Mu Utwe Balisana Ba Itusisa Jehova

“Mu utwe ba ba etelela mwahalaa mina mi mu ipeye kwatasaa bona, kakuli ba tonela mioyo ya mina.”—MAHEB. 13:17.

MU KONA KU ALABA CWAÑI?

Baana-bahulu ba mwa puteho ba lisanga cwañi lingu za Mulimu?

Ki kabakalañi lingu ha li swanela ku utwa balisana mwa puteho?

Ki kabakalañi ku sa petahala kwa baana-bahulu ha ku sa swaneli ku tahisa kuli lu ba tongoke kamba kuli lu palelwe ku latelela zamaiso ya bona?

1, 2. Ki kabakalañi Jehova ha ibapanya ku mulisana?

JEHOVA u ibapanya ku mulisana. (Ezek. 34:11-14) Taba yeo i lu tusa ku utwisisa kuli Jehova ki ya cwañi. Mulisana ya lilato u bonanga teñi kuli wa babalela hande lingu za hae. U isanga lingu za hae ko ku na ni lico ni mezi, mi u lwalanga ngu ye sa zo pepiwa. (Samu 23:1, 2; Isa. 40:11) U tokomelanga lingu za hae musihali ni busihu mi wa li silelezanga kwa libatana. (1 Sam. 17:34, 35; Luka 2:8) U batanga ngu ifi kamba ifi ye latehile mwa mutapi ni ku babalela lingu ze holofezi.—Ezek. 34:16.

² Mwa linako za kwamulaho, buñata bwa batu ba Mulimu ne li balisana ni balimi. Bakeñisa taba yeo, ne ba utwisisa libaka Jehova ha naa ibapanyize ku mulisana. Ne ba ziba kuli lingu li tokwa ku babalelwa ni ku tokomelwa kuli li be ni buiketo bo bunde ni ku zwelapili ku pila. Ka nzila ye swana, batu ba tokwa ku babalelwa ni ku etelelwa ki Jehova. (Mare. 6:34) Batu ha ba sa babalelwi ni ku etelelwa ki Jehova, ba ka nyanda. Ha ba na ku ziba se sinde ni se si maswe, mi ha ba na ya ka ba sileleza. Ba swana sina “lingu ze si na mulisana.” (1 Mal. 22:17) Nihakulicwalo, Jehova ka lilato u fa batu ba hae ze ba tokwa.

 3. Lu ka itutañi mwa taba ye?

³ Ni luna lwa utwisisa ze tahisa kuli Jehova a swane sina mulisana. Jehova u babalela hande batu ba hae kacenu. Lu ka ituta mwa lu etelelela Jehova ni mwa lu tuseza kuli lu fumane ze lu tokwa. Mi hape kihona lu ka nyakisisa ze lu swanela ku eza kuli lu tusiwe ki ketelelo ni pabalelo ya lu fa.

MULISANA YO MUNDE U KETA BA BAÑWI KULI BA MU TUSE

 4. Jesu u babalela cwañi lingu za Jehova?

⁴ Jehova u ketile Jesu kuli a be Toho ya puteho ya Sikreste. (Maef. 1:22, 23) Jesu, yena “mulisana yo munde,” u swana ni Ndatahe. Jesu u lata lingu mi wa li babalela. Mane naa ‘tobohile moyo wa hae kabakala lingu.’ (Joa. 10:11, 15) Kaniti luli tiululo ki mpo ye nde hahulu kwa batu kaufela! (Mat. 20:28) Mulelo wa Jehova ki wa kuli mutu kaufela ya bonisa tumelo ku Jesu “a si ke a timezwa kono a be ni bupilo bo bu sa feli”!—Joa. 3:16.

5, 6. (a) Ki bo mañi ba ketile Jesu kuli ba babalele lingu za hae, mi lingu li swanela ku ezañi kuli li tusiwe ki pabalelo ye li fiwa ki Jesu? (b) Ki libaka mañi le lituna le li tahisa kuli lu latelele ketelelo ye lu fiwa ki baana-bahulu?

⁵ Lingu li bonisa cwañi kuli Jesu Kreste ki Mulisana wa zona? Jesu naa ize: “Lingu za ka li teeleza kwa linzwi la ka, na li ziba, mi za ni latelela.” (Joa. 10:27) Lingu li teeleza kwa linzwi la Mulisana yo Munde ka ku latelela ketelelo ya hae ka nako kaufela. Seo si kopanyeleza ku utwa ba ketile mulisana yo kuli ba mu tuse ku lisa mutapi. Mwa linako za baapositola, Jesu naa file baapositola ni balutiwa ba hae buikalabelo bwa ku lisa balateleli ba hae. Naa ba bulelezi kuli ba kutaze ni ku fepa “lingunyana” za hae. (Mat. 28:20; mu bale Joani 21:15-17.) Taba ye nde ha ne i zwelapili ku kutazwa, batu ba bañata ba ba balutiwa ba Kreste. Kacwalo, Jesu naa boni teñi kuli ne ku ka ba ni Bakreste ba ba hulile kwa moya ba ne ba ka lisa liputeho.—Maef. 4:11, 12.

⁶ Hasamulaho, Paulusi naa bulelezi baana-bahulu ba mwa puteho ya Efese kuli: “Mu ketilwe ki moya o kenile ku ba baokameli, kuli mu lise puteho ya Mulimu.” (Lik. 20:28) Ni kacenu, baana-bahulu ba ketilwe ki moya o kenile. Ki kabakalañi ha lu kona ku bulela cwalo? Ne ba ketilwe kabakala kuli ne ba kwanisize ze tokwahala ze ñozwi mwa Linzwi la Mulimu le li ñozwi ka susumezo ya moya o kenile. Kacwalo, ha lu utwa baana-bahulu, lu bonisa likute ku Jehova ni Jesu, bona Balisana ba babeli ba batuna ka ku fitisisa. (Luka 10:16) Leo ki lona libaka le lituna ha lu itatela ku utwa baana-bahulu. Kono ku na ni mabaka a mañwi a tahisa kuli lu latelele ketelelo ye ba lu fa baana-bahulu.

 7. Baana-bahulu ba mi tusa cwañi ku zwelapili ku tiisa bulikani bwa mina ni Jehova?

⁷ Baana-bahulu ba itusisanga litaba za mwa Bibele ka nako kaufela ha ba susueza ni ku fa ketelelo kwa mizwale ni likaizeli za bona. Baana-bahulu ha ba bulelelangi mizwale ni likaizeli za bona mo ba swanela ku pilela bupilo bwa bona. (2 Makor. 1:24) Kono ba tusanga mizwale ni likaizeli za bona ku ikezeza likatulo ze tomile fa likuka za mwa Bibele. Ka ku eza cwalo, baana-bahulu ba tusa puteho ku swalisana ni ku ba ni kozo. (1 Makor. 14:33, 40) Bibele i bulela kuli baana-bahulu “ba tonela mioyo ya mina.” Taba yeo i bonisa kuli baana-bahulu ba bata ku tusa mutu kaufela mwa puteho kuli a zwelepili ku ba bukaufi ni Jehova. Kamukwaocwalo, baana-bahulu ba akufanga ku tusa muzwale kamba kaizeli ya bata ku eza katulo ye maswe kamba ya ezize kale katulo ye maswe. (Magal. 6:1, 2; Juda 22) Lu na ni mabaka a mande a tahisa kuli lu “utwe ba ba etelela.”—Mu bale Maheberu 13:17.

 8. Baana-bahulu ba sileleza cwañi puteho?

⁸ Ka ku ba mulisana ya lilato, muapositola Paulusi naa lemusize mizwale ba hae ba mwa Kolose kuli: “Mu tokomele kuli ku si ke kwa ba ni ya mi isa mwa butanga ka butali bwa lifasi ni bupumi ka ku ya ka lizo za batu, ka ku ya ka lituto za lifasi za matatekelo mi isiñi ka ku ya ka Kreste.” (Makolo. 2:8) Temuso ya naa file Paulusi yeo i lu tusa ku bona libaka le liñwi ha lu tokwa ku latelela ketelelo ye lu fiwa ki baana-bahulu. Baana-bahulu ba sileleza mizwale ni likaizeli za bona kwa batu ba ba bata ku ba kauhanya ku Jehova. Muapositola Pitrosi naa lemusize kuli “bapolofita ba buhata” ni “baluti ba buhata” ne ba ka lika ku kukueza Bakreste ba ba fokola kuli ba si ke ba utwa Jehova. (2 Pit. 2:1, 14) Kacenu, baana-bahulu ba swanela ku fanga litemuso ze swana ha ku tokwahala kuli ba eze cwalo. Baana-bahulu ki Bakreste ba ba na ni butali ili ba ba na ni yeloseli mwa bupilo. Ne ba ketilwe ku ba baana-bahulu bakeñisa kuli ba bonisize kuli ba utwisisa hande mañolo mi ba na ni buikoneli bwa ku luta niti ya mwa Bibele. (1 Tim. 3:2; Tite 1:9) Ku hula kwa bona kwa moya, ku ba ni kutwisiso, ni butali bo ba fumani mwa Bibele ku ba tusa ku fa ketelelo ye nde kwa mizwale ni likaizeli za bona.

MULISANA YO MUNDE U FEPA NI KU SILELEZA LINGU

 9. Jesu u fepa ni ku etelela cwañi puteho kacenu?

⁹ Jehova u itusisa kopano ya hae kwa ku luta ni ku etelela mizwale ni likaizeli ba mwa lifasi kaufela. Lu fiwanga likelezo za mwa Mañolo ku zwelela mwa lihatiso za luna. Fokuñwi, kopano hape i fanga ketelelo kwa baana-bahulu ba mwa puteho. Baana-bahulu ba fiwanga ketelelo ku zwelela mwa mañolo e ba lumelwanga kamba ku zwelela kwa litaelo ze ba fiwanga ki baokameli ba maeto. Mukwa wo u tahisa kuli lingu li amuhele litaelo ze utwahala.

10. Mulisana ya lilato u na ni buikalabelo mañi haiba muzwale kamba kaizeli u ikauhanyize kwa puteho?

¹⁰ Balisana ba ba lilato ba na ni buikalabelo bwa ku sileleza ni ku babalela lingu. Baana-bahulu ba Sikreste sihulu ba iyakatwa batu ba ba kula kwa moya kamba ba ba ezize mafosisa a matuna. (Mu bale Jakobo 5:14, 15.) Ba bañwi mwendi ba ikauhanyize kwa puteho mi ba tuhezi ku sebeleza Mulimu. Mulisana ya lilato u ka ezañi kuli a tuse batu ba ba cwalo? U ka eza mwa konela kaufela kuli a bate batu ba ba cwalo ni ku ba susueza kuli ba kutele kwa puteho. Jesu naa ize: “Haki nto ye kateleha ku Ndate ya kwa lihalimu kuli nihaiba a li muñwi ku ba banyinyani bao a latehe.”—Mat. 18:12-14.

LU SWANELA KU NGA CWAÑI KU SA PETAHALA KWA BAANA-BAHULU?

11. Ki kabakalañi ha ku kona ku ba taata ku ba bañwi ku utwa baana-bahulu?

¹¹ Jehova ni Jesu ki balisana ba ba petehile. Balisana ba ba itusiswa ki Jehova ni Jesu kuli ba babalele puteho ha ba si ka petahala. Muinelo wo u kona ku tahisa kuli ku be taata ku ba bañwi ku utwa baana-bahulu. Ba kana ba nahana kuli: ‘Baana-bahulu ki batu ba ba si ka petahala sina luna. Ha lu swaneli ku teeleza kwa kelezo ye ba lu fa?’ Ki niti kuli baana-bahulu ha ba si ka petahala. Kono ha lu swaneli ku isa pilu kwa ku sa petahala kwa bona kamba kwa mafosisa e ba eza.

12, 13. (a) Ki mafosisa mañi e ne ba ezize batanga ba Mulimu ba naa itusisize mwa linako za kwamulaho? (b) Ki kabakalañi Jehova ha naa bata kuli mafosisa a batu ba naa itusisa a ñolwe mwa Bibele?

¹² Mañolo a patulula mafosisa a ne ba ezize batu ba naa itusisize Jehova mwa linako za kwamulaho kwa ku etelela batu ba hae. Ka mutala, Davida naa tozizwe ku ba mulena wa Isilaele, kono hasamulaho naa foselize Mulimu. Naa bukile ni musalaa mutu mi hasamulaho a bulaisa muunaa hae. (2 Sam. 12:7-9) Mu nyakisise hape za naa ezize muapositola Pitrosi. Nihaike kuli naa filwe buikalabelo bo butuna mwa puteho ya Sikreste, ni yena naa ezize mafosisa a matuna. (Mat. 16:18, 19; Joa. 13:38; 18:27; Magal. 2:11-14) Kwandaa Jesu, ku zwa ku Adama ni Eva ba ne ba petahalile, ha ku na mutu yo muñwi ya petahalile.

¹³ Ki kabakalañi Jehova ha naa boni teñi kuli mafosisa a ne ba ezize batanga ba hae ba bañwi ba naa sepile, a ñolwa mwa Bibele? Libaka le liñwi la naa ezelize cwalo, ne li ku lu bonisa kuli wa kona ku itusisa batu ba ba si ka petahala ku etelela batu ba hae. Mane ku zwa feela kwamulaho, Mulimu u itusisanga batu ba ba si ka petahala ku etelela batu ba hae. Kacwalo, taba ya kuli baana-bahulu ha ba si ka petahala ha i swaneli ku tahisa kuli lu ba tongoke kamba lu palelwe ku latelela zamaiso ya bona. Jehova u bata kuli lu ba kuteke ni ku ba utwa.—Mu bale Exoda 16:2, 8.

14, 15. Lu kona ku itutañi ka mo Jehova naa fezi litaelo kwa batu ba hae mwa linako za kwamulaho?

¹⁴ Ki kwa butokwa hahulu kuli lu utwe baana-bahulu. Libaka? Mu hupule mo Jehova mwa linako za kwamulaho naa fezi litaelo kwa batu ba hae ilikuli ba kone ku tiyela miinelo ye taata. Ka mutala, Maisilaele ha ne ba zwile mwa Egepita, Mulimu naa itusisize Mushe ni Aruni kuli ba fe litaelo za butokwa kwa batu. Ku zwa fo, Maisilaele ne ba tokwa ku utwa litaelo kuli ba si ke ba welwa ki kozi ya bulishumi. Maisilaele bao ne ba bulelezwi kuli ba ce sico se si ipitezi, ba bulaye ngu, ni kuli ba sase mali a yona fa misumo ya likwalo za bona ni fahalimwa minyako ya bona. Kana Mulimu naa ambozi ni Maisilaele luli? Batili. Batu ne ba amuhezi litaelo zeo ku zwelela kwa baana-bahulu ba ne ba filwe litaelo ki Mushe. (Ex. 12:1-7, 21-23, 29) Ka nzila yeo, Jehova naa itusisize Mushe ni baana-bahulu ku etelela batu. Kacenu, Jehova u itusisa baana-bahulu ba Sikreste ku eza cwalo.

¹⁵ Mwendi mwa hupula linako ze ñata mwa Bibele fo Jehova naa itusiselize batu kamba mangeloi kwa ku fa litaelo za hae kwa batu. Mwa miinelo ye miñata, litaelo zeo ne li pilisize batu. Mwa miinelo yeo kaufela, Mulimu naa ketile ku fa batu ba bañwi maata a ku bulela ka libizo la hae ni ku bulelela batu ba hae ze ne ba tokwa ku eza mwa miinelo ye taata. Lu na ni buikolwiso bwa kuli Jehova u ka eza nto ye swana fa Armagedoni. Kono baana-bahulu ba ba na ni buikalabelo bwa ku yemela Jehova kamba kopano ya hae kacenu ba swanela ku tokomela hahulu kuli ha ba itusisi maswe maata e ba filwe.

“MUTAPI U LI MUÑWI, MULISANA A LI MUÑWI”

16. Ki lifi “linzwi” le lu swanela ku teeleza ku lona?

¹⁶ Batu ba Jehova ki “mutapi u li muñwi” o liswa ki “mulisana a li muñwi,” yena Jesu Kreste. (Joa. 10:16) Jesu naa bulezi kuli naa ka ba ni balutiwa ba hae ka “mazazi kaufela ku isa kwa maungulelo a muinelo wa lifasi.” (Mat. 28:20) Ka ku ba Mulena mwa lihalimu, Jesu u filwe maata a ku zamaisa lika kaufela ze ka ezahala pili a si ka taha kale ku to sinya lifasi la Satani. Ki nto mañi ye kona ku lu tusa ku zwelapili ku swalisana ni ku silelezwa mwa kopano ya Mulimu? Bibele i alaba kuli: “Lizebe za mina li ka utwa mwamulaho a mina linzwi le li li: ‘Nzila ki yona ye, mu zamaye ku yona!’” “Linzwi” leo li kopanyeleza za lu luta Jehova mwa Bibele ni za bulela Jehova ni Jesu ka ku itusisa balisana ba ba ketilwe ki bona.—Mu bale Isaya 30:21; Sinulo 3:22.

17, 18. (a) Batu ba Mulimu ba mwa muinelo mañi o taata, mi ki buikolwiso mañi bo lu kona ku ba ni bona? (b) Lu ka nyakisisañi mwa taba ye tatama?

¹⁷ Bibele i bulela kuli Satani u swana “sina tau ye buluma, ye bata ye i ka ca.” (1 Pit. 5:8) Sina feela sibatana se si lapile, Satani u zuma mutapi, u libelela nako ye swanela ya kuli a lwanise ngu ye fokozi kamba ye zwile mwa mutapi. Kona libaka ha lu tokwa ku zwelapili ku ba bukaufi ni puteho hamohocwalo ni “mulisana ni mulibeleli” wa luna. (1 Pit. 2:25) Sinulo 7:17 i bulela za batu ba ba punyuha ñalelwa ye tuna. Liñolo leo li bulela kuli Jesu “u ka ba lisa, mi u ka ba etelela kwa maweluwelu a mezi a bupilo. Mi Mulimu u ka takula miyoko kaufela kwa meeto a bona.” Yeo ki sepiso ye nde luli!

¹⁸ Buikalabelo bwa baana-bahulu ba Sikreste bwa ku lisa puteho ki bwa butokwa hahulu. Baana bao ba ba ketilwe ba tokwa ku ezañi kuli ba babalele lingu za Jesu? Lu ka alaba puzo yeo mwa taba ye tatama.

[Siswaniso se si fa likepe 23]

Sina mulisana mwa sileleleza mutapi wa hae, baana-bahulu ba sileleza lingu ze ba filwe ku lisa (Mu bone paragilafu 8)

[Siswaniso se si fa likepe 25]

Balisana ba kwa moya ba sebeza ka taata kuli ba sileleze mutapi (Mu bone paragilafu 17 ni 18)