Lipuzo Zezwa Kwa Babali

Ki bomañi lipaki bababeli babatalusizwe kwa Sinulo kauhanyo 11?

Sinulo 11:3 ibulela ka za lipaki zepeli zeneka polofita ka mazazi a 1,260. Hape likande leo lizwelapili kutalusa kuli sibatana nesika ‘koma ni kubulaya’ lipaki zeo. Kono hamulaho wa “mazazi a malaalu ao ni hafu,” lipaki zepeli zeo nelika kutisezwa kwa bupilo ili nto yeneka komokisa baba liboni.—Sin. 11:7, 11.

Lipaki zepeli zeo ki bomañi? Litaba zeekezehile ka za likande leo lilutusa kuziba kuli lipaki zeo ki bomañi. Pili, lutalusezwa kuli lipaki zeo ‘liswanisezwa kwa likota zepeli za olive ni matomelo a lilambi.’ (Sin. 11:4) Taba yeo iluhupulisa za matomelo a lilambi ni likota zepeli za olive zebulezwi mwa bupolofita bwa Zakaria. Nekubulezwi kuli likota zepeli zeo za olive neliswaniseza “batoziwa bababeli,” ili Mubusisi yabizwa Zerubabele ni Muprisita ya Pahami Joshua, “babayemi kwatuko Mulena wa lifasi kaufela.” (Zak. 4:1-3, 14) Kuzwafo, lipaki zepeli litaluswa kuli lieza lika zekomokisa zeswana ni zanaaezize Mushe ni Elia.—Mubapanye Sinulo 11:5, 6 ni Numere 16:1-7, 28-35 ni 1 Malena 17:1; 18:41-45.

Ki lika mañi zeswana zebulezwi kwa Sinulo ni kwa Zakaria? Yeñwi ni yeñwi ya litaba zeo ibulela za batoziwa ba Mulimu bane baetelela mwa bulapeli bwa niti ka nako yetaata yene balikiwa. Kacwalo, ka kutaleleza manzwi a kwa Sinulo kauhanyo 11, mizwale babatozizwe bane baetelela mwa musebezi wa kukutaza ka nako yene utomilwe Mubuso wa Mulimu mwa lihalimu ka silimo sa 1914, nebakutalize ‘inze baapezi masila a saka’ ka lilimo ze taalu ni hafu.

Kwa mafelelezo hane banze bakutaza inze baapezi masila a masaka, batoziwa bao nebabulailwe ka swanisezo hane balengilwe mwa tolongo ka nako yenyinyani ili nako yeswanisezwa ki mazazi a malaalu ni hafu. Ka kuya ka mubonelo wa lila za Mulimu, musebezi wa mizwale bao neutuhelisizwe, ili nto yenetahisize kuli batu bane balwanisa musebezi wo babe ni tabo yetuna.—Sin. 11:8-10.

Kusina taba ni muinelo wo, bupolofita nebutalelelizwe, kwa mafelelezo a mazazi a malaalu ni hafu, lipaki bababeli neba kutiselizwe kwa bupilo. Bakreste babatozizwe neba lukuluzwi mwa tolongo mi bane bazwezipili kusepahala nebafilwe buikalabelo bobuipitezi ki Mulimu ka Mulenaa bona, Jesu Kreste. Ka silimo sa 1919, nebali babañwi ba batu bane ba ketilwe kusebeza sina “mutanga yasepahala yanani kutwisiso” kuli bababalele batu ba Mulimu ka kuba fa lico za kwa moya mwa mazazi a maungulelo.—Mat. 24:45-47; Sin. 11:11, 12.

Kwatabisa kuziba kuli Sinulo 11:1, 2 ibonisa kuli likezahalo zeo nelika ezahala ka nako yeneka mishalwa tempele ya kwa moya. Malaki kauhanyo 3 ibulela za kutatubwa kokuswana kone kuama tempele ya kwa moya, ili kezahalo yeneka latelelwa ki kukeniswa kwa tempele. (Mala. 3:1-4) Musebezi wa kutatuba tempele ya kwa moya ni kuikenisa neungile nako yekuma kai? Musebezi wo neukalile mwa silimo sa 1914 kuisa kwa makalelo a silimo sa 1919. Nako yeo ikopanyeleza mazazi a 1,260 (ili likweli ze 42) ni mazazi a malaalu ni hafu aswanisezo abulezwi kwa Sinulo kauhanyo 11.

Ki nto yelutabisa hahulu kuli Jehova naalukisize hande miinelo ya kwa moya yeo kuli akenise sicaba sesiipitezi, ili sesi eza misebezi yeminde. (Tite 2:14) Kuzwafo, lwaitebuha kwa mutala obatomile Bakreste babatozizwe bane baetelela ka nako ya tiko yeo, ili nto yenetahisize kuli basebeze sina lipaki bababeli baswanisezo.

(Sinulo 11:7) Habafelize kufa bupaki, sibatana sesizwa mwa mukoti sikato balwanisa ni kubakoma ni kubabulaya.

(Sinulo 11:11) Hamulaho wa mazazi amalaalu ni hafu, moya wa bupilo ozwa ku Mulimu wakena ku bona, mi bayema ka mahutu abona, mi bane bababoni bakenelwa ki sabo yetuna.