Lu Ngongwele kwa Tumelo ya Luna ya Butokwa Hahulu!

“Ni ñolela ba ba amuhezi tumelo i li ñwi ni ya luna kwa butokwa.”—2 PITROSI 1:1.

 1. Ki sifi seo Jesu n’a bulezi ka ku fa temuso kwa baapositola ba hae, kono Pitrosi yena n’a inunekile cwañi?

MANZIBWANA a lizazi pili Jesu a si ka shwa kale, n’a bulezi kuli baapositola ba hae kaufela ne ba ka mu siloka. A li muñwi ku bona, Pitrosi, a inuneka a li: “Niha ba ka sitatala kaufela kabakala hao, na, ha ni na ku sitatala ni hanyinyani!” (Mateu 26:33, litaku li siyamisizwe ki luna) Kono Jesu n’a ziba kuli ne ku si ke kwa ba cwalo. Ki ka lona libaka leo ha n’a bulelezi Pitrosi hona ka nako yeo kuli: “Ni ku lapelezi kuli tumelo ya hao i si ke ya fela. Mi wena ha u sikuluhile, u tiise banabahenu.”—Luka 22:32.

 2. Pitrosi ni ha n’a na ni buikolwiso bo bu tulile tikanyo, ki lifi za n’a ezize ze n’e bonisize kuli tumelo ya hae ne i fokola?

² Pitrosi, ya n’a bile ni buikolwiso bo bu tulile tikanyo ka za tumelo ya hae, n’a latuzi Jesu bona busihu bo bu swana bo. Halalu a latula nihaiba kuli n’a ziba Kreste! (Mateu 26:69-75) Ha s’a “sikuluhile,” manzwi a Mulen’a hae, a’ li “u tiise banabahenu,” a swanela ku ba a n’a kuta-kutezi ku utwahala hahulu mwa lizebe za hae. Bupilo bwa Pitrosi ku zwa honafo ne bu amilwe hahulu ki yona taelo yeo, sina ka mo bu boniseza bupaki bwa mañolo a mabeli a n’a ñozi, ili a bulukilwe mwa Bibele.

Libaka Pitrosi Ha N’a Ñozi Mañolo A Hae

 3. Ki kabakalañi Pitrosi ha n’a ñozi liñolo la hae la pili?

³ Ibata i ba lilimo ze 30 hasamulaho wa lifu la Jesu, Pitrosi n’a ñozi liñolo la hae la pili, mi n’a ñolezi mizwale ba hae ba mwa Ponto, Galatia, Kapadosia, Asia, ni Bitinia, libaka ze eza mutulo ni wiko wa naha ya Turkey kacenu. (1 Pitrosi 1:1) Majuda, ili bao ba bañwi ku bona ne ba kana ba bile Bakreste ka Pentekonta ya 33 C.E., fo ku si na ku kakanya ne ba li mwahal’a bao Pitrosi n’a ñolezi. (Likezo 2:1, 7-9) Buñata ne li Balicaba be ne ba talimani ni miliko ye mituna ku zwelela kwa bahanyezi. (1 Pitrosi 1:6, 7; 2:12, 19, 20; 3:13-17; 4:12-14) Kacwalo, Pitrosi n’a ñolezi bona mizwale ba ku ba susueza. Mulelo wa hae ne li ku ba tusa ku amuhela “mupuzo wa tumelo, ili ku piliswa kwa mioya ya [bona].” Kacwalo mwa kelezo ya hae ya kwa mafelelezo, n’a bulezi kuli: “Mu hane ku [Diabulosi] ka ku tiya mwa tumelo.”—1 Pitrosi 1:9; 5:8-10.

 4. Ki kabakalañi Pitrosi ha n’a ñozi liñolo la hae la bubeli?

⁴ Hasamulaho, Pitrosi n’a ñolezi bona Bakreste ba liñolo la bubeli. (2 Pitrosi 3:1) Kabakalañi? Kakuli ne ku na ni lubeta lo lutuna ni ku fita. Batu ba muzamao o maswe ne ba ka tisa mizamao ya bona ye silafaza mwahal’a balumeli mi ne ba ka yembulula ba bañwi ku bona! (2 Pitrosi 2:1-3) Fahalimu a zeo, Pitrosi n’a lemusize ka za basheununi. N’a ñozi mwa liñolo la hae la pili kuli “mafelelezo a linto kamukana a fakaufi,” mi cwale ku bonahala kuli ba bañwi ne ba sheununa muhupulo o cwalo. (1 Pitrosi 4:7; 2 Pitrosi 3:3, 4) Ha lu nyakisiseni liñolo la Pitrosi la bubeli mi lu bone mo ne li tiiselize mizwale kuli ba zwelepili ku tiya mwa tumelo. Mwa taba ye ya pili, lu ka nyakisisa 2 Pitrosi kauhanyo ya 1.

Mulelo wa Kauhanyo 1

 5. Pitrosi u lukiseza cwañi babali ba hae nzila ya ku ambolisana ka za butata?

⁵ Pitrosi ha matukeli mwa ku kala ku talima ka za butata bo butuna. Kono u lukisa nzila ya ku ambolisana bona butata bo ka ku hulisa buitebuho bwa babali ba hae ku seo ne ba amuhezi muta ba ba Bakreste. U ba hupulisa ka za lisepiso za Mulimu ze nde ni ka za busepahali bwa bupolofita bwa Bibele. U eza se ka ku talusa ka za ku fetuha, ili pono ya Kreste mwa m’ata a Mubuso yeo n’a bile ni yona ka butu.—Mateu 17:1-8; 2 Pitrosi 1:3, 4, 11, 16-21.

 6, 7. (a) Ki sifi seo lu kona ku ituta kwa mukalisezo wa liñolo la Pitrosi? (b) Ki ku eza buitumelelo bo bu cwañi ko ku kana kwa tusa fokuñwi haiba lu fa kelezo?

⁶ Kana ku na ni se lu kona ku ituta kwa mukalisezo wa taba wa Pitrosi? Kana kelezo ha i amuhelwangi hande haiba pili lu lundulula ni bateelezi likalulo za sepo ye tuna ya Mubuso yeo kaufel’a luna lu na ni yona? Mi ku cwañi ka za ku itusisa ze bonwi za ka butu? Ku kana kwa ba kuli, hasamulaho wa lifu la Jesu, Pitrosi hañata n’a kandekanga ka za ku bona pono yeo ya Kreste mwa kanya ya Mubuso.—Mateu 17:9.

⁷ Mu hupule, hape, kuli ka mo ku kona ku bela kaufela ka nako yeo Pitrosi n’a ñola liñolo la hae la bubeli, litaba za Evangeli za Mateu ni liñolo la Paulusi kwa Magalata ne se li hasanyizwe ka buñata. Kacwalo bufokoli bwa Pitrosi bwa butu ni muinelo wa tumelo ya hae li kana za ba ze n’e se li zibahala hande kwa batu ba mwa linako za n’a pila ku zona. (Mateu 16:21-23; Magalata 2:11-14) Nihakulicwalo, nto ye ne i si ka mu palelwisa ku ba ya lukuluhile kwa ku bulela. Kaniti ki nto ye ne i kana i hohile ni ku fita mamelelo ya ba ne ba ziba ka za bufokoli bwa bona. Kacwalo, ha lu tusa ba ba mwa butata, kana ne ku si ke kwa ba ko ku buanyu ku itumelela kuli ni luna lwa fosanga?—Maroma 3:23; Magalata 6:1.

Tumeliso ye Tiisa

 8. Pitrosi n’a kana a itusisize linzwi la “tumelo” ka kutwisiso ifi?

⁸ Cwale ha mu nyakisise tumeliso ya Pitrosi. Isali honafo u ama fa taba ya tumelo, ni ku ama kwa babali ba hae ku ba “ba ba amuhezi tumelo i li ñwi ni ya luna kwa butokwa.” (2 Pitrosi 1:1) Pulelo ya “tumelo” fa i kana ya talusa “susuezo ye tiile” mi i ama kwa sikutu sa litumelo kamba lituto za Sikreste, ze biziwanga fokuñwi mwa Mañolo kuli ki “niti.” (Magalata 5:7; 2 Pitrosi 2:2; 2 Joani 1) Linzwi la “tumelo” hañata li itusiswanga ka mukwa wo ku fita ka mukwa wa ka nañungelele wa ku sepa kamba ku ikolwisa ku mutu kamba sika se siñwi.—Likezo 6:7; 2 Makorinte 13:5; Magalata 6:10; Maefese 4:5; Juda 3.

 9. Ki kabakalañi tumeliso ya Pitrosi ha i lukela ku ba ye ne i utwahalile ku ba ye mufutumala sihulu ku Balicaba?

⁹ Tumeliso ya Pitrosi i lukela ku ba ye ne i utwahalile ku ba ye mufutumala sihulu kwa babali ba Balicaba. Majuda ne ba si na swalisano ni Balicaba, mi mane ne ba ba shendaula, mi ne ku na ni saluluti sa Balicaba mwahal’a Majuda ba ne ba bile Bakreste. (Luka 10:29-37; Joani 4:9; Likezo 10:28) Niteñi, Pitrosi, Mujuda ka sipepo ni muapositola wa Jesu Kreste, n’a bulezi kuli babali ba hae—Majuda ni Balicaba—ne ba na ni tumelo ye swana mi ne ba ikola tohonolo ye likana ni ya hae.

10. Ki lituto mañi zeo lu kona ku ituta ku zwelela kwa tumeliso ya Pitrosi?

¹⁰ Ha mu nahane lituto ze nde zeo tumeliso ya Pitrosi i lu luta kacenu. Mulimu h’a na ketululo; h’a ngi mushobo u li muñwi wa batu kamba naha i liñwi ku ba ya butokwa ku fita ye ñwi. (Likezo 10:34, 35; 11:1, 17; 15:3-9) Sina ka mwa n’a lutezi yena Jesu ka sibili, Bakreste kaufela ki mizwale, mi ha ku na ni yo mukana ku luna ya lukela ku ikutwa ku ba yo mutuna. Ku tuha fo, tumeliso ya Pitrosi i koñomeka kuli luli lu mwa sizwale sa lifasi kaufela, ba ba na ni ‘tumelo i liñwi kwa butokwa’ ni yeo Pitrosi ni baapositola sina yena ne ba na ni yona.—Mateu 23:8; 1 Pitrosi 5:9.

Zibo ni Lisepiso za Mulimu

11. Hasamulaho wa ku lumelisa, ki lika mañi za butokwa zeo Pitrosi a koñomeka?

¹¹ Hasamulaho wa ku lumelisa, Pitrosi u ñola kuli: “Mu atisizwe sishemo ni kozo.” Lu ka atisezwa cwañi sishemo ni kozo? “[Ka] zibo ya ku ziba Mulimu, ni Jesu Kreste Mulen’a luna,” ki mwa alabela Pitrosi. Cwale u bulela kuli: “Mata a hae a bumulimu, [a] lu file ze tokwahala kaufela za bupilo ni za bulumeli.” Kono zona lika ze butokwa luli ze lu li amuhela cwañi? “Kabakala ku mu ziba Yena ya lu bizize ka kanya ni ka mata a hae.” Kacwalo Pitrosi u koñomeka habeli kuli zibo ye nepahezi ya Mulimu ni Mwan’a hae ki ya butokwa luli.—2 Pitrosi 1:2, 3; Joani 17:3.

12. (a) Ki kabakalañi Pitrosi ha koñomeka tokwahalo ya zibo ye nepahezi? (b) Kuli lu ikole lisepiso za Mulimu, ki sifi seo lu lukela pili ku ba lu ezize?

¹² “Baluti ba buhata” bao Pitrosi a fa temuso ka za bona mwa kauhanyo ya 2 ba itusisa “manzwi a butali” ili ku puma Bakreste. Ka nzila yeo ba lika ku ba pepeza ni ku ba kutiseza kwa mizamao ye maswe ili yeo ne ba lukuluzwi ku yona. Ba ba ka ituhelela ku pepezwa mwa ku pumiwa ko ku cwalo hamulaho wa ku lukululwa ka ‘zibo ye nepahezi ya Mulena ni Mupulusi wa luna Jesu Kreste’ ba ka welwa ki ziyezi ye tuna luli. (2 Pitrosi 2:1-3, 20) Ka mo ku bonahalela ka mulelo wa ku ambola ka za bona butata bo hasamulaho, Pitrosi u koñomeka isali kwa makalelo a liñolo la hae tuso ya ku ba ni zibo ye nepahezi mwa ku buluka mayemo a kenile ku Mulimu. Pitrosi u bonisa kuli Mulimu u lu file “lisepiso ze tuna luli ni za butokwa, kuli ka zona lu fumane kabelo ku s’a li sona Mulimu.” Niteñi, kuli lu ikole zona lisepiso ze, ili ze li kalulo ye ñwi ya butokwa kwa neku la tumelo ya luna, Pitrosi u bulela kuli, lu swanela pili ku ba ba ba ‘bandukile kwa ku bola ko ku li teñi mwa lifasi ka litakazo.’—2 Pitrosi 1:4.

13. Ki kwa sika mañi ko Bakreste ba ba tozizwe ni “lingu ze ñwi” ba tukufalelwa ku ngongwela?

¹³ M’u nga cwañi lisepiso za Mulimu? Kana ki ka nzila yeo bomasiyaleti ba ba tozizwe ba Bakreste ba l’i nga? Ka 1991, Fredreck Franz, ya na li prezidenti wa Watch Tower Bible and Tract Society ka nako yeo, ili ya n’a ndongwami bukombwa bwa nako ye tezi ka lilimo ze fitelela 75, n’a kusufalize cwana maikuto a bao ba ba na ni sepo ya ku busa ni Kreste: “Lu ngongwela mane ku to fita ni ku yona hora ye, mi lu ka zwelapili ku ngongwela ku fitela Mulimu a bonisa luli kuli ki ya buniti mwa ‘lisepiso za hae ze butokwa ni ze nde luli.’” Muzwale Franz n’a zwezipili ku ba ni buikolwiso mwa sepiso ya Mulimu ya zuho ya kwa lihalimu, mi n’a ngongwezi kwa tumelo ku fitela lifu la hae fa lilimo ze 99 za buhulu. (1 Makorinte 15:42-44; Mafilipi 3:13, 14; 2 Timotea 2:10-12) Ka nzila ye swana, bolule-lule ba batu ba sweli ku ngongwela kwa tumelo, ka ku beya mamelelo ya bona kwa sepiso ya Mulimu ya paradaisi ya lifasi ili m’o batu ba ka pila ku ya ku ile mwa tabo. Kana mu ba bañwi ba ba ba cwalo?—Luka 23:43; 2 Pitrosi 3:13; Sinulo 21:3, 4.

Muhato ka za Lisepiso za Mulimu

14. Ki kabakalañi Pitrosi ha beya m’ata ku ba kona kalemeno ka pili ka ku ekeza kwa tumelo?

¹⁴ Kana lu ba ba na ni buitumelo ku Mulimu ka za seo a sepisize? Haiba ku cwalo, Pitrosi u bonisa kuli lu lukela ku bonisa cwalo. “Kabakala zeo” (kabakala kuli Mulimu u lu file lisepiso ze butokwa luli), lu lukela ku lika ka mo lu konela kaufela k’u nga muhato. Ha lu koni ku kolwa ka ku ba fela mwa tumelo kamba ka ku ziba fela niti ya Bibele. Fo ha ku si ka likana! Mwendi mwa mazazi a Pitrosi ba bañwi mwa liputeho ne ba ambolanga hahulu ka za tumelo kono ne ba ikenyize mwa muzamao o maswe. Mikwa ya bona ne i tokwa ku ba ni mata a bunde, kacwalo Pitrosi u eleza kuli: “Kwa tumelo ya mina mu ekeze mata.”—2 Pitrosi 1:5; Jakobo 2:14-17.

15. (a) Ki kabakalañi zibo ha i kolohanyizwe hasamulaho wa m’ata ku ba kalemeno ka ka swanela ku ekeziwa kwa tumelo? (b) Ki tulemeno tufi to tuñwi to tu ka lu bakanyeza ku ngongwela kwa tumelo?

¹⁵ Hasamulaho wa ku bulela ka za m’ata, Pitrosi u kolohanya tulemeno to tuñwi to tu silezi to tu lukela ku ekeziwa kwa tumelo ya luna. Kaufel’a tona to twa tokwahala kuli lu “tiye mwa tumelo.” (1 Makorinte 16:13) Ka libaka la kuli bakwenuheli ne ba ‘kopamisa Mañolo’ ni ku hasanya ‘lituto za bupumi,’ Pitrosi ku zwa fo u kolohanya zibo ku ba ye butokwa hahulu, mi u bulela kuli: “Kwa mata mu ekeze zibo.” Mi u zwelapili kuli: “Kwa zibo mu ekeze buiswalo; kwa buiswalo mu ekeze ku itiisa; kwa ku itiisa mu ekeze bulapeli; kwa bulapeli mu ekeze ku latana, mane ku lata batu kaufela.”—2 Pitrosi 1:5-7; 2:12, 13; 3:16.

16. Kiñi se si ka ezahala haiba tulemeno t’o Pitrosi a kolohanya tu ekeziwa kwa tumelo, kono ki sifi se si ka ezahala haiba tu sa ekeziwi?

¹⁶ Ki sifi se si ka ezahala haiba zona lika ze supile ze li ekeziwa kwa tumelo ya luna? “Zeo ha li li teñi ku mina, mi ili ka buñata,” ka mwa alabela Pitrosi, “li ka mi tokwisa buzwa ni ku palelwa, mwa ku beya miselo mwa zibo [ye nepahezi, NW] ya Mulen’a luna Jesu Kreste.” (2 Pitrosi 1:8) Kwa lineku le liñwi, Pitrosi u bulela kuli: “Mutu ye linto zeo li tokwahala ku yena, ki sibofu, ki ya sa boneli kwahule; ki kale a libala ku keniswa kw’a n’a kenisizwe libi za hae za kale.” (2 Pitrosi 1:9) Mu lemuhe kuli Pitrosi u cinca ku itusisa kwa “mina” ni “luna” ni ku itusisa “mutu,” “yena,” ni “hae.” Nihaike kuli, ka bumai, ba bañwi ki libofu, ba ba libala, ni ba ba masila, ka sishemo Pitrosi ha talusi kuli mubali ki yo muñwi wa ba ba cwalo.—2 Pitrosi 2:2.

Ku Tiisa Mizwale ba Hae

17. Kiñi se ne si kana si tiselize Pitrosi ku eza kupo ye sishemo ya kuli “linto zeo” li eziwe?

¹⁷ Mwendi ka ku lemuha kuli sihulu ba banca ba kona ku pumiwa ka bunolo, Pitrosi ka sishemo u ba susueza kuli: “Mu tundamene hahulu mwa ku tiisa ku bizwa ni ku ketwa kwa mina; kakuli ha mu ka eza cwalo, ha mu na ku wa, ku ya ku ile.” (2 Pitrosi 1:10; 2:18) Bakreste ba ba tozizwe ba ba ekeza zona lika ze supile ze kwa tumelo ya bona ba ka ikola mupuzo o mutuna, sina ka mwa bulelela Pitrosi kuli: “Mu ka fiwa sibaka se situna luli sa ku y’o kena mwa mubuso o sa feli wa Jesu Kreste, Mulena ni Mupilisi wa luna.” (2 Pitrosi 1:11) “Lingu ze ñwi” ba ka amuhela sanda sa ku ya ku ile fa lifasi mubu mwa Mubuso wa Mulimu.—Joani 10:16; Mateu 25:33, 34.

18. Ki kabakalañi Pitrosi ha bata ku ‘hupulisa kamita’ mizwale ba hae?

¹⁸ Pitrosi ka buniti u bata kuli mizwale ba hae ba be ni ona mupuzo-tuna o cwalo wo. “Kabakaleo,” ka mwa ñolela, “ni ka na ni mi hupulisa litaba zeo kamita, niha mu se mu li ziba, mi mu tiile mwa niti.” (2 Pitrosi 1:12) Pitrosi fa u itusisa linzwi la Sigerike la ste·riʹzo, ili le li tolokilwe ku ba “mu tiile” kono ili le ne li tolokilwe kuli “u tiise” mwa kelezo ya Jesu kwamulaho ku Pitrosi ye li: “U tiise banabahenu.” (Luka 22:32) Ku itusiswa kwa lona linzwi leo ku kana kwa bonisa kuli Pitrosi wa hupula kelezo ye tiile ya n’a amuhezi ku zwelela ku Mulen’a hae. Pitrosi cwale u bulela kuli: “Ni hupula kuli ha ni nze ni pila mwa munganda wo [mubili wa butu], ni lukela ku mi zusa ka ku mi hupulisa litaba, inze ni ziba kuli ni na ni ka siya kapili munganda wo.”—2 Pitrosi 1:13, 14.

19. Ki lituso mañi zeo lu tokwa kacenu?

¹⁹ Nihaike kuli Pitrosi ka sishemo u bulela kuli babali ba hae ba “tiile mwa niti,” wa lemuha kuli tumelo ya bona i kona ku lwela. (1 Timotea 1:19) Ka ku ziba kuli u ka tuha a shwa, u tiisa mizwale ba hae ka ku bulela lika zeo ba ka kona ku hupula ka nako ya kwapili ilikuli ba zwelepili ku tiya kwa moya. (2 Pitrosi 1:15; 3:12, 13) Ka nzila ye swana, ni luna kacenu lu tokwa likupuliso za ka nako kaufela kuli lu zwelepili ku tiya mwa tumelo. Ku si na taba ni kuli lu bomañi kamba kuli se lu bile mwa niti ka nako ye kuma kai, ha lu koni ku tokolomoha ku bala Bibele kwa kamita, tuto ya ka butu, ni ku fumaneha kwa mikopano ya puteho. Ba bañwi ba fanga mabaka a ku sa fumaneha kwa mikopano, ka ku bulela kuli ba katezi hahulu kamba kuli mikopano ki ya ku kutela-kutela kamba ha i zamaiswi hande, kono Pitrosi n’a ziba bubebe ka b’o ufi kamba ufi wa luna a kona ku latehelwa ki tumelo haiba lu ba ni buikolwiso bo bu tulile tikanyo.—Mareka 14:66-72; 1 Makorinte 10:12; Maheberu 10:25.

Mutomo O Tiile wa Tumelo ya Luna

20, 21. Ku fetuha kwa Jesu ne ku tiisize cwañi tumelo ya Pitrosi ni ya babali ba liñolo la hae, ku kopanyeleza ni luna kacenu?

²⁰ Kana tumelo ya luna ka bunolo fela i tomile fa matangu a ezizwe ka butali? Pitrosi u alaba ka ku koñomeka kuli: “Ha lu si ka ya ka matangu a’ ezizwe ka butali, ha lu mi zibisize mata a Mulen’a luna Jesu Kreste ni ku taha kwa hae; kono ne lu iponezi butuna bwa hae ka meto a luna.” Pitrosi, Jakobo, ni Joani ne ba li ni Jesu ha ba bona pono ya hae mwa m’ata a Mubuso. Pitrosi u talusa kuli: “N’a filwe ki Mulimu Ndate likute ni kanya, nako y’a fitelwa ki linzwi le li zwa kwa kanya ye pahami, le li li: Yo ki mwan’a ka ya latwa, ye ni katelwa. Ni luna lu utwile linzwi leo ha li zwa kwa lihalimu, lu nze lu inzi ni yena fa lilundu le li kenile.”—2 Pitrosi 1:16-18

²¹ Pitrosi, Jakobo, ni Joani ha ba ba ni pono yeo, kaniti Mubuso ne u bile wa luli ku bona! “Hape,” ki mwa bulelela Pitrosi, “lu na ni linzwi la bapolofita le li tiile ku fita, le mu ka eza hande ku isa pilu ku lona.” Ee, babali ba liñolo la Pitrosi, ku kopanyeleza ni luna kacenu, ba na ni libaka le li tiile la ku isa pilu kwa bupolofita bwa Mubuso wa Mulimu. Ki ka nzila ifi yeo lu lukela ku isa pilu? Pitrosi u alaba kuli: “Inge kwa lambi ye lu bonisa mwa sibaka se si lififi, ku isa nako ya malungasiku, mi naleli ya lilungwe i bonahala mwa lipilu za mina.”—2 Pitrosi 1:19; Daniele 7:13, 14; Isaya 9:6, 7.

22. (a) Lipilu za luna li tokwa ku zwelapili ku tonela nto mañi? (b) Lu iseza cwañi pilu kwa linzwi la bupolofita?

²² Lipilu za luna ne li ka unsufala ha li sa monyehelwi ki linzwi la bupolofita. Kono ka ku li iseza pilu, lipilu za Bakreste li zwezipili ku ba ze tonela malungasiku muta “naleli ya lilungwe,” yena Jesu Kreste, a bonahala mwa kanya ya Mubuso. (Sinulo 22:16) Lu iseza cwañi pilu kwa linzwi la bupolofita kacenu? Ka tuto ya Bibele, ka ku itukiseza ni ku abana kwa mikopano, ni ka ku ‘tokomela zeo, ni ku li tukufalelwa.’ (1 Timotea 4:15) Kuli linzwi la bupolofita li be sina lambi ye bonisa mwa “sibaka se si lififi” (lipilu za luna), lu lukela ku li lumeleza ku lu ama ka butungi—litakazo, maikuto, lisusuezo, ni likonkwani za luna. Lu tokwa ku ba baituti ba Bibele, ka libaka la kuli Pitrosi u fita fa mafelelezo a kauhanyo 1 cwana: “Ha ku na bupolofita bo mutu a ka italuseza bona ili yena. Kakuli mwa mazazi a kale bupolofita ha bu si ka bonahala ka ku lata kwa mutu; kono batu ne ba bulela ka taelo ya Mulimu inze ba susumezwa ki moya o Kenile.”—2 Pitrosi 1:20, 21.

23. Ki sifi seo kauhanyo ya pili ya 2 Pitrosi i lukiselize babali?

²³ Mwa kauhanyo ya pili ya liñolo la hae la bubeli, Pitrosi n’a lu file susuezo ye tuna ya ku ngongwela kwa tumelo ya luna ya butokwa. Cwale se lu itukiselize ku nyakisisa litaba za butokwa ze latelela. Taba ye latelela i ka nyakisisa kauhanyo 2 ya 2 Pitrosi, ili mo muapositola a talima shemaeto ya likukuezo za muzamao o maswe o n’o keni mwa liputeho.

Kana Mwa Hupula?

◻ Ki kabakalañi Pitrosi ha koñomeka butokwa bwa zibo ye nepahezi?

◻ I kana ya ba libaka mañi m’ata ha kolohanyizwe ku ba kona kalemeno ka pili ka ka lukela ku ekezwa kwa tumelo?

◻ Ki kabakalañi Pitrosi ha bata kamita ku fa mizwale ba hae likupuliso?

◻ Ki mutomo mañi o tiile wo Pitrosi a fa kwa tumelo ya luna?

[Siswaniso se si fa likepe 16]

Bufokoli bwa Pitrosi ne bu si ka mu tahiseza ku fulalela tumelo ya hae