Mu Tabe ka Sepo ya Mubuso!

“Mu tabe ka sepo; mu itiise mwa manyando.”—MAROMA 12:12.

 1. Ki kabakalañi ha lu kona ku fumana tabo mwa swalisano ni Jehova, mi ki sifi seo muapositola Paulusi n’a susuelize Bakreste ku si eza?

“MULIMU ya tabile.” (1 Timotea 1:11, NW) Seo si talusa hakalo Jehova! Ki kabakalañi? Kakuli misebezi ya hae kaufela i tahisa tabo ku yena. Bakeñisa kuli Jehova ki yena Simbule sa lika kaufela ze nde ni ze tabisa, libupiwa za hae kaufela ze butali li kona ku fumana tabo mwa swalisano ya zona ni yena. Ka ku swanela, muapositola Paulusi n’a susuelize Bakreste ku lebuha tohonolo ya bona ye tabisa ya ku ziba Jehova Mulimu, ku itumela kwa neku la limpo za Hae kaufela ze makalisa za pupo, ni ku ba ni tabo mwa lilato le li sishemo leo Yena a ba bonisa. Paulusi n’a ñozi kuli: “Mu be ba ba tabile kamita ku Mulena; hape ni kutela ni li: Mu be ba ba tabile.”—Mafilipi 4:4; Samu 104:31.

 2. Ki sepo mañi ye tahisa tabo ye tuna, mi ki sifi seo Bakreste ba susuezwa ku eza kwa neku la sepo yeo?

² Kana Bakreste b’a utwa kelezo ye ya n’a file Paulusi? Ka mo ku inezi fela ba eza cwalo! Banyani ba Jesu Kreste ba kwa moya ki ba ba tabile mwa sepo ye kanya yeo Mulimu a ba tahiseza. (Maroma 8:19-21; Mafilipi 3:20, 21) Ee, ba ziba kuli ba ka abana mwa ku taleleza sepo ye tuna ya nako ya kwapili ya mufuta wa mutu, ili ba ba pila ni ba ba shwile, ka ku sebeza ni Kreste mwa mulonga wa Mubuso wa hae wa lihalimu. Mu hupule ka m’o ba ka bela ba ba tabile hakalo mwa matohonolo a bona sina bacalifa hamoho, ba ba sebeza sina malena ni baprisita! (Sinulo 20:6) Ki tabo hakalo yeo ba ka ba ni yona ha ba nze ba tusa mufuta wa mutu o’ sepahala ku fita fa bupetehi ni ku tusa mwa ku etelela ku kutiswa sinca kwa Paradaisi mwa lifasi-mubu la luna! Ka niti, batanga ba Mulimu kaufela ba na ni “sepo ya bupilo bo bu sa feli, bo bu sepisizwe ki Mulimu ya sa koni ku puma, pili, lifasi li si ka ezwa kale.” (Tite 1:2) Ka ku ba ni sepo ye tuna ye, muapositola Paulusi u susueza Bakreste kaufela kuli: “Mu tabe ka sepo.”—Maroma 12:12.a

Tabo ya Niti—Kalemeno ka mwa Pilu

 3, 4. (a) Ki sifi seo pulelo ya “ku taba” i si talusa, mi Bakreste ba swanela ku taba hañata mo ku kuma kai? (b) Tabo ya niti ki sikamañi, mi i itingile fa sikamañi?

³ “Ku taba” ku talusa ku utwa tabo ni ku i bonisa; ha ku talusi ku ba mwa muinelo wa maikuto a munyaka o fitelela tikanyo, kamba ku taba ko kutuna. Manzwi a muinelo wa ku talusa ku eza sika a’ likanelela ni manzwi a Siheberu ni a Sigerike a’ itusisizwe mwa Bibele sina “tabo,” “nyakalalo,” ni “ku ikutwa ku taba” a talusa maikuto a mwahali ni poniso ya kwande ya tabo. Bakreste ba susuezwa kuli ba ‘ine ba tabile,’ “mu be ba ba tabile kamita.”—2 Makorinte 13:11; 1 Matesalonika 5:16.

⁴ Kono mutu u kona cwañi ku ba ya tabile kamita? Seo s’a konahala kakuli tabo ya niti ki kalemeno ka mwa pilu, kalemeno ka ka tungile ka mwahali, ili ka kwa moya. (Deuteronoma 28:47; Liproverbia 15:13; 17:22) Ki muselo wa moya wa Mulimu, o beilwe ki Paulusi fa mukoloko hamulaho fela wa lilato. (Magalata 5:22) Sina kalemeno ka mwahali, ha i itingi fa lika za kw’ande, mane nihaili fa mizwale ba luna. Kono ki ye itinga fa moya wa Mulimu o kenile. Mi i zwelela fa ku ikolwisa kwa mwahali kwa ku ziba kuli mu na ni niti, sepo ya Mubuso, mi ni kuli mu eza se si tabisa Jehova. Kacwalo, tabo haki mukwa fela wa butu o lu pepilwe ni ona; ki kalulo ya “mutu yo munca,” ili sishañata sa tulemeno to ne tu tahisize kuli Jesu Kreste a zwe mubano.—Maefese 4:24; Makolose 3:10.

 5. Liponahazo za kw’ande za tabo ne li kana za ba teñi l’ili mi ki kamukwaufi?

⁵ Nihaili kuli tabo ki kalemeno ka mwa pilu ya swanisezo, ne ka kana ka boniswa kw’ande ka linako ze ñwi. Ki lifi zona liponahazo za tabo zeo, za ka linako ze ñwi? Li kona ku ba nto ifi kamba ifi mwahal’a buiketo bwa ponahalo ya pata ni ku takisa luli bakeñisa tabo. (1 Malena 1:40; Luka 1:44; Likezo 3:8; 6:15) Kana seo, cwalehe, si talusa kuli batu ba ba si bokamundengule kamba ba ba sa menyi ka nako kaufela ha ba na tabo? Ku tokwa! Tabo ya niti ha i iponahazi mwa ku zwelapili ku mbombola, ku seha, ku menya, kamba ku menya ka ku bonahalisa meno fela. Miinelo i tahisanga kuli tabo i iponahaze mwa linzila ze fapahana-fapahana. Haki tabo fela i nosi ye lu bisanga ba ba silikani kwa Ndu ya Mubuso kono, ka ku fapahana, ki lilato la luna la sizwale ni lilato ka nañungelele.

 6. Ki kabakalañi Bakreste ha ba kona ku ba ni tabo kamita mane niha ba talimana ni miinelo ye s’a tabisi?

⁶ Kalulo ye s’a cinci ya tabo ki ku zwelapili ku ba teñi kwa yona mwahali sina muinelo o buniti wa butu bo bunca bwa Mukreste. Seo ki sona se si konahalisa ku ba ni tabo kamita. Ka mo ku inezi fela, ka linako ze ñwi ne lu kana lwa filikana bakeñisa nto ye ñwi, kamba ne lu kana lwa talimana ni miinelo ye sa tabisi. Kono niteñi lwa kona ku ba ni tabo mwa pilu ya luna. Bakreste ba bañwi ba kwa makalelo n’e li batanga, ba ne ba na ni malena ba ne ba li t’ata ku ba tabisa. Kana Bakreste ba ba cwalo ne ba kona ku ba ni tabo kamita? Ee, bakeñisa sepo ya bona ya Mubuso ni tabo ye mwa lipilu za bona.—Joani 15:11; 16:24; 17:13.

 7. (a) Ki sifi seo Jesu n’a si bulezi ka za tabo mwa manyando? (b) Ki sifi se si lu tusa ku itiisa mwa manyando, mi ki mañi ya n’a file mutala o munde ka ku fitisisa kwa neku la seo?

⁷ Hamulaho fela wa ku bulela kwa muapositola Paulusi kuli: “Mu tabe ka sepo,” n’a ekelize kuli: “Mu itiise mwa manyando.” (Maroma 12:12) Jesu hape n’a bulezi ka za tabo mwa manyando ha n’a bulezi kwa Mateu 5:11, 12 kuli: “Mu ka ba ni [tabo, NW] ha ba mi tapaula . . . ha ba mi nyandisa . . . Mu wabelwe mi mu nyakalale, kakuli mupuzo wa mina ikaba o mutuna kwa lihalimu.” Ku wabelwa ni ku nyakalala ka tabo k’o ha ku tokwi ku ba ponahazo tota ya kwande; sihulu-hulu ki buikolwiso bo bu tungile bwa mwahali b’o mutu a na ni bona mwa ku tabisa Jehova ni Jesu Kreste muta a itiisa mwa muliko. (Likezo 5:41) Ka mo ku inezi luli, ki tabo y’e lu tusanga mwa ku itiisa ha lu li mwa manyando. (1 Matesalonika 1:6) Kwa neku la seo, Jesu n’a file mutala o munde ka ku fitisisa. Mañolo a lu bulelela kuli: “Kabakala tabo y’a n’a beezwi kwapili, Jesu a itiisa kwa [kota ya linyando, NW].”—Maheberu 12:2.

Ku Taba ka Sepo Ku Si Na Taba ni Butata

 8. Ki butata bufi b’o Bakreste ne ba kana ba talimana ni bona, kono ki kabakalañi butata ha bu s’a felisi tabo ya Mukreste?

⁸ Ku ba mutang’a Jehova ha ku lukululi mutu kwa butata. Ne ku kana kwa ba ni butata bwa mwa lubasi, butata bwa za masheleñi, mapongo, kamba lifu la balatiwa. Hailif’o lika ze cwalo li kona ku tisa masitapilu, ha li zwisi teñi mutomo wa luna wa ku taba ka sepo ya Mubuso, tabo ya mwahali ye lu na ni yona mwa pilu ya luna.—1 Matesalonika 4:13.

 9. Ki butata bufi bwa n’a na ni bona Abrahama, mi lu ziba cwañi kuli n’a na ni tabo mwa pilu ya hae?

⁹ Sina ka mutala, mu nahanisise Abrahama. Bupilo n’e si bo ne bu tabisa ku yena ka nako kaufela. N’a na ni butata bwa mwa lubasi. Siendi sa hae, Hagare, ni musal’a hae, Sara, ne ba sa pilisani hande. Ne ku na ni likomano. (Genese 16:4, 5) Ishimaele n’a seha Isaka ka ku sheununa, ni ku mu nyandisa. (Genese 21:8, 9; Magalata 4:29) Kwa mafelelezo, musal’a Abrahama ya latiwa, Sara, a shwa. (Genese 23:2) Ku si na taba ni butata bo, n’a bile ni tabo ka sepo ya Peu ya Mubuso, yona Peu ya Abrahama, yeo ka yona macaba kamukana a lifasi-mubu n’a ka fiwa mbuyoti. (Genese 22:15-18) Ka ku ba ni tabo mwa pilu ya hae, n’a itiisize mwa sebelezo ya Jehova ka lilimo ze mwanda hamulaho wa ku zwa mwa muleneñi wahabo wa Ure. Kacwalo ku ñozwi ka za hae kuli: “N’a talimezi munzi o na ni mitomo ya niti, o Mulali ni Muyahi wa ona ki Mulimu.” Bakeñisa tumelo ya Abrahama mwa Mubuso wa Bumesiya o n’o sa taha, Mulena Jesu, ha s’a ketilwe kale ki Mulimu ku ba Mulena, n’a kona ku bulela kuli: “Abrahama u nyakalezi kuli n’a ka bona lizazi la ka; u li boni, mi u li tabezi.”—Maheberu 11:10; Joani 8:56.

10, 11. (a) Ki ndwa mañi yeo luna sina Bakreste lu na ni yona, mi lu yangwelwa cwañi? (b) Ki sikamañi se si lu tusa mwa ku tokwa buikoneli kwa luna mwa ku lwana ndwa ya ku lwanisa mubili wa luna o’na ni sibi ka nzila ye petehile?

¹⁰ Ka ku ba batu ba ba si ka petahala, lu na ni ku lwanisana hape ni mibili ya luna ye mwa sibi, mi yona ndwa ye ya ku eza se si lukile i kona ku ba ye zwafisa hahulu. Nihakulicwalo, ndwa ya luna ya ku lwanisa mifokolo ya luna, ha i talusi kuli ha lu na sepo. Paulusi n’a ikutwile ku ba ya swabile ka yona ndwa ye, mi n’a bulezi kuli: “Ki mañi ya ka ni liulula kwa mubili wo wa lifu? N’itumezi ku Mulimu, ka Jesu Kreste Mulen’a luna.” (Maroma 7: 24, 25) Ka Jesu Kreste ni tiululo ya n’a file, lwa yangwelwa.—Maroma 5:19-21.

¹¹ Sitabelo sa Kreste sa tiululo sa lu tusa mwa bufokoli bwa luna bwa ku sa kona ku lwana ndwa yeo ka nzila ye petehile. Lwa kona ku ba ni tabo ka tiululo yeo kakuli i konahalisa kuli lu be ni lizwalo le li kenisizwe ni swalelo ya libi za luna. Kwa Maheberu 9:14, Paulusi u bulela ka za “mali a Kreste” a’ na ni m’ata a ku “kenisa maikuto a luna kwa misebezi ye shwile.” Kacwalo, lizwalo la Bakreste ha li tokwi ku ba le li imezwa ki ku inyaza ni maikuto a bufosi. Seo, hamohocwalo ni sepo ye lu na ni yona, si toma m’ata a tiile a tahisa tabo ye wabelisa. (Samu 103:8-14; Maroma 8:1, 2, 32) Ha lu nyakisisa sepo ya luna, kaufel’a luna lu ka susuezwa ku lwana ndwa yeo ka ku kondisa lika.

Ku Buluka Sepo ya Luna mwa Munahano ka Butuna

12. Ki sepo mañi yeo Bakreste ba ba tozizwe ba kona ku nyakisisa?

¹² Ki kwa butokwa kwa neku la bomasiyaleti ba ba tozizwe hamohocwalo ni lingu ze ñwi ku buluka mwa munahano “sepo ya ku piliswa,” ku i apala sina kuwani ya sisole ye sileleza. (1 Matesalonika 5:8) Bakreste ba ba tozizwe ba kona ku nyakisisa tohonolo ye makalisa ya ku fumana bupilo bo bu s’a koni ku shwa mwa lihalimu, ku kona ku bonana ni Jehova Mulimu, ni ku ikola swalisano ya ka butu ni Jesu Kreste y’a kanyisizwe ni baapositola ni ba bañwi kaufela ba 144,000, ba ba bulukile busepahali bwa bona mwahal’a myanda-nda ya lilimo. Ki buñata hakalo bwa liswalisano bo bu sa konwi ku taluswa!

13. Ba ba tozizwe ba ba sa li fa lifasi-mubu ba ikutwa cwañi ka za sepo ya bona?

¹³ Palo ye nyinyani ya ba ba tozizwe ba ba sa li fa lifasi-mubu ba ikutwa cwañi ka za sepo ya bona ya Mubuso? Seo si konwa ku kusufazwa mwa manzwi a F. W. Franz, presidenti wa Watch Tower Society, ya n’a kolobelizwe mwa 1913 a’ li: “Sepo ya luna ki nto ye buniti, mi i ka talelezwa ka ku tala ku yo muñwi kaufela wa mafelelezo wa lilama za ba 144,000 ba mutapinyana ku isa mane kwa sipimo se si fita se lu kile lwa nahana kaufela. Luna ba bomasiyaleti ba ne ba li teñi mwa silimo sa 1914, muta ne lu libelela kaufel’a luna ku ya kwa lihalimu, ha lu si ka latehelwa ki maikuto a luna a butokwa bwa sepo yeo. Kono lu ba ba tiile kwa neku la yona sina mo ne lu kile lwa bela, mi lu itebuha yona ni ku fita mwa nako kaufela ye lu na ni ku i libelela. Ki nto ye swanelwa ku litelwa, mane niha ne i ka tokwa lilimo ze eza lule. Ni fumana butokwa bwa sepo ya luna ku ba bo butuna ku fita mo ne ni kile na i fumanela kwamulaho, mi ni kamuta ha ni lati ku latehelwa ki buitebuho bwa ka kwa neku la yona. Sepo ya mutapinyana hape i fa buniti bwa kuli tibelelo ya buñata bo butuna bwa lingu ze ñwi, ku si na nihaili mayemo a ku palelwa, i ka talelezwa ka ku fitelela mihupulo ya luna ye minde ka ku fitisisa. Ki kabakaleo ha lu sweli ka t’ata ku to fita ni ku yona hora ye, mi lu ka swala ka t’ata ku fitela Mulimu a ka be a file bupaki luli bwa kuli ki y’a buniti kwa ‘lisepiso za hae ze butokwa luli ni ze makaza hahulu.’”—2 Pitrosi 1:4; Numere 23:19; Maroma 5:5.

Ku Taba Cwale mwa Sepo ya Paradaisi

14. Ki sepo mañi yeo ba buñata bo butuna ba tokwa ku i buluka mwa munahano?

¹⁴ Lipulelo ze cwalo za tumelo ye nyakalalisa li fa ku bao ba ba li ba buñata bo butuna bwa lingu ze ñwi mabaka a mande hahulu a ku ba ni tabo. (Sinulo 7:15, 16) Ba ba cwalo ba tokwa ku buluka mwa munahano sepo ya ku punyuha Armagedoni. Ee, a mu libelele ilikuli mu bone Mubuso wa Mulimu ha u bub’anisa bubusi bwa Jehova Mulimu bwa pupo kaufela ni ku kenisa libizo la hae le li na ni kanya ka ku tahisa ñalelwa ye tuna, ye ka kenisa fa lifasi-mubu ka ku zwisa ba ba maswe bao Diabulosi s’a bile mulimu wa bona. I kaba tabo hakalo ku punyuha ñalelwa ye tuna yeo!—Daniele 2:44; Sinulo 7:14.

15. (a) Ki musebezi mañi wa ku folisa w’o Jesu n’a ezize ha n’a li fa lifasi-mubu, mi ki kabakalañi? (b) Ki bufi bo bu k’a ba butokwi bwa buikangulo bwa bapunyuhi ba Armagedoni, mi ki kabakalañi ha bu li bo bu fapahana ku bwa ba ba k’a zuha?

¹⁵ Kwa neku la buñata bo butuna, Sinulo 7:17 i bulela kuli: “Ngunyana . . . u ka ba lisa, a ba ise kwa maweluwelu a mezi a bupilo; mi Mulimu u ka takula miyoko kaufela kwa meto a bona.” Nihaike kuli bupolofita b’o bu na ni talelezo ya kwa moya ona cwale, bapunyuhi ba Armagedoni ba ka bu bona bu talelezwa mwa nzila ya luli. Kamukwaufi? Kihona, ki sifi seo Jesu n’a si ezize ha n’a li fa lifasi-mubu? N’a folisize ba ne ba holofezi, n’a tahisize kuli lianga li zamaye, n’a kwaluzi lizebe za bosusu ni meto a libofu, mi hape n’a folisize mbingwa, ku omelela luñañali, ni “matuku kaufela ni buanga kaufela.” (Mateu 9:35; 15:30, 31) Kana seo haki sona seo Bakreste kacenu ba si tokwa? Buñata bo butuna bu k’a shimba buhole ni buanga bwa lifasi la kale ku isa mwa lifasi le linca. Ki sifi se lu libelela Ngunyana ku si eza ka za seo? Butokwi bwa bapunyuhi ba Armagedoni bu k’a ba bo bu fapahana hahulu ku bwa ba ba ka fumana zuho. Ba ba ka zuha ka mo ku bonahalela ba ka bupiwa sinca ni mibili ye si na se si tondahala, ye si na fo i nyazahala, ye na ni buikangulo, nihaike ha i na ku ba ye se i petehile kale mwa butu. Mo ku bonahalela ka bupaki, bakeñisa makazo ya zuho ha ba na ku tokwa ku foliswa kwa buhole bufi kamba bufi bwa kale ka makazo ya foliso. Ka ku fapahana, bakeñisa muinelo wa bona o ipitezi wa ku punyuha Armagedoni, ba bañata mwahal’a buñata bo butuna ba ka tokwa ni ku foliswa mi seo ba ka si amuhela. Ka mo ku bonahalela fela, mulelo o mutuna wa lifoliso za Jesu n’e li ku fa poniso kwa neku la ku susuezwa kwa buñata bo butuna ka za tibelelo ye tabisa ya kuli ha ba na ku punyuha fela kono hamulaho wa seo ba ka foliswa.

16. (a) Ki l’ili f’o foliso ya ka makazo ya bapunyuhi ba Armagedoni i kana ya ezahala, mi ki sifi se si zwa mwateñi? (b) Lu ka zwelapili ku taba mwahal’a Lilimo ze Sikiti ka sepo mañi?

¹⁶ Yona foliso ye cwalo ye makaza ka ku utwahala i ka ezahala mwahal’a bapunyuhi ba Armagedoni hamulahonyana wa Armagedoni mi ku sa na ni nako ye likani zuho i si ka kalisa kale. (Isaya 33:24; 35:5, 6; Sinulo 21:4; mu bapanye Mareka 5:25-29.) Mi cwale batu ba ka yumba mangilasi, mataa, likota za ku sikatela teñi, lipula za ku kuba, meno a buhata, lipangaliko za ku utwa ka zona, ni ze ñwi ze swana ni zeo. Ki libaka hakalo la ku taba ka lona! Likezo ze cwalo za ku uncafaza za Jesu li swalisana hande hakalo ni kalulo ya bapunyuhi ba Armagedoni sina mitomo ya lifasi le linca! Matuku a’ holofaza a ka zwiswa teñi ilikuli bapunyuhi ba zwelepili ka tabo, inze ba talima ka cisehelo kwa likezahalo za mwa Lilimo ze Sikiti ze yandulukile fapil’a bona, ba sa totobezwi ki manyando ao lifasi la kale ne li kana li tahisize fahalimw’a bona. Mi kaufela mwahal’a Lilimo ze Sikiti, ba ka ba ni tabo ka sepo ya ku fita fa bupetehi bo bu tezi luli bwa bupilo bwa butu kwa mafelelezo a lilimo zeo ze sikiti.

17. Ki ze tabisa lifi ze ka ba teñi musebezi wa ku kutisa sinca Paradaisi ha u nze u zwelapili?

¹⁷ Haiba yeo ki yona sepo ya mina, ha mu hupule hape ka za tabo ya ku abana mwa ku kutisa sinca Paradaisi fa lifasi-mubu. (Luka 23:42, 43) Ha ku na ku kakanya fa taba ya kuli bapunyuhi ba Armagedoni ba ka tusa mwa ku b’akanya lifasi-mubu mi kacwalo ni ku fumana libaka ze nde k’o ba ba shwile ba ka zusezwa. Likepelo li kana za yolwa ki mikopano ya ku amuhela ba ba fumani zuho, ku kopanyeleza ni balatiwa ba luna tota ba ba shwile. Mi mu nahane ka za swalisano ye wabelisa ni banna ni basali ba ba sepahala ba mwa myanda-nda ya lilimo za kwamulaho. Ki mañi sihulu-hulu ye ne mu ka bata ku ambolisana ni yena? Kana ki Abele, Enoke, Nuwe, Jobo, Abrahama, Sara, Isaka, Jakobo, Josefa, Mushe, Joshua, Rahaba, Debora, Samisoni, Davida, Elia, Elisha, Jeremia, Ezekiele, Daniele, kamba Joani Mukolobezi? Ki hande, cwalehe, yona tibelelo yeo ye tabisa ni yona ki kalulo ya sepo ya mina. Mu ka kona ku ambolisana ni bona, ku ituta ku bona, ni ku sebeza hamoho ni bona mwa ku eza lifasi kamukana ku ba paradaisi.

18. Ki ze tabisa lifi ze ekezehile ze lu kona ku nyakisisa?

¹⁸ Mu hupule, hape, ka za lico ze nde, mezi a kenile, ni moya o si na masila, lifasi-mubu la luna ha se li kutisizwe kwa buitikaneleli bwa muinelo wa za swalisano ya mwahal’a ze pila ni maino a zona ili mwa nzila yeo Jehova n’a li bupezi ku bela. Bupilo ka nako yeo, ha bu na ku ba fela ku ikola kwa bupetehi ka muinelo wa tandabale, kono bu ka ba bwa ku abana ka cisehelo ni ka ku utwahala mwa misebezi ye tabisa. Mu nahane ka za muinelo wa lifasi kamukana wa batu ba ba lukuluhile ku zwa kwa bukebenga, buitati, muna, likomano—sizwale m’o muselo wa moya u zusezwapili ni ku tahisiwa ki batu kaufela. Ki nto ye tabisa hakalo!—Magalata 5:22, 23.

Sepo ye Ezisa Bupilo ku Swanelwa ku Piliwa

19. (a) Ki l’ili f’o ku ba ni tabo ko ku bulelwa kwa Maroma 12:12 ku yelwaseli? (b) Ki kabakalañi ha lu swanela ku ba ni tundamo mwa ku s’a tuhelela milwalo ya bupilo kuli i kasheze kwatuko sepo ya luna?

¹⁹ Tibelelo ye se i fumanehile ha isali sepo, kacwalo ku ba ni tabo ko ku susuelizwe ki muapositola Paulusi kwa Maroma 12:12 ku yelwaseli ka nako ya cwale. (Maroma 8:24) Ku hupula fela ka za limbuyoti zeo Mubuso wa Mulimu u ka tahisa ki nto ye tahisa ku taba ka sepo yeo cwale. Kacwalo he mu be ni tundamo ya ku s’a lumeleza milwalo ya bupilo mwa lifasi le li bolile ku kasheza kwatuko sepo ya mina ye kanya. Mu si ke mwa katala ni ku tuhela, ili ku latehelwa ki pono ya sepo ya za kwapili. (Maheberu 12:3) Ku siya nzila ya Sikreste ha ku na ku tatulula butata bwa mina. Mu hupule kuli, haiba mutu a tuhela ku sebeleza Jehova bakeñisa milwalo kaufela ya mwa bupilo cwale, u sa li ni yona milwalo yeo, kono u latehelwa ki sepo mi kacwalo u latehelwa mwa ku kona ku ba ya tabile mwa litibelelo ze makaza za kwapili.

20. Sepo ya Mubuso i ama cwañi bao ba ba i amuhela, mi ki kabakalañi?

²⁰ Batu ba Jehova ba na ni mabaka a mañata hahulu a ku ba ni bupilo bo bu tabile. Sepo ya bona ye nde, ili ye fa tukufalelo i ezisa bupilo ku ba bo bu swanelwa ku piliwa. Mi ha ba ipulukeli yona sepo ye tabisa yeo. Ku tokwa, ba tukufalelwa ku i abana ni ba bañwi. (2 Makorinte 3:12) Kacwalo kuli bao ba ba amuhela sepo ya Mubuso ki batu ba ba na ni buikolwiso, mi ba bata ku susueza ba bañwi ka ku ba taluseza taba ye nde ye zwa ku Mulimu. Seo si tahisa kuli bupilo bwa bao ba ba amuhela yona taba yeo bu tale ka sepo ye makaza ka ku fitisisa ye se i filwe kwa mufuta wa mutu ka nañungelele—sepo ya Mubuso o k’a kutisa sinca Paradaisi fa lifasi-mubu. Haiba batu ha ba i amuheli, lu ka zwelapili ku ba ni tabo kakuli lu na ni sepo yeo. Ba ba s’a lati ku utwa ki bona ba ba latehelwa; haki luna.—2 Makorinte 4:3, 4.

21. Ki sikamañi se si li fakaufi, mi lu swanela ku bona cwañi butokwa bwa sepo ya luna?

²¹ Sepiso ya Mulimu ki ya kuli: “A mu bone, linto kaufela ni li eza ze nca.” (Sinulo 21:5) Lifasi le linca li fakaufi ni limbuyoti za lona kaufela ze nyakalalisa ni ze s’a feli. Sepo ya luna—kwa neku la bupilo mwa lihalimu kamba mwa paradaisi ya fa lifasi-mubu—ki ya butokwa hahulu; mu kumalele cwalo ku yona. Mwa linako za mafelelezo ze t’ata ze, ku fita nako ifi kamba ifi, mu i bone “sina ankora ya moya, ye tiile, ye tata.” Ka ku ba ni sepo ya luna ye tomile ku Jehova, “licwe la ku ya ku ile—Licwe la myaha,” ka buniti fela lu na ni libaka le li tiile ni le li nyangumuna ona cwale luli la kuli lu “tabe ka sepo” ye beilwe fapil’a luna.—Maheberu 6:19; Isaya 26:4, The Amplified Bible.

[Litaluso za kwatasi]

Lipuzo za Lundululo

◻ Sepo ye tuna ya mufuta wa mutu ki ifi?

◻ Tabo ya niti ki sikamañi?

◻ Foliso ya ka makazo ya bapunyuhi ba Armagedoni i bonahala kuli i ka ezahala l’ili?

◻ Ki kabakalañi ha lu sa swaneli ku tuhelela milwalo ya bupilo ku kasheza kwatuko sepo ya luna?

◻ Ki ze tabisa lifi ze mu libelela mwa lifasi le linca?

[Siswaniso se si fa likepe 22]

Kana ne i si ke ya tala mwa pilu ya mina tabo ka ku iponela mufuta wa lifoliso zeo Jesu n’a li ezize?

[Siswaniso se si fa likepe 23]

Bao ba ba fumana tabo mwa Mubuso ba susueza ba bañwi ka ku abana sepo ya bona