Mu Eze Ba Bañwi Hande mi Mu Fane

¹ Dorkas “n’a ezanga misebezi ye minde ye miñata, ni lituso.” (Lik. 9:36, 39) Moya wa hae wa bufani ne u tahisize kuli a latwe ki batu ba ne ba mu ziba mane ni Jehova Mulimu. Maheberu 13:16 i bulela kuli: “Mu si ke mwa libala ku eza ba bañwi hande, ni ku fana; kakuli Mulimu u tabela matabelo a cwalo.” Kacenu lu ka kona cwañi ku eza ba bañwi hande ni ku fana?

² Nzila ye lu kona ku tusa ba bañwi ki ka ku fana “tutu” ya luna. (Liprov. 3:9) Linubu za luna kwa musebezi wa mwa lifasi kaufela li tusa kwa ku yaha Mandu a Mubuso, Mandu a Mikopano, ni miyaho ya mitai mwa lifasi kaufela. Bufani bwa luna bu konisize bolule-lule ku tusiwa ki lituto za Mulimu ni sango sa kwa moya se si yahisa.

³ Ku Omba-omba: Ha ku ba ni kozi, batu ba Jehova ba itukiselize ku ‘eza hande’ balumeli sina bona ni ba bañwi ba ba sa lumeli. (Magal. 6:10) Hamulaho wa ku tunya kwa muyaho mo ku pangelwa milyani mwa France, bosinyalana ba ne ba pila bukaufi ni muyaho w’o ne ba bulezi kuli: “Mizwale ba luna ne ba tile ka bubebe ku to tusa kwa ku kenisa muzuzu wa luna ni ya ba bañwi ye mwa muyaho. Bomuyahwa ni luna ne ba komokile ha ne ba boni kuli batu ba bañata ne ba til’o tusa.” Kaizeli yo muñwi n’a ekelize kuli: “Maeluda ne ba to lu tusa. Ne ba to lu susueza. Mane yeo kona tuso ye ne lu tokwa hahulu ku fita tuso ya kwa mubili.”

⁴ Niha ku na ni linzila ze ñata za ku tusa bomuyahwa ni luna, nzila ye lu kona ku ba tusa hahulu ka yona ki ku abana ni bona zibo ye butokwa hahulu ya niti, ili ye kopanyeleza “sepo ya bupilo bo bu sa feli” y’a sepisize Jehova. (Tite 1:1, 2) Lushango lo lu mwa Bibele lu omba-omba ha buniti bote ba ba lila bakeñisa miinelo ya lifasi ni muinelo wa bona wa ku sa petahala. (Mat. 5:4) Haike lu eze ba bañwi hande ni ku fana mo lu konela kaufela.—Liprov. 3:27.