“Baezi ba Linzwi” Ba Ba Tabile

“Mu amuhele ka musa Linzwi le li calilwe ku mina, le li kona ku pilisa mioya ya mina. Mu be baezi ba Linzwi, isi bautwi fela.”—JAKOBO 1:21, 22.

 1. Liñolo la luna la silimo sa 1996 li na ni ku ngiwa cwañi?

“MU BE BAEZI BA LINZWI.” Yona pulelo ye bunolo yeo i lwezi lushango lo lu m’ata. I ingilwe mwa “Liñolo le li Ñozwi ki Jakobo” mwa Bibele, mi i ka boniswa mwa Mandu a Mubuso sina liñolo la silimo la Lipaki za Jehova mwahal’a 1996 kaufela.

 2, 3. Ki kabakalañi ha ne ku li ko ku swanela kuli Jakobo a ñole liñolo le li na ni libizo la hae?

² Jakobo, munyan’a Jesu ku bom’ahe, n’a na ni mayemo a matuna mwa puteho ya Sikreste ya kwa makalelo. Ka nako ye ñwi hamulaho wa zuho ya Jesu, Mulen’a luna n’a bonahezi ka butu ku Jakobo mi cwale ni kwa baapositola kamukana. (1 Makorinte 15:7) Hasamulaho, muapositola Pitrosi ha n’a lukuluzwi mwa tolongo ka makazo, n’a bulelezi sikwata se ne si kubukani sa Bakreste kuli: “Mu zibise Jakobo ni balumeli litaba zeo.” (Likezo 12:17) Ku bonahala kuli, nihaike kuli yena n’a si muapositola, Jakobo n’a zamaisize mukopano wa sitopa se si busa mwa Jerusalema muta baapositola ni ba bahulu ne ba atuzi kuli Balicaba ba ba fita fa ku lumela ne ba sa tokwi ku iswa kwa mupato. Jakobo n’a kusufalize litaba, mi katulo ye ne i koñomekilwe ki moya o kenile ne i lumezwi kwa liputeho kaufela.—Likezo 15:1-29.

³ Ka mo ku bonahalela fela, nahanisiso ya Jakobo ya ka tokomelo ne li ya butokwa hahulu. Nihakulicwalo, ka buikokobezo n’a lumela kuli yena ki “mutanga wa Mulimu ni wa Mulena Jesu Kreste” fela. (Jakobo 1:1) Liñolo la hae le li buyelezwi li na ni kelezo ye na ni susuezo ye nde ili ye tuna kwa neku la Bakreste kacenu. Ne li felizwe ku sa siyezi lilimo z’e ne kuli Maroma ba taseze Jerusalema lwa pili ka Muzamaisi wa mpi Cestius Gallus, taba ye nde ha ne se i kutalizwe ka butuna “ku ba ba li teñi kaufela mwatas’a lihalimu.” (Makolose 1:23) Ne li linako ze t’ata, mi batanga ba Jehova ne ba lemuhile ka ku tala kuli katulo ya Hae ne se i li bukaufi ni ku tahiswa fa sicaba sa Majuda.

 4. Ki sifi se si bonisa kuli Bakreste ba kwa makalelo ne ba na ni buikolwiso mwa Linzwi la Mulimu?

⁴ Bona Bakreste bao ne se ba na ni Mañolo kaufela a Siheberu ni buñata bwa Mañolo a Sigerike. Sina ka mo ku boniselizwe ki ku ama teñi ko ku ñata ku ze ñozwi za bona za kwa makalelo, bañoli ba Bibele ba Sikreste ka mo ku bonahalela fela ne ba na ni buikolwiso bo butuna mwa Linzwi la Mulimu. Ka mukwa o swana, luna kacenu lu tokwa ku ituta Linzwi la Mulimu ka buniti ni ku li sebelisa mwa bupilo bwa luna. Kuli lu itiise, lu tokwa m’ata ni bundume bwa kwa moya ili zeo Mañolo a’ kenile a fa.—Samu 119:97; 1 Timotea 4:13.

 5. Ki kabakalañi ha lu tokwa ketelelo ye ipitezi kacenu, mi lu ka i fumana kai?

⁵ Kacenu mufuta wa mutu u yemi bukaufi hahulu ni “ñalelwa . . . ye tuna; la li ku simuluha lifasi, ku tisa cwale, ha ku si ka bonwa ñalelwa ye tuna cwalo, mane ni kwapili.” (Mateu 24:21) Ku punyuha kwa luna ku itingile fa ku ba ni ketelelo ya bumulimu. Ne lu kana lwa i fumana cwañi? Ka ku kwalula lipilu za luna kwa lituto za Linzwi le li buyelezwi ka moya wa Mulimu. Seo si ka lu isa kwa ‘ku ba baezi ba linzwi,’ sina batanga ba Jehova ba ba sepahala ba mwa linako za kwamulaho. Lu lukela ku bala ni ku ituta Linzwi la Mulimu ka t’ata ni ku itusisa lona ka ku tisa tumbo ku Jehova.—2 Timotea 2:15; 3:16, 17.

Buitiiso ka Tabo

 6. Ki kabakalañi ha lu swanela ku fumana tabo mwa ku talimana ni miliko?

⁶ Mwa ku kwalula liñolo la hae, Jakobo u talusa ka za tabo, muselo wa bubeli wa moya wa Mulimu. U ñola kuli: “Banabahesu, mu talime kuli ki tabo fela ha mu tahelwa ki miliko ye miñata, Inze mu ziba kuli ku likwa kwa tumelo ya mina ku tahisa ku itiisa, Mi ku itiisa ko, ku na ni ku feleleza musebezi wa kona, kuli mu be ba ba petehile, ba ba hulile luli, ba ba sa tokwi se siñwi.” (Jakobo 1:2-4; Magalata 5:22, 23) Ne ku kana kwa bulelwa cwañi kuli ki “tabo fela” ku talimana ni miliko ye miñata? Kihona, nihaiba Jesu mwa Ngambolo ya hae ya fa Lilundu n’a bulezi kuli: “Mu ka ba ni mbuyoti ha ba mi tapaula kabakala ka, ha ba mi nyandisa, ba mi tameleza bumaswe kamukana ka buhata. Mu wabelwe mi mu nyakalale, kakuli mupuzo wa mina ikaba o mutuna kwa lihalimu.” (Mateu 5:11, 12) Ku na ni ku kolwa ko ku tabisa mwa ku bona limbuyoti za Jehova fa buikatazo bwa luna ha lu nze lu itiisa ku liba kwa sikonkwani sa bupilo bo bu sa feli.—Joani 17:3; 2 Timotea 4:7, 8; Maheberu 11:8-10, 26, 35.

 7. (a) Ne lu kana lwa tusiwa cwañi ku itiisa? (b) Ka ku swana sina Jobo, lu kana lwa fiwa cwañi mupuzo?

⁷ Jesu yena ka sibili n’a itiisize “kabakala tabo y’a n’a beezwi kwapili.” (Maheberu 12:1, 2) Ka ku talima hande kwa mutala wa Jesu wa bundume, ni luna lwa kona ku itiisa! Sina ka mwa bulelela Jakobo bukaufi ni mafelelezo a liñolo la hae, Jehova u fa babuluki ba busepahali mupuzo o mutuna. “A mu bone, lu ba bulela kuli ba na ni mbuyoti ba ba konile ku itiisa,” ki mwa bulelela Jakobo. “Mu utwile za Jobo, za ku sa fela pilu kwa hae; mi mu boni mafelelezo a hae, a’ mu file Mulena; kakuli Mulena u tezi sishemo ni mukekecima.” (Jakobo 5:11) Mu hupule ka m’o busepahali bwa Jobo ne bu fezwi mupuzo ha n’a kutisizwe mwa buikangulo bo bunde ni mwa ku ikola bupilo bo bu tezi, bwa tabo ni balatiwa. Buitiiso mwa busepahali bu kona ku tisa ku wabelwa ko ku swana mwa Paradaisi ye sepisizwe ya lifasi le linca la Mulimu, sina masetela a tabo ya ku sebeleza Jehova cwale.

Ku Bata Butali

 8. Ne lu kana lwa fumana cwañi butali bwa niti, bo bu sebeza, mi tapelo i peta kalulo mañi ku seo?

⁸ Ku ituta kwa luna Linzwi la Mulimu ka t’ata, hamohocwalo ni ku li sebelisa mwa likezo, ku ka tisa butali bwa silumeli, ili ku lu konisa ku itiisa mwahal’a ku silafala kwa muinelo wa Satani o sweli ku shwa. Ne lu kana lwa ikolwisa cwañi ka za ku fumana butali bo bu cwalo? Jakobo u lu bulelela kuli: “Mutu ku mina h’a tokwa butali, a bu kupe ku Mulimu ya fanga batu kamukana ka bufani bo butuna, a sa kanani; mi u ka bu fiwa. Kono a kupe ka tumelo, a si ke a bilaela ka se siñwi; kakuli ya bilaela u swana sina liputu la liwate, le li zukuzwa ki moya, le li fukisezwa kafa ni kafa.” (Jakobo 1:5, 6) Lu swanela ku lapela ka buniti, ka buikolwiso bo bu sa zukuzehi bwa kuli Jehova u ka utwa likupo za luna ni kuli u ka li alaba ka nako ni nzila ya hae ye swanela.

 9. Jakobo u talusa cwañi butali bwa silumeli ni ku sebeliswa kwa bona?

⁹ Butali bwa silumeli ki mpo ye zwa ku Jehova. Mwa ku talusa limpo ze cwalo, Jakobo u bulela kuli: “Mpo ye nde kaufela, ni mpo ye petehile kaufela, i zwa kwahalimu, ku Ndate wa maseli, yo ku si na petuho ku Yena, nihaiba muluti wa petuho.” Hamulaho mwa liñolo la hae, Jakobo u talusa se si zwa mwa ku fumana butali bwa niti ha bulela kuli: “Kana ku mina ku na ni ya na ni butali ni kutwisiso? A bonahalise ka muzamao wa hae o munde kuli misebezi ya hae i ezwa ka musa o lukela mutu ya butali. . . . Butali bo bu zwa kwahalimu, pili ki bo bu kenile, hape bu na ni kozo, ni musa, ni makeke, bu tezi sishemo, ni miselo ye munati, ha bu na sishweka, ha bu na muipo.”—Jakobo 1:17; 3:13-17.

10. Bulapeli bwa buhata bu fapahana cwañi ni bwa niti?

¹⁰ Mwa kopano ya mwa lifasi kamukana ya bulapeli bwa buhata, ibe mwa Krestendomu kamba mwa linaha li sili, hañata ki kwa ka sizo kwa neku la balapeli ku opela lipina ze sikai, ku teeleza kwa litapelo ze kuta-kutelwa, mi mwendi ni ku utwa ngambolo. Ha ku na susuezo ye fiwa kwa neku la ku shaela lushango lwa sepo, kakuli bulapeli bo buñata ha bu boni tibelelo ye nde ya kwapili. Sepo ye nde hahulu ya Mubuso wa Mulimu wa Bumesiya i kona ku ba kuli ni kamuta ha i bulelwi kamba ki ye sa utwisiswi hande ka ku tala. Jehova u bulela ka bupolofita ku ba ba kumalezi ku Krestendomu kuli: “Sicaba sa ka si ezize libi ze peli; ba ni tobohile, Na, liweluwelu la mezi a’ pilisa; mi ba ikepezi masima, kono ki masima a’ na ni mandala, a’ sa buluki mezi.” (Jeremia 2:13) Ha ba na mezi a niti. Butali bwa kwa lihalimu ha bu yo ku bona.

11, 12. (a) Butali bwa bumulimu bu swanela ku lu susueza cwañi? (b) Butali bwa bumulimu bu lu lemusa ka za nto mañi?

¹¹ Ki muinelo o fapahana hakalo ku o li mwahal’a Lipaki za Jehova kacenu! Ka m’ata a filwe ki Mulimu, ba sweli ku taza lifasi-mubu ka taba ye nde ya Mubuso wa Hae o taha. Butali bo ba bulela bu tomile ka ku tiya fa Linzwi la Mulimu. (Mu bapanye Liproverbia 1:20; Isaya 40:29-31.) Ka mo ku inezi fela, ba itusisa hande zibo ni kutwisiso za niti mwa ku shaela milelo ye makalisa ya Mulimu ni Mubupi wa luna. I swanela ku ba takazo ya luna ya kuli b’ote ba ba li mwa puteho ba “tale zibo ya tato ya [Mulimu], ye ka yona [ba] ka fiwa butali ni kutwisiso ya za Moya.” (Makolose 1:9) Ka ku ba ni mutomo w’o, ba banca hamohocwalo ni ba bahulu ba ka susuezwa kamita ‘ku ba baezi ba linzwi.’

¹² “Butali bo bu zwa kwahalimu” bu lu lemusa ka za libi ze kona ku tahisa ku sa lumelelwa kwa bumulimu. “Banabahesu ba ba latiwa, mu zibe taba ye,” ki mwa bulelela Jakobo. “Mutu kaufela ibe ya teeleza kapili, ya liyeha kwa ku bulela, ya liyeha ni kwa ku halifa; Kakuli buhali bwa mutu ha bu sebezi ku luka kwa Mulimu.” Ee, lu lukela ku teeleza kapili, ka cisehelo, kwa kelezo ya bumulimu ni ku i sebelisa. Nihakulicwalo, lu lukela ku itibelela kwa ku itusisa maswe “silama se sinyinyani” sani, lona lilimi. Ka makatakata, lusebo lo lu si na butali, kamba lipulelo za buikaco, lilimi ka swanisezo li kona ku tumbula lubya mwa “mushitu o mutuna.” Kacwalo lu tokwa ku tahisa kalemeno ka ku tabisa ni buiswalo mwa liswalisano za luna kaufela.—Jakobo 1:19, 20; 3:5.

13. Ki kabakalañi ha ku li kwa butokwa kuli lu amuhele “linzwi le li calilwe”?

¹³ “Kabakaleo,” ki mwa ñolela Jakobo, “mu tuhele ze masila kaufela, ni se si sa li teñi sa lunya; mi mu amuhela ka musa Linzwi le li calilwe ku mina, le li kona ku pilisa mioya ya mina.” (Jakobo 1:21) Lifasi le le li mukwañuli, ni mupilelo wa lona wa buitati, wa ku lata sifumu, wa ku iponahaza ni mizamao ye silafezi, li fakaufi ni ku fela. “Kono ya eza tato ya Mulimu u ina ku ya ku ile.” (1 Joani 2:15-17) Kacwalo he, ki kwa butokwa hakalo kuli lu amuhele “Linzwi le li calilwe”! Butali bo bu filwe ka Linzwi la Mulimu bu fapahana hahulu ni bumaswe bwa lifasi le li shwa le. Ha lu tokwi ni se si kana sa bumaswe b’o. (1 Pitrosi 2:1, 2) Lu tokwa ku ba ni lilato la ku lata niti ni tumelo ye tiile ye calilwe mwa lipilu za luna, ilikuli lu ikatulele ku sa biuka ni kamuta mwa linzila ze lukile za Jehova. Kono kana ki ko ku likani ku utwa Linzwi la Mulimu?

Ku Fita fa ku Ba “Baezi ba Linzwi”

14. Lu kona ku ba cwañi “bautwi” hamohocwalo ni “baezi” ba Linzwi?

¹⁴ Kwa Jakobo 1:22, lu bala kuli: “Mu be baezi ba Linzwi, isi bautwi fela ba ba ipuma.” “Mu be baezi ba Linzwi”! Yona taba ye tuna yeo ka buniti fela i koñomekilwe mwa liñolo la Jakobo. Lu lukela ku teeleza, mi cwale ni ku eza ‘hona cwalo’! (Genese 6:22) Batu ba bañata kacenu ba ipapata kuli ki ko ku likani ku utwa ngambolo kamba ku abana mwa muezezo o muñwi wa bulapeli ka linako ze ñwi, kono ba feleza onafo fela. Ba nahana kuli haiba fela ba pila ‘bupilo bo bunde’ ka ku ya ka lipimo za bona, seo si ka ba se si likani. Niteñi Jesu Kreste n’a bulezi kuli: “Mutu h’a lata ku ni latelela, u na ni ku itoboha, a lwale [kota ya hae ya linyando, NW], mi a ni siyale mwamulaho.” (Mateu 16:24) Kezo ya ka ku ifana sitabelo ni buitiiso mwa ku latelela mutala wa Jesu wa ku eza tato ya Mulimu ka ku utwahala fela ki ze tokwahala kwa Bakreste ba niti. Ku bona, tato ya Mulimu kacenu ki ye swana sina ka mo ne i bezi mwa lilimo za mwanda wa pili muta Jesu ya zusizwe n’a laezi kuli: “Mu ye cwale, mu lute macaba kaufela.” (Mateu 28:19) Mu sweli ku eza cwañi ku seo?

15. (a) Ki swanisezo ifi yeo Jakobo a fa, ye bonisa ka mo lu kona ku bela ba ba tabile sina “baezi ba linzwi”? (b) Ki kabakalañi bulapeli fela bwa ka muezezo wa kamita ha bu si bo bu likani?

¹⁵ Haiba lu zwelapili ku talimisisa mwa Linzwi la Mulimu, li kona ku ba sina siiponi mwa ku lu bonisa mutu y’o lu li yena. Jakobo u bulela kuli: “Ya talimisisa mwa Mulao o petehile, ona Mulao wa tukuluho, mi a tiiseza mwateñi, isi muutwi fela ya libala, kono muezi ya eza musebezi, mutu yo u ka fuyaulwa ku z’a eza kaufela.” (Jakobo 1:23-25) Ee, u ka ba ‘muezi wa linzwi’ ya tabile. Fahalimu a seo, ki kwa butokwa ku ba “muezi” mwa taba kaufela ya bupilo bwa luna bwa Sikreste. Ni kamuta ha lu swaneli ku ipuma ka ku nahana kuli bulapeli bwa ka muezezo wa kamita fela ki bo bu likani. Jakobo u lu eleza ku lemuha miinelo ye miñwi ya bulapeli bwa niti ili yeo nihaiba Bakreste ba ba na ni cisehelo ne ba kana ba keshebisize. U ñola kuli: “Bulumeli bo bu kenile, bo bu sa nyazahali fapil’a Mulimu Ndat’a luna, ki mutu h’a lekula lindiala ni limbelwa mwa ñalelwa ya bona, mi a ipabalela ku za lifasi a si na koli.”—Jakobo 1:27.

16. Abrahama n’a bile “mulikan’a Jehova” ka linzila lifi, mi ne lu kana lwa fumana cwañi silikani sa Hae?

¹⁶ Haki ko ku likani ku bulela fela kuli, ‘Ni lumela ku Mulimu,’ ni ku siyela litaba zeo onafo fela. Sina ka mo i taluseza Jakobo 2:19: “Wena u lumela kuli Mulimu ki a li muñwi; u eza hande; kono ni bona badimona ba lumela cwalo, mi ba ngangama.” Jakobo u koñomeka kuli “tumelo . . . ha i si na misebezi, i ishwezi,” mi u ama ku Abrahama, ili ku bulela kuli: “Tumelo n’e sebelisana ni misebezi ya hae, mi tumelo ya hae ya petahala ka misebezi.” (Jakobo 2:17, 20-22) Misebezi ya Abrahama ne i kopanyelelize ku fa kimululo ku bahabo, ku amuhela baenyi, ku itukiseza ku fana Isaka sitabelo, ni ku ‘ipulela’ tumelo ye sa zikinyehi mwa sepiso ya Mulimu ya “munzi o na ni mitomo ya niti,” ili Mubuso wa Bumesiya o kwapili. (Genese 14:16; 18:1-5; 22:1-18; Maheberu 11:8-10, 13, 14; 13:2) Ka ku swanela, Abrahama “a bizwa [mulikan’a Jehova, NW].” (Jakobo 2:23) Ni luna ne lu kana lwa balwa ku ba ‘balikani ba Jehova’ ha lu nze lu tiiseza ku shaela tumelo ni sepo ya luna mwa Mubuso wa hae wa ku luka o taha.

17. (a) Ki kabakalañi Rahaba ha n’a ‘beilwe ya lukile,’ mi n’a fumani cwañi mupuzo? (b) Ki mukoloko ufi o mutelele w’o Bibele i fa wa bao ba ne ba ‘bile baezi ba linzwi’? (c) Jobo n’a filwe cwañi mupuzo, mi ki kabakalañi?

¹⁷ Bao ba ne ba bile “baezi ba linzwi” ne ba ‘beilwe ba ba lukile ka misebezi, isi ka tumelo inosi.’ (Jakobo 2:24) Rahaba ne li yo muñwi ya n’a ekelize misebezi kwa tumelo ya hae mwa “linzwi” la n’a utwile ka ku ama kwa likezo ze m’ata za Jehova. N’a patile matwela ba Maisilaele ni ku ba tusa ku baleha, mi hamulaho a kubukanya ba ndu ya bondat’ahe kuli ba puluswe. Mwa zuho, u ka taba hakalo ku ziba kuli tumelo ya hae, ye ne i yemezwi ki misebezi, ne i tisize kuli a be kukululu wa Mesiya! (Joshua 2:11; 6:25; Mateu 1:5) Maheberu kauhanyo ya 11 i fa mukoloko o mutelele wa ba bañwi ba ne ba ‘bile baezi’ mwa ku bonisa tumelo ya bona, mi ba ka fumana mupuzo o mutuna. Hape ha lu lukeli ku libala Jobo, ili y’o ha nze a li mwatas’a tiko ye tuna n’a bulezi kuli: “Ku lumbekwe Libizo la [Jehova, NW].” Sina ha se lu lemuhile, tumelo ni misebezi ya hae ne li tisize mupuzo o mutuna. (Jobo 1:21; 31:6; 42:10; Jakobo 5:11) Ka mukwa o swana, ku itiisa kwa luna kacenu sina “baezi ba linzwi” ku ka tisa tumelezo ya Jehova ya ka ku mu tabisa.

18, 19. Mizwale ba ba se ba hatelezwi ka nako ye telele ba fitile cwañi fa ku ba “baezi ba linzwi,” mi misebezi ya bona i tisize mbuyoti ifi?

¹⁸ Mwahal’a bao ba ba tiyezi ze ñata mwahal’a lilimo ki mizwale ba luna ba mwa Kalulo ya Yurope ya kwa Upa. Cwale bakeñisa kuli likaniso ze ñata li zwisizwe teñi, bona bao ka niti luli se ba bile “baezi ba linzwi” mwa miinelo ya bona ye minca. Balumiwa ni mapaina ba ba zwa mwa linaha ze li mabapa se ba tutezi k’o ku yo tusa mwa ku luta ni ku zamaisa lika. Mutai wa kwa Finland ni mitai ye miñwi ya Watch Tower Society ye li mabapa se i lumile bocaziba ba za buyahi, mi swalisano ya mizwale ya mwa lifasi kamukana ye na ni sishemo se i tahisize mali a ku yahisa liofisi ze nca za mitai ni Mandu a Mubuso.—Mu bapanye 2 Makorinte 8:14, 15.

¹⁹ Bona mizwale bao ba ne ba hatelezwi ka nako ye telele se b’a ngile muhato wa ka cisehelo hakalo mwa simu! Ba sweli ku ‘sebeza ka t’ata ni ku itiisa’ kuli, ka mubulelelo o muñwi, ba yolise libaka ze ne li sa fumanehi ku bona mwahal’a “nako . . . ye maswe.” (1 Timotea 4:10; 2 Timotea 4:2) Sina ka mutala, mwa April ye felile mwa Albania, m’o ku tibelwa ne ku bile ko ku situhu hahulu, libunda kaufela la mapampili a Taba ya Mubuso ye ne i na ni toho ya taba ye li “Ki Kabakalañi Bupilo Ha Bu Tezi But’ata Cwalo?” ne li abezwi mwa mazazi a malalu fela. W’o ne u bile muhato o munde hahulu o tatama Kupuzo ya lifu la Jesu, ili yeo ku yona ne ku fumanehile batu ba ba eza 3,491—ili ba bañata hahulu ku fita bahasanyi ba bona ba ba cisehela b’a 538.

20. Lipalo za mwa lilimo za cwañu fa za ba ba fumanehile kwa Kupuzo li bonisa nto mañi, mi ba bañata ne ba kana ba tusiwa cwañi?

²⁰ Linaha ze ñwi ni zona li petile kabelo ye butokwa ka lipalo za ba ba fumanehile kwa Kupuzo, ili ze ekezehile mwa lilimo za cwanoñu fa ka ku fitelela 10,000,000. Mwa libaka ze ñata ba banca, ka ku tiiswa kwa tumelo ya bona bakeñisa ku fumaneha kwa Kupuzo ni ku i mamela, se ba fita fa ku ‘ba baezi ba linzwi.’ Kana lwa kona ku susueza ba ba sa z’o swalisana ni luna ba ba ekezehile kuli ba fite ku ze konisa kwa neku la tohonolo yeo?

21. Ka ku lumelelana ni liñolo la luna la silimo, ki nzila ifi ye lu swanela ku ndongwama, mi ki ka ku ba ni sikonkwani sifi?

²¹ Ka ku swana ni Bakreste bani ba ne ba na ni cisehelo mwa lilimo za mwanda wa pili, ni ba bañwi ba bañata haisali ku zwiwa f’o, ni luna ha lu ikatuleleñi ku itiisa mwa ku “matela fo ku likanyisizwe” ili fa bupilo bo bu sa feli, nihaiba bona bo bu ka ba mwa Mubuso wa kwa lihalimu kamba mwa liluko la ona la fa lifasi-mubu. (Mafilipi 3:12-14) Ku fita fa sikonkwani seo ki nto ye swanelwa ki buikatazo bwa luna kaufela. Ye haki nako ya ku wela mwa ku ba bautwi fela, kono sihulu ki nako ya ‘ku tiya ni ku n’o sebeza.’ (Hagai 2:4; Maheberu 6:11, 12) Ha lu ‘amuhezi linzwi le li calilwe,’ haike lu be ‘baezi ba linzwi ba ba tabile’ cwale ni ku ya cwalo mwa linako za ku ya ku ile ze ka taha.

Ne Mu ka Alaba Cwañi?

◻ Ne lu kana lwa itiisa cwañi ka tabo?

◻ “Butali bo bu zwa kwahalimu” ki nto mañi, mi ne lu kana lwa bu ndongwama cwañi?

◻ Ki kabakalañi ha lu lukela ku ba “baezi ba Linzwi, isi bautwi fela”?

◻ Ki lipiho lifi ze swanela ku lu nyangumuna ku ba “baezi ba linzwi”?

[Siswaniso se si fa likepe 26]

Haike ni luna lu kwalulele lipilu za luna kwa tuto ya bumulimu

[Siswaniso se si fa likepe 27]

Busepahali bwa Jobo ne bu filwe mupuzo ka ku kutiswa kwa hae kwa bupilo bo bu tezi, bwa tabo ni balatiwa