Taba Ye Lu Lukela Ku Shaela

NAKO ye telele pili Bukreste bu si ka kala kale, Jehova n’a bulelezi musepahali Abrahama ka za tukiso ya kuli “macaba kamukana a lifasi” a fiwe mbuyoti. (Gen. 22:18) Hape n’a susumelize Salumoni ku ñola ka za nto ya butokwa hahulu ye ba tokwa ku eza batu bote, kuli: “Saba Mulimu [wa niti, NW], mi u mamele milao ya hae. Kakuli ki yona swanelo kaufela ya mutu.” (Muek. 12:13) Kono batu be ne ba ka ba ba macaba kamukana ne ba ka ituta cwañi ka za lika zeo?

Nihaike kuli kamita ku bile ni batu ba ba lumela mwa linzwi la Mulimu, Bibele i bonisa kuli bukutazi bo butuna bwa mwa lifasi kaufela bo ne bu ka fitisa luli taba ye nde kwa macaba kaufela ne bu bulukezwi “lizazi la Mulena.” Lizazi leo ne li kalile ka 1914. (Sin. 1:10) Ka za nako yeo, Sinulo 14:6, 7 ne i bulezi cimo kuli ka ketelelo ya mangeloi mushaa wa butokwa n’o ka ezwa ku “ba masika kamukana, ni mishobo, ni lipuo, ni macaba.” Ne ba ka elezwa kuli: “Mu sabe Mulimu, mu mu lumbeke; kakuli nako ya hae ya ku atula i tile; mu mu kubamele, Ya ezize lihalimu ni lifasi, ni liwate, ni maweluwelu a mezi.” Tato ya Mulimu kikuli taba yeo i zibahazwe. Lu na ni tohonolo ya ku abana mwa musebezi w’o.

“Mulimu Wa Niti.” Jehova ha n’a zibahalize kuli, “Ki mina lipaki za ka,” ne li ka nako fo ne ku zekiwa taba ya Bumulimu. (Isa. 43:10) Taba ye lukela ku shaelwa haki taba fela ya kuli batu ba swanela ku ba mwa bulapeli bo buñwi kamba ku lumela ku mulimu o muñwi. Ba tokwa ku fiwa kolo ya ku ituta kuli Mubupi wa lihalimu ni lifasi ki yena Mulimu a nosi wa niti. (Isa. 45:5, 18, 21, 22; Joa. 17:3) Ki Mulimu wa niti fela ya kona ku bulela cimo ze sepeha ze ka ezahala kwapili. Tohonolo ya luna ki ku talusa kuli talelezo ya linzwi la Jehova kwakale ki mutomo o tiile wa ku sepela kuli zote z’a sepisize kuli li ka ezahala kwapili li ka ezahala luli.—Josh. 23:14; Isa. 55:10, 11.

Kaniti, ba bañata be lu kutaza ku bona ba lapela milimu i sili kamba ba ipapata kuli ha ba lapeli mulimu ni o mukana. Kuli lu teelezwe, lu kana lwa tokwa ku kala ka taba fo lu lumelelana. Lwa kona ku tusiwa ki mutala o ñozwi kwa Likezo 17:22-31. Mu lemuhe kuli muapositola Paulusi niha n’a ezize ka maseme, n’a bulezi hande-nde buikalabelo bwa batu bote ku Mulimu ya li yena Mubupi wa lihalimu ni lifasi.

Ku Zibahaza Libizo la Mulimu. Mu si pimi ku bulela Mulimu wa niti fa libizo. Jehova wa lata libizo la hae. (Ex. 3:15, NW; Isa. 42:8, NW) U bata kuli batu ba zibe libizo leo. N’a boni teñi kuli libizo la hae le li pahami la ñolwa mwa Bibele ku fitelela h’a 7,000. Lu na ni buikalabelo bwa ku li zibisa batu.—Deut. 4:35.

Batu kaufela ba tokwa ku ziba Jehova ni ku lapela libizo la hae ka tumelo kuli ba pile ku ya ku ile. (Joe. 2:32; Mala. 3:16; 2 Mates. 1:8) Niteñi, buñata bwa batu ha ba zibi Jehova. Ku bona bao ku na ni ba bañata-ñata ba ba li ba lapela Mulimu ya bulezwi mwa Bibele. Niha ba na ni Bibele ni ku i balanga, mwendi ni f’o ha ba zibi libizo la Mulimu le li mu konka kakuli li kapuzwi mwa Libibele ze tolokilwe miteñi ye. Batu ba bañwi mo ba zibela fela libizo la Jehova kikuli ba bahulu ba bulapeli bwa bona ba ba bulelezi kuli ba si ke ba itusisa lona.

Lu kona ku zibisa cwañi batu libizo la Mulimu? Ha ku na se si m’ata ku fita ku ba bonisa lona mwa Bibele—Bibele ya bona haiba ku konahala. Mwa litoloko za mwa lipuo ze ñwi, libizo leo li fumaneha h’a likiti-kiti. Ku ze ñwi, li kana la fumaneha fela kwa Samu 83:18 kamba Exoda 6:3-6, kamba li kana la fumaneha kwa Genese 22:14 kamba Isaya 12:2. Mwa litoloko ze ñwi li sikai, manzwi a mañwi, a’ cwale ka “Mulena” ni “Mulimu,” a ñozwi ka muñolo o ipitezi f’o mañolo a mwa puo ya kwa makalelo a na ni libizo la Mulimu. K’o batoloki ba miteñi ye ba zwiselelize libizo la Mulimu, mu kana mwa tokwa ku itusisa toloko ya kale ya Bibele kuli mu bonise batu ze ezizwe. Mwa linaha ze ñwi mu kana mwa zibisa batu libizo la Mulimu le li mwa lipina za bulapeli kamba ze mwa taba ye fanuzwi fa muyaho wa nyangela.

Nihaiba ku ba ba lapela milimu i sili, Jeremia 10:10-13 mwa New World Translation of the Holy Scriptures ya kona ku itusiswa hande. Ze i bulela f’o haki libizo fela la Mulimu; i talusa hande ni mw’a inezi.

Mu si pati libizo la Jehova ka malumbatina a’ cwale ka “Mulimu” ni “Mulena,” sina mo ba ezeza ba Krestendomu. Seo hasi talusi kuli libizo leo li lukela ku itusiswa kwa makalelo a likande ni likande. Kabakala litumelo ze fosahezi, batu ba bañwi ne ba ka kauleza puhisano. Kono ha se mu tomile mutomo wa likande, mu si kata-kati ku itusisa libizo la Mulimu.

Mu ka lemuha kuli Bibele i itusisa libizo la Mulimu hañata-ñata ku fita mo i itusiseza malumbatina a’ cwale ka “Mulena” ni “Mulimu” h’a kopanywa. Niteñi, bañoli ba Bibele ne ba si ka lika ku kopanya libizo la Mulimu mwa mubamba ni mubamba. Ne ba li kopanyize fela sina mw’a itusisezwanga mabizo kamita ili ka likute. W’o ki mutala o munde wa ku latelela.

Mutu Ya Taluswa ki Libizo Leo. Taba ya kuli Mulimu u na ni libizo le li mu konka niha i li niti ya butokwa, ao ki makalelo fela.

Kuli batu ba late Jehova ni ku mu lapela ka tumelo, ba tokwa ku ziba kuli ki Mulimu ya cwañi. Jehova ha n’a zibahalize libizo la hae ku Mushe fa Lilundu la Sinai, N’a si ka kutela fela ku bulela kuli “Jehova.” N’a bulezi ni ka za ye miñwi ya mikwa ya Hae ye zwile mubano. (Ex. 34:6, 7, NW) W’o ki mutala o lu swanela ku latelela.

Ibe kuli mu kutaza batu ba ba sa z’o tabela niti kamba mu fa lingambolo mwa puteho, ha mu bulela ka za limbuyoti za Mubuso, mu taluse ze li bonisa ka za Mulimu y’a fa lisepiso zeo. Ha mu ama kwa litaelo za hae, mu koñomeke butali ni lilato ze li bonisa. Mu taluse hande-nde kuli z’a tokwa Mulimu ha li lu imezi, kono kuli li lelezwi ku lu tusa. (Isa. 48:17, 18; Mika 6:8) Mu bonise m’o kezo ni kezo ye bonisa m’ata a Jehova i patululela se siñwi ka za mw’a inezi, lipimo za hae, ni mulelo wa hae. Mu bulele za m’o Jehova a likanyeleza mikwa ya hae. Batu ba mi utwe mu bulela mo mu ikutwela ka za Jehova. Lilato la mina ku Jehova la kona ku tahisa kuli ba bañwi ni bona ba mu late cwalo.

Taba ya ka putako ya mwa mazazi a luna i susumeza batu ku saba Mulimu. Ka ze lu bulela, lu swanela ku lika ku hulisa sabo ye cwalo ya silumeli. Sabo yeo ki sabo ye nde, ili ku tompa Jehova ka tompo ye tuna. (Samu 89:7) I kopanyeleza ku lemuha kuli Jehova ki yena Muatuli ya pahami ni kuli lu tokwa ku katelwa ki yena kuli a lu fe bupilo kwapili. (Luka 12:5, NW; Maro. 14:12) Kacwalo, sabo ye cwalo i kopani ni lilato le li tungile ku yena mi ka seo ni takazo ye tuna ya ku mu tabisa. (Deut. 10:12, 13) Sabo ya silumeli hape i lu susumeza ku toya ze maswe, ku mamela litaelo za Mulimu, ni ku mu lapela ka pilu kaufela. (Deut. 5:29; 1 Makol. 28:9; Liprov. 8:13) I lu sileleza kwa ku lika ku sebeleza Mulimu inze lu sa lata lika za lifasi.—1 Joa. 2:15-17.

Libizo la Mulimu Ki “Mapilelo A Tiile.” Batu bao luli ba ba fita fa ku ziba Jehova ba silelezwa hahulu. F’o haki ka libaka fela la kuli ba itusisa libizo la hae kamba kuli ba kona ku bulela bo buñwi bwa bunde bwa hae. Kono ki ka libaka la kuli ba sepa Jehova yena ka sibili. Ka za bona, Liproverbia 18:10 i li: “Libizo la [Muñ’a] Bupilo ki mapilelo a tiile, ya lukile u sabela ku ona, mi wa piliswa.”

Mu itusise hande linako za ku eleza ba bañwi ku sepa Jehova. (Samu 37:3; Liprov. 3:5, 6) Sepo ye cwalo i bonisa tumelo ku Jehova ni lisepiso za hae. (Maheb. 11:6) Ka mo li lu sepiseza Linzwi la Mulimu, batu ba ka piliswa ha ba “biza Libizo la [Jehova, NW]” kabakala kuli ba ziba kuli ki yena Muambakani ya Pahami, ni kuli ba lata linzila za hae, mi ba lumela ka ku tala kuli puluso sakata i kona ku tahiswa fela ki yena. (Maro. 10:13, 14) Ha mu nze mu luta ba bañwi, mu ba tuse ku ba ni tumelo ye cwalo mwa likalulo kaufela za bupilo.

Batu ba bañata ba na ni matata a’ imeza. Mwendi ha ba boni mwa ku a tatululela. Mu ba eleze ku ituta linzila za Jehova, ku mu sepa, ni ku sebelisa ze ba ituta. (Samu 25:5) Mu ba susueze ku lapelela ka t’ata tuso ya Mulimu ni ku itumela ku yena kwa limbuyoti za hae. (Mafil. 4:6, 7) Ha ba fita fa ku ziba Jehova, isi fela ka ku bala manzwi a mañwi mwa Bibele kono hape ni ka ku bona talelezo ya lisepiso za hae mwa bupilo bwa bona, ba ka kala ku ba mwa buiketo bo bu tahiswa ki ku itebuha luli ze li yemela libizo la Jehova.—Samu 34:8; Jer. 17:7, 8.

Mu itusise hande kolo ni kolo ya ku tusa batu ku utwisisa ni ku itebuha bunde bwa ku saba Mulimu wa niti, Jehova, ni ku buluka litaelo za hae.

JESU KRESTE ha s’a zusizwe kwa bafu mi a si ka kutela kale kwa lihalimu n’a file balutiwa ba hae litaelo, a li: “Mu ka ba lipaki za ka . . . ku isa kwa mafelelezo a lifasi.” (Lik. 1:8) Batanga ba Mulimu ba ba sepahala ba mwa miteñi y’e ba taluswa ku ba batu “ba ba sweli bupaki bwa Jesu.” (Sin. 12:17) Mu tukufalezwi cwañi ku fa bupaki b’o?

Batu ba bañata ba ba kozwi kuli ba lumela ku Jesu ha ba zibi kuli n’a li teñi a si ka taha kale fa lifasi. Ha ba zibi kuli luli n’a li mutu inge luna ha n’a li fa lifasi. Ha ba utwisisi se ku talusa ku ba Mwan’a Mulimu kwa hae. Ba ziba ze nyinyani-nyinyani ka za musebezi wa hae mwa talelezo ya mulelo wa Mulimu. Ha ba zibi z’a eza cwale, mi ha ba lemuhi m’o z’a ka eza kwapili li ka amela bupilo bwa bona. Mane ba kana ba nahana ka mafosisa kuli Lipaki za Jehova ha ba lumeli ku Jesu. Lu tohonolofalizwe ku ikataza ku zibahaza niti ka za litaba zeo.

Batu ba bañwi bona ha ba lumeli kuli Jesu ya talusizwe mwa Bibele n’a pilile luli. Ba bañwi b’a nga Jesu ku ba fela munna yo mutuna. Ba bañata ba hana taba ya kuli ki Mwan’a Mulimu. ‘Ku swala bupaki bwa Jesu’ mwahal’a batu ba ba cwalo ku tokwa buikatazo bo butuna, pilu-telele, ni maseme.

Ku si na taba ni mubonelo wa bateelezi ba mina, ba tokwa ku ziba ka za Jesu Kreste kuli ba kone ku amuhela tukiso ya Mulimu ye fa bupilo bwa kamita. (Joa. 17:3) Tato ya Mulimu ye bulezwi hande-nde kikuli bote ba ba pila ba “bulele kuli Jesu Kreste ki Mulena” mi ba ipeye kwatas’a puso ya hae. (Mafil. 2:9-11) Kacwalo, ha lu koni ku pima fela taba ha lu kopana ni batu ba saluluti hahulu kamba ba ba ikutwa hahulu kuli mibonelo ya bona i lukile, imi i fosahezi. Hailif’o fokuñwi lwa kona ku bulela za Jesu Kreste ka ku lukuluha—nihaiba fela ha lu pota lwa pili—fokuñwi hape lu kana lwa tokwa ku bulela ka maseme litaba ze ka tusa bateelezi ba luna ku kala ku nahana ze nepahezi ka za hae. Lu kana hape lwa tokwa ku nahana za mwa ku tahiseza likalulo ze ñwi za taba yeo ha lu zwelapili ku n’o pota. Nihakulicwalo, ku kana kwa sa konahala ku talusa zote ze amiwa ku fitela lu zamaisa tuto ya Bibele ya mwa ndu ku mutu.—1 Tim. 2:3-7.

Za Butokwa Z’a Peta Jesu mwa Mulelo wa Mulimu. Lu tokwa ku tusa batu ku utwisisa kuli, kakuli Jesu ki yena “nzila” mi ‘ha ku na mutu ya ka taha ku Ndate, konji ka yena,’ ha ku konahali ku lumelelwa ku ba mulikan’a Mulimu mutu a sa lumeli ku Jesu Kreste. (Joa. 14:6) Haiba mutu a sa lemuhi musebezi wa butokwa w’o Jehova a file Mwan’a hae wa mweli, ha ku konahali ku utwisisa Bibele. Libaka? Kakuli Jehova n’a ezize Mwana y’o ku ba yena mutomo wa talelezo ya milelo ya Hae kaufela. (Makolo. 1:17-20) Bupolofita bwa Bibele bu tomile fa taba yeo. (Sin. 19:10) Jesu Kreste ki yena y’o ka yena ku ka tatululwa matata kaufela a’ labuzwi ki kwenuho ya Satani ni sibi sa Adama.—Maheb. 2:5-9, 14, 15.

Kuli mutu a utwisise musebezi wa Kreste, u lukela ku lumela kuli batu ba mwa bumai bo butuna bo ba sa koni ku ikayutula teñi. Kaufel’a luna lu pepwa mwa sibi. Nto yeo i kona ku lu ama ka linzila ze shutana-shutana mwa bupilo bwa luna kaufela. Kono kwa nalulelule, i tahisa lifu. (Maro. 3:23; 5:12) Mu tuse be mu kutaza ku utwisisa taba yeo. Ku tuha f’o mu taluse kuli ka sitabelo sa tiululo sa Jesu Kreste, Jehova ka lilato u tahisize tukuluho kwa sibi ni lifu ku ba ba bonisa tumelo mwa tukiso yeo. (Mare. 10:45; Maheb. 2:9) Seo si ba fa kolo ya ku t’o pila bupilo bo bu sa feli ili bo bu petehile. (Joa. 3:16, 36) Ha ku na mukwa o muñwi o konahalisa seo. (Lik. 4:12) Ka ku ba muluti, ibe wa mutu kamba puteho, mu si ciñekeli fela fa ku bulela litaba zeo. Ka sishemo ni pilu-telele, mu suñe mwa lipilu za bateelezi ba mina moya wa buitumelo kwa musebezi wa Kreste wa ku ba Muliululi wa luna. Buitumelo kwa tukiso yeo bu kona ku ama hahulu moya, muzamao, ni milelo ya mutu mwa bupilo.—2 Makor. 5:14, 15.

Ki niti kuli Jesu n’a itombozi bupilo bwa hae ku bu eza sitabelo hañwi fela. (Maheb. 9:28) Nihakulicwalo, u sweli musebezi wa ku ba Muprisita yo Mutuna cwale. Mu tuse ba bañwi ku utwisisa se i talusa taba yeo. Kana ba mwa ñalelwa, ba swabile, ba nyanda, kamba ba mwa butata kabakala kutokwa musa kwa batu be ba pila ni bona? Jesu ha n’a li mutu inge luna, n’a ipumani ku zona zeo kaufela. Wa ziba mo lu ikutwela. Kabakala ku sa petahala, kana lu ikutwa kuli lu tokwa musa wa Mulimu? Haiba lu lapela ku Mulimu kuli a lu swalele ka mutomo wa sitabelo sa Jesu, Jesu u ba “Muyemeli fapil’a Ndate.” Ka mufelañeke, wa “lu lapelela.” (1 Joa. 2:1, 2; Maro. 8:34) Ki ka sitabelo sa Jesu ni lisebelezo za hae za ku ba Muprisita yo Mutuna lu kona ku sutelela kwa “lubona lwa sishemo” lwa Jehova kuli lu fumane tuso mwa nako ye swanela. (Maheb. 4:15, 16) Nihaike kuli ha lu si ka petahala, tuso y’a fa Jesu sina Muprisita yo Mutuna i lu konisa ku sebeleza Mulimu ka lizwalo le li kenile.—Maheb. 9:13, 14.

Hape, Jesu u eza ka m’ata a matuna ka ku ba yena y’o Mulimu a ketile ku ba Toho ya puteho ya Sikreste. (Mat. 28:18; Maef. 1:22, 23) Kacwalo, u fa ketelelo ye tokwahala ili ye lumelelana ni tato ya Mulimu. Ha mu luta ba bañwi, mu ba tuse ku utwisisa kuli Jesu Kreste ki yena Toho ya puteho, isiñi mutu wa fa lifasi. (Mat. 23:10) Ku zwelela fo mu kopanela lwa pili ni batu ba ba tabela niti, mu ba memele kwa mikopano ya puteho ya mwa silalanda, ko lu ituta Bibele ka ku itusisa lihatiso ze lukisizwe ka “mutanga ya sepahala, ya na ni kutwisiso.” Mu si ba talusezi fela kuli “mutanga” y’o ki mañi; mu taluse hape kuli Mulena ki mañi ilikuli ba zibe za butoho bwa Jesu. (Mat. 24:45-47) Mu ba zibahaze kwa maeluda, mi mu taluse lipimo za mwa Mañolo ze ba swanela ku kwanisa maeluda. (1 Tim. 3:1-7; Tite 1:5-9) Mu ba taluseze kuli puteho haki ya maeluda kono kuli ba lu tusa ku zamaya mwa mihato ya Jesu Kreste. (Lik. 20:28; Maef. 4:16; 1 Pit. 5:2, 3) Mu tuse ba ba tabela bao ku bona kuli ku na ni kopano ye swalisani hande, ya mwa lifasi kaufela, ye sebeza mwatas’a butoho bwa Kreste.

Mwa Libuka za Evangeli, lu ituta kuli Jesu ha n’a keni mwa Jerusalema nakonyana pili a si ka shwa kale, balutiwa ba hae ne ba shaezi kuli ki Yena “Muywandi ya taha ka Libizo la Mulena.” (Luka 19:38) Batu ha ba nze ba zwelapili ku ituta Bibele mwa butungi, ba ituta kuli Jehova ki kale a fa Jesu m’ata a ku busa a’ ama batu ba macaba kaufela. (Dan. 7:13, 14) Ha mu fa lingambolo mwa puteho kamba ku zamaisa lituto, mu tuse batu ku utwisisa ni ku itebuha mo i swanela ku lu amela puso ya Jesu.

Mu koñomeke kuli mupilelo wa luna u bonisa za haiba lwa lumela luli kuli Jesu Kreste ki Mulena ni kuli lwa ipeya ka ku itatela kwatas’a puso ya hae. Mu taluse za musebezi w’o Jesu, ha s’a tozizwe ku ba Mulena, n’a file balateleli ba hae kuli ba u eze. (Mat. 24:14; 28:18-20) Mu bulele zeo Jesu, Muelezi, n’a bulezi ka za ze swanela ku ba za butokwa hahulu mwa bupilo. (Isa. 9:6, 7; Mat. 6:19-34) Mu bulele za moya w’o Mulena wa Kozo n’a bulezi kuli balateleli ba hae ne ba ka u bonisa. (Mat. 20:25-27; Joa. 13:35) Mu tokomele kuli ha mu ipi m’ata a ku atula za haiba batu ba bañwi ba eza mo ba swanela ku ezeza, kono mu ba susueze ku alakanya ze li bonisa likezo za bona ka za buipeyo bwa bona kwa bulena bwa Kreste. Ha mu nze mu eza cwalo, mu itumelele kuli ni mina mu tokwa ku eza nto ye swana.

Ku Toma Kreste Sina Mutomo. Bibele i likanyeza musebezi wa ku tahisa mulutiwa wa Sikreste kwa ku yaha muyaho fa mutomo, kikuli Jesu Kreste. (1 Makor. 3:10-15) Kuli mu pete nto yeo, mu tuse batu ku ziba Jesu ka mw’a taluselizwe mwa Bibele. Mu tokomele kuli ba si ke ba m’i nga ku ba mina ye ba latelela. (1 Makor. 3:4-7) Mu libise mamelelo ya bona ku Jesu Kreste.

Haiba mutomo u tomilwe hande, baituti ba ka utwisisa kuli Kreste n’a lu siyezi mutala “kuli [lu] hate mw’a n’a hatile.” (1 Pit. 2:21) Kuli mu yahele fa taba yeo, mu susueze baituti ku bala Libuka za Evangeli isi fela inge kuli ki litaba za niti ze ezahezi kono kuli ki mutala wa ku latelela. Mu ba tuse ku hupula moya ni mikwa ya n’a na ni yona Jesu. Mu ba susueze ku lemuha mwa n’a ikutwela Jesu ka za Ndat’ahe, mwa n’a tulezi miliko, mwa n’a boniselize buipeyo ku Mulimu, ni mwa n’a ezelize batu mwa miinelo ye shutana-shutana. Mu taluse ka ku koñomeka musebezi wa n’a tukufalezwi Jesu mwa bupilo bwa hae. Mi muituti h’a libilwe ki litiko ni likatulo za ku eza mwa bupilo, u ka ipuza kuli: ‘Jesu n’a ka ezañi mwa muinelo wo? Kana keto ya ka i ka bonisa buitebuho sakata ku z’a ni ezelize?’

Ha mu bulela fapil’a puteho, mu si nahani kuli bakeñisa kuli mizwale ba mina ba lumezi kale ku Jesu, ha ku tokwahali ku libisa mamelelo ye ipitezi ku yena. Ze mu bulela li ka ba za butokwa hahulu haiba mu yahela fa tumelo yeo. Ha mu bulela za mikopano, mu li swalisanise kwa musebezi wa Jesu wa ku ba Toho ya puteho. Ha mu bulela za bukombwa bwa mwa simu, mu taluse za moya wa n’a bonisize Jesu ha n’a eza bukombwa bwa hae, mi mu bulele za bukombwa ka ku hupula zeo Kreste ka ku ba Mulena a sweli ku eza mwa ku kubukanya batu ba ba ka punyuha ni ku kena mwa lifasi le linca.

Kwa iponelwa hande kuli ku tokwahala ze ñata ku fita ku ituta fela litaba za matatekelo ka za Jesu. Kuli batu ba be Bakreste sakata, ba lukela ku bonisa tumelo ku yena ni ku mu lata luli. Lilato le li cwalo li ba susumeza ku sepahala ni ku ipeya ku utwa. (Joa. 14:15, 21) Li konisa batu ku tiya mwa tumelo ha ba li mwa likayamana, ku zwelapili ku zamaya mwa mihato ya Kreste mwa bupilo bwa bona kaufela, ku bonisa kuli ki Bakreste ba ba buzwize ili ba ba “hulile . . . ni ku tiya mwateñi.” (Maef. 3:17) Mupilelo o cwalo u tahisa tumbo ku Jehova, yena Mulimu ili Ndat’ahe Jesu Kreste.

JESU ha n’a fa tunango ka za sisupo sa ku ba teñi kwa hae ni mafelelezo a muinelo wa linto, n’a bulezi cimo kuli: “Evangeli ye ya mubuso i ka bulelwa mwa lifasi kaufela, ibe bupaki mwa macaba kamukana; kihona ku ka taha mafelelezo.”—Mat. 24:14.

Kanti ki ifi luli yona taba yeo ye ka shaelwa hahulu cwalo? Ki taba ka za Mubuso w’o Jesu n’a lu lutile ku u lapelela ku Mulimu, kuli: “Ku tahe mubuso wa hao.” (Mat. 6:10) Sinulo 11:15 i u talusa ku ba “mubuso wa Mulen’a luna [Jehova], ni wa Kreste wa hae” kakuli m’ata a ku busa a zwa ku Jehova mi a filwe Kreste yena Mulena. Kono mu lemuhe kuli taba ya n’a bulezi Jesu kuli i ka shaelwa mwa mazazi a luna ki ye tuna ku fita ye ne ba shaezi balateleli ba hae mwa lilimo za mwanda wa pili. Ne ba bulelela batu kuli: “Mubuso wa Mulimu u sutelezi fakaufi ni mina.” (Luka 10:9) Jesu, yena ya tozizwe kuli a be Mulena, n’a li mwahal’a bona ka nako yeo. Kono ka mo ku ñolezwi kwa Mateu 24:14, Jesu n’a polofitile za ku zibahazwa kwa mwa lifasi kaufela kwa nto ye ñwi mwa talelezo ya mulelo wa Mulimu.

Mupolofita Daniele n’a filwe pono ya nto yeo. N’a boni “yo muñwi ya swana sina mwan’a mutu,” Jesu Kreste. N’a mu boni inz’a fiwa ki Jehova Mulimu “Yo Muhulu wa Mazazi” “bulena, kanya, ni mubuso, kuli ba mishobo kaufela, ni ba macaba, ni ba lipuo kaufela ba t’o mu sebeleza.” (Dan. 7:13, 14) Nto yeo ya butokwa mwa pupo kamukana ne i ezahezi mwa lihalimu ka 1914. Ku tuha f’o, Diabulosi ni badimona ba hae ba kunupelwa fa lifasi. (Sin. 12:7-10) Muinelo wa linto wa kale wa kena mwa mazazi a ona a maungulo. Kono pili u si ka zwiselezwa kale, mushaa wa mwa lifasi kaufela u sweli wa ezwa wa kuli Mulena yena Mesiya wa Mulimu cwale u busa a li fa lubona lwa hae lwa kwa lihalimu. Batu kai ni kai ba sweli ku lemuswa. Muhato o b’a nga teñi u bonisa mo b’a ngela Muambakani ya Pahami, yena Mubusi “ya na ni mubuso fahalimu a bulena bwa batu.”—Dan. 4:32.

Ki niti, ku sa taha ze ñwi—ze ñata! Lu sa lapela kuli “Ku tahe mubuso wa hao,” kono haki ka muhupulo wa kuli ku tomwa kwa Mubuso wa Mulimu ku sa li kwapili. Kono ki ka muhupulo wa kuli Mubuso wa kwa lihalimu u k’a nga muhato wa ku puma litaba kuli u taleleze bupolofita bo bu cwale ka bo bu kwa Daniele 2:44 ni Sinulo 21:2-4. U ka fetula lifasi-mubu ku li eza paradaisi mo ku tezi batu ba ba lata Mulimu ni batu ba bañwi. Ha lu nze lu bulela “Evangeli ye ya mubuso,” lu talusa ni lika zeo ze ka ezahala kwapili. Kono hape lu zibahaza ka buikolwiso kuli Jehova ki kale a fa Mwan’a hae m’ata a tezi a ku busa. Kana mwa kanatelanga fa taba ye nde yeo ha mu kutaza za Mubuso?

Ku Talusa Mubuso. Lu kona ku peta cwañi musebezi wa luna wa ku shaela Mubuso wa Mulimu? Lu kana lwa zusulusa cisehelo ya batu ka ku kalisa lipuhisano ze ama litaba ze shutana-shutana, kono kapili ba swanela ku bona hande kuli taba ya luna i ama Mubuso wa Mulimu.

Kalulo ya butokwa ya musebezi w’o i ama ku bala kamba ku bulela fela manzwi a mañolo a’ bulela za Mubuso. Ha mu ama kwa Mubuso, mu bone teñi kuli be mu ambota ba utwisisa s’o li sona. Ku kana kwa tokwahala ze ñwi ku fita fela ku bulela kuli Mubuso wa Mulimu ki mulonga. Batu ba bañwi ba kana ba fumana t’ata ku nahana kuli nto ye sa bonahali i kona ku ba mulonga. Mwa kona ku ba tusa ku nahanisisa fa taba yeo ka linzila ze shutana-shutana. Ka mutala, m’ata a’ hohela lika fafasi h’a bonahali, kono a ama hahulu bupilo bwa luna. Ha lu koni ku bona Yena ya n’a tomile mulao wa m’ata a hohela lika fafasi, kono kwa iponelwa hande kuli yena y’o u na ni m’ata a matuna. Bibele i mu bulela kuli ki “Mulena wa kamita.” (1 Tim. 1:17) Kamba mu kana mwa talusa kuli mwa naha ye tuna, batu ba bañata ba li ku simwa ba potele muleneñi wa yona kamba ku bona mubusi wa bona ka sibili. Ba ziba za teñi ka lipiho za makande. Ka ku swana, Bibele, ye hasanyizwe mwa lipuo ze fitelela 2,200, i lu bulelela ka za Mubuso wa Mulimu; i lu zibisa ya filwe m’ata ni z’o eza Mubuso. Tora ya ku Libelela, ye hasanywa mwa lipuo ze ñata ku fita limagazini ze ñwi kaufela, i lukiselizwe ku “Hasanya Mubuso wa Jehova,” ka mo ku bulelezwi fahalimu a yona.

Kuli mu tuse batu ku utwisisa kuli Mubuso w’o u cwañi, mwa kona ku punda ze ñwi za lika ze ba bata kuli milonga i ba fe: ili buiketo ku za mali, kozo, tukuluho kwa bukebenga, ku eza hande batu ba mishobo kaufela, ku kena sikolo, ni ku fa likalafo. Mu bonise kuli ki ka Mubuso wa Mulimu fela batu ba ka kwaniselezwa mwa linto zeo ni litakazo ze ñwi ze nde za batu.—Samu 145:16.

Mu like ku kenya mwa lipilu za batu takazo ya ku ba babusiwa ba Mubuso, mw’a busa Jesu Kreste. Mu taluse kuli limakazo za n’a ezize ki muleukela wa z’a ka eza a li Mulena wa kwa lihalimu. Mu bulelange hañata ka za mikwa ye minde ya n’a bonisize. (Mat. 8:2, 3; 11:28-30) Mu taluse kuli n’a lu shwezi ni kuli hasamulaho Mulimu a mu zusa kwa bafu ku y’o ba ni bupilo bo bu sa koni ku shwa mwa lihalimu. K’o ki kona kw’a buseza.—Lik. 2:29-35.

Mu koñomeke kuli Mubuso wa Mulimu cwale u buseza kwa lihalimu. Kono mu hupule kuli buñata bwa batu ha ba boni miinelo ye ba nahana kuli neikaba bupaki bwa puso ye cwalo. Mu bulele kuli ku cwalo, mi mu ba buze haiba ba ziba zeo Jesu Kreste n’a bulezi kuli neikaba sisupo sa teñi. Mu bulele ze ñwi za litaba za sisupo se si ama lika ze ñata ze kwa Mateu kauhanyo 24, Mareka kauhanyo 13, kamba Luka kauhanyo 21. Ku tuha f’o mu buze libaka ku fiwa bulena kwa Kreste mwa lihalimu ha ne ku ka tahisa lika ze cwalo fa lifasi. Mu itusise Sinulo 12:7-10, 12.

Kuli mu fe bupaki bo bu iponelwa ka za z’o eza Mubuso wa Mulimu cwale, mu bale Mateu 24:14, mi mu taluse tukiso ya mwa lifasi kaufela ye ezahala cwale ya ku luta Bibele. (Isa. 54:13) Mu bulelele batu ka za likolo ze shutana-shutana ze tusa Lipaki za Jehova—ze tomile fa Bibele kaufela zona, ili ze ezwa ku si na ku lifisa. Mu taluse kuli kwand’a bukombwa bwa luna bwa fa ndu ni ndu, ili mwa linaha ze fitelela 230, lu lutanga batu ni mabasi Bibele fa ndu ku si na tifo. Ki ufi mulonga wa butu o kona ku lukisa tukiso ye tuna cwalo ya lituto isi fela kwa babusiwa ba ona kono ni batu kai ni kai mwa lifasi? Mu meme batu ku taha kwa Ndu ya Mubuso, ku ba kwa mikopano ya mupotoloho ni ya sikiliti ya Lipaki za Jehova, kuli ba bone bupaki bwa m’o lituto zeo li amela bupilo bwa batu.—Isa. 2:2-4; 32:1, 17; Joa. 13:35.

Kono kana muñ’a ndu u ka lemuha mo bu amelwa bupilo bwa hae? Mwa kona ku talusa ka maseme kuli mulelo wa mina wa ku pota kikuli mu buhisane za kolo ye filwe bote ya ku keta ku pila mwa puso ya Mubuso wa Mulimu. Ka nzila ifi? Ka ku ituta z’a tokwa Mulimu ni ku pila ka zona cwale.—Deut. 30:19, 20; Sin. 22:17.

Ku Tusa Ba Bañwi ku Bata Pili za Mubuso. Mutu niha s’a amuhezi taba ya za Mubuso, u na ni likatulo za ku eza. U k’a nga ka butokwa cwañi Mubuso wa Mulimu mwa bupilo bwa hae? Jesu n’a elelize balutiwa ba hae kuli ba “tundamene ku bata pili mubuso.” (Mat. 6:33, NW) Lu kona ku tusa cwañi Bakreste ba bañwi ku eza cwalo? Ka ku toma mutala o munde luna beñi ni ka ku buhisana kolo kaufela ye li teñi ya ku eza zwelopili. Fokuñwi, ka ku buza mutu haiba u nahanile fa lika ze ñwi ze konahala ni ka ku ambola ni yena lika ze ezahezi kuli mu bonise ze ba eza ba bañwi. Ka ku ambola litaba za mwa Bibele ka mukwa o tahisa kuli li tungise lilato la mutu ku Jehova. Ka ku koñomeka kuli Mubuso ki wa luli. Ka ku koñomeka butokwa bwa musebezi wa ku shaela za Mubuso. Hañata, se sinde ka ku fitisisa ki ha mu suña kwa batu takazo ya ku eza lika ze tokwa ku ezwa, isi ku ba bulelela fela zona.

Ku si na kuli cwañi, taba ya butokwa yeo kaufel’a luna lu lukela ku shaela i kanatela sihulu ku Jehova Mulimu, Jesu Kreste, ni Mubuso. Litaba za niti za butokwa ka za teñi li swanela ku koñomekwa mwa bukutazi bwa luna bwa fa nyangela, mwa liputeho za luna, ni mwa bupilo bwa luna ka sibili. Ha lu eza cwalo, lu bonisa kuli kaniti luli lwa tuseha ka lituto za luna za Sikolo sa Bukombwa sa Teokratiki.