ku fa ngambolo ye tiile, ku fa bupaki b’o ku si na ku honona ka za bona kuli “Jesu wa Nazareta,” y’o ne ba kokotezi, n’a li “Mulena” ya n’a talusizwe cimo ki Davida mwa manzwi a’ li: “[Jehova] u ize ku Mulen’a ka: ‘U ni ine ku la ka la bulyo, ku isa ha ni ka eza lila za hao sipula sa f’a hatela mautu a hao.’” Ka ku tabeha kwa pilu, ba ne ba teelelize ku Pitrosi ba buza kuli: “Bannabahesu lu ka eza cwañi?” Ka ku alaba seo Pitrosi a ba susueza kuli: “Mu bake, mi mutu ni mutu wa mina a kolobezwe ka libizo la Jesu Kreste, kuli a fiwe swalelo ya libi.” Ki sifi se ne si zwile mwateñi? Ba ba eza likiti ze talu ne ba kolobelizwe! (Likezo 2:14-41) Bupaki ne bu sweli ku fiwa cwale mwa Jerusalema. Hamulaho, ne bu yandulukezi mwa Judea kaufela, mi cwale ni Samaria, mi ka ku feza ni “kwa mafelelezo a lifasi.” Yanduluko ya musebezi wa ku kutaza Mubuso ne i ezahezi ka bubebe hahulu kuli mane ibata i ba ka 60 C.E. muapositola Paulusi n’a kona ku bulela kuli taba ye nde ne i “bulezwi ku ba ba li teñi kaufela mwatas’a lihalimu.”—Makolose 1:23.

Yanduluko ya Mubuso ni Nyandiso

 6, 7. (a) Yanduluko ya Mubuso ni nyandiso ya Bakreste ne li zamaelezi hamoho kamukwaufi mwahal’a lilimo za mwanda wa pili? (b) Ki bufi butokwi bwa ka putako bo ne bu zuhile mwahal’a Bakreste mwa Jerusalema, mi bona butokwi b’o ne bu talelelizwe kamukwaufi?

⁶ Ku si ka fita nako ye telele hamulaho a Pentekonta ya 33 C.E., balutiwa ba Jesu ne ba na ni libaka la ku hupula manzwi a hae a’ li: “Mutanga h’a fiti mulen’a hae. Ha ba ni nyandisize, ba ka mi nyandisa ni mina.” (Joani 15:20) Baeteleli ba Sijuda ne ba halifile muta “linzwi la Mulimu ne li nze li zwelapili; mi palo ya balutiwa [ha ne i] ekezeha hahulu mwa Jerusalema.” Ka litamilikezo ze si na mutomo, mulutiwa Setefani a bulaiwa ka ku pobaulwa ka macwe. Seo ne si bonahezi ku ba sona sisupo se ne ba libelezi ba bañata, kakuli “ka lizazi leo, manyando a matuna a tahela [puteho] mwa Jerusalema. Balumeli kaufela ba hasanyezwa mwa manaha a Judea ni Samaria; kwa siyala baapositola ba nosi.”—Likezo 6:7; 7:58-60; 8:1.

⁷ Nyandiso ya kuyuka ka nakonyana. Kono hamulahonyana fela, Heroda Agripa I a bulaya muapositola Jakobo. Pitrosi n’a beilwe mwa tolongo kono n’a lukuluzwi ki lingeloi. Hamulaho a f’o mizwale mwa Jerusalema ba fita fa ku sheba hahulu kwa neku la za kwa mubili, mi tuso ne i na ni ku lumelwa ku bona ku zwelela kwa balumeli sina bona ba ba mwa likalulo li sili. (Likezo 9:31; 12:1-11; 1 Makorinte 16:1-3) Mwahal’a ku pota kwa muapositola Paulusi mwa Jerusalema, bulikang’ate kwa neku la bulapeli ne bu li teñi kakuli buñata ne bu kalumukile ka ku huwa kuli: “Mutu ya cwalo u mu zwise mwa lifasi, h’a lukeli ku pila!” (Likezo 22:22) Kaniti luli, bona Bakreste bao ba ne ba pila mwa Jerusalema ni mwa Judea ne ba tokwa susuezo ye tuna kuli ba zwelepili ku fa bupaki ka za Mubuso ka busepahali. Jesu na sepisize balutiwa ba hae kuli “moya o kenile o Ndate a ka luma ka libizo la ka,” u ka sebeza sina “mutiisapilu.” (Joani 14:26) Mi Ndate cwale n’a ka fa kamukwaufi tuso ni ku omba-omba kwa mufuta o cwalo ko ne ku tokwahala? Kalabo, mwa kalulo ye ñwi, ne li ka muapositola Paulusi.

Liñolo la Paulusi kwa Maheberu

 8. (a) Ki sifi se ne si tahisize kuli Paulusi a ñolele liñolo la hae kwa Maheberu? (b) Ki fa kalulo ifi ya liñolo la hae fo lu ka hohela mamelelo ya luna, mi ki kabakalañi?

⁸ Bukaufi ni 61 C.E., Paulusi n’a beilwe mwa tolongo mwa Roma, kono n’a izibela se ne si ezahala kwa mizwale ba hae mwa Jerusalema. Kacwalo, ka ku ba mwatas’a ketelelo ya moya wa Jehova, n’a ñozi liñolo la hae la ka nako ye lukela kwa Maheberu. Li tezi mamelelo ye lilato kwa mizwale ni likaizeli ba hae ba Maheberu. Paulusi n’a ziba seo ne ba si tokwa ili kuli tumelo ya bona ni buikolwiso li tome ku Jehova sina yena Mutusi wa bona. Cwale ne ba ka kona ku ‘mata ka tundamo mwa takano ye ne i beilwe fapil’a bona’ ni ku bulela ka buikolwiso kuli: “[Jehova] ki yena ya ni tusa, ha ni sabi se siñwi; Mutu s’a ka ni eza ki nto mañi?” (Maheberu 12:1; 13:6) Ki ku yona kalulo ye ya liñolo la Paulusi kwa Maheberu (likauhanyo 11-13) k’o cwale lu bata ku fa mamelelo ya luna. Ki kabakalañi? Kakuli muinelo o ne ba talimani ni ona Bakreste bao ba kwa makalelo u swana ni w’o Lipaki za Jehova ba talimani ni ona kacenu.

 9. Ki taba ifi ye ne i talimani ni Bakreste ba mwa lilimo za mwanda wa pili ye talimani ni Bakreste kacenu, mi i kona fela ku talimanwa ni yona kamukwaufi?

⁹ Mwahal’a lusika lwa luna, undi-wa-nyagela ba se ba ngile muhato o munde kwa neku la taba ya Mubuso ka ku ineela isali bona ku Jehova ni ku kolobezwa sina Lipaki za hae. Niteñi, mwahal’a yona yanduluko ye ya bulapeli bwa niti ku se ku bile ni nyandiso ye tuna, mane Bakreste ba bañata ba se ba latehezwi ki bupilo bwa bona sina mo ne ku bezi ku Setefani, Jakobo, ni lipaki ba bañwi ba ne ba sepahala mwa lilimo za mwanda wa pili. Ka lona libaka le, taba i sa li ye swana sina ka mo ne i inezi kwamulaho ye li: Ki bomañi ba ba ka yema ka ku tiya mwa tiko ya busepahali bwa bona fapil’a twaniso ye ekezeha fa taba ya Mubuso? Ka ku ekeza, ki mañi ya ka kona ku talimana ni likezahalo ze sabisa “ñalelwa ye tuna” ye si na ye likana ni yona hañi-hañi ha se i ka ambeka lona lusika lo lwa cwale? (Mateu 24:21) Kalabo ki ya kuli, ki bao ba ba itukiselize ku “lwana ndwa ye nde ya tumelo,” bao ba ba yemi “ka ku tiya mwa tumelo.” Bona bao ki bona kwa mafelelezo ba ba ka kona ku bulela kuli: “Tulo ye tuzi lifasi ki tumelo ya luna.”—1 Timotea 6:12; 1 Pitrosi 5:9; 1 Joani 5:4.

Ku Fumana Tuso Ku Zwelela kwa Mitala ya Busepahali

10. (a) Tumelo ki nto mañi? (b) Mulimu n’a ikutwile kamukwaufi kwa neku la banna ni basali ba tumelo baikale?

¹⁰ Tumelo ki nto mañi? Paulusi u alaba kuli: “Tumelo ki ku sepa ka ku tiya ze lu libelezi, ni ku kolwa ze sa bonwi. Ka yona tumelo, baikale ba pakilwe bupaki bo bunde.” (Maheberu 11:1, 2) Paulusi cwale u koñomeka taluso ya hae ya tumelo ka ku bonisa tumelo inze i eza misebezi. U fa mamelelo ku ze zwile mubano mwa bupilo bwa banna ba bañwi “baikale,” hamohocwalo ni basali ba ba cwale ka Sara ni Rahaba. Ki ko ku susueza hakalo ku fumana kuli “Mulimu h’a swabeli ku ipiza Mulimu wa bona”! (Maheberu 11:16) Kana Mulimu w’a kona ku bulela nto ye swana kwa neku la luna bakeñisa tumelo ya luna? Haike mwa ku fela kwa lizazi ni lizazi lu si ke lwa eza nto ni ye kana ye ka tisa kuli a swabe ka luna.

11. Luna kacenu lu kona ku fumana tuso kamukwaufi ku zwelela mwa ku “[beiwa] mwahali ki lilu le lituna la lipaki”?

¹¹ Hamulaho a taba ya banna ni basali ba ba sepahala bao, Paulusi u bulela kuli: “Cwalehe, ha lu bona kuli lu beilwe mwahali ki lilu le lituna la lipaki, lu tuhele kaufela ze lu imela, ni sibi se si lu hanelela fakaufi; mi lu zamaye inze lu mata ka ku itiisa mwa siyano ye lukiselizwe luna.” (Maheberu 12:1) Nihaike cwale ba se ba itobalezi mwa libita, kana bona lipaki ba ba sepahala bao ili ba ba li mitala ye minde ba sa pila mwa minahano ya luna? Kana mwa ba ziba hande hamohocwalo ni ze bonwi za bona kuli mane mwa kona ku alaba kuli ee? W’o ki ona o muñwi wa mipuzo ye miñata ye fumanwa mwa tuto ya Bibele ya kamita, ku itusisa m’ata a luna kaufela ku ezisa ze boñwi za ona “lilu le lituna la lipaki” bao ku ba ze pila. Kaniti, ku beya kwa pilu mutala wa bona wa busepahali ku ka lu tusa ka butuna mwa ku pima tengamo ya ku tokwa tumelo. Mi hape, seo si ka lu tusa ku fa bupaki kwa niti ka bundume ni ku tokwa sabo mwa miinelo kaufela.—Maroma 15:4.

Mu Si Ke mwa Katala

12. (a) Mutala wa Jesu u kona ku lu tusa kamukwaufi kuli lu si ke lwa ‘katala ni ku fela pilu’? (b) Ki ifi mitala ye miñwi ya mwa lizazi la cwale ya bao ba ba sa katali?

¹² Mutala wa luna o mutuna ka ku fitisisa wa tumelo ki Jesu. Paulusi u susueza kuli: “Lu zamaye inze lu mata ka ku itiisa mwa siyano ye lukiselizwe luna; lu nze lu talimile Jesu, yena Mutateki ni Mufelelezi wa tumelo. . . . Mu mu lemuhe yena ya itiisize niha n’a hanyezwa cwalo ki baezalibi, kuli mu si ke mwa katala ni ku fela pilu.” (Maheberu 12:1-3) Mu se mu “lemuhile” mutala wa Jesu ka ku fita fa sipimo sifi? Mu se mu “talimile” ku yena ka ku fita fa sipimo sifi? (1 Pitrosi 2:21) Satani u bata kuli lu ‘katale ni ku fela pilu.’ U bata kuli lu tuhele ku eza musebezi wa ku fa bupaki. U eza seo kamukwaufi? Fokuñwi ka twaniso ka sibili ye zwelela kwa bulapeli ni m’ata a silifasi a tamaiso, sina mo ne ku inezi mwa lilimo za mwanda wa pili. Silimo se si felile, musebezi wa ku kutaza Mubuso ne u hanisizwe mwa manaha a bat’o eza 40. Kono kana seo ne si katalisize mizwale ba luna? Batili! Musebezi wa bona wa ka busepahali ne u tahisize kuli ba ba fita fa 17,000 ni ku fitelela ne ba kolobelizwe ku ona manaha ao ka 1988. Ki susuezo kwa butuna yeo seo si swanela ku i tisa ku bao ba ba pila mwa manaha m’o ku na ni tukuluho ye utwahala! Haike lu si ke lwa katala ni kamuta mwa ku kutaza taba ye nde ya Mubuso!

13. (a) Ki lifi lika ze ñwi ze sa lemusehi ka bunolo ze kona ku lu tahiseza mukatala mwa musebezi wa luna wa ku kutaza? (b) Ki ifi ‘tabo ya n’a beezwi Jesu kwapili,’ mi lu kona ku fumana cwañi mubonelo o swana wa tabo?

¹³ Niteñi, ku na ni lika ze ñwi ze sa lemusehi ka bunolo ze kona ku lu tahiseza mukatala. Zona ze li kopanyeleza cwalo ni twaniso mwahal’a lubasi lo lu kauhani, ku filikana kwa mwa munahano, mapongo, sineneketo ye zwelela kwa litaka, ku zwafa ko ku tiswa ki ku tokwa ze nde ze zwa mwa musebezi wa luna wa ku kutaza, kamba mwendi maikuto a bunyemi bakeñisa kuli mafelelezo a muinelo wo wa linto h’a si ka fita kale. Cwale, ki sifi se ne si tusize Jesu mwa ku tiyela manyando a mwa munahano ni a kwa mubili? Ne li “tabo ya n’a beezwi kwapili.” (Maheberu 12:2) Jesu n’a tiisizwe ki tabo ya ku ezisa pilu ya Ndat’ahe ku ba ye tabile ka ku Mu bonahaza ku tokwa mulatu ni ka tibelelo ya tabo yeo a ka ipumana ku yona mwa ku fa limbuyoti za Mubuso wa Bumesia. (Lisamu 2:6-8; 40:9, 10; Liproverbia 27:11) Kana lwa kona ku latelela ka tokomelo ona mubonelo wo wa Jesu wa tabo? Mi mu hupule manzwi a ku omba-omba a Pitrosi kwa 1 Pitrosi 5:9 a’ li: “Butata ki bu li buñwi bo bu tahela banabahabo mina ba ba mwa lifasi.” Ku ziba kuli Jehova w’a utwisisa lika, ku utwa mufutumala wa sizwale sa lifasi kamukana, ni ku beya meto a luna fa tabo ye kwapil’a luna mwatas’a puso ya Mubuso—zona zeo kaufela li ka lu tusa ku sa katala mwa ku sebeleza Jehova ka tumelo ni mwa ku kutaza muta mafelelezo ha s’a li fa kaufi hahulu.

Libaka Jehova h’a Kalimela

14. Ki lifi lituso ze ne li kana za zwelela mwa litiko ni manyando ao ne lu kana lwa tiyela?

¹⁴ Paulusi cwale u beya liseli fa libaka ha ne lu kana lwa tiyela litiko ni manyando. U akaleza kuli lu swanela ku talima lika ze cwalo sina mufuta wa kalimelo. Paulusi u talusa kuli: “Mwan’a ka u si ke wa nyaza [Jehova] h’a ku kalimela, mi u si ke wa fela pilu ha u omanyiwa ki yena; kakuli [Jehova] u kalimela ya latwa ki yena.” (Maheberu 12:5, 6) Nihaiba Jesu n’a “itutile ku utwa, ka ze butuku ze mu tahezi.” (Maheberu 5:8) Kaniti, ni luna hape lu tokwa ku ituta ku utwa. Mu lemuhe lika ze butokwa ze tiswa ki ku tuhelela kalimelo kuli i lu zamaise. Paulusi n’a bulezi kuli: “Ku ka beya muselo wa kozo ni wa ku luka, ku ba ba likilwe cwalo.” Ki susuezo hakalo yeo!—Maheberu 12:11.

15. Lu kona ku itusisa cwañi kelezo ya Paulusi ya ku ‘ezeza mautu a luna linzila ze lukile’?

¹⁵ Haiba lu amuhela “kalimelo [ye zwelela ku Jehova]” mwa liseli le li cwalo, lu ka buluka mwa pilu kelezo ya Paulusi ye buniti ye li: “Cwale, a mu tiise mazoho a’ lepelezi, ni mañwele a’ tetema. Mu ezeze mautu a mina linzila ze lukile.” (Maheberu 12:12, 13) Fokuñwi ki ko ku bunolo hahulu ku kwenuha ka ku zwa mwa ‘nzila ye kumbani ye isa kwa bupilo.’ (Mateu 7:14) Muapositola Pitrosi ni ba bañwi mwa Antioke ka nako ye ñwi ne ba na ni mulatu mwa ku eza seo. Kabakalañi? Kakuli “ne ba sa zamayi ka ku luka, mwa niti ya [taba ye nde, NW].” (Magalata 2:14) Kacenu, lu lukela ku zwelapili ku teeleza ku Muluti wa luna Yo Mutuna ka ku Fitisisa, Jehova Mulimu. Lu tokwa ku itusisa ka ku tala lituso ze lu filwe ka “mutanga ya sepahala ni ya na ni kutwisiso.” Seo si ka tahisa kuli mautu a luna a be mwa ‘nzila ye lukile.’—Mateu 24:45-47; Isaya 30:20, 21.

16. (a) “Mubisi o baba” u kona ku mela mwa puteho kamukwaufi? (b) Ki kabakalañi Paulusi h’a kopanya buhule hamoho ni ku tokwa buitebuho fa lika ze kenile, mi lu kona ku ipabalela isali luna kamukwaufi kwa neku la lika z’e lubeta ze cwalo?

¹⁶ Paulusi cwale wa lemusa kuli lu swanela ku “[libelela] kuli ku [luna] mutu a si ke a taelwa kwa sishemo sa Mulimu; ni kuli mubisi o baba u si ke wa mela, ku [lu] filikanya; mi ba bañata ba fumane ku sinyiwa ki ona.” (Maheberu 12:15) Ku fita fa ku ba ni bunyemi, ku ba ni pilaelo, ku batisisa milatu mwa nzila yeo lika li eziwa ka yona mwa puteho ku kona ku swana sina “mubisi o baba” o kona ku yanduluka ka bubebe ni ku sinya mihupulo ye minde ya ba bañwi mwa puteho. Lwa kona ku pima maikuto a’ sa yahisi a mufuta o cwalo ka ku nahanisisa limbuyoti ze sa konwi ku balwa zeo niti i se i tisize mwa bupilo bwa luna. (Lisamu 40:5) Lubeta lo lu ñwi ki lwa ku ba ni litengamo za buhule kamba ‘ku tokwa buitebuho fa lika ze kenile, sina Isau.’ (Maheberu 12:16) Paulusi u kopanya hamoho zona linto ze peli zeo z’e li lubeta, bakeñisa kuli si li siñwi si kona ku isa mwa ku eza se siñwi ka bunolo. Ha ku na Mukreste ya tokwa ku wela mwa litakazo za buitati za mufuta o cwalo haiba a itusisa manzwi a Pitrosi a’ li: “Mu hane ku yena [Diabulosi] ka ku tiya mwa tumelo.”—1 Pitrosi 5:9.

“Ku Kolwa Ze Sa Bonwi”

17. Mu bapanye likezahalo ze mbwetukisa za kwa Lilundu la Sinai ni zeo Bakreste ba talimani ni zona kacenu.

¹⁷ Tumelo ya luna i itingile hahulu fa “ku kolwa ze sa bonwi.” (Maheberu 11:1) Ze ñwi za zona lika zeo ze sa bonwi Paulusi u zwelapili ku li talusa kwa Maheberu 12:18-27. U bulela ka za likezahalo ze mbwetukisa kwa Lilundu la Sinai Mulimu ha n’a bulezi ka sibili ku Isilaele ni Mushe ha n’a bulezi kuli: “Ni sabile maswe, na ngangama!” Muapositola cwale u ekeza kuli: “Kono mu tile kwa Lilundu la Sione, kwa munzi wa Mulimu-Ya-Pila, yena Jerusalema wa lihalimu, kwa mangeloi a’ kopani a’ eza bolule ba bañata.” Mwa taba ya Maisilaele baikale kwa Lilundu la Sinai, linzwi la Mulimu ne li nyanganyisize lifasi-mubu, ka mwa taluseza Paulusi, kono cwale W’a sepisa, ka ku bulela kuli: “Hape ni ka zikinyisa hañwi, isi lifasi fela, kono ni lihalimu.” Nihaike ona manzwi ao a ñolezwi sihulu Bakreste ba ba tozizwe, “buñata bo butuna” bwa lingu ze ñwi ni bona ba kona ku a beya kwa pilu. (Sinulo 7:9) Kana mwa utwisisa ka ku tala seo Paulusi a si bulela? Lu yemi fapil’a kopano ya mangeloi a’ likiti ze mashumi-shumi. Ka mo ku inezi fela, lu yemi hape fapil’a Jehova. Kwa lizoho la hae la bulyo ku inzi Jesu Kreste. Kaniti, lu inzi mwa kalulo ye mbwetukisa ni ku fita ni mwatas’a buikalabelo bo butuna hahulu ku fita bwa le bwa Maheberu ba kwaikale kwa Lilundu la Sinai! Mi mu hupule kuli, ku nyanganyiswa ko ku ka ba teñi fa ndwa ye taha ya Armagedoni ku ka tahisa kuli lihalimu la cwale ni lifasi la cwale ze maswe li be siyo. Kacenu kaniti luli haki yona nako ya ku “hana” ku teeleza kwa Linzwi la Mulimu ni ku li buluka!

18. Ki kamukwaufi fela lu kona ku zwelapili ku fa bupaki ka za Jehova, ku si na ku katala?

¹⁸ Ki niti, cwalehe, lu pila mwa nako ye mbwetukisa mwa litaba za mufuta wa mutu. Ka ku ba Lipaki za Jehova, lu se lu lumilwe kwa mafelelezo a lifasi ku yo kutaza taba ye nde ya Mubuso wa Mulimu o tomilwe. Kuli lu eze cwalo, lu lukela ku ba ni tumelo ye sa zikinyehi, tumelo ye sa katali, tumelo ye lu konisa ku amuhela kalimelo ye zwelela ku Jehova. Haiba lu na ni tumelo ya mufuta o cwalo, lu ka fumanwa mwahal’a bao ba ba ka zwelapili ku “[sebeleza] Mulimu ka mukwa o mu tabisa, inze lu na ni likute ni sabo.” (Maheberu 12:28) Ee, mi lu ka zwelapili ku fa bupaki ka za Jehova mi ha lu na ku katala.

Ne Mu Ka Alaba Kamukwaufi?

◻ Ki kabakalañi liñolo la Paulusi kwa Maheberu ha li li le li na ni tuso hahulu ku luna?

◻ Ki taba mañi yeo Bakreste ba lukela ku talimana ni yona kacenu?

◻ Lu kona ku fumana tuso kamukwaufi ku zwelela kwa lipaki ba ba sepahala baikale?

◻ Ki kabakalañi Jehova h’a kalimela bao a lata?

◻ Ki sifi sinotolo kwa neku la ku kutaza ku si na ku katala?