Kauhanyo 19

Mu Tiiseze mwa Lilato la Mulimu

Ku lata Mulimu ku talusañi?

Lu kona ku tiiseza cwañi mwa lilato la Mulimu?

Jehova u ka fa mupuzo mañi ku ba ba tiiseza mwa lilato la hae?

 1, 2. Lu kona ku fumana kai makundamo a mande kacenu?

MU NAHANE kuli mwa zamaya mwa mukwakwa inze ku na ni liñungwa. Malu a pula a kwahela. Mamonyi a kala ku benya, mishika ya lenga, mi pula ya kala ku suluha. Mwa kala ku akufa, ku bata kwa ku yaama. Kwatuko a mukwakwa, mu bona makundamo. Ki sibaka se si tiile, ku omile, mi ku bonahala kuli mwa kona ku yaama mwateñi luli. Kaniti sibaka seo si ka ba sa butokwa luli ku mina!

² Lu pila mwa linako ze t’ata. Miinelo ya lifasi i sweli ku kutela kwatasi ni ku fita. Kono ku na ni makundamo a tiile mo lu kona ku silelezwa kwa kozi ya ku ya ku ile. Ki afi ona ao? Mu bone ze i luta Bibele, i li: “Ni bulela [Muñ’a] Bupilo, ni li: Ki Yena mapilelo a ka ni sisabelo sa ka, ki Yena Mulimu wa ka ye ni sepile.”—Samu 91:2.

 3. Lu kona ku eza cwañi kuli Jehova a be makundamo a luna?

³ Mu nahane taba yeo! Jehova, yena Mubupi ni Muambakani wa pupo kaufela, w’a kona ku ba makundamo a luna mo lu silelezwa teñi. W’a kona ku lu sileleza kakuli u m’ata ku fita mutu kamba nto ifi kamba ifi ye kona ku lu lwanisa. Niha lu ka tahelwa ki kozi, Jehova wa kona ku felisa ze maswe kaufela ze i tahisa kozi. Lu kona ku eza cwañi kuli Jehova a be makundamo a luna? Lu tokwa ku mu sepa. Hape Linzwi la Mulimu li lu susueza kuli: “Mu tiiseze mwa lilato la Mulimu.” (Juda 21) Luli, lu tokwa ku tiiseza mwa lilato la Mulimu, ili ku zwelapili ku ba ni swalisano ye lilato ni Ndat’a luna wa kwa lihalimu. F’o lu ka kona ku ikolwisa kuli ki yena makundamo a luna. Kono lu kona ku tahisa cwañi swalisano yeo?

MU LEMUHE MW’A BONISEZA MULIMU LILATO MI MU LI AMUHELE

 4, 5. Ki lifi linzila ze ñwi zeo Jehova a bonisize ka zona kuli wa lu lata?

⁴ Kuli lu tiiseze mwa lilato la Mulimu, lu tokwa ku lemuha mw’a lu boniselize Jehova lilato. Mu nahane lituto ze ñwi za mwa Bibele ze mu itutile ka tuso ya yona buka ye. Ka ku ba Mubupi, Jehova u lu file lifasi ku ba lihae la luna le linde. U li talize ka lico ni mezi, lifa, lifolofolo ze tabisa, ni pupo ye buheha. Ka ku ba Muñoli wa Bibele, Mulimu u lu zibisize libizo la hae ni mikwa ya hae. Hape, Linzwi la hae li bonisa kuli n’a lumezi Mwan’a hae ya lateha fa lifasi, mi a tuhelela Jesu ku nyanda ni ku shwa bakeñisa luna. (Joani 3:16) Mi mpo yeo i kona ku lu tahisezañi? I lu fa sepo ya nako ye nde ya kwapili.

⁵ Sepo ya luna ya za kwapili i itingile hape fa nto ye ñwi ya ezize Mulimu. Jehova u tomile puso ya kwa lihalimu, ili Mubuso wa Bumesiya. Mubuso w’o u tuha u felisa manyando kaufela ni ku eza lifasi paradaisi. Mu nahane taba yeo! Lwa kona ku pila teñi ka kozo ni tabo ku ya ku ile. (Samu 37:29) Kono Mulimu u lu file ketelelo ya mwa ku pilela hande ka ku fitisisa yona nako ye. Hape u lu file mpo ya tapelo, ili nzila yeo lu kona ku ambola ku yena ka nako kaufela. Zeo ki linzila li sikai fela zeo Jehova a bonisize ka zona lilato kwa batu kaufela ni ku mina ka butu.

 6. Mu kona ku bonisa cwañi kuli mwa amuhela lilato l’a mi bonisize Jehova?

⁶ Puzo ya butokwa ye mu tokwa ku ipuza ki ya kuli: Ni ka amuhela cwañi lilato la Jehova? Ba bañata ba kana ba li, “Ni na ni swanela ku bonisa kuli na lata Jehova.” Kana ki mona mo mu ikutwela cwalo? Jesu n’a bulezi kuli taelo ye ki yona ye tuna ka ku fitisisa; n’a ize: “Lata Mulena Mulimu wa hao, ka pilu ya hao kaufela, ni ka moya wa hao kaufela, ni ka kutwisiso ya hao kaufela.” (Mateu 22:37) Kaniti mu na ni mabaka a mañata a ku lata Jehova Mulimu. Kono kana ku ikutwa kuli mu na ni lilato le li cwalo ki yona fela nto ye tokwahala mwa ku lata Jehova ka pilu, moya, ni kutwisiso ya mina kaufela?

 7. Kana ku lata Mulimu ku ama ze ñwi ku fita ku ba ni maikuto fela? Mu taluse.

⁷ Sina mo ku taluselizwe mwa Bibele, ku lata Mulimu ha ku ami fela maikuto. Mane, nihaike ku ikutwa kuli lwa lata Jehova ku butokwa, ona maikuto ao ki makalelo fela a lilato la luli ku yena. Kuli ku be ni kota ya tolwana, peu ya teñi ya tokwahala. Kono haiba mu bata tolwana, kana ne ku ka likana mutu yo muñwi ha n’a ka mi fa fela peu ya teñi? Kutokwa! Ka nzila ye swana, maikuto fela a ku lata Jehova Mulimu ki makalelo fela. Bibele i luta kuli: “Ku lata Mulimu, kiha lu mamela litaelo za hae; mi litaelo za hae ha li na bukiti.” (1 Joani 5:3) Kuli lilato la ku lata Mulimu li be la niti, li lukela ku beya miselo. Li lukela ku boniswa ka likezo.—Mateu 7:16-20.

 8, 9. Lu kona ku bonisa cwañi kuli lwa lata ni ku itebuha Mulimu?

⁸ Lu bonisa kuli lwa lata Mulimu ha lu utwa litaelo za hae ni ku sebelisa likuka za hae. Ku eza cwalo ha ku yo t’ata hahulu. Ku fita ku ba ye imeza, milao ya Jehova i tomezwi ku lu tusa ku pila bupilo bo bunde, bwa tabo. (Isaya 48:17, 18) Ha lu pila ka ku latelela ketelelo ya Jehova, lu bonisa Ndat’a luna wa kwa lihalimu kuli lwa itebuha luli z’a lu ezelize kaufela. Ka bumai, ki ba banyinyani mwa lifasi kacenu ba ba bonisa buitebuho bo bu cwalo. Ha lu bati ku sa ba ni buitebuho, inge batu ba bañwi ba ne ba pilile ka nako ya n’a li teñi Jesu fa lifasi. Jesu n’a folisize batu ba mbingwa b’a 10, kono ki a li muñwi fela ya n’a kutile ku to itumela ku yena. (Luka 17:12-17) Kaniti lu bata ku ba sina mutu ya n’a itumezi yani, isi sina b’a 9 ba ne ba si ka itumela!

⁹ Kacwalohe, ki lifi litaelo za Jehova ze lu tokwa ku utwa? Mwa buka mo lu buhisani li sikai ku zona, kono ha lu nyakisiseñi ze ñwi li sikai. Ku utwa litaelo za Mulimu ku ka lu tusa ku tiiseza mwa lilato la Mulimu.

MU SUTELELE HAHULU KU JEHOVA

10. Mu taluse libaka ku zwelapili ku ba ni zibo ka za Jehova Mulimu ha ku li kwa butokwa.

¹⁰ Ku ituta ka za Jehova ki muhato wa butokwa ha ku taha kwa ku sutelela ku yena. Ki nto ye sa lukeli ku fela ni kamuta. Ha ne mu ka be mu li fande busihu inze ku bata hahulu, mi mu ola mulilo, kana ne mu ka tuhelela malimi a mulilo ku tima? Batili. Ne mu ka zwelapili ku beya likota kuli mulilo u zwelepili ku tuka. Bupilo bwa mina bu itingile fa ku eza cwalo! Sina likota mo li zwisezapili mulilo ku tuka, “ku ziba za Mulimu” ni kona ku zwisezapili lilato la luna ku Jehova ku tiya.—Liproverbia 2:1-5.

11. Balateleli ba Jesu ne ba ikutwile cwañi ka za tuto ya hae?

¹¹ Jesu n’a bata kuli balateleli ba hae ba tiiseze mwa lilato la bona ku Jehova ni kuli Linzwi la hae la niti li zwelepili ku tuka. Ha s’a zusizwe kwa bafu, Jesu n’a lutile ba babeli kwa balutiwa ba hae ka za bupolofita bo bu mwa Mañolo a Siheberu bo ne bu talelelizwe ku yena. Seo ne si tahisizeñi? Hasamulaho ne ba ize: “Ha lu li, lipilu za luna ne li tuka mwa lifuba za luna, ha n’a lu bulelisa mwa nzila, a lu taluseza Mañolo?”—Luka 24:32.

12, 13. (a) Ki sifi se si ezahezi kwa lilato la ku lata Mulimu ni Bibele kwa batu ba bañata kacenu? (b) Lu kona ku eza cwañi kuli lilato la luna li si ke la fola?

¹² Ha ne mu itutile lwa pili ze i luta luli Bibele, kana ne mu lemuhile kuli pilu ya mina ne i kalile ku tuka ka tabo, cisehelo ni lilato ku Mulimu? Lu sepa kuli ne ku bile cwalo. Ba bañata ba ikutwile cwalo. Mungendenge cwale ki wa ku zwisezapili lilato leo mwa pilu ni ku li hulisa. Ha lu lati ku latelela moya wa lifasi la kacenu. Jesu n’a polofitile kuli: “Lilato la ba bañata li ka fola.” (Mateu 24:12) Mu kona ku eza cwañi kuli lilato la mina ku Jehova ni kwa niti ya mwa Bibele li si ke la fola?

¹³ Mu zwelepili ku fumana zibo ya Jehova Mulimu ni Jesu Kreste. (Joani 17:3) Mu kengeele kamba ku nahanisisa ze mu ituta mwa Linzwi la Mulimu, inze mu ipuza kuli: ‘Litaba ze, li ni lutañi ka za Jehova Mulimu? Li ni fa mabaka mañi a mañwi a ku mu lata ka pilu, moya, ni kutwisiso ya ka kaufela?’ (1 Timotea 4:15) Ku nahanisisa cwalo ku ka tahisa kuli lilato la mina ku Jehova li zwelepili ku tuka.

14. Tapelo i kona ku lu tusa cwañi ku zwisezapili lilato la luna ku Jehova?

¹⁴ Nzila ye ñwi ya ku zwisezapili lilato la mina ku Jehova ki ku lapelanga kamita. (1 Matesalonika 5:17) Mwa Kauhanyo 17 ya buka ye, ne lu itutile kuli tapelo ki mpo ya butokwa ye zwa ku Mulimu. Sina mo ku bezi kuli bulikani bwa batu bu tiya haiba ku na ni ku ambolisananga kamita, bulikani bwa luna ni Jehova ni bona bu zwelapili ku tiya ni ku hula ha lu lapela ku yena kamita. Ku butokwa kuli litapelo za luna li si ke za ba za ku ezeza fela mulao—ili ku kuta-kutelanga manzwi a swana a si na taluso kamba a si ka nahanisiswa. Lu tokwa ku bulela ku Jehova sina mwana mwa n’a ka bulelela ku bondat’ahe b’a lata. Mi lu bata ku bulela ka likute, kono hape ili ka ku lukuluha, ka buniti, ni ka ku zwelela kwa pilu. (Samu 62:8) Luli, tuto ya Bibele ya ka butu ni litapelo ze zwelela kwa pilu ki likalulo za butokwa mwa bulapeli bwa luna, mi li lu tusa ku tiiseza mwa lilato la Mulimu.

MU FUMANE TABO MWA BULAPELI BWA MINA

15, 16. Ki kabakalañi ha ku li ko ku lukile ku nga musebezi wa ku kutaza Mubuso ku ba tohonolo ni bufumu?

¹⁵ Tuto ya Bibele ya ka butu ni tapelo ki likezo za bulapeli ze lu kona ku eza lu sa bonwi ki ba bañwi. Kono cwale ha lu nyakisiseñi kalulo ya bulapeli ye lu ezezanga fa nyangela: yona ya ku taluseza ba bañwi bulapeli bwa luna. Kana se mu taluselize ba bañwi litaba za niti za mwa Bibele? Haiba ku cwalo, mu bile ni tohonolo ye tuna. (Luka 1:74) Ha lu taluseza ba bañwi litaba za niti ze lu itutile ka za Jehova Mulimu, lu eza musebezi wa butokwa hahulu o filwe Bakreste kaufela ba niti, ona wa ku kutaza taba ye nde ya Mubuso wa Mulimu.—Mateu 24:14; 28:19, 20.

¹⁶ Muapositola Paulusi n’a nga bukombwa bwa hae ku ba nto ya butokwa luli, mi mane n’a bu bizize kuli ki bufumu. (2 Makorinte 4:7) Ku ambota batu ka za Jehova Mulimu ni milelo ya hae ki ona musebezi o munde ka ku fitisisa o mu kona ku eza. Ku eza cwalo ki ku sebeleza Mulena yo munde ka ku fitisisa, mi ku tahisa lika ze nde ka ku fitisisa. Ka ku abana mwa musebezi w’o, mu tusa batu ba lipilu ze na ni niti ku sutelela ku Ndat’a luna wa kwa lihalimu ni ku kena mwa nzila ya bupilo bo bu sa feli! Ha ku na musebezi o munde ku fita w’o. Hape, ku paka ka za Jehova ni Linzwi la hae ku ekeza kwa tumelo ya mina ni ku tiisa lilato la mina ku yena. Mi Jehova wa itebuha buikatazo bwa mina. (Maheberu 6:10) Ku pateha mwa musebezi w’o ku mi tusa ku tiiseza mwa lilato la Mulimu.—1 Makorinte 15:58.

17. Ki kabakalañi bukombwa bwa Sikreste ha bu lukela ku eziwa ka putako kacenu?

¹⁷ Ku butokwa ku hupula kuli musebezi wa ku kutaza Mubuso u lukela ku eziwa ka putako. Bibele i li: “Bulela Linzwi, u tiise.” (2 Timotea 4:2) Ki kabakalañi ha ku swanela ku eziwa cwalo ka putako kacenu? Linzwi la Mulimu li lu taluseza kuli: “Lizazi la [Muñ’a] Bupilo le lituna li sutelezi, e, li sutelezi, mane li akufa ka lubilo.” (Zefania 1:14) Ee, nako i taha ka lubilo f’o Jehova a ka feliseza muinelo wo kaufela wa linto. Batu ba tokwa ku lemuswa! Ba tokwa ku ziba kuli ye ki yona nako ya kuli ba kete Jehova ku ba yena Mubusi wa bona. Mafelelezo h’a na “ku liyeha.”—Habakuki 2:3.

18. Ki kabakalañi ha lu swanela ku lapela Jehova patalaza hamoho ni Bakreste ba niti?

¹⁸ Jehova u bata kuli lu mu lapele patalaza hamoho ni Bakreste ba niti. Ki lona libaka Linzwi la hae ha li li: “A lu babalelane, kuli lu susumezane mwa lilato ni mwa misebezi ye minde. Lu si ke lwa tuhela liputeho za luna, mo ba ezeza ba bañwi; kono lu kutazane, sihulu ka ku bona kuli lizazi le lituna li sutelezi.” (Maheberu 10:24, 25) Ha lu putehana ni balumeli ba bañwi kwa mikopano ya Sikreste, lu ba ni kolo ye nde hahulu ya ku lumbeka ni ku lapela Mulimu wa luna yo munde. Hape lwa yahisana ni ku susuezana.

19. Lu kona ku eza cwañi kuli lu tiise lilato mwa puteho ya Sikreste?

¹⁹ Ha lu nze lu swalisana ni balapeli ba bañwi ba Jehova, lu tiisa lilato ni bulikani mwa puteho. Ku butokwa kuli lu bone bunde ku ba bañwi, sina Jehova mw’a bonela bunde ku luna. Mu si ke mwa libelela balumeli ba bañwi ku eza lika ka ku petahala. Mu hupule kuli kaufel’a luna lu zamaela fo ku shutana mwa ku hula kwa moya ni kuli mañi ni mañi wa luna wa ezanga mafosisa. (Makolose 3:13) Mu like ku utwana hahulu ni ba ba lata hahulu Jehova, mi mu ka bona kuli mwa hula kwa moya. Kaniti, ku lapela Jehova hamolo ni mizwale ni likaizeli ba mina ba kwa moya ku ka mi tusa ku tiiseza mwa lilato la Mulimu. Jehova u fa mupuzo mañi ku ba ba mu lapela ka busepahali ili ku tiiseza mwa lilato la hae?

MU BATE “BUPILO BO BU SA FELI”

20, 21. “Bupilo bo bu sa feli” ki nto mañi, mi ki kabakalañi ha i li sepo ye nde?

²⁰ Jehova u fa batanga ba hae ba ba sepahala bupilo, kono ki bupilo bwa mufuta mañi? Kana mwa pila luli yona nako ye? Buñata bwa luna ne lu ka li kalabo ya zibahala hande kakuli lwa buyela, ku ca ni ku nwa. Kaniti lu lukela ku ba ba ba pila. Mi ha lu tabile luli, lu kana mane lwa bulela kuli, “Bo ki bona bupilo luli!” Kono Bibele i bonisa kuli ka kutwisiso ya lika ya niti, kacenu ha ku na mutu ya pila luli.

²¹ Linzwi la Mulimu li lu susueza ku “amuhela bupilo bo bu sa feli.” (1 Timotea 6:19) Manzwi ao a bonisa kuli “bupilo bo bu sa feli” ki nto ye lu libelela ku to ba ni yona kwapili. Kaniti, ha lu ka petahala, lu ka pila ka ku tala luli, kakuli lu ka pila sina mwa n’a lelezi Mulimu kwa makalelo. Ha lu ka be lu pila mwa paradaisi fa lifasi inze lu na ni buikangulo bo bunde, kozo, ni tabo ye tezi, f’o lu ka ikola bupilo sakata—“bupilo bo bu sa feli.” (1 Timotea 6:12) Kana yeo haki sepo ye nde?

22. Mu kona ku “swala bupilo bo bu sa feli” ka nzila ifi?

²² Lu kona cwañi ku “swala bupilo bo bu sa feli”? Mwa taba mwa n’a bulezi manzwi ao, Paulusi n’a susuelize Bakreste kuli ba “sebeze ze nde” ni kuli ba “fume misebezi ye minde.” (1 Timotea 6:18) Kacwalo kwa bonahala hande kuli ku itingile hahulu ka mo lu sebeliseza litaba za niti ze lu itutile mwa Bibele. Kono kana Paulusi n’a talusa kuli “bupilo bo bu sa feli” lu bu fiwa sina tifo ya ku eza misebezi ye minde? Batili, kakuli sepo ye nde yeo i itingile luli fa ku amuhela “sishemo” sa Mulimu. (Maroma 5:15) Kono Jehova u tabela ku fa mupuzo ba ba mu sebeleza ka busepahali. U bata ku mi bona ha mu pila “bupilo bo bu sa feli.” Bupilo bwa tabo ni kozo, bo bu sa feli b’o bu ka fumanwa ki ba ba tiiseza mwa lilato la Mulimu.

23. Ki kabakalañi ku tiiseza mwa lilato la Mulimu ha ku li kwa butokwa?

²³ Yo muñwi ni yo muñwi wa luna u swanela ku ipuza kuli, ‘Kana ni lapela Mulimu ka nzila y’a bonisize mwa Bibele?’ Haiba lu ikolwisa kuli ka zazi ni zazi kalabo ki ee, f’o lu mwa nzila ye lukile. Lwa kona ku ba ni sepo ya kuli Jehova ki makundamo a luna. U ka sileleza batu ba hae ba ba sepahala mwa mazazi a t’ata a muinelo wa linto wa kale wo. Hape Jehova u ka lu kenya mwa lifasi le linca le li tuha li taha. Lu ka ba ba ba tabile luli ku ba teñi ka nako yeo! Mi lu ka tabela luli kuli ne lu ezize liketo ze nde mwa mazazi a maungulelo a! Haiba mu eza liketo ze cwalo ka nako ye, mu ka ikola “bupilo bo bu sa feli” bwa ku ya ku ile sina mwa n’a lelezi Mulimu!

ZE I LUTA BIBELE

▪ Lu bonisa lilato la niti ku Mulimu ka ku utwa litaelo za hae ni ku sebelisa likuka za hae.—1 Joani 5:3.

▪ Ku ituta Linzwi la Mulimu, ku lapela ku Jehova ku zwelela kwa pilu, ku luta ba bañwi ka za hae, ni ku mu lapela kwa mikopano ya Sikreste ku ka lu tusa ku tiiseza mwa lilato la Mulimu.—Mateu 24:14; 28:19, 20; Joani 17:3; 1 Matesalonika 5:17; Maheberu 10:24, 25.

▪ Ba ba tiiseza mwa lilato la Mulimu ba na ni sepo ya ku ikola “bupilo bo bu sa feli.”—1 Timotea 6:12, 19; Juda 21.

[Siswaniso se si fa likepe 184]

Kana mu ka tuhelela Jehova ku ba makundamo a mina mwa linako ze t’ata ze?

[Siswaniso se si fa likepe 187]

Sina mulilo, lilato la mina ku Jehova li tokwa ku kotezwa kuli li zwelepili ku tuka

[Siswaniso se si fa likepe 190]

Jehova u bata kuli mu ikole “bupilo bo bu sa feli.” Kana mu ka eza cwalo?