Buitiiso—Ki bwa Butokwa Hahulu kwa Bakreste

“Kwa tumelo ya mina mu ekeze . . . ku itiisa.”—2 PITROSI 1:5, 6.

 1, 2. Ki kabakalañi kaufel’a luna ha lu lukela ku itiisa ku isa kwa mafelelezo?

MUOKAMELI wa maeto ni musal’a hae ne ba potela Mukreste sina bona wa lilimo za buhulu ze mwa ma-90. N’a ngile mashumi-shumi a lilimo mwa bukombwa bwa nako ye tezi. Ha ne ba nze ba ambola, muzwale wa musupali y’o n’a bulezi ka ku nyolelwa ka za matohonolo a mañwi a n’a ikozi ka lilimo-limo ze felile. Miyoko ha ne i kalisa ku shulumuka mwa pata ya hae, a lil’oka kuli: “Kono cwale ha ni koni ku eza ze ñata mwa nto ifi kamba ifi.” Muokameli wa maeto n’a apuzi Bibele ya hae ni ku bala Mateu 24:13, ili k’o Jesu Kreste a amilwe a bulela kuli: “Kono ya [itiisa] ku isa kwa mafelelezo, ki yena ya ka piliswa.” Cwale muokameli y’o a talima muzwale ya lateha y’o ni ku bulela kuli: “Kalulo ya mafelelezo yeo luna kaufela lu na ni yona, ku si na taba ni buñata kamba bunyinyani bwa ze lu kona ku eza, ki ya ku itiisa ku isa kwa mafelelezo.”

² Ee, ka ku ba Bakreste kaufel’a luna lu na ni ku itiisa ku isa kwa mafelelezo a muinelo wo wa linto kamba kwa mafelelezo a bupilo bwa luna. Ha ku na nzila ye ñwi ya ku amuhela ka yona tumelezo ya Jehova kwa neku la ku puluswa. Lu mwa siyano ya bupilo, mi lu lukela ku “mata ka ku itiisa” ku fitela lu fita kwa mafelelezo. (Maheberu 12:1) Muapositola Pitrosi n’a koñomekile butokwa bwa kalemeno kao ha n’a susuelize Bakreste sina yena kuli: “Kwa tumelo ya mina mu ekeze . . . ku itiisa.” (2 Pitrosi 1:5, 6) Kono buitiiso ki nto mañi luli?

Buitiiso—Seo Bu Talusa

 3, 4. Ku itiisa ku talusañi?

³ Ku itiisa ku talusañi? Linzwi la Sigerike la ku eza sika la ku “itiisa” (hy·po·meʹno) ka mo li inezi fela li talusa “ku siyala kamba ku ina mwatasi.” Li fumaneha h’a 17 mwa Bibele. Ka ku ya ka bañoli ba madikishinari bo W. Bauer, F. W. Gingrich, ni F. Danker, li talusa “ku siyala ka ku fapahana kwa ku baleha . . . , ku hana ku kuta mwamulaho, ku s’a iteseleza.” Linzwi la Sigerike la sika le li yemela “buitiiso” (hy·po·mo·neʹ) li fumaneha ka buñata bo bu fitelela 30. Ka ku ama ku lona, buka ya A New Testament Wordbook, ye ñozwi ki William Barclay, i bulela kuli: “Buitiiso ki mayemo a ku kona ku tiyela lika, isiñi fela ka ku iteseleza, kono ka sepo ye cisehela . . . Ki kalemeno ka ka yemisa mutu a nze a talimezi kwa moya. Ki mukwa o munde o kona ku cinca tiko ye t’ata ka ku fitisisa ku i bisa tompo bakeñisa kuli hamulaho wa butuku ku bonwa sikonkwani.”

⁴ Buitiiso, kacwalo he, bu lu konisa ku s’a kutela mwamulaho ni ku s’a latehelwa ki sepo ha lu talimani ni mikwalelo ni but’ata. (Maroma 5:3-5) Bu talima kwa sikonkwani se si hamulaho wa butuku bwa cwale—ili mupuzo, kamba mpo, ya bupilo bo bu s’a feli, mwa lihalimu kamba fa lifasi-mubu.—Jakobo 1:12.

Buitiiso—Kabakalañi?

 5. (a) Ki kabakalañi Bakreste kaufela ha ba “swanezi ku itiisa”? (b) Miliko ya luna neikana ya beiwa mwa mifuta ifi ye mibeli?

⁵ Ka ku ba Bakreste, kaufel’a luna lu “swanezi ku [itiisa].” (Maheberu 10:36) Kabakalañi? Ka mutomo ki ka libaka la kuli lu “tahelwa ki miliko ye miñata.” Litaba za Sigerike fa kwa Jakobo 1:2 li akaleza kezahalo ye si ka libelelwa kamba ye sa amuhelehi, inge mutu h’a atumelwa ki lisholi. (Mu bapanye Luka 10:30.) Lu talimana ni miliko ye neikana ya ba ya mifuta ye mibeli: ye atile kwa batu bakeñisa sibi sa sihozo, ni ye taha kabakala buipeyo bwa luna bwa bumulimu. (1 Makorinte 10:13; 2 Timotea 3:12) Ki ifi ye miñwi ya yona miliko yeo?

 6. Paki yo muñwi n’a itiisize cwañi ha n’a talimani ni ku kula ko ku utwisa butuku?

⁶ Mapongo a matuna. Ka ku swana sina Timotea, Bakreste ba bañwi ba na ni ku tiyela “ku kuma-kuma.” (1 Timotea 5:23) Sihulu ha lu talimani ni ku kula ko k’u nga nako ye telele, mwendi ili ko ku utwisa hahulu butuku, lu tokwa ku itiisa, ku hana ku kuta mwamulaho, ka tuso ya Mulimu ni ku s’a latehelwa ki pono ya sepo ya luna ya Sikreste. Mu nyakisise mutala wa Paki yo muñwi ya mwa lilimo za buhulu ze kwa makalelo a ma-50 ya n’a lwanisani ka nako ye telele, ni ka t’ata luli ni butuku bwa sikoto sa liselusi ze kula hahulu ili se ne si bululuha ka bubebe. Mwa ku pazulwa kwa hae ko ku beli n’a siyezi a tiile mwa mayemo a hae a ku s’a amuhela ku pompelwa mali. (Likezo 15:28, 29) Kono sikoto seo sa taha hape mwa mba ya hae mi sa zwelapili ku hula bukaufi ni mongola wa hae. Ha ne si nze si hula cwalo, n’a utwa butuku bo bu s’a konwi ku nahanelwa ili bo bu s’a konwi ku cinaliswa ki kalafo ifi kamba ifi. Niteñi, n’a talimezi kwa linako za hamulaho wa butuku b’o kwa mupuzo wa bupilo mwa lifasi le linca. N’a zwezipili ku abana sepo ya hae ya ka cisehelo ni baalafi, bababaleli, ni bapoti. N’a itiisize ku fita kwa mafelelezo luli—ili mafelelezo a bupilo bwa hae. Mapongo a mina ne a kana a s’a beyi bupilo mwa lubeta kamba ku ba butuku hahulu sina bwa n’a bile ni bona muzwale ya lateha y’ani, kono niteñi ne a kana a tahisa tiko ye tuna ya buitiiso.

 7. Buitiiso bu ama butuku bwa mufuta mañi ku ba bañwi ba mizwale ni likaizeli ba luna ba kwa moya?

⁷ Butuku bwa mwa maikuto. Ka linako ze ñwi, ba bañwi ba batu ba Jehova ba talimana ni “pilu ye inzi mwa maswabi” ye “loba mutu fahali.” (Liproverbia 15:13) Maikuto a matuna a ku swaba a atile mwa “linako ze tata” ze. (2 Timotea 3:1) Magazini ya Science News ya December 5, 1992, ne i bihile kuli: “Ku ata kwa maikuto a matuna a ku swaba, ili ao hañata a sinya buikoneli bo buñwi ku ekezehile mwa lusika lo luñwi ni lo luñwi lwa masika a’ tatamana a’ pepilwe haisali ku zwiwa ka 1915.” Ze tisa maikuto a ku swaba ao ki z’e fitana-fitana, ili ze kona ku ba za misebelezo ya lilama za mubili ni ze s’a tabisi ili ze butuku. Kwa Bakreste ba bañwi, ku itiisa ku ama ndwa ya ka zazi ni zazi ya ku hana ku kutela mwamulaho ha ba talimani ni butuku bwa mwa maikuto. Niteñi, ha ba palelwi. Ba siyala ba sepahala ku Jehova ku si na taba ni ku ba mwa miyoko.—Mu bapanye Samu 126:5, 6.

 8. Ki tiko mañi ya za mali ye ne lu kana lwa talimana ni yona?

⁸ Litiko ze fitana-fitana ze lu talimana ni zona ne li kana za kopanyeleza ni but’ata bo butuna bwa za sifumu. Muzwale yo muñwi wa mwa New Jersey, U.S.A., ha n’a ipumani ka sipundumukela a si na mubeleko, ka ku utwahala n’a iyakatwite ka za ku fepa lubasi lwa hae ni ku s’a latehelwa ki ndu ya hae. Niteñi, n’a si ka libala ka za sepo ya Mubuso. Ha n’a nze a bata mubeleko o muñwi, n’a itusisize hande nako yeo ka ku sebeza sina paina wa ku tusa. Kwa nalulelule, a fumana mubeleko.—Mateu 6:25-34.

 9. (a) Ku latehelwa ki mulatiwa ka lifu ne ku kana kwa tokwa cwañi buitiiso? (b) Ki mañolo afi a’ bonisa kuli ha ku si ka fosahala ku lotisa miyoko ka maswabi?

⁹ Haiba se mu latehezwi ki mulatiwa ka lifu, mu tokwa buitiiso bo bu zwelapili ni hamulaho wa ku kutela mwa mipilelo ya kamita kwa ba ba pila ni mina. Mane ne mu kana mwa fumana kuli ku mi bela hahulu t’ata ka silimo ni silimo ka nako ye bat’o ba yeo mulatiwa wa mina n’a shwile ku yona. Ku itiisa kwa neku la ku latehelwa ko ku cwalo ha ku talusi kuli ku fosahezi ku lotisa miyoko ya maswabi. Ku lila lifu la mutu ye ne lu lata ki kwa ka taho, mi seo hasi bonisi ku tokwa tumelo mwa sepo ya zuho ka nzila ifi kamba ifi. (Genese 23:2; mu bapanye Maheberu 11:19.) Jesu “a lila” hamulaho wa lifu la Lazaro, nihailikuli N’a bulelezi Mareta ka buikolwiso kuli: “Kaizel’a hao u ka zuha.” Mi Lazaro n’a zuhile luli!—Joani 11:23, 32-35, 41-44.

10. Ki kabakalañi batu ba Jehova ha ba tokwa ku itiisa ka mukwa o ipitezi?

¹⁰ Fahalimu a ku tiyela litiko ze fumaneha kwa batu kaufela, batu ba Jehova ba na ni tokwahalo ye ipitezi ya ku itiisa. “Mu ka toiwa ki macaba kaufela kabakala Libizo la ka,” ki mwa n’a lemuselize Jesu. (Mateu 24:9) Hape n’a bulezi kuli: “Ha ba ni nyandisize, ba ka mi nyandisa ni mina.” (Joani 15:20) Ki kabakalañi sitoyo ni nyandiso ha li ba teñi cwalo? Kakuli ku si na taba ni ko lu pila fa lifasi-mubu le sina batanga ba Mulimu, Satani u sweli ku lika ku loba busepahali bwa luna ku Jehova. (1 Pitrosi 5:8; mu bapanye Sinulo 12:17.) Kwa neku la seo Satani u fuzelezi nyandiso, ili ku beya buitiiso bwa luna mwa tiko ye tuna.

11, 12. (a) Lipaki za Jehova ni bana ba bona ne ba talimani ni tiko mañi ya buitiiso mwa lilimo za ma-1930 ni za kwa makalelo a ma-1940? (b) Ki kabakalañi Lipaki za Jehova ha ba hana ku caela siswaniso sa naha silutu?

¹¹ Sina ka mutala, mwa ma-1930 ni kwa makalelo a ma-1940, Lipaki za Jehova ni bana ba bona mwa United States ni Canada ne ba bile mwatas’a nyandiso ye tuna hahulu bakeñisa kuli ne ba hana ku caela siswaniso sa naha silutu ka mabaka a lizwalo. Lipaki ba kuteka siswaniso sa naha ye ba pila ku yona, kono ba latelela sikuka se si tomilwe mwa Mulao wa Mulimu kwa Exoda 20:4, 5, se si li: “U si ke wa ikezeza siswaniso se si betilwe, nihaiba siswaniso sifi kamba sifi sa linto ze kwahalimu mwa lihalimu, nihaiba sa ze mwatasi mwa lifasi, nihaiba sa ze mwa mezi mwatas’a lifasi. U si ke wa si kubamela, u si ke wa si sebeleza; kakuli Na, [Jehova, NW] Mulimu wa hao, ni Mulimu ya lifufa.” Muta bana ba sikolo ba bañwi ba ba li Lipaki ne ba lelekilwe bakeñisa kuli ne ba lakaza ku nongisa bulapeli bwa bona ku Jehova Mulimu fela, Lipaki ne ba tomile Likolo za Mubuso kwa neku la ku ba luta. Baituti bao ne ba kutile kwa likolo za nyangela Kuta ye Tuna ya mwa United States ha ne i lumezi mayemo a bona a bulapeli, sina mo li ezeza linaha ze na ni yeloseli kacenu. Nihakulicwalo, buitiiso bwa ka bundume bwa ba banca bao bu sebeza sina mutala o’ babazeha, sihulu ku ba banca ba Sikreste kacenu ba ne ba kana ba talimana ni nyefulo ni ku sehiwa bakeñisa kuli ba lika ka t’ata ku pila ka lipimo za Bibele.—1 Joani 5:21.

¹² Litiko ze fitana-fitana ze lu talimana ni zona—ili ze atile kwa batu kamukana hamohocwalo ni zeo lu talimana ni zona bakeñisa tumelo ya luna ya Sikreste—li bonisa libaka ha lu tokwa buitiiso. Kono lu kona ku itiisa cwañi?

Mu Itiise ku Fita kwa Mafelelezo—Kamukwaufi?

13. Jehova u fa cwañi buitiiso?

¹³ Batu ba Mulimu ba mwa mayemo a mande hahulu ku fita ba ba s’a lapeli Jehova. Kwa neku la tuso, lu kona ku kupa “Mulimu, yena [y’a fa, NW] ku tiisa.” (Maroma 15:5) Nihakulicwalo, Jehova u fa cwañi buitiiso? Nzila ye ñwi ya eza cwalo ka yona ki ka mitala ya buitiiso ye ñozwi mwa Linzwi la hae, yona Bibele. (Maroma 15:4) Ha lu nze lu nyakisisa zeo, ha lu susuezwi fela ku itiisa kono hape lu ituta mwa ku itiiseza. Mu nyakisise mitala ye mibeli ye zwile mubano—buitiiso bwa ka bundume bwa Jobo ni buitiiso bo bu si na koli bwa Jesu Kreste.—Maheberu 12:1-3; Jakobo 5:11.

14, 15. (a) Ki litiko lifi zeo Jobo n’a tiyezi? (b) Jobo n’a konile cwañi ku tiyela litiko za n’a talimani ni zona?

¹⁴ Ki miinelo ifi ye ne i beile buitiiso bwa Jobo mwa tiko? N’a bile ni but’ata bwa za sifumu ha n’a latehezwi ki buñata bwa liluwo la hae. (Jobo 1:14-17; mu bapanye Jobo 1:3.) Jobo n’a utwile butuku bwa ku latehelwa muta bana ba hae kaufela b’a lishumi ne ba bulailwe ki liñungwa. (Jobo 1:18-21) N’a kulile butuku bo butuna, ili bo bu utwisa butuku luli. (Jobo 2:7, 8; 7:4, 5) Musal’a hae ka sibili n’a mu susuelize kuli a fetuhele Mulimu. (Jobo 2:9) Balikani ba batuna ne ba bulezi lika ze holofaza, ze si na sishemo, ni ze si za niti. (Mu bapanye Jobo 16:1-3 ni Jobo 42:7.) Nihakulicwalo, mwahal’a zeo kaufela Jobo n’a hanile ku kutela mwamulaho, ili ku buluka busepahali. (Jobo 27:5) Lika za n’a tiyezi li swana ni litiko zeo batu ba Jehova ba talimana ni zona kacenu.

¹⁵ Jobo n’a konile cwañi ku itiisa mwa litiko zeo kaufela? Nto ye ñwi yeo luli ne i tiisize Jobo ne li sepo. N’a zibahalize kuli: “Kota niha i lemwa, ku na ni sepo ya kuli i ka mela hape, ni kuli ha i na ku tokwa lituhela.” (Jobo 14:7) Ki sepo mañi yeo Jobo n’a na ni yona? Sina ha ku bonisizwe mwa litimana ze sikai hamulaho, n’a bulezi kuli: “Mutu h’a shwa, kabe n’a ka pila hape? . . . Fo, Wena n’o ka biza, mi ne ni ka ku alaba; Mi n’o ka shukelwa [kamba, ku nyolelwa] ku bona hape musebezi wa mazoho a hao.” (Jobo 14:14, 15) Ee, Jobo n’a boni ze kwapil’a butuku bwa hae bwa nako yeo. N’a ziba kuli litiko za hae ne li si ke z’a ba teñi ku ya ku ile. Ha li liyeha ka ku fitisisa n’a ka ba ni ku itiisa ku isa lifu. Tibelelo ya hae ya ka sepo ne li ya kuli Jehova, ya lakaza ku zusa bafu ka nzila ye lilato, n’a ka mu kutisa kwa bupilo.—Likezo 24:15.

16. (a) Ki sifi se lu ituta ka za buitiiso kwa mutala wa Jobo? (b) Sepo ya Mubuso i lukela ku ba ya luli kamukwaufi ku luna, mi ki kabakalañi?

¹⁶ Ki sifi se lu ituta kwa ku itiisa kwa Jobo? Kuli lu itiise ku isa kwa mafelelezo, ni kamuta ha lu swaneli ku libala sepo ya luna. Hape, mu hupule kuli buniti bwa sepo ya Mubuso bu talusa kuli manyando afi kamba afi ao lu talimana ni ona ki a “ka nakonyana fela” h’a bapanyiwa teñi. (2 Makorinte 4:16-18) Sepo ya luna ye nde hahulu i tomile ka ku tiya fa sepiso ya Jehova ya nako ye kwapilinyana muta a “ka takula miyoko kaufela kwa meto a [luna]; mi lifu ha li sa na ku ba teñi; nihaiba ku tahelwa ki maswabi ni ku lila, ni ku utwa butuku.” (Sinulo 21:3, 4) Sepo yeo, ye s’a “tahisi maswabi,” i lukela ku mamela minahano ya luna. (Maroma 5:4, 5; 1 Matesalonika 5:8) I lukela ku ba ya luli ku luna—ya luli hahulu kuli ka meto a tumelo, lu kone ku ipona lu li mwa lifasi le linca—lu s’a lwaniswi ki makulanu ni maswabi a matuna kono lu zuha ka zazi ni zazi lu na ni buikangulo bo bunde ni munahano o’ s’a lyangani; lu s’a bilaeli ni kamuta ka za lisineneketo ze tuna za sifumu kono lu pila mwa buiketo; lu s’a lili mafu a balatiwa kono lu ipumana mwa muinelo o’ nyangumuna wa ku ba bona ba zusiwa kwa bafu. (Maheberu 11:1) Ha ku si na sepo ye cwalo lu kona ku fita fa ku eshulwa ki litiko za luna za cwale kuli mane lu palelwe. Ka ku ba ni sepo ya luna, lu na ni susuezo ye tuna hakalo ya ku zwelapili ku lwana, ku zwelapili ku itiisa ku fita kwa mafelelezo!

17. (a) Ki litiko lifi zeo Jesu n’a tiyezi? (b) Manyandotuna ao Jesu n’a tiyezi ne a kana a konwa ku bonwa mwa taba mañi ya luli? (Mu bone litaluso za kwatasi.)

¹⁷ Bibele i lu susueza ku ‘talimela’ Jesu ni ku ‘mu lemuha.’ Ki litiko lifi za n’a tiyezi? Ze ñwi za zona ne li tahisizwe ki sibi ni ku s’a petahala kwa ba bañwi. Jesu n’a si ka tiyela fela ku “hanyezwa cwalo ki baezalibi” kono hape ni but’ata bo ne bu taha mwahal’a balutiwa ba hae, ku kopanyeleza cwalo ni likananisano za bona za ka ku kuta-kutela ka za y’a n’a li yo mutuna ka ku fitisisa. Ka butuna ni ku fita, n’a talimani ni tiko ya tumelo ye si na ye likana ni yona. N’a ‘itiisize fa kota ya linyando.’ (Maheberu 12:1-3; Luka 9:46; 22:24) Ku t’ata nihaili ku nahana fela ka za manyando a mwa munahano ni a kwa mubili a’ amilwe mwa butuku bwa ku kokotelwa ni lishwau la ku bulaiwa sina munyefuli.a

18. Ka ku ya ka muapositola Paulusi, ki lika lifi ze peli ze ne tiisize Jesu?

¹⁸ Ki sika mañi se ne si konisize Jesu ku itiisa ku fita kwa mafelelezo? Muapositola Paulusi u bulela lika ze peli ze ne tiisize Jesu: “litapelo ni likupo” mi hape ni “tabo y’a n’a beezwi kwapili.” Jesu, Mwan’a Mulimu ya petehile, n’a s’a swabi ku kupa tuso. N’a lapezi “ka muhuwo o mutuna, ni ka miyoko.” (Maheberu 5:7; 12:2) Sihulu tiko ya hae ye tuna ka ku fitisisa ha ne i atumela n’a fumani tokwahalo ya ku lapela ka ku kuta-kutela ni ka buniti kuli a tiiswe. (Luka 22:39-44) Ka ku alaba likupo za Jesu, Jehova n’a si ka zwisa teñi tiko yeo, kono n’a tiisize Jesu kuli a i tiyele. Jesu hape n’a itiisize kabakala kuli n’a talima ze hamulaho wa kota ya linyando ka za mupuzo wa hae—ili tabo ya n’a ka ba ni yona mwa ku ekeza kwa ku keniswa kwa libizo la Jehova ni ku liululwa kwa lubasi lwa mufuta wa mutu kwa lifu.—Mateu 6:9; 20:28.

19, 20. Mutala wa Jesu u lu tusa cwañi ku ba ni mubonelo o’ buniti luli ka za seo buitiiso bu ama?

¹⁹ Ku zwelela kwa mutala wa Jesu, lu ituta lika ze sikai ze lu tusa ku ba ni mubonelo o’ nga lika ka mo li inezi luli ka za seo buitiiso bu ama. Kezo ya buitiiso haki ye bunolo. Haiba lu fumana but’ata mwa ku tiyela tiko ye ñwi, lu fumana ku omba-ombiwa ka ku ziba kuli ne ku li cwalo ni ku Jesu. Kuli lu itiise ku isa kwa mafelelezo, lu lukela ku lapelela m’ata ka ku kuta-kutela. Ha lu li mwatas’a tiko ka linako ze ñwi ne lu kana lwa ikutwa ku s’a swanela ku lapela. Kono Jehova u lu mema kuli lu mu bulelele ze kwa pilu ya luna kaufela ‘kakuli wa lu tokomela.’ (1 Pitrosi 5:7) Mi ki ka libaka la seo Jehova h’a sepisize mwa Linzwi la hae, u ipeile mwa tamo ya ku fa “mata ao a matuna hahulu” ku bao ba ba mu biza ka tumelo.—2 Makorinte 4:7-9.

²⁰ Ka linako ze ñwi lu lukela ku itiisa lu nze lu lotisa miyoko. Ku Jesu, butuku bwa kota ya linyando ka ili bona fela ne bu si libaka la ku taba ka lona. Ka ku fapahana, tabo ne i li mwa mupuzo o ne u beilwe fapil’a hae. Ku luna haki muinelo wa niti ku libelela kuli kamita lu ka ikutwa ku taba ni ku nyakalala ha lu li mwatas’a tiko. (Mu bapanye Maheberu 12:11.) Nihakulicwalo, ka ku talima kwapili kwa mupuzo ne lu kana lwa kona ku ‘talima kuli ki tabo fela’ mane niha lu talimana ni miinelo ye fa tiko ka ku fitisisa. (Jakobo 1:2-4; Likezo 5:41) Nto ya butokwa ka ku fitisisa ki ya kuli lu siyale inze lu tiile cwalo—mane niha seo ne si ka ba ka ku lotisa miyoko. Mu hupule kuli, Jesu n’a si ka bulela kuli, ‘Ya lotisa miyoko ye minyinyani ka ku fitisisa, ki yena ya ka piliswa’ kono n’a inze, “Ya tundamena ku isa kwa mafelelezo, ki yena ya ka piliswa.”—Mateu 24:13.

21. (a) Kwa 2 Pitrosi 1:5, 6, lu susuezwa ku ekeza nto mañi kwa buitiiso bwa luna? (b) Ki lipuzo lifi ze ka nyakisiswa mwa taba ye tatama?

²¹ Buitiiso kacwalo ki bwa butokwa hahulu kwa neku la puluso. Nihakulicwalo, kwa 2 Pitrosi 1:5, 6, lu susuezwa ku ekeza buipeyo bwa bumulimu kwa ku itiisa kwa luna. Buipeyo bwa bumulimu ki nto mañi? Bu swalisani cwañi ni buitiiso, mi mu kona ku bu fumana cwañi? Lipuzo zeo li ka nyakisiswa mwa taba ye tatama.

[Litaluso za kwatasi]

Ne Mu Ka Alaba Cwañi?

◻ Ku itiisa ku talusañi?

◻ Ki kabakalañi batu ba Jehova ha ba tokwiwa ku itiisa ka mukwa o ipitezi?

◻ Ki sika mañi se ne si konisize Jobo ku itiisa?

◻ Mutala wa Jesu u lu tusa cwañi ku ba ni mubonelo o’ buniti ka za buitiiso?