Lipuzo Ze Zwa kwa Babali

Kiñi ze tisa “bufumu bwa macaba kamukana” mwa “Ndu” ya bulapeli bwa niti?—Hagai 2:7.

Jehova na bulezi cimo ka mupolofita Hagai kuli: “Ni ka nyanganyisa macaba kaufela; mi bufumu bwa macaba kamukana bu ka ta kwanu, kuli Ndu yeo i tale kanya ya ka.” (Hagai 2:7) Kana ku “nyanganyisa macaba kaufela” kona ko ku tisa kuli “bufumu” bwa macaba, bona batu ba lipilu ze sepahala, ba swalisane ni bulapeli bwa niti? Kutokwa.

Ha mu nyakisise nto ye nyanganyisa macaba ao ni ze ezahala kabakala ku nyanganyiswa k’o. Bibele i bulela kuli: ‘Macaba a halifile, mi batu ba lela ze si na tuso.’ (Samu 2:1) Lika “ze si na tuso” ze ba sweli ku ‘lela’ kamba ku singanyeka batu ki mukwa wa ku zwisezapili lipuso za bona. Mi macaba ao a nyanganyiswa hahulu ki nto ifi kamba ifi ye bonahala ku bemba lipuso za macaba ao.

Macaba ao a bembeha hahulu kabakala musebezi o ba eza Lipaki za Jehova mwa lifasi kamukana wa ku kutaza Mubuso wa Mulimu o so tomilwe. Kakuli esi Mubuso wa Mulimu o mwa m’ata a Jesu Kreste, yena Mesiya, u ka “ketula ni ku feza mibuso [ya batu] kaufela.” (Daniele 2:44) Lushango lwa katulo lo lu zibahazwa ka musebezi wa luna wa ku kutaza lu sweli ku nyanganyisa macaba. (Isaya 61:2) Mi macaba a sweli ku nyanganyiswa hahulu ni ku fita musebezi wa ku kutaza ha u nze u tiya ni ku yamba. Ku nyanganyiswa ko ku polofitilwe kwa Hagai 2:7 ku talusañi?

Kwa Hagai 2:6, lu bala kuli: “[Muñ’a] Bupilo wa limpi s’a bulela ki se, u li: Kaufinyana, ni ka nyanganyisa lihalimu, ni lifasi, ni liwate, ni mo ku omile.” Muapositola Paulusi na kutezi ku ñola manzwi ao, ha na ize: “U file batu sepiso, a li: Hape ni ka zikinyisa hañwi, isi lifasi fela, kono ni lihalimu. Mi h’a li: Hañwi hape, ki ku talusa kuli, lika ze ka zikinyiswa u ka li feza, mo ku felezwa lika ze bupilwe; kuli lika ze sa koni ku zikinyiwa [ona Mubuso] li ine.” (Maheberu 12:26, 27) Kaniti lifasi le la kale li ka feliswa kuli cwale ku tahe lifasi le linca la Mulimu.

Batu ba lipilu ze sepahala ba hohelwa kwa bulapeli bwa niti, isi kabakala kuli macaba a sweli a nyanganyiswa. Nto ye sweli ku ba hohela ku Jehova ni kwa bulapeli bwa hae ki yona nto ye swana ye nyanganyisa macaba, ona musebezi wa ku kutaza Mubuso wa Mulimu mwa lifasi kaufela. Ku shaelwa kwa “evangeli ya linako ze sa feli” ku hohela batu ba ba sepahala kwa bulapeli bwa Mulimu wa niti.—Sinulo 14:6, 7.

Taba ye nde ya Mubuso i kopanyeleza lushango lwa katulo ni lwa puluso. (Isaya 61:1, 2) Ku kutazwa kwa taba ye nde mwa lifasi kaufela ku tisa lika ze peli: ku nyanganyiswa kwa macaba ni ku kubukanya bufumu bwa macaba ku Jehova.