TUTO 48

Mukete Hande Balikani

Yehatisizwe

Balikani baluna babatuna balutusanga kuba ni tabo, mi hape balutiisanga haluli mwa miinelo yetaata. Bibele ilulemusa kuli haki mutu kaufela yakona kuba mulikani yomunde. Kacwalo, ki lika mañi zekona kumitusa kuketa hande balikani? Halunyakisiseñi lipuzo zetatama.

1. Balikani bamina bakona kutahisa kuli mube mutu yacwañi?

Hañata luezanga lika zebaeza batu bolutanda hahulu nako ni bona. Lika zeo likona kuba zende kamba zemaswe, kusina taba kuli lutandanga nako ni bona fa Intaneti kamba kwa sibaka sesiñwi. Kona libaka Bibele haibulela kuli: “Yazamaya ni bababutali ukaba yabutali, kono yaswalisana ni litoto [babaeza zasalati Jehova] ukakena mwa butata.” (Liproverbia 13:20) Balikani bamina babalata Jehova ni kumulapela baka mitusa kusutelela ku Jehova ni kumitusa kuezanga likatulo zende mwa bupilo. Kono kuba ni balikani babasa lapeli Jehova kukona kutahisa kuli lusike lwaba ni silikani sesinde ni Jehova. Kona libaka Bibele hai lubulelela kuli lukete hande balikani! Kuba ni balikani babalata Mulimu, kuka lutusa ni kutusa balikani baluna. Mi kuzwa fo, kuka lutusa ‘kuzwelapili kususuezana ni kutiisana.’—1 Matesalonika 5:11.

2. Jehova ukona kuikutwa cwañi ka za balikani bemuketa?

Jehova uketanga balikani bahae ka tokomelo. “Uitamanga bulikani bobutuna ni babalukile.” (Liproverbia 3:32) Jehova ukona kuikutwa cwañi haiba luketa balikani babasa mulati? Hana kutabela luli! (Mubale Jakobo 4:4.) Kono haiba luambuka kuba ni balikani babamaswe ni kuketa balikani babande, lukatabisa Jehova ni kuba balikani bahae.—Samu 15:1-4.

MUBATISISE

Munyakisise libaka haluswanela kuketanga hande balikani, mi mubone momukona kutusezwa mwa bupilo haiba mueza cwalo.

3. Muambuke kuba ni balikani babamaswe

Haluswaneli kueza silikani ni batu babasa ezi zalata Mulimu ni babasa lateleli likuka zahae. Mubuhe VIDIO, mi kihona mukanyakisisa lipuzo zelatelela.

VIDIO: Muitute Mwa Kuambukela Liango Zemaswe (6:17)

Ki lika mañi zekona kutahisa kuli luikenye mwa liango zemaswe lusalemuhi?

Mubale 1 Makorinte 15:33, mi kihona mukanyakisisa lipuzo zelatelela:

Mulikani yamaswe ki mutu yacwañi? Ki kabakalañi hamubulela cwalo?

Mubale Samu 119:63, mi kihona mukanyakisisa puzo yelatelela:

Mulikanaa mina uswanela kuba mutu yacwañi?

Miselo ye mwa mukeke. Linzi lilula fa muselo obolile wo mi muselo wo utahiseza miselo yemiñwi kusinyeha. — Muselo ulimuñwi obolile ukona kubolisa miselo yemiñwi kaufela. Mulikani alimuñwi yamaswe ukona kutahisa kuli mube mutu yacwañi?

4. Lwakona kueza silikani ni batu babashutana-shutana

Bibele ilutaluseza za silikani sa Davida ni Jonatani, ili baana bane bapilile mwa linako za Maisilaele. Nihaike kuli Jonatani neli yomuhulu hahulu ku Davida mi neli mwanaa mulena, Jonatani naali mulikanaa Davida yomutuna. Mubale 1 Samuele 18:1, mi kihona mukanyakisisa puzo yelatelela:

Ki kabakalañi halusa swaneli kuba feela ni balikani bolulikana ni bona kamba babanani mayemo aswana ni aluna?

Mubale Maroma 1:11, 12, mi kihona mukanyakisisa puzo yelatelela:

Balikani babalata Jehova bakona kususuezana cwañi?

Mwa vidio yelatelela, mubone mo muzwale yomuñwi yomunca naafumanezi mulikani yomuñwi. Mubuhe VIDIO, mi kihona mukanyakisisa lipuzo zelatelela.

VIDIO: Mwakona Kuba ni Balikani Babashutana-Shutana (5:06)

Ka kuya ka vidio yemubuhile, ki kabakalañi bashemi ba Akil hane basatabeli kuli aeze silikani ni banaakena ni bona sikolo?
Ki lika mañi zanaatabezi Akil kwa balikani bao kwa makalelo?
Ki lika mañi zanaaezize kuli asike aikutwanga bulutu?

5. Zekona kumitusa kufumana balikani babande

Munyakisise zekona kumitusa kufumana balikani ba niti ni zekona kumitusa kuba mulikani yomunde. Mubuhe VIDIO.

VIDIO: Mulikani wa Niti ki Mutu Yacwañi? (4:14)

Siswaniso sesibonisa vidio ya ‘Mulikani wa Niti ki Mutu Yacwañi?’ Mwanana yapotolohilwe ki balikani bahae ba lisimuluho zeshutana-shutana.

Mubale Liproverbia 18:24 ni 27:17, mi kihona mukanyakisisa lipuzo zelatelela:

Balikani ba niti batusananga cwañi?
Kana munani balikani ba niti? Haiba hamuna, ki lika mañi zemutokwa kueza kuli mube ni balikani babacwalo?

Mubale Mafilipi 2:4, mi kihona mukanyakisisa puzo yelatelela:

Kuli mube ni balikani babande, muswanela kuba batu babande. Mukona kueza cwañi cwalo?

Maswaniso: Musizana yasweli kupota-pota ni balikani bahae babalaalu. 1. Uambola ni yomuñwi wa bona fa foni. 2. Uambola ni mulikanaa hae yomuhulu kwa Ndu ya Mubuso. 3. Upotela yomuñwi wa balikani bahae yanani maswabi. — Kuli mube ni balikani babande, muswanela *kuba* mulikani yomunde

BABAÑWI BABULELANGA KULI: “Ku hande kuba ni balikani kusina taba kuli ki babande kamba ki babamaswe kufita kusaba ni balikani.”

Nemuka alaba cwañi mutu yabulela cwalo?

LITABA KA BUKUSWANI

Haluketa hande balikani, lutabisa Jehova mi hape kueza cwalo kwalutusa.

Mulundulule

Ki kabakalañi Jehova habata kuli lukete balikani babande?
Ki batu babacwañi belusa swaneli kueza silikani ni bona?
Ki lika mañi zeluswanela kueza kuli lube ni silikani sesinde ni batu babaswanela?

Mufelize kuituta tuto ye la:

Za Kueza

Muzibe batu babañata mwa puteho.

Zeñwi:

Your other goal

MUBONE LITABA ZEÑWI

Mubone mobakona kulutuseza balikani babande haluli mwa miinelo yetaata.

“Mutiise Silikani Samina ni Mizwale Bamina Pili Mafelelezo Asika Taha Kale” (Tawala ya Mulibeleli, November 2019)

Munyakisise zemukona kueza kuli mube ni balikani babande.

“Nikona Kuba Cwañi ni Balikani Babande?” (Questions Young People Ask—Answers That Work, Volyumu 1, kauhanyo 8)

Kana kulukile kuba ni balikani fa Intaneti?

Muitusise Hande Mawebusaiti A Kulumelana ka Ona Litaba (4:12)

Mwa likande lelinani toho ya taba yeli “Nenilakaza Hahulu Kuba ni bo Ndate,” mubone zenetusize muuna yomuñwi kuketa hande balikani.

“Bibele Yacincanga Bupilo Bwa Batu” (Tawala ya Mulibeleli, April-June, 2012)