“Si Tezi Mabizo A Ku Nyefula”

BUKA ya Bibele ya Sinulo i talusa ka za pono ya ka za “sibatana se si fubelu, se si tezi mabizo a ku nyefula.” Si fita fa ku ba teñi ka nakonyana, mi cwale si ya mwa mukoti ili m’o hamulaho si fita fa ku longoka mwa teñi. (Sinulo 17:3, 8) Hañata-ñata, makepe a yona magazini ye a se a zibahalize sona sibatana se si fubelu seo, kwa makalelo, sina League of Nations mi, hamulaho, sina muyoli wa yona, ili Kopano ya Bamacaba. Kono ki kabakalañi sona sibatana se si fubelu seo ha si bulelwa kuli “si tezi mabizo a ku nyefula”?

Mayemo a Tumelelano ya pili ya League of Nations, ka ku toma fa liakalezo za Britain hamohocwalo ni America, n’a zibahalizwe kwa nyangela la February 14, 1919. Lizazi le li tatama, fa kalulo ye ne i na ni toho ya taba ye li “The League of Peace” (Kopano ya Kozo), The Times ya London ne i talusize kuli: “Ki nto ye tisa munyaka o mutuna ku itemuhela mwa Tumelelano musebezi o mutuna wa batu ba ba bulela Sikuwa. . . . Lu itakaleza ku bulela kuli ki taba ye butokwa ka ku fitisisa mwahal’a macaba ku ze hatisizwe kamukana haisali.” George Thayer, yo muhulu wa keleke ye bizwa First Congregational Church ya Cincinnati mwa United States, n’a i talusize sina “zibahazo ye mutomo ka ku fitisisa ya tato ni takazo ya batu ba ba monyehezwi ba fa lifasi-mubu ye se i beilwe fa pampili haisali.” Tumbo hape ne i zwelela kwa lihatiso za malimi a sili. “Haki Bibele,” ko na mo ne u taluselize mutende wa Sifura L’Homme Libre, “kono ki ku ba ni m’ata a fita seo, kakuli Bibele, kamba Mukutazi wa evangeli ufi kamba ufi ni kamuta ha li si ka tibela batu mwa ku bulayana. Mihupulo ye petehile ki yona ye tahisa sika ka sibili.” Mutende wa Sifura Victoire ne u talusize seo sina “muhato wa ka nañungelele o mutuna ka ku fitisisa o ezizwe ku zwa kwa makalelo a lifasi kwa neku la ku toma nahanisiso ni katulo ye lukile fa lifasi-mubu.”

Hamulaho wa ku tomiwa kwa League of Nations, General Jan Smuts, yo muñwi wa bayemeli ba Britain fa katengo kao, n’a ñozi kuli: “Tumelelano ki ye ñwi ya litaba ze tuna ze yahisa mwa litaba za kwaikale za mufuta wa mutu. . . . I lukela ku kondisa lika, kakuli ha ku na nzila i sili kwa neku la bupilo bwa kwapili bwa zwelopili. . . . Macaba a’ si ka kena kale mwa tumelelano ye a ka fita fa ku wela mwamulaho li li liñwi ka li li liñwi ili ku latelela sona sisupo seo mufuta wa mutu u taha mwatas’a sona ka ku nga muhato wa ku ya fapili ka tulo ya kopano ya kozo ni ku kondisa.”

Zona litibelelo za mufuta o cwalo kaufela ne li fumanehile ku ba za mbwashula Ndwa ya Lifasi ya II ha ne i tumbukile ka 1939. Kopano ya League ne i palezwi. Ne li kopano fela ya butu ili ye ne i ezizwe ki batu ba ba si ka petahala. Ki nto ye swana ni ku muyoli wa yona, Kopano ya Bamacaba. Niteñi, fa lizazi le ne i nyatezwi Tumelelano ya ka Mulao ya UN, kalulo ya mwa mutende wa The New York Times ne i talusize yona kopano yeo sina “kota ya kozo” ni ku bulela kuli, “Sepo ye tuna i pepilwe . . . Lika ze tuna li ka be li fitile fa ku ba teñi.” Ka ku swana, bahulu ba bulapeli ba se ba bizize UN sina “sepo ye mutomo” ya kozo ni “sepo ya mafelelezo.”

Ku bulela kuli likopano za butu li ka taleleza lika ili zeo ki Mubuso wa Mulimu fela o kona ku li peta ki nyefulo. Kacwalo, Bibele i talusa kuli hamulaho wa ku ba teñi ka nakonyana, Kopano ya Bamacaba i ka “shwelela.” Ki mulonga wa Mulimu fela o petehile ili wa lihalimu o kona ku tisa kozo ya ku ya ku ile kwa mufuta wa mutu.—Sinulo 17:11, 12; Isaya 9:6, 7; Daniele 2:44.