M’u Nge Muhato kwa Lisepiso za Mulimu ka ku Bonisa Tumelo

“Lu filwe [ki Jehova Mulimu] lisepiso ze tuna luli ni za butokwa.” —2 PITROSI 1:4.

 1. Ki sika mañi se si lu konisa ku bonisa tumelo ya niti?

JEHOVA u bata kuli lu bonise tumelo mwa lisepiso za hae. Niteñi, “tumelo hasi ya batu kamukana.” (2 Matesalonika 3:2) Kalemeno kao ki muselo wa moya o kenile, kamba m’ata a’ sebeza a Mulimu. (Magalata 5:22, 23) Kacwalo, ki bao fela ba ba etelelwa ki moya wa Jehova ba ba kona ku bonisa tumelo.

 2. Muapositola Paulusi u talusa cwañi “tumelo”?

² Kono tumelo ki nto mañi? Muapositola Paulusi u i biza “ku kolwa ze sa bonwi.” Bupaki bwa lika za luli zeo ze sa bonwi ki bo butuna hahulu kuli mane tumelo i likanyezwa ku bona. Tumelo hape i bulelwa ku ba “ku sepa ka ku tiya ze lu libelezi” kakuli ba ba na ni kalemeno kao ba na ni buikolwiso bo bu tiile bwa kuli lika kaufela ze sepisizwe ki Jehova Mulimu ki ze buniti hahulu kuli mane ki ze swana fela ni ze se li talelelizwe.—Maheberu 11:1.

Tumelo ni Lisepiso za Jehova

 3. Ki sifi seo Bakreste ba ba tozizwe ba ka ipumana ku sona ha ne ba ka bonisa tumelo?

³ Kuli lu tabise Jehova, lu lukela ku bonisa tumelo mwa lisepiso za hae. Muapositola Pitrosi n’a bonisize seo mwa liñolo la hae la bubeli le li buyelezwi, le ne li ñozwi i bata i’ba ka 64 C.E. N’a bonisize kuli haiba Bakreste ba ba tozizwe sina yena ba bonisa tumelo, ne ba ka bona talelezo ya “lisepiso [za Mulimu] ze tuna luli ni za butokwa.” Ka seo, ne ba ka “[fumana] kabelo ku s’a li sona Mulimu” ka ku ba bayoli hamoho ni Jesu Kreste mwa Mubuso wa kwa lihalimu. Ka tumelo ni tuso ya Jehova Mulimu, ba bandukile kwa ku ba mwa butanga kwa mikwa ni likezo ze silafezi za lifasi le. (2 Pitrosi 1:2-4) Mu nahane fela ka za seo! Ba ba bonisa tumelo ya niti ba ikola tukuluho ye swana yeo ye butokwa hahulu kacenu.

 4. Ki tulemeno tufi to lu swanela ku ekeza kwa tumelo ya luna?

⁴ Tumelo mwa lisepiso za Jehova ni buitumelo kwa neku la tukuluho ya luna ye lu filwe ki Mulimu li swanela ku lu susueza ku eza mo lu konela kaufela kuli lu be Bakreste ba ba fa mutala o munde. Pitrosi n’a bulezi kuli: “Mu ikataze hahulu kuli kwa tumelo ya mina mu ekeze [kalemeno ka bunde, NW]; kwa [kalemeno ka bunde, NW] mu ekeze zibo; Kwa zibo mu ekeze buiswalo; kwa buiswalo mu ekeze ku itiisa; kwa ku itiisa mu ekeze bulapeli; Kwa bulapeli mu ekeze ku latana, mane ku lata batu kaufela.” (2 Pitrosi 1:5-7) Pitrosi kacwalo u lu fa mukoloko o ne lu ka eza hande ku u peta mwa pilu. Ha lu talimisiseñi hande tona tulemeno t’o.

Miinelo ya Butokwa ya Tumelo

 5, 6. Kalemeno ka bunde ki nto mañi, mi lu kona ku ka ekeza cwañi kwa tumelo ya luna?

⁵ Pitrosi n’a bulezi kuli kalemeno ka bunde, zibo, buiswalo, ku itiisa, bulapeli, ku latana, ni lilato li na ni ku ekezwa ku ka kañwi ni ka kañwi mane ni kwa tumelo ya luna. Lu lukela ku sebeza ka t’ata kuli lu eze tulemeno t’o ku ba miinelo ye butokwa ya tumelo ya luna. Sina ka mutala, kalemeno ka bunde haki kalemeno kao lu kona ku bonisa ku si na tumelo. Muñoli wa madikishinari W. E. Vine u bonisa kuli kwa 2 Pitrosi 1:5, “kalemeno ka bunde ka ekeziwa sina kalemeno ka ka butokwa kwa neku la ku bonisa tumelo.” Ka kañwi ni ka kañwi ka tulemeno to tuñwi t’o Pitrosi a bulela ka swanela ku ba muinelo wa tumelo ya luna.

⁶ Pili, lu lukela ku ekeza kalemeno ka bunde kwa tumelo ya luna. Ku ba y’a na ni kalemeno ka bunde ku talusa ku eza se sinde mwa meto a Mulimu. Mwa sibaka sa linzwi la Sigerike le li tolokilwe fa sina “kalemeno ka bunde,” lihatiso ze ñwi li itusisa “bunde.” (New International Version; The Jerusalem Bible; Today’s English Version) Kalemeno ka bunde ka lu susueza ku pima ku eza bumaswe kamba ku holofaza batu sina luna. (Samu 97:10) Hape ka ka lu susueza ku eza ka bundume mwa ku eza bunde kwa neku la ku tuseha kwa ba bañwi kwa kwa moya, kwa mubili, ni mwa maikuto.

 7. Ki kabakalañi ha lu swanela ku ekeza zibo kwa tumelo ya luna ni kwa kalemeno ka luna ka bunde?

⁷ Ki kabakalañi Pitrosi h’a lu susueza ku ekeza zibo kwa tumelo ya luna ni kwa kalemeno ka luna ka bunde? Kihona, ha lu nze lu talimana ni lishemaeto ze nca kwa tumelo ya luna, lu tokwa zibo kuli lu ketahanye bunde kwa bumaswe. (Maheberu 5:14) Ka tuto ya Bibele ni yeloseli mwa ku sebelisa Linzwi la Mulimu ni mwa ku bonisa butali bo bu sebeza mwa bupilo bwa ka zazi ni zazi, lu zwisezapili zibo ya luna. Kacwalo, seo si lu konisa ku buluka tumelo ya luna ni ku zwelapili ku eza se si li se sinde ha lu li mwatas’a tiko.—Liproverbia 2:6-8; Jakobo 1:5-8.

 8. Buiswalo ki nto mañi, mi bu swalisani cwañi ni ku itiisa?

⁸ Kuli lu tusehe mwa ku talimana ni litiko ka tumelo, lu tokwa ku ekeza buiswalo kwa zibo ya luna. Linzwi la Sigerike la “buiswalo” li talusa buikoneli bwa ku ipeya mwatas’a tamaiso ya hae mutu ka sibili. Ona muselo wo wa moya wa Mulimu u lu tusa ku bonisa buikaniso mwa munahano, manzwi, ni muzamao. Ka ku tundamena mwa ku bonisa buiswalo, lu ekeza ku itiisa ku bona. Linzwi la Sigerike la “ku itiisa” li supa kwa ku ba ni mayemo a’ tiile a ka bundume, isiñi ku ituhelela fela ka ku ishonda kwa but’ata bo bu s’a konwi ku pimiwa. Ne li kabakala tabo ya n’a beezwi kwapili Jesu ha n’a itiisize fa kota ya linyando. (Maheberu 12:2) M’ata a’ filwe ki Mulimu a’ swalisanisizwe ni ku itiisa a fa kemelo kwa tumelo ya luna mi a lu tusa ku nyakalala mwa ñalelwa, ku hana tiko, ni ku pima ku sheng’oka ha lu li mwa nyandiso.—Mafilipi 4:13.

 9. (a) Bulapeli ki nto mañi? (b) Ki kabakalañi ha lu swanela ku ekeza ku latana fa bulapeli bwa luna? (c) Lu kona cwañi ku ekeza lilato fa ku latana kwa luna?

⁹ Kwa ku itiisa kwa luna lu lukela ku ekeza teñi bulapeli—likute, ku lapela, ni sebelezo ku Jehova. Tumelo ya luna y’a hula ha lu nze lu sebelisa bulapeli ni ku bona ka m’o Jehova a sebelisanela ni batu ba hae. Niteñi, kuli lu bonise mayemo a bumulimu, lu tokwa ku latana. Ka mo ku inezi fela mane, “ya toile mwanahabo ye a bona, h’a koni ku lata Mulimu ye a sa boni.” (1 Joani 4:20) Lipilu za luna li swanela ku lu susueza ku bonisa lilato la niti kwa batanga ba bañwi ba Jehova ni ku bata buiketo bwa bona ka linako kaufela. (Jakobo 2:14-17) Kono ki kabakalañi ha lu bulelezwi ku ekeza ku lata batu kaufela fa ku latana kwa luna? Ka mo ku bonahalela fela Pitrosi n’a talusa kuli lu lukela ku bonisa lilato la ku lata mufuta wa mutu kaufela, isiñi fela mizwale ba luna. Lilato leo li boniswa sihulu ka ku kutaza taba ye nde ni ku tusa batu kwa moya.—Mateu 24:14; 28:19, 20.

Ku Amiwa ko ku Fapahana

10. (a) Lu k’a nga cwañi muhato haiba kalemeno ka bunde, zibo, buiswalo, ku itiisa, bulapeli, ku latana, ni ku lata batu kaufela li ekezwa kwa tumelo ya luna? (b) Ki sifi se si ezahala haiba mutu ya ipala ku ba Mukreste a s’a bi ni tulemeno t’o?

¹⁰ Haiba lu ekeza kalemeno ka bunde, zibo, buiswalo, ku itiisa, bulapeli, ku latana, ni lilato kwa tumelo ya luna, lu ka nahana, ku bulela, ni k’u nga muhato ka linzila ze lumelelwa ki Mulimu. Ka ku fapahana, haiba mutu ya ipala ku ba Mukreste a palelwa ku bonisa tulemeno t’o, u fita fa ku ba sibofu kwa moya. U ba ‘ya s’a boni liseli’ le li zwa ku Mulimu mi u libala kuli u kenisizwe kwa libi za hae za kwamulaho. (2 Pitrosi 1:8-10; 2:20-22) Ni kamuta haike lu si ke lwa palelwa ka nzila yeo mi kacwalo lu latehelwe ki tumelo mwa lisepiso za Mulimu.

11. Ki sifi seo ka ku nepahala lu kona ku libelela ku ba ba tozizwe ba ba sepahala?

¹¹ Bakreste ba ba sepahala ba ba tozizwe ba na ni tumelo mwa lisepiso za Jehova mi ba itiisa kuli ba ikolwise ka za pizo ni ku ketiwa kwa bona. Ku si na taba ni ze sitatalisa lifi kamba lifi ze mwa nzila ya bona, lu kona ku libelela kuli ba ka bonisa tulemeno twa bumulimu. Ku ba ba tozizwe ba ba sepahala ‘ku ka fiwa sibaka se situna luli sa ku y’o kena mwa mubuso o sa feli wa Jesu Kreste’ ka zuho ya bona ya bupilo bwa kwa moya mwa lihalimu.—2 Pitrosi 1:11.

12. Lu na ni ku utwisisa cwañi manzwi a kwa 2 Pitrosi 1:12-15?

¹² Pitrosi n’a lemuhile kuli n’a ka shwa hañi-hañi, mi n’a libelela ku fumana zuho ya kamita kwa bupilo bwa mwa lihalimu. Kono ka nako kaufela yeo a li ya pila mwa “munganda wo”—ili mubili wa hae wa butu—n’a likile ku tiisa tumelo ya balumeli sina yena ni ku ba nyangumuna ka ku ba hupulisa tokwahalo ya ku lumelelwa kwa bumulimu. Hamulaho wa ku shwa kwa hae, mizwale ni likaizeli ba kwa moya ba Pitrosi ne ba ka tiisa tumelo ya bona ka ku hupula manzwi a hae.—2 Pitrosi 1:12-15.

Tumelo mwa Linzwi la Bapolofita

13. Mulimu n’a file cwañi bupaki bo bu tiisa tumelo ka za ku taha kwa Kreste?

¹³ Mulimu yena ka sibili n’a file bupaki bo bu tiisa tumelo ka za buniti bwa ku taha kwa Jesu “ka mata a matuna ni ka kanya ye tuna.” (Mateu 24:30; 2 Pitrosi 1:16-18) Ka ku s’a ba ni bupaki, baprisita ba bahedeni ne ba bulela makande a buhata ka za milimu ya bona, hailif’o Pitrosi, Jakobo, ni Joani ne ba iponezi kanya ya ku benya kwa Kreste. (Mateu 17:1-5) Ne ba mu boni a li mwa kanya mi ne ba utwile mulumo wa linzwi la Mulimu yena ka sibili a lumela kuli Jesu ne li Mwan’a Hae ya latiwa. Ku lumela k’o ni ku bonahala ku benya ko ne ku filwe Kreste ka nako yeo, ne li li ku kutekiwa ni ku fiwa kanya ku yena. Bakeñisa sinulo ya bumulimu yeo, Pitrosi n’a bizize sibaka seo, se ne si kana sa ba fa ngo ye ñwi ya lilundu la Hermoni, kuli ki “lilundu le li kenile.”—Mu bapanye Exoda 3:4, 5.

14. Tumelo ya luna i swanela ku amiwa cwañi ki ku benya kwa Jesu?

¹⁴ Ku benya kwa Jesu ku swanela ku ama cwañi tumelo ya luna? Pitrosi n’a bulezi kuli: “Hape lu na ni linzwi la bapolofita le li tiile ku fita, le mu ka eza hande ku isa pilu ku lona, inge kwa lambi ye lu bonisa mwa sibaka se si lififi, ku isa nako ya malungasiku, mi naleli ya Lilungwe i bonahala mwa lipilu za mina.” (2 Pitrosi 1:19) “Linzwi la bapolofita” ka mo ku bonahalela fela ne li kopanyeleza isiñi fela bupolofita bwa mwa Mañolo a Siheberu ka za Mesiya kono hape ni pulelo ya Jesu ya kuli n’a ka taha “ka mata a matuna ni ka kanya ye tuna.” Linzwi ne li bile cwañi “le li tiile ni ku fita” ka ku benya? Kezahalo yeo ne i file buniti bwa linzwi la bapolofita ka za ku taha ka kanya kwa Kreste mwa m’ata a Mubuso.

15. Ki lika mañi ze amilwe mwa ku fa mamelelo kwa linzwi la bapolofita?

¹⁵ Kuli lu tiise tumelo ya luna, lu lukela ku fa mamelelo kwa linzwi la bapolofita. Seo si kopanyeleza ku ituta lona linzwi leo, ku li buhisana kwa mikopano ya Sikreste, ni ku sebelisa kelezo ya lona. (Jakobo 1:22-27) Lu lukela ku li tuhelela ku ba ‘inge lambi ye bonisa mwa sibaka se si lififi,’ ye monyehela lipilu za luna. (Maefese 1:18) Ki f’o fela ha ne li kana la lu etelela ku fitela “naleli ya Lilungwe,” kamba, “Naleli ye benya, ya kakusasa,” yena Jesu Kreste, a ipatulula ka kanya. (Sinulo 22:16) Ku patuluha k’o ku ka talusa sinyeho ku ba ba si na tumelo ni limbuyoti ku ba ba bonisa tumelo.—2 Matesalonika 1:6-10.

16. Ki kabakalañi ha lu kona ku ba ni tumelo ya kuli lisepiso kaufela za bupolofita ze mwa Linzwi la Mulimu li ka talelezwa?

¹⁶ Bapolofita ba Mulimu ne si fela batu ba ba bunangu ba ne ba bulela cimo litaba ze butali, kakuli Pitrosi n’a inze: “Ha ku na bupolofita bo mutu a ka italuseza bona ili yena. Kakuli mwa mazazi a kale bupolofita ha bu si ka bonahala ka ku lata kwa mutu; kono batu ne ba bulela ka taelo ya Mulimu inze ba susumezwa ki Moya o Kenile.” (2 Pitrosi 1:20, 21) Sina ka mutala, Davida n’a bulezi kuli: “Moya wa [Jehova, NW] u bulela ka na.” (2 Samuele 23:1, 2) Mi Paulusi n’a ñozi kuli: “Liñolo kamukana li tahile ka Moya wa Mulimu.” (2 Timotea 3:16) Bakeñisa kuli bapolofita ba Mulimu ne ba buyelezwi ka moya wa hae, lwa kona ku ba ni tumelo ya kuli lisepiso kaufela ze mwa Linzwi la hae li ka talelezwa.

Ne Ba Na ni Tumelo mwa Lisepiso za Mulimu

17. Ki sepiso mañi ye ne li mutomo wa tumelo ya Abele?

¹⁷ Lisepiso za Jehova ne li li mutomo wa tumelo ya “lilu le lituna” la lipaki za mwa linako za pili Bukreste bu si ka taha kale. (Maheberu 11:1–12:1) Sina ka mutala, Abele n’a na ni tumelo mwa sepiso ya Mulimu ka za “peu” ye ne i ka pyata toho ya “noha.” Ne ku na ni bupaki bwa talelezo ya katulo ya Mulimu kwa bashemi ba Abele. Kwande a Edeni, Adama ni lubasi lwa hae ne ba ca buhobe ka mifufuzo ya lipata za bona bakeñisa kuli mubu o ne u kutilwe ne u melisa seto ni miutwa. Abele n’a kana a lemuhile litakazo zeo Eva n’a bile ni zona ku munn’a hae mi n’a boni kuli Adama n’a mu busa. Ka buniti fela Eva n’a bulezi ka za butuku bwa ku itwala kwa hae. Mi makenelo a kwa simu ya Edeni ne a silelelizwe ka likerubimi ni lilumo le li benya. (Genese 3:14-19, 24) Kaufela zeo ne li tisa “ku kolwa” ko ne ku koñomeka buniti ku Abele bwa kuli ku lukululwa ne ku ka taha ka Peu ye sepisizwe. Ka k’u nga muhato ka tumelo, Abele n’a file sitabelo ku Mulimu se ne si fumanehile ku ba sa butokwa bo butuna ku fita sa Kaine.—Maheberu 11:1, 4.

18, 19. Ki ka linzila lifi Abrahama ni Sara ne ba bonisize tumelo?

¹⁸ Litoho za mabasi bo Abrahama, Isaka, ni Jakobo ni bona ne ba na ni tumelo mwa lisepiso za Jehova. Abrahama n’a bonisize tumelo mwa sepiso ya Mulimu ya kuli mabasi kamukana a fa lifasi n’a ka fuyaulwa ka yena ni kuli peu ya hae ne i ka fiwa naha. (Genese 12:1-9; 15:18-21) Mwan’a hae Isaka ni muikulu wa hae Jakobo ne li “ba ba ne ba ka ca ni yena sanda sa Sepiso.” Ka tumelo Abrahama “a ina mwa naha ya Sepiso, mo ku inelwa mwa naha ya basili” mi n’a libelela “munzi o na ni mitomo ya niti,” ili Mubuso wa kwa lihalimu wa Mulimu w’o mwatas’a ona na ka zusezwa kwa bupilo fa lifasi-mubu. (Maheberu 11:8-10) Kana mu na ni tumelo ye swana ni yeo?

¹⁹ Musal’a Abrahama, Sara, n’a bat’o ba wa lilimo za buhulu ze 90 mi n’a sa fitelezi buhulu bwa ku pepa bana ha n’a bonisize tumelo mwa sepiso ya Mulimu mi n’a filwe m’ata “a ku ba fa mezi a manca” mi a pepa Isaka. Kacwalo, ku zwelela ku Abrahama wa lilimo za buhulu ze 100, “ya s’a hulile luli” ha ku amiwa ku za lupepo, kwa nalulelule “ku tahile . . . batu ba bañata, ba ba likana ni linaleli za kwa lihalimu.”—Maheberu 11:11, 12; Genese 17:15-17; 18:11; 21:1-7.

20. Nihailikuli litoho za mabasi ne ba si ka bona talelezo ye tezi ya lisepiso za n’a ba sepisize Mulimu, ki sifi se ne ba ezize?

²⁰ Litoho za mabasi ba ne ba sepahala ne ba shwile ba si ka bona talelezo ye tezi ya lisepiso za Mulimu ku bona. Niteñi, “ba li boni [lika ze sepisizwe] li sa li kwahule, ba li cilanisize; mi ba ipulezi kuli, bona, ki ba ku sili mi ki baenyi [mwa naha, NW].” Kwa fita masika a mañata pili Naha ya Sepiso i si ka fita kale fa ku luiwa ki lusika lwa Abrahama. Mwahal’a bupilo bwa bona kaufela, nihakulicwalo, bona litoho za mabasi bao ba ne ba saba Mulimu ne ba bonisize tumelo mwa lisepiso za Jehova. Bakeñisa kuli ni kamuta ne ba si ka latehelwa ki tumelo, hañi-hañi ba ka zusezwa kwa bupilo mwa kalulo ya fa lifasi-mubu ya “munzi” w’o Mulimu a ba lukiselize, ili Mubuso wa Bumesiya. (Maheberu 11:13-16) Ka nzila ye swana, tumelo i kona ku lu buluka lu sepahala ku Jehova mane nihaiba lu sa boni talelezo ya kapili-pili ya lisepiso za hae ze makalisa. Tumelo ya luna hape i ka lu susueza kuli lu ipeye ku utwa Mulimu, sina mwa n’a ezelize Abrahama. Mi sina ka mwa n’a siyezi bana ba hae sanda sa kwa moya, ni luna hape lu kona ku tusa bana ba luna kuli ba bonise tumelo mwa lisepiso ze nde hahulu za Jehova.—Maheberu 11:17-21.

Tumelo ki ya Butokwa Hahulu kwa Bakreste

21. Kuli lu be ba ba amuheleha ku Mulimu kacenu, ki sifi se si lukela ku kopanyelezwa mwa ku bonisa tumelo kwa luna?

²¹ Ka mo ku inezi fela, ku na ni ze ñata ze amilwe mwa tumelo ku fita ku ba ni buikolwiso mwa talelezo ya lisepiso za Jehova. Mwahal’a litaba za kwamulaho za mufuta wa mutu kaufela, ku bile ko ku tokwahala ku bonisa tumelo ku Mulimu ka linzila ze fapahana-fapahana kuli lu fumane tumelezo ya hae. Paulusi n’a bonisize kuli “kwand’a tumelo mutu h’a koni ku tabelwa ki [Jehova Mulimu]; kakuli ya taha ku Mulimu u swanezi ku lumela kuli Mulimu u teñi, ni kuli ki Yena ya fa ba ba mu bata mupuzo.” (Maheberu 11:6) Kuli a be y’a amuheleha ku Jehova kacenu, mutu u lukela ku bonisa tumelo ku Jesu Kreste ni kwa sitabelo sa tiululo seo Mulimu a file ka yena. (Maroma 5:8; Magalata 2:15, 16) Ki ka ku swana fela ni mwa n’a bulelezi Jesu yena ka sibili kuli: “Mulimu u latile lifasi [la mufuta wa mutu] hahulu, mane u li file Mwan’a hae wa libanda, kuli mutu ufi kamba ufi ya lumela ku yena a si ke a shwa, kono a be ni bupilo bo bu sa feli. Ya lumela ku Mwana u na ni bupilo bo bu sa feli; mi ya sa lumeli ku Mwana h’a na ku bona bupilo, kono buhali bwa Mulimu bu inzi fahalimw’a hae.”—Joani 3:16, 36.

22. Mubuso wa Bumesiya u ka tisa talelezo ya sepiso ifi?

²² Jesu u peta kalulo ye butokwa hahulu mwa talelezo ya lisepiso za Mulimu ka za Mubuso w’o Bakreste ba lapelela. (Isaya 9:6, 7; Daniele 7:13, 14; Mateu 6:9, 10) Sina ka mwa n’a boniselize Pitrosi, ku benya ne ku tiisize linzwi la bapolofita ka za ku taha kwa Jesu mwa m’ata a Mubuso ni kanya. Mubuso wa Bumesiya u ka tisa talelezo ya sepiso ye ñwi ya Mulimu, kakuli Pitrosi n’a ñozi kuli: “Ka sepiso ya hae, lu talimezi lihalimu le linca, ni lifasi le linca, mo ku yahile Ku Luka.” (2 Pitrosi 3:13) Bupolofita bo bu swana ne bu talelelizwe muta Majuda ba ne ba li mwa butanga mwa Babilona ne ba kutisizwe sinca kwa naha ya lihae la bona ka 537 B.C.E. mwatas’a mulonga o ne u na ni Zerubabele sina yena mubusisi ni Joshua sina muprisita yo mutuna. (Isaya 65:17) Kono Pitrosi n’a supa kwa nako ya kwapili muta “lihalimu le linca”—ili Mubuso wa kwa lihalimu wa Bumesiya—ne u ka busa fahalimu a “lifasi le linca,” ili nyangela ya batu ba ba lukile ba ba pila fa lifasi le.—Mu bapanye Samu 96:1.

23. Ki lipuzo lifi ka za kalemeno ka bunde ze lu ka buhisana nako ye tatama?

²³ Ka ku ba batanga ba ba sepahala ba Jehova ni balateleli ba Mwan’a hae y’a latiwa, Jesu Kreste, lu nyolelwa lifasi le linca la Mulimu le li sepisizwe. Lwa ziba kuli li fakaufi, mi lu na ni tumelo ya kuli lisepiso kaufela ze butokwa hahulu za Jehova li ka talelezwa. Kuli lu zamaye lu amuheleha fapil’a Mulimu, lu lukela ku tiisa tumelo ya luna ka ku ekeza ku yona kalemeno ka bunde, zibo, buiswalo, ku itiisa, bulapeli, ku latana, ni ku lata batu kaufela.a Cwale, ne ku kana kwa buziwa kuli, Lu kona ku bonisa cwañi kalemeno ka bunde? Mi ku bonisa kwa luna kalemeno ka bunde ku ka lu tusa cwañi ni ku tusa ba bañwi, sihulu balikani ba luna ba Sikreste, ba b’a ngile muhato kwa lisepiso za Mulimu ka ku bonisa tumelo?

[Litaluso za kwatasi]

Likalabo za Mina ki Lifi?

◻ “Tumelo” neikana ya talusiwa cwañi?

◻ Ka ku ya ka 2 Pitrosi 1:5-7, ki tulemeno tufi to tu na ni ku ekezwa kwa tumelo ya luna?

◻ Ki ku ama kufi k’o ku benya kwa Jesu ku swanela ku ba ni kona fa tumelo ya luna?

◻ Ki mitala ifi ya tumelo ye filwe ki Abele, Abrahama, Sara, ni ba bañwi ba mwa linako za kwa makalelo?

[Siswaniso se si fa likepe 25]

Kana mwa ziba m’o ku benya kwa Jesu ku kona ku amela tumelo ya mutu?