⁹ Kunani mabaka amañata haluswanela ‘kuhupula babaetelela’ ni haluswanela kubasepa. Lukona kutusiwa cwañi haiba lueza cwalo? Muapositola Paulusi naabulezi kuli: “Bamibabalela sina babaka ikalabela, kuli baeze cwalo ka tabo mi isiñi ka kutonga, kakuli seo sika mitahiseza butata.” (Maheb. 13:17) Luswanela kuutwa baba luzamaisa ni kuipeya kwatasaa bona ka kulatelela ketelelo yeba lufa, kakuli balubabalela kuli lusilelezwe ni kutiya kwa moya.

¹⁰ Kwa liñolo la 1 Makorinte 16:14, Paulusi naabulezi kuli: “Lika kaufela zemueza, mulieze ka lilato.” Kacwalo, likatulo kaufela zeeziwanga zeama batu ba Mulimu, liezwangwa ka lilato, kona kalemeno ka butokwa hahulu. Liñolo la 1 Makorinte 13:4-8 libulela cwana ka za lilato: “Lilato linani pilu-telele ni sishemo. Lilato halina muna. Haliikankabeki, haliitundumuni, haliezi zeswabisa, halibati zalona feela, halifilikani. Halina ndimbelela. Halitabiswi ki kusaluka, kono litabiswa ki niti. Likwahela lika kaufela, lilumela lika kaufela, lisepa lika kaufela, liitiisa mwa lika kaufela. Lilato halipalelwi.” Bakeñisa kuli likatulo kaufela zeezezwanga kutusa batanga ba Jehova lieziwa ka lilato, luswanela kuikutwa kuli luetelelwa hande luli. Mi taba yeo ibonisa hande kuli Jehova unani lilato kwa batu bahae.

¹¹ Mwa linako za baapositola, Jehova naaitusisanga batu babasika petahala kuetelela batu bahae, sina mokuinezi ni kacenu. Niteñi, Jehova naaitusisize batu bao kueza tato yahae. Nuwe naaezize aleka mi naalemusize batu kuli lifasi nelika sinyiwa. (Gen. 6:13, 14, 22; 2 Pit. 2:5) Mushe naafilwe musebezi wa kuetelela batu ba Jehova kubazwisa mwa Egepita. (Exo. 3:10) Batu babasika petahala nebaitusisizwe kuñola Bibele ka kususumezwa ki moya wa Mulimu. (2 Tim. 3:16; 2 Pit. 1:21) Kacwalo, haluswaneli kupalelwa kusepa kopano ya Mulimu kabakala kuli Jehova uitusisa batu babasika petahala kuetelela musebezi wa kukutaza ni kuluta batu kuba balutiwa. Kono mane lwatiiswa ka kuziba kuli misebezi kaufela yeezwa mwa kopano ya Jehova ikonahala feela ka tuso yahae. Mutanga yasepahala utalimani ni miinelo yetaata ka lilimo zeñata, kono mwahalaa nako yeo kaufela ubonisize kuli uetelelwa ki moya wa Mulimu. Kacenu, Jehova ufuyauzi hahulu kalulo ya fa lifasi ya kopano yahae. Kacwalo, lulatelele ketelelo yelufiwa ki kopano ya Mulimu ni kuisepa ka kutala.

¹⁴ Nzila yeñwi yelubonisa ka yona kuli lusepile kopano ki ka kulatelela likatulo zeeziwa. Fo kutalusa kuli luswanela kuba ni buikokobezo ka kulatelela ketelelo ya mizwale babafilwe buikalabelo mwa kopano, babacwale ka baokameli ba mupotoloho ni baana-bahulu mwa liputeho. Mizwale bao ni bona ki “babaetelela” mwahalaa luna, mi luswanela kubautwa ni kuipeya kwatasaa bona. (Maheb. 13:7, 17) Nihaike kuli halukoni kuutwisisa ka kutala libaka likatulo zeñwi haliezizwe, lwaziba kuli haiba lulilatelela, lukatusiwa kamita. Mi Jehova uka lufuyaula kabakala kulatelela zeñozwi mwa Linzwi lahae ni ketelelo yelufiwa ki kopano yahae. Ka mukwa ocwalo, lukabonisa kuli luipeya kwatasaa Mulenaa luna, yena Jesu Kreste.