Tempele ye Tuna ya kwa Moya ya Jehova

“Lu na ni muprisita yo mutuna cwalo, . . . ki yena Sikombwa sa Sibaka se si Kenile, ni sa Tabernakele ya niti ye tomilwe ki Mulena, isi mutu.”—MAHEBERU 8:1, 2.

 1. Ki tukiso ifi ye lilato yeo Mulimu n’a ezelize mufuta wa mutu o mwa sibi?

JEHOVA MULIMU, ka lilato la hae le lituna la ku lata mufuta wa mutu, n’a file sitabelo sa ku zwisa libi za lifasi. (Joani 1:29; 3:16) Ne si tokwile ku shimbululwa kwa bupilo bwa Mweli wa hae ku zwa kwa lihalimu ku beiwa mwa mba ya mwalyanjo wa Sijuda Maria. Lingeloi la Jehova ne li taluselize hande Maria kuli mwana ya n’a ka itwala n’a ‘ka bizwa Ya-Kenile, Mwan’a Mulimu.’ (Luka 1:34, 35) Josefa, ya n’a beelelize Maria, n’a bulelezwi ka za muinelo wa makazo wa ku itwaliwa kwa Jesu mi n’a zibile kuli yena y’o n’a ka “pilisa sicaba sa hae kwa libi za sona.”—Mateu 1:20, 21.

 2. Ki sifi sa n’a ezize Jesu ha n’a li wa lilimo za buhulu ze bat’o ba 30, mi ki kabakalañi?

² Jesu ha n’a nze a hula, ku lukela ku ba kuli n’a utwisisize ze ñwi za litaba zeo ka za ku pepwa kwa hae kwa ka makazo. N’a ziba kuli Ndat’ahe wa kwa lihalimu n’a mu bulukezi musebezi wa ku punyusa bupilo fa lifasi-mubu. Kacwalo, ha n’a li munna ya kolile wa lilimo za buhulu ze bat’o ba ze 30, Jesu n’a tile ku mupolofita wa Mulimu Joani kuli a kolobezwe mwa nuka ya Jordani.—Mareka 1:9; Luka 3:23.

 3. (a) Ki sifi sa n’a talusa Jesu ka manzwi a li, “Ha u si ka lata sitabelo nihaiba nubu”? (b) Ki mutala ufi o zwile mubano w’o Jesu n’a tomezi bao kaufela ba ba bata ku ba balutiwa ba hae?

³ Jesu n’a lapela ka nako ya kolobezo ya hae. (Luka 3:21) Ka mo ku bonahalela fela, ku zwa onaf’o ku ya kwapili mwa bupilo bwa hae, n’a talelelize manzwi a Samu 40:6-8, sina mo ne ku boniselizwe hamulaho ki muapositola Paulusi kuli: “Ha u si ka lata sitabelo nihaiba nubu, kono u ni lukiselize mubili.” (Maheberu 10:5) Kacwalo Jesu n’a bonisize ku lemuha kwa hae kuli Mulimu n’a “si ka lata” kuli matabelo a lifolofolo a zwelepili ku fiwa kwa tempele ya mwa Jerusalema. Ka ku fapahana, n’a lemuhile kuli Mulimu n’a lukiselize yena, Jesu, mubili wa butu bo bu petehile, kuli a u fe sina sitabelo. Seo ne si ka zwisa tokwahalo ye ñwi ifi kamba ifi ya matabelo a lifolofolo. Ka ku bonisa takazo ya hae ya ka pilu kaufela ya ku ipeya kwatas’a tato ya Mulimu, Jesu n’a zwezipili ku lapela kuli: “Ki na yo, na ta, (Sina ha ku ñozwi za ka mwa buka,) ni t’o eza se si latwa ki Wena, Mulimu.” (Maheberu 10:7) Ki mutala o kateleha hakalo wa bundume ni buipeyo bwa ka ku tokwa buitati w’o Jesu n’a file zazi leo ku bao kaufela ba ne ba ka ba balutiwa ba hae hasamulaho!—Mareka 8:34.

 4. Mulimu n’a bonisize cwañi tumelezo ya hae kwa ku ifana kwa Jesu?

⁴ Kana Mulimu n’a bonisize tumelezo ya hae kwa tapelo ya Jesu ya fa kolobezo? Ha mu tuhele yo muñwi wa baapositola ba Jesu ba ba ketilwe a lu fe kalabo: “Jesu h’a kolobelizwe, a pakisa ku zwa mwa mezi; mi ka nako i liñwi, lihalimu la kwaluluhela yena; a bona Moya o swana sina nkwilimba u t’o ina fahalimw’a hae. Mi kwa utwahala linzwi le li zwa kwa lihalimu, le li li: Yo ki mwan’a ka ya latiwa, ye ni katelwa.”—Mateu 3:16, 17; Luka 3:21, 22.

 5. Ki sifi se ne si swaniselizwe ki aletare tenyene ya mwa tempele?

⁵ Ku amuhela kwa Mulimu ku tahiswa kwa mubili wa Jesu kwa ku ba sitabelo ne ku talusa kuli, ka kutwisiso ya kwa moya, aletare ye tuna ku fita y’ani ya mwa tempele ya mwa Jerusalema ne i fitile fa ku ba mwa mayemo a kwapili. Aletare tenyene fo ne li tahiswa lifolofolo sina sitabelo ne i yemela yona aletare ya kwa moya yeo, ili yeo kacwalo ne i li “ku lata” kamba tukiso ya Mulimu ya ku amuhela ka yona bupilo bwa butu bwa Jesu sina sitabelo. (Maheberu 10:10) Ki kabakaleo muapositola Paulusi n’a kona ku ñolela Bakreste sina yena kuli: “Lu na ni aletare ya luna, mi ba ba eza sebelezo mwa Tabernakele [kamba, tempele], ha ba na tukelo ya ku ca za yona.” (Maheberu 13:10) Ka mubulelelo o muñwi, Bakreste ba niti ba fumana tuso kwa sitabelo se si lifa milatu se si na ni mayemo a pahami ni ku fita, ili seo buñata bwa baprisita ba Majuda ne ba hanile.

 6. (a) Ki nto mañi ye ne i fitile fa ku ba mwa mayemo a kwapili ka nako ya kolobezo ya Jesu? (b) Lilumbatina la Mesiya, kamba Kreste, li talusañi?

⁶ Ku toziwa kwa Jesu ka moya o kenile ne ku talusize kuli Mulimu cwale n’a tahisize tukiso ya hae kamukan’a yona ya tempele ya kwa moya, ka ku ba ni Jesu a nze a sebeza sina Muprisita yo Mutuna. (Likezo 10:38; Maheberu 5:5) Mulutiwa Luka n’a buyelezwi ku supa silimo luli sa kezahalotuna yeo kuli ne li “mwa mwaha wa bu 15 wa puso ya Tibere Sesare.” (Luka 3:1-3) Seo si zamaelela ni silimo sa 29 C.E.—ili lisunda ze 69 za lilimo, kamba lilimo ze 483, ku zwa ka nako yeo Mulena Aritazerisi n’a file taelo ya kuli mamota a Jerusalema a yahiwe sinca. (Nehemia 2:1, 5-8) Ka ku ya ka bupolofita, “Ya tozizwe, Mulena” n’a ka taha mwa silimo seo se si bulezwi cimo. (Daniele 9:25) Ku bonahala kuli Majuda ba bañata ne ba lemuhile seo. Luka u biha kuli “sicaba ne si libelezi” ku bonahala kwa Mesiya, kamba Kreste, ili malumbatina a n’a zwa fa manzwi a Siheberu ni Sigerike a na ni taluso ye swana, ya kuli “mutoziwa.”—Luka 3:15.

 7. (a) Mulimu n’a tozize lili “Sisa se si kenile hahulu,” mi seo ne si talusañi? (b) Ki nto mañi ye ñwi ye ne i ezahezi ku Jesu ka nako ya ku kolobezwa kwa hae?

⁷ Ka nako ya kolobezo ya Jesu, sibaka sa Mulimu sa kwa lihalimu ne si tozizwe, kamba ku kauhanyiwa, kuli si be “Sisa se si kenile hahulu” mwa tukiso ya tempeletuna ya kwa moya. (Daniele 9:24) “Tabernakele [kamba, tempele] ya niti ye tomilwe ki Mulena, isi mutu” ne i fitile fa ku kalisa ku sebeza. (Maheberu 8:2) Hape, ka kolobezo ya hae ka mezi ni moya o kenile, munna y’o Jesu Kreste n’a pepilwe sinca sina Mwan’a Mulimu kwa moya. (Mu bapanye Joani 3:3.) Seo ne si talusize kuli nako ha i nze i ya Mulimu n’a ka kutiseza Mwan’a hae kwa bupilo bwa kwa lihalimu, ili k’o n’a ka yo sebeza ku la bulyo la Ndat’ahe sina Mulena ni Muprisita yo Mutuna “wa linako ze sa feli, ka mukwa wa Melekisedeke.”—Maheberu 6:20; Samu 110:1, 4.

Sibaka se si Kenile Hahulu sa kwa Lihalimu

 8. Ki miinelo ifi ye minca yeo lubona lwa Mulimu lwa kwa lihalimu ne lu fitile fa ku ba ni yona?

⁸ Fa lizazi la ku kolobezwa kwa Jesu, lubona lwa Mulimu lwa kwa lihalimu ne lu bile ni miinelo ye minca. Tokwahalo ya sitabelo sa mutu ya petehile sa ku lifa ka sona libi za lifasi ne i koñomekile bukeni bwa Mulimu ka ku fapahana ni buezalibi bwa mutu. Hape mukekecima wa Mulimu ne u koñomekilwe kakuli cwale n’a bonisize ku lata ku tabiswa, kamba ku shemuba, kwa hae. Kacwalo lubona lwa Mulimu kwa lihalimu ne lu fitile fa ku ba inge kalulo ya mwahali ka ku fitisisa ya tempele, ili m’o muprisita yo mutuna n’a kena hañwi ka silimo ni mali a lifolofolo kuli a lifele libi ka nzila ye li mutala.

 9. (a) Lisila le ne li li mwahal’a Sibaka se si Kenile ni Sibaka se si Kenile Hahulu ne li swaniseza nto mañi? (b) Jesu n’a keni cwañi kwa buse bwa lisila la tempele ya Mulimu ya kwa moya?

⁹ Lisila le ne li kauhanya Sibaka se si Kenile kwa Sibaka se si Kenile Hahulu ne li swaniseza mubili wa Jesu wa kwa nama. (Maheberu 10:19, 20) Ne u li mukwalelo o ne u tibela Jesu ha n’a li mutu wa fa lifasi-mubu ku ya mwa sibaka mo ne ku li Mulimu. (1 Makorinte 15:50) Ka nako ya lifu la Jesu, “lisila la mwa Tempele la pazuha fahali, ku kala kwahalimu ku isa kwatasi.” (Mateu 27:51) Seo ne si bonisize ka nzila ye lemuseha kuli mukwalelo o ne u tibela Jesu ku ya kwahalimu cwale ne u zwisizwe teñi. Hamulaho wa mazazi a malalu, Jehova Mulimu n’a ezize makazo ye zwile mubano. N’a zusize Jesu kwa bafu, isiñi sina mutu wa nama ni mali ya kona ku shwa, kono sina sibupiwa sa moya se si na ni kanya ili ya “ina mwa linako ze sa feli.” (Maheberu 7:24) Hamulaho wa mazazi a’ 40, Jesu n’a nyuluhezi kwa lihalimu mi a yo kena mwa “Sisa se si kenile hahulu” luli, kuli “a tahe fapil’a Mulimu ka luna.”—Maheberu 9:24.

10. (a) Ki sifi se ne si ezahalile Jesu ha sa tahisize teko ya sitabelo sa hae ku Ndat’ahe wa kwa lihalimu? (b) Ku toziwa ka moya o kenile ne ku talusañi kwa balutiwa ba Kreste?

¹⁰ Kana Mulimu n’a amuhezi teko ya mali a Jesu a n’a suluzwi sina tifo ya libi za lifasi? Ka buniti fela n’a i amuhezi. Bupaki bwa seo ne bu tile hamulaho wa mazazi a’ 50 ku zwa fa zuho ya Jesu, fa lizazi la mukiti wa Pentekonta. Moya wa Mulimu o kenile ne u sululezwi fa balutiwa ba 120 ba Jesu ba ne ba kubukani hamoho mwa Jerusalema. (Likezo 2:1, 4, 33) Ka ku swana ni Muprisita yo Mutuna wa bona, Jesu Kreste, ne ba tozizwe kuli ba sebeze sina “buprisita bo bu kenile, kuli [ba] tahise matabelo a moya” mwatas’a tukiso ya Mulimu ya tempele ye tuna ya kwa moya. (1 Pitrosi 2:5) Fahalimu a seo, bona batoziwa bao ne ba li sicaba se sinca, “mushobo o kenile” wa Isilaele wa kwa moya. Ku zwa fo, bupolofita kamukana bwa lika ze nde ka za Isilaele, ze cwale ka sepiso ya “bulikani bo bunca” ye kwa Jeremia 31:31, ne bu ka sebeza kwa puteho ya Bakreste ba ba tozizwe, bona be li “Isilaele wa Mulimu” tota.—1 Pitrosi 2:9; Magalata 6:16.

Miinelo ye Miñwi ya Tempele ya kwa Moya ya Mulimu

11, 12. (a) Ki nto mañi ye ne i yemelwa ki lapa la baprisita ku Jesu, mi ki nto mañi kwa balateleli ba hae ba ba tozizwe? (b) Mukeketuna wa mezi u yemela nto mañi, mi u sweli ku itusiswa cwañi?

¹¹ Nihaike kuli Sibaka se si Kenile Hahulu ne si swaniseza “mwa lihalimu luli,” m’o Mulimu a li fa lubona, miinelo ye miñwi kaufela ya tempele ya Mulimu ya kwa moya i ama lika ze fa lifasi-mubu. (Maheberu 9:24) Mwa tempele ya mwa Jerusalema, ne ku na ni lapa la mwahali la baprisita le ne li na ni aletare ya matabelo ni mukeketuna wa mezi, ao baprisita ne ba itusisa mwa ku ikenisa pili ba si ka eza kale sebelezo ye kenile. Zona lika zeo li swanisezañi mwa tukiso ya Mulimu ya tempele ya kwa moya?

¹² Ku Jesu Kreste, lapa la baprisita la mwahali ne li yemela muinelo wa hae o si na sibi ka ku ba Mwan’a Mulimu ya li mutu wa fa lifasi-mubu ya petehile. Ka ku bonisa tumelo mwa sitabelo sa Jesu, balateleli ba Kreste ba ba tozizwe ba beiwa ku luka. Kacwalo, Mulimu ka tukelo u kona ku sebelisana ni bona inge kuli ha ba na sibi. (Maroma 5:1; 8:1, 33) Kacwalo, lona lapa leo hape li yemela muinelo wa butu bwa fa lifasi-mubu bo bu lukile bo bu fiwa ili b’o lilama ba buprisita bo bu kenile ba ikola ka buñwi fapil’a Mulimu. Ka nako ye swana, Bakreste ba ba tozizwe ba sa li ba ba si ka petahala ni ba ba mwa sibi. Mukeketuna wa mezi mwa lapa leo u yemela Linzwi la Mulimu, leo Muprisita yo Mutuna a itusisa mwa ku kenisa buprisita bo bu kenile ka ku zwelapili. Ka ku ipeya kwatas’a muinelo wa ku kenisa w’o, ba fitile fa ponahalo ye kutekeha ili ye kutekisa Mulimu ni ku hohela ba ba kwande kwa bulapeli bwa hae bo bu kenile.—Maefese 5:25, 26; mu bapanye Malaki 3:1-3.

Sibaka se si Kenile

13, 14. (a) Sibaka se si kenile si yemelañi ku Jesu ni balateleli ba hae ba ba tozizwe? (b) Sibaka sa lambi se si ezizwe fa gauda si yemelañi?

¹³ Kalulo ya pili ya tempele i yemela muinelo o pahami ku fita wa lapa. Ku mutu wa fa lifasi-mubu ya petehile Jesu Kreste, i yemela ku pepwa sinca kwa hae sina Mwan’a Mulimu kwa moya ya ka kutela kwa bupilo bwa kwa lihalimu. Hamulaho wa ku beiwa ba ba lukile ka mutomo wa tumelo ya bona mwa mali a Kreste a’ suluzwi, bona balateleli ba ba tozizwe bao hape ba iponela ku sebeza ko ku ipitezi k’o kwa moya wa Mulimu. (Maroma 8:14-17) Ka “mezi [f’o kikuli, kolobezo ya bona] ni ka Moya,” ba “pepwa sinca” sina bana ba Mulimu kwa moya. Ka ku ba cwalo, ba na ni sepo ya ku zusezwa kwa bupilo bwa kwa lihalimu sina bana ba Mulimu ba moya, ibile fela ba zwelapili ba nze ba sepahala ku fita fa lifu.—Joani 3:5, 7; Sinulo 2:10.

¹⁴ Baprisita ba ne ba sebeza mwahali mwa Sibaka se si Kenile sa tempele ya fa lifasi-mubu ne ba sa bonwi ki balapeli ba ba kwande. Ka ku swana, Bakreste ba ba tozizwe ba ipumana mwa muinelo wa kwa moya o sa abanwi kamba ku utwisiswa ka ku tala ki buñata bwa balapeli ba Mulimu, bao sepo ya bona i li ya ku pila ku ya ku ile fa lifasi-mubu le li li paradaisi. Sibaka sa lambi se si ezizwe fa gauda si yemela muinelo o monyehezwi wa Bakreste ba ba tozizwe. Ku sebeza kwa moya wa Mulimu, sina mafula a mwa lambi, ku fa monyehelo fa Bibele. Kutwisiso ye ba fumana Bakreste ka seo, ha ba ipulukeli yona. Ka ku fapahana, ba ipeya ku utwa Jesu ya n’a bulezi kuli: “Mina mu liseli la lifasi. . . . Liseli la mina a li bonise batu cwalo, kuli ba bone misebezi ya mina ye minde, mi ba lumbe Ndat’a mina ya kwa lihalimu.”—Mateu 5:14, 16.

15. Sinkwa sa poniso se si fa tafule ya sinkwa ne si yemelañi?

¹⁵ Kuli ba zwelepili ku ba mwa muinelo wo o’ monyehezwi, Bakreste ba ba tozizwe ba lukela ku ifepa kamita ku se si yemelwa ki sinkwa se si fa tafule ya sinkwa sa poniso. Simbule se si mutomo sa sico sa bona sa kwa moya ki Linzwi la Mulimu, leo ba lika ka t’ata ku bala ni ku yeya ku lona ka zazi. Jesu hape n’a sepisize ku ba fumanela “lico ka nako ye lukela” ka “mutanga [wa hae] ya sepahala, ya na ni kutwisiso.” (Mateu 24:45) Yena “mutanga” y’o ki sitopa kamukana sa Bakreste ba ba tozizwe ba ba fa lifasi-mubu ka nako ifi kamba ifi. Kreste s’a itusisize sona sitopa se si tozizwe seo mwa ku hasanya litaba fa talelezo ya bupolofita bwa Bibele ni ku fa ketelelo ya ka bunako fa ku sebeliswa kwa likuka za Bibele mwa bupilo bwa cwale bwa ka zazi ni zazi. Kacwalo, Bakreste ba ba tozizwe ba ifepa ka buitebuho fa litukiso za kwa moya ze cwalo kaufela. Kono ku fepeha kwa bupilo bwa bona bwa kwa moya ha ku si ka itinga fela fa ku ikungela zibo ya ku ziba Mulimu mwa minahano ni lipilu za bona. Jesu n’a ize: “Sico sa ka, kikuli ni eze se si latwa ki Ya ni lumile, mi ni feleleze musebezi wa hae.” (Joani 4:34) Ka ku swana, Bakreste ba ba tozizwe ba kolwiswa ki ku itiisa ka zazi ni zazi mwa ku eza tato ya Mulimu ye patuluzwi.

16. Sebelezo ya kwa aletare ya insense i yemelañi?

¹⁶ Kakusasana ni manzibwana, muprisita n’a fa insense ku Mulimu fa aletare ya insense mwa Sibaka se si Kenile. Ka nako ye swana, balapeli ba ba si baprisita ne ba lapela ku Mulimu ba nze ba yemi mwa malapa a kwande a tempele ya hae. (Luka 1:8-10) “Insense,” ka mo i taluseza Bibele, i talusa “milapelo ya balumeli.” (Sinulo 5:8) “Tapelo ya ka i amuhelwe ki Wena sina insense,” ki mwa n’a ñolezi walisamu Davida. (Samu 141:2) Bakreste ba ba tozizwe ni bona ba lata hahulu tohonolo ya bona ya ku atumela Jehova ka tapelo ka Jesu Kreste. Litapelo ze tiile ze zwa kwa pilu li swana sina insense ye na ni munko o munati. Bakreste ba ba tozizwe hape ba lumbeka Jehova ka linzila ze ñwi, ka ku itusisa milomo ya bona mwa ku luta ba bañwi. Buitiiso bwa bona ha ba talimani ni butata ni busepahali bwa bona mwatas’a tiko ki ze tabisa hahulu Mulimu.—1 Pitrosi 2:20, 21.

17. Ki sifi se ne si amilwe mwa talelezo ya swanisezo ya bupolofita ye ne i filwe ka ku kena kwa pili kwa muprisita yo mutuna mwa Sibaka se si Kenile Hahulu fa Lizazi la Swalelo ya Libi?

¹⁷ Fa Lizazi la Swalelo ya Libi, muprisita yo mutuna wa mwa Isilaele n’a na ni ku kena mwa Sibaka se si Kenile Hahulu ni ku cisa insense fa pizana ya gauda ye na ni mashala a’ enyauka. Seo ne si na ni ku eziwa a si ka tisa kale mali a sitabelo bakeñisa sibi. Ka ku taleleza yona swanisezo ya bupolofita yeo, Jesu ya n’a li mutu wa fa lifasi-mubu n’a bulukile busepahali bo bu tezi ku Jehova Mulimu pili a si ka fa kale bupilo bwa hae sina sitabelo se si inelela kwa neku la libi za luna. Kacwalo n’a bonisize kuli mutu wa fa lifasi-mubu ya petehile u kona ku buluka busepahali bwa hae fapil’a Mulimu ku si na taba ni sineneketo yeo Satani a tisa ku yena. (Liproverbia 27:11) Ha n’a likiwa, Jesu n’a itusisa tapelo “ka muhuwo o mutuna, ni ka miyoko, . . . mi a utwiwa kabakala bulapeli bwa hae.” (Maheberu 5:7) Ka yona nzila yeo n’a lumbile Jehova sina Mubusi wa pupo kamukana ya lukile ni ya na ni tukelo. Mulimu n’a file Jesu mupuzo ka ku mu zusa kwa bafu ku mu isa kwa bupilo bwa mwa lihalimu bo bu sa koni ku shwa. Mwa mayemo ao a’ pahami, Jesu u isa mamelelo kwa libaka la bubeli la ku taha kwa hae fa lifasi-mubu, ili la ku kutisa batu ba baezalibi ba ba bakile mwa silikani ni Mulimu.—Maheberu 4:14-16.

Kanya ye Tuna Hahulu ya Tempele ya Mulimu ya kwa Moya

18. Jehova u tisize cwañi kanya ye zwile mubano kwa tempele ya hae ya kwa moya?

¹⁸ “Kanya ya Ndu ya mwamulaho i ka fita ya ya pili,” ki mwa n’a bulelezi cimo Jehova. (Hagai 2:9) Ka ku zusa Jesu ku ba Mulena ni Muprisita yo Mutuna ya sa koni ku shwa, Jehova n’a tisize kanya ye zwile mubano mwa tempele ya hae ya kwa moya. Jesu cwale u mwa mayemo a ku kona ku tisa “ku pilisa ko ku sa feli [ku] ba ba mu utwa kamukana.” (Maheberu 5:9) Ba pili kwa ku bonisa ku ipeya ku utwa ko ku cwalo ne li balutiwa b’a 120 ba ne ba amuhezi moya o kenile la Pentekonta ka 33 C.E. Buka ya Sinulo ne i bulezi cimo kuli bona bana ba Isilaele ba kwa moya bao kwa nalulelule ne ba ka fita fa palo ya 144,000. (Sinulo 7:4) Hamulaho wa lifu, buñata bwa bona ne ba bile ni ku lobala ba sa ikutwi mwa libita le li zibahala la mufuta wa mutu, ba nze ba litela nako ya ku ba teñi kwa Jesu mwa m’ata a bulena. Ku bala nako kwa bupolofita ko ku fumanwa kwa Daniele 4:10-17, 20-27 ku supa kwa 1914 sina nako yeo Jesu a swanela ku kalisa ku busa mwahal’a lila za hae. (Samu 110:2) Ka lilimo ze mashumi-shumi pili silimo seo si si ka taha kale, Bakreste ba ba tozizwe ne ba si libelezi ka tukufalelo. Ndwa ya lifasi ya pili ni bumai bo ne bu zamaelela ni yona kwa mufuta wa mutu ne li file bupaki bwa kuli Jesu ka buniti fela n’a yolisizwe sina Mulena ka 1914. (Mateu 24:3, 7, 8) Hakuswanyani hamulaho wa f’o, ka ku fita kwa nako ya “katulo . . . ye na ni ku kala ka ba Ndu ya Mulimu,” Jesu n’a ka taleleza sepiso kwa balutiwa ba hae ba ba tozizwe ba ne ba se ba shwile, ya kuli: “Ni ka kuta, ni t’o mi nga.”—1 Pitrosi 4:17; Joani 14:3.

19. Bomasiyaleti ba ba 144,000 ba ka kena cwañi mwa Sibaka se si Kenile Hahulu sa kwa lihalimu?

¹⁹ Lilama za buprisita bo bu kenile ba 144,000 ha ba si ka swaiwa ka ku feleleza ni ku kubukanyezwa kwa lihae la bona la kwa lihalimu kaufel’a bona. Bomasiyaleti ba bona ba sa pila fa lifasi-mubu mwa muinelo wa kwa moya o yemezwi ki Sibaka se si Kenile, ba nze ba kauhanyizwe kwa maino a Mulimu ka “lisila,” kamba mukwalelo, wa mibili ya bona ya nama. Bona bao ha ba nze ba shwa ka busepahali, ba zusiwa onaf’o sina libupiwa za kwa moya ze sa shwi ili ku yo ba ni bao ba kalulo ya 144,000 ba se ba li kwa lihalimu.—1 Makorinte 15:51-53.

20. Ki musebezi ufi wa butokwa hahulu o ba sweli ku eza bomasiyaleti ba buprisita bo bu kenile ka nako ye, mi ki ka ku ba ni ze zwa mwateñi lifi?

²⁰ Ka ku ba ni baprisita ba bañata cwalo ba ba sebeza hamoho ni Muprisita yo Mutuna kwa lihalimu, tempele ya Mulimu ya kwa moya i fumani kanya ye ekezehile. Mwahal’a nako ya cwale, bomasiyaleti ba buprisita bo bu kenile ba sweli ku eza musebezi o butokwa hahulu fa lifasi-mubu. Ka ku kutaza kwa bona, Mulimu u sweli ku “nyanganyisa macaba kaufela” ka lipulelo za katulo ya hae, sina ha ku bulezwi cimo kwa Hagai 2:7. Ka nako ye swana, bolule-lule ba balapeli ba ba talusizwe sina “bufumu bwa macaba kamukana” ba sweli ku selehanela mwa malapa a fa lifasi-mubu a tempele ya Jehova. Bona bao ba na ni kalulo ifi mwa tukiso ya Mulimu ya bulapeli, mi ki kanya ifi ya kwapili ye lu kona ku libelela kwa tempeletuna ya hae ya kwa moya? Lipuzo zeo li ka tatubisiswa mwa taba ye tatama.

Lipuzo za Lundululo

◻ Ki mutala ufi o zwile mubano wa n’a tomile Jesu ka 29 C.E.?

◻ Ki tukiso ifi ye ne i kalisize ku sebeza ka 29 C.E.?

◻ Ki sifi se si yemelwa ki Sibaka se si Kenile ni Sibaka se si Kenile Hahulu?

◻ Tempele ye tuna ya kwa moya i filwe cwañi kanya?

[Siswaniso se si fa likepe 23]

Jesu ha n’a tozizwe ka moya o kenile ka 29 C.E., tempele ye tuna ya Mulimu ya kwa moya ne i kalisize ku sebeza