Baana, Kana Mwa Ipeya Kwatasaa Kreste ya li Toho ya Mina?

“Toho ya muuna kaufela ki Kreste.”—1 MAKOR. 11:3.

 1. Ki nto mañi ye bonisa kuli Jehova ki Mulimu wa kozo?

LIÑOLO la Sinulo 4:11 li li: “Mulena ni Mulimu wa luna, ki Wena ya lukela ku fiwa kanya, ni likute, ni maata; kakuli ki Wena ya ezize linto kamukana, mi ha li li teñi, niha ne li bupilwe, ki ka ku lata kwa hao.” Bakeñisa kuli Jehova Mulimu na bupile linto kamukana, ki yena Muambakani ya Pahami mi u na ni maata fahalimu a linto kamukana za bupile. Jehova “hasi Mulimu wa mifilifili, kono ki wa kozo.” Taba yeo i iponelwa hande ka mwa beezi mangeloi a hae mwa litulo za ona.—1 Makor. 14:33; Isa. 6:1-3; Maheb. 12:22, 23.

2, 3. (a) Ki mañi wa pili ku bupiwa ki Jehova? (b) Situlo sa Mwana wa mweli si shutana cwañi ni sa Ndate?

² A si ka bupa kale nto ifi kamba ifi, Mulimu na li a nosi ka nako ye si na makalelo. Nto ya pili ya na bupile ki mutu wa moya ya bizwa “Linzwi” kakuli ne li yena Mubuleli wa Jehova. Linto ze ñwi kaufela ne li tahile ka yena Linzwi yo. Hasamulaho, Linzwi na tile fa lifasi sina mutu ya petehile mi na tilo bizwa Jesu Kreste.—Mu bale Joani 1:1-3, 14.a

³ Mañolo a bulelañi ka za mo si shutanela situlo sa Mulimu ni sa Mwanaa hae wa mweli? Ka susumezo ya moya, muapositola Paulusi na ñozi kuli: “Ni lata kuli mu zibe se: Toho ya muuna kaufela ki Kreste; mi muuna ki toho ya musali; mi Mulimu ki toho ya Kreste.” (1 Makor. 11:3) Kreste u mwatasaa Ndatahe ya li Toho ya hae. Kuli ku be ni kozo ni kutwano mwahalaa libupiwa za Mulimu, ku swanela ku ba ni ba ba li litoho ni ba ba swanela ku ipeya kwatasaa bona. Niheba yena yo “linto kamukana li ezizwe ka yena” u swanela ku ipeya kwatasaa Mulimu.—Makolo. 1:16.

4, 5. Jesu na ikutwile cwañi ka za kuli Jehova ki yena Toho ya hae?

⁴ Jesu na ikutwile cwañi ka za taba ya ku ipeya kwatasaa Jehova ni ya ku taha fa lifasi? Mañolo a li: “Niha naa na ni sibupeho sa Mulimu, Jesu ha si ka li, ku likana ni Mulimu ki nto ya ka hanelela, kono a itoboha ku sa na li sona, ka ku nga sibupeho sa mutanga, ni ku ikeza ya swana sina batu; mi ha fumanwi a li sina mutu, a ikokobeza, a ipeya ku utwa ku isa kwa lifu, mane lifu” la fa kota ya linyando.—Mafil. 2:5-8.

⁵ Kamita Jesu na lata ku eza tato ya Ndatahe ka buikokobezo. Na ize: “Ha ni koni ku eza se siñwi ili na: . . . katulo ya ka i lukile; kakuli ha ni ezi se si latwa ki na, kono ni eza se si latwa ki Ndate ya ni lumile.” (Joa. 5:30) Hape na ize: ‘Kamita ni eza ze tabisa Ndate.’ (Joa. 8:29) Mi kwa mafelelezo a bupilo bwa hae bwa fa lifasi, Jesu na lapezi cwana ku Ndatahe: “Ni ku lumbile mwa lifasi; ni felize musebezi o no ni file kuli ni u eze.” (Joa. 17:4) Kaniti luli, Jesu na lumela kuli Mulimu ki yena Toho ya hae.

Ku Ipeya Kwatasaa Ndate ku Tusa Mwana

 6. Jesu na bonisize tulemeno tufi to tunde?

⁶ Ha na li fa lifasi, Jesu na bonisize tulemeno to tunde to tuñata. Ka kañwi ka tulemeno to ne li lilato le lituna la na bonisize ku Ndatahe. Na ize: “Ni lata Ndate.” (Joa. 14:31) Hape na bonisize lilato le lituna kwa batu. (Mu bale Mateu 22:35-40.) Jesu na li ya musa mi na iyakatwa ba bañwi; na si ya buhali kamba ya hatelela. Na ize: “Mu tahe ku na mina kamukana ba ba katezi, ba ba imezwi, mi ni ka mi imulula. Mu itwese coko ya ka, mi mu itute ku na; kakuli ni na ni musa ni pilu ye bunolo, [mi] mu ka fumanela mioya ya mina pumulo. Kakuli coko ya ka i bubebe, mi mulwalo wa ka ha u na bukiti.” (Mat. 11:28-30) Batu kaufela ba ba swana sina lingu, sihulu be ne ba nyandiswa ni ku hatelelwa, ne ba tabezi hahulu Jesu kakuli na li mutu yo munde mi litaba za na ba luta ne li ba tiisa.

7, 8. Ka ku ya ka Mulao, musali ya na kula mweya na sa swaneli ku ezañi, kono Jesu na mu ezize cwañi?

⁷ Ha mu nyakisise mwa na ngela basali Jesu. Halaa linako ze felile, baana ba bañata ba nyandisize hahulu basali. Baeteleli ba bulapeli mwa Isilaele wa ikale ni bona ne ba nyandisanga maswe basali. Kono Jesu yena na kutekanga basali. Taba yeo i pakwa ki mwa na ezelize musali ya na kula mweya ka lilimo ze 12. Musali yo “na nyandile hahulu ha na nzaa alafwa ki liñaka” mi na sinyize liluwo la hae kaufela kuli a fole. Kono niha na ikatalize cwalo, “butuku bwa hae ne bu ekezehile.” Ka ku ya ka Mulao, na ngiwa ku ba ya si ka kena. Mutu ufi kamba ufi ya na ka mu swala ni yena na ka ba ya si ka kena.—Liv. 15:19, 25.

⁸ Musali yo ha na utwile kuli Jesu na sweli ku folisa bakuli, a ikenya mwahalaa silundwamanje se ne si latelela Jesu, inzaa li: “Kabe ni ka swala fa kubo ya hae feela, kabe na fola.” A swala Jesu, mi honafo feela a fola. Jesu na ziba kuli musali yo na sa swaneli ku mu swala fa siapalo sa hae. Kono nihakulicwalo, na si ka mu halifela. Na mu ezize ka musa. Na utwisisize mwa na ikutwela musali yo ya na kulile ka lilimo ze ñata mi na lemuhile kuli na tokwa hahulu tuso. Jesu a mu bulela ka sishemo kuli: “Mwanaka, tumelo ya hao i ku pilisize; u ye ka kozo, mi u folelele luli kwa butuku bwa hao.”—Mare. 5:25-34.

 9. Jesu na ezize cwañi, balutiwa ba hae ha ne ba likile ku hanisa banana ku taha ku yena?

⁹ Nihaiba banana ne ba ikutwanga hande ku ba ni Jesu. Zazi le liñwi batu ha ne ba tisize bana ba banyinyani ku yena, balutiwa ba hae ne ba omanyize batu bao. Ku bonahala kuli ne ba nahana kuli Jesu na sa lati ku katazwa ki banana. Kono Jesu yena na sa nahani cwalo. Mañolo a lu taluseza kuli: “Jesu ha bona cwalo, a [nyemela balutiwa], mi a li ku bona: Mu tuhele bana ba banyinyani ba tahe ku na, mi mu si ke mwa ba hanisa; kakuli mubuso wa Mulimu ki wa ba ba swana sina bona.” Hape a “ba nga mwa mazoho a hae, mi a ba fuyola ka ku beya mazoho a hae fahalimu a bona.” Jesu na tuhelezi banana ku taha ku yena mi na ba amuhezi hande.—Mare. 10:13-16.

10. Jesu na konile cwañi ku ba ni tulemeno twa na bonisize ha na li fa lifasi?

¹⁰ Jesu na konile cwañi ku ba ni tulemeno twa na bonisize ha na li fa lifasi? A si ka taha kale fa lifasi ku to pila sina mutu, Jesu na talimisisanga mwa na sebeleza Ndatahe wa kwa lihalimu ka nako ye telele-telele mi na itutile linzila za Hae. (Mu bale Liproverbia 8:22, 23, 30.) Ha na li kwa lihalimu, na iponezi nzila ye lilato ya busa Jehova ka yona pupo ya Hae kamukana mi na mu likanyisize. Kana Jesu na ka kona ku eza cwalo kambe na si ya ipeya kwatasi? Na tabela ku ipeya kwatasaa Ndatahe, mi Jehova na tabezi ku ba ni Mwana ya cwalo ya ipeya ku utwa. Ha na li fa lifasi, Jesu na likanyisize hande tulemeno twa Ndatahe wa kwa lihalimu. Ki tohonolo kwa butuna ye lu na ni yona ya ku ipeya kwatasaa Kreste ya ketilwe ki Mulimu ku ba Mulena wa Mubuso wa kwa lihalimu!

Mu Likanyise Tulemeno Twa Kreste

11. (a) Ki mañi ye lu swanela ku ikataza ku likanyisa? (b) Ki kabakalañi baana ba mwa puteho sihulu ha ba swanela ku ikataza ku likanyisa Jesu?

¹¹ Bote mwa puteho ya Sikreste ba swanela ku zwelapili ku ikataza ku likanyisa tulemeno twa Kreste, mi baana sihulu ki bona ba ba swanela ku eza cwalo. Mwa taba ye, lu boni kuli Bibele i bulela cwana: “Toho ya muuna kaufela ki Kreste.” Sina Kreste ha likanyisize Toho ya hae, yena Mulimu wa niti, baana ba Sikreste ni bona ba swanela ku ikataza ku likanyisa toho ya bona—yena Kreste. Ha na bile Mukreste, muapositola Paulusi na ezize hona cwalo. Na susuelize Bakreste ka yena kuli: “Mu be ba ba ni likanyisa, sina na, ha ni li ya likanyisa Kreste.” (1 Makor. 11:1) Mi muapositola Pitrosi na ize: “Ki sona se mu bizelizwe; kakuli Kreste ni yena u utwile butuku bakeñisa mina, a mi siyela mutala, kuli mu hate mwa na hatile.” (1 Pit. 2:21) Ku na ni libaka le liñwi hape baana ha ba swanela hahulu ku mamela kelezo ya ku likanyisa Kreste. Ki bona ba ba banga maeluda ni batanga ba bukombwa. Sina Jesu ha na fumani tabo mwa ku likanyisa Jehova, baana ba Sikreste ni bona ba swanela ku fumana tabo mwa ku likanyisa Kreste ni tulemeno twa hae.

12, 13. Maeluda ba swanela ku eza cwañi lingu ze ba filwe ku babalela?

¹² Maeluda ba mwa puteho ya Sikreste ba swanela ku ituta ku likanyisa Kreste. Pitrosi na elelize baana-bahulu, kamba maeluda, kuli: “Mu lise mutapi wa Mulimu o ku mina, isi ka ku hapelezwa, kono ibe ka ku lata ku ezeza Mulimu; isi kabakala bufumu bo bu maswe, kono ibe ka pilu ye lata; isi ka ku busa mitapi ya mina ka taata, kono ka ku ezeza mutapi mutala.” (1 Pit. 5:1-3) Maeluda ba Sikreste ha ba swaneli ku hatelela mutapi, ku u busa, kamba ku sa u eza ka musa. Kono ka ku likanyisa Kreste, ba ikataza ku eza lingu ka lilato, ka musa, ni ka buikokobezo, ili ze ba filwe ku babalela.

¹³ Baana ba ba etelela mwa puteho ki batu ba ba si ka peteha, mi kamita ba swanela ku lemuha taba yeo. (Maro. 3:23) Kacwalo, ba swanela ku lata ku ituta ka za Jesu ni ku likanyisa lilato la hae. Ba swanela ku nahanisisa mo Mulimu ni Kreste ba ezeza batu ni ku lika ku ba likanyisa. Pitrosi u lu eleza kuli: “Mu ipeye ba bañwi kwatasaa ba bañwi kaufelaa mina, mi mu apale buikokobezo; kakuli Mulimu u hanela ba ba ikuhumusa, mi u shemuba ba ba ishuwa.”—1 Pit. 5:5.

14. Maeluda ba swanela ku bonisa cwañi likute ku ba bañwi?

¹⁴ Ha ba sebelisana ni mutapi wa Mulimu, baana ba ba filwe buikalabelo mwa puteho ba swanela ku bonisa tulemeno to tunde. Liñolo la Maroma 12:10 li li: “Mu latane ba bañwi ni ba bañwi ka lilato la mutu ni munyanaa hae, inze mu beyana kwapili ka ku fanana likute.” Maeluda ni batanga ba bukombwa ba kutekanga ba bañwi. Sina mo ba swanela ku ezeza Bakreste kaufela, baana bao ba swanela ‘ku sa eza se siñwi ka kañi, kamba ka buipabazo kwa feela; kono ka buikokobezo mutu ni mutu ku bona a hupule kuli ba bañwi ba mu fita.’ (Mafil. 2:3) Kaniti, ba ba etelela ba swanela ku bona ba bañwi kuli ba ba fita. Ha ba eza cwalo, baana ba ba filwe buikalabelo ba mamela kelezo ya Paulusi, ye li: “Cwale luna ba ba na ni maata, lu lukela ku lwala mifokolo ya ba ba fokola, isi ku yema fa se si lu tabisa luna feela. Mutu ni mutu ku luna a tabise mwanahabo ka ku mu batela ze nde, ze ka mu yahisa. Kakuli ni yena Kreste ha si ka bata se si mu tabisa ili yena.”—Maro. 15:1-3.

Mu Kuteke Basali ba Mina

15. Baana ba swanela ku eza cwañi basali ba bona?

¹⁵ Cwale ha mu nyakisise kelezo ya na file Pitrosi kwa baana ba ba nyezi. Na ñozi kuli: “Mina baana, mu pilisane ni [basali ba mina] ka kutwisiso, kakuli musali ki piza ye fokola ku fita mina; mu ba kuteke.” (1 Pit. 3:7) Haiba mwa kuteka mutu yo muñwi, mu ka isa pilu kwa mihupulo ya hae, ni kwa lika za tokwa kamba za bata, mi mu ka eza za lata kuli li eziwe haiba ha ku na libaka le liñwi la butokwa la ku sa ezeza cwalo. Muuna u swanela ku kuteka musalaa hae cwalo.

16. Ki ifi temuso ye li fa Linzwi la Mulimu kwa baana ka za ku kuteka basali ba bona?

¹⁶ Ha na bulelela baana ku kuteka basali ba bona, Pitrosi na ba file temuso ye: “Kuli milapelo ya mina isike ya paleliswa ki se siñwi.” (1 Pit. 3:7) Taba yeo i bonisa fo ku sweu mo Jehova a ngela muuna ya sa kuteki musalaa hae. Haiba muuna a palelwa ku kuteka musalaa hae, litapelo za hae ha li na ku utwiwa. Fahalimu a seo, haiba muuna a kuteka musalaa hae, sibeli sa bona ba ka ba ni tabo ye tuna ni ku fita mi ba ka swalisana hande.

17. Muuna u swanela ku lata cwañi musalaa hae?

¹⁷ Linzwi la Mulimu hape li eleza baana ku lata basali ba bona. Li li: “Baana ba swanezi ku lata basali ba bona sina mubili wa bona. . . . Kakuli haisali, ha ku na mutu ya kile a toya nama ya hae; kono wa i fepa, wa i babalela sina Kreste mwa ezeza Keleke . . . Yo muñwi ni yo muñwi ku mina a late musalaa hae mwa itatela.” (Maef. 5:28, 29, 33) Baana ba swanela ku lata cwañi basali ba bona? Paulusi na ñozi kuli: “Baana, mu late basali ba mina, sina Kreste mwa latezi Keleke mi a itobohile bakeñisa yona.” (Maef. 5:25) Kacwalo, muuna u swanela ku itatela nihaiba ku shwela musalaa hae, sina Kreste ha na shwezi batu. Muuna wa Sikreste ha iseza musalaa hae pilu, ni ha mu eza ka musa ni ka lilato, ku ka ba bunolo ku musalaa hae ku ipeya kwatasaa hae.

18. Ki nto mañi ye ba kona ku fiwa baana ili ye kona ku ba tusa ku kuteka basali ba bona?

¹⁸ Kana ku taata kuli baana ba kuteke basali ba bona ka nzila yeo? Batili. Jehova na si ke a ba kupa ku eza nto ye ba sa koni. Hape, balapeli ba Jehova ba kona ku fiwa maata a matuna ka ku fitisisa, ona moya o kenile wa Mulimu. Jesu na ize: “Mbali mina ba ba na ni lunya, mu ziba ku fa bana ba mina lika ze nde, Ndate ya kwa lihalimu u ka mi fita hahulu mwa ku fa Moya o Kenile ku ba ba u kupa ku yena.” (Luka 11:13) Baana ba kona ku lapela ku Jehova kuli ka moya wa hae, a ba tuse ku eza hande ba bañwi, hamohocwalo ni basali ba bona.—Mu bale Likezo 5:32.

19. Lu ka nyakisisañi mwa taba ye tatama?

¹⁹ Kaniti, baana ba na ni buikalabelo bo butuna bwa ku ituta ku ipeya kwatasaa Kreste ni ku likanyisa mwa itusiseza maata a hae. Kono cwale basali bo, sihulu basali ba ba nyezwi? Mwa taba ye tatama, lu ka nyakisisa mo basali ba swanela ku ngela musebezi o ba eza mwa tukiso ya Jehova.

[Litaluso za kwatasi]

• Ki tulemeno tufi twa Jesu to lu swanela ku likanyisa?

• Maeluda ba swanela ku eza cwañi lingu?

• Muuna u swanela ku eza cwañi musalaa hae?x

[Lipuzo za Tuto]

[Maswaniso a fa likepe 10]

Mu likanyise Jesu ka ku kuteka ba bañwi