Taba yetuna yebulezwi hahulu mwa Bibele ki ya Mubuso wa Mulimu. Jehova ukaitusisa Mubuso wo kuli apete mulelo wahae fa lifasi. Mubuso wa Mulimu ki nto mañi? Luziba cwañi kuli Mubuso wo usweli wabusa? Ki lika mañi zese upetile? Mi ki lika mañi zeuka eza kwapili? Mwa tuto ye ni mwa lituto zepeli zetatama, lukaalaba lipuzo zeo.

1. Mubuso wa Mulimu ki nto mañi, mi ki mañi Mulena wa Mubuso wo?

Mubuso wa Mulimu ki mulonga otomilwe ki Jehova Mulimu. Mulena wa Mubuso wo, yena Jesu Kreste, wabusa kwa lihalimu. (Mateu 4:17; Joani 18:36) Bibele ibulela cwana ka za Jesu: “Ukabusa sina Mulena . . . kuya kuile.” (Luka 1:32, 33) Ka kuba Mulena wa Mubuso wa Mulimu, Jesu ukabusa batu kaufela fa lifasi.

2. Ki bo mañi babaka busa ni Jesu?

Jesu haana kubusa anosi. Batu babazwa “mwa mishobo kaufela ni malimi ni batu ni sicaba. . . bakabusa sina malena fahalimwaa lifasi.” (Sinulo 5:9, 10) Ki batu babakai babaka busa ni Kreste? Kuzwa feela fanaatezi Jesu fa lifasi, Bakreste babañata-ñata babile balateleli bahae. Kono kwa batu bao, ki ba 144,000 feela babakaya kwa lihalimu kuyo busa ni Jesu. (Mubale Sinulo 14:1-4.) Bakreste babañwi kaufelaa bona bakabusiwa ki Mubuso wo inze bali fa lifasi.—Samu 37:29.

3. Ki kabakalañi Mubuso wa Mulimu hauli omunde hahulu kufita mibuso ya batu?

Babusi ba linaha niha balikanga kueza lika zende, habana maata a kueza lika kaufela zebabata. Hañata bayoliwanga ki babusi babañwi ili babasina milelo ya kutusa batu bebabusa. Kono Mulena wa Mubuso wa Mulimu, yena Jesu, haana kuyoliwa ki mutu ufi kamba ufi. Mulimu ‘utomile mubuso osike wasinyiwa nikamuta.’ (Daniele 2:44) Jesu ukabusa lifasi kaufela mi haana kubonisa saluluti. Jesu unani lilato, musa, mi uatula ka kuluka, kacwalo, ukaluta batu kupilisana hande ni babañwi ka lilato, ka musa, ni ka kuluka.—Mubale Isaya 11:9.

4. Mubuso omaata ka kufitisisa ukabusa lifasi kaufela

Jesu Kreste unani maata a kubusa kufita babusi ba lifasi. Mubale Mateu 28:18, mi kihona mukanyakisisa puzo yelatelela:

• Maata a Jesu a kubusa ashutana cwañi ni a babusi ba lifasi?

Babusi ba lifasi bayoliwanga, mi yomuñwi ni yomuñwi wabona ubusanga feela sibaka sesiñwi sa lifasi. Mubuso wa Mulimu ona bo? Mubale Daniele 7:14, mi kihona mukanyakisisa lipuzo zelatelela:

• Ki kabakalañi hakutabisa kuziba kuli Mubuso wa Mulimu “hauna kusinyiwa”?

• Ki kabakalañi hakutabisa kuziba kuli Mubuso wo ukabusa lifasi kaufela?

5. Mibuso ya batu itokwa kuyoliswa

Ki kabakalañi Mubuso wa Mulimu hauswanela kuyola mibuso ya batu? Mubuhe VIDIO, mi kihona mukanyakisisa puzo yelatelela.

VIDIO: Mubuso wa Mulimu ki Nto Mañi?—Kalulonyana ya vidio (1:41)

• Mibuso ya batu itahisize lika mañi?

Mubale Muekelesia 8:9, mi kihona mukanyakisisa lipuzo zelatelela:

• Mubona cwañi, kana Mubuso wa Mulimu waswanela kuyola mibuso ya batu? Libaka?

6. Mubuso wa Mulimu unani babusi baba luutwisisa

Bakeñisa kuli Mulenaa luna, Jesu, naapilile fa lifasi sina mutu, wakona “kuluutwela butuku mwa bufokoli bwaluna.” (Maheberu 4:15) Ba 144,000, ili baana ni basali babasepahala babaka busa ni Jesu, baketilwe ki Jehova kuzwelela “mwa mishobo kaufela ni malimi ni batu ni sicaba.”—Sinulo 5:9.

• Kana kuziba kuli Jesu ni bakabusa ni bona kaufela bakile bafita mwa miinelo yemukopana ni yona kwamiomba-omba? Libaka?

7. Mubuso wa Mulimu unani milao yeminde hahulu kufita milao ya mibuso ya batu

Mibuso ya batu itomanga milao yetusa batu ni kubasileleza. Mubuso wa Mulimu ni ona unani milao yebaswanela kulatelela batu bababusiwa ki ona. Mubale 1 Makorinte 6:9-11, mi kihona mukanyakisisa lipuzo zelatelela:

• Munahana kuli bupilo bukaba cwañi batu kaufela habaka latelela milao ya Mulimu?a

• Kana mwautwisisa libaka Jehova hatokwa kuli babaka busiwa ki Mubuso wahae balatelele milao yeo? Libaka?

• Ki lika mañi zebonisa kuli batu babasa lateleli milao ya Mulimu bakona kucinca?—Mubone timana 11.

LITABA KA BUKUSWANI

Mubuso wa Mulimu ki mulonga otomilwe kwa lihalimu mi ukabusa lifasi kaufela.

Mulundulule

• Ki bo mañi babaka busa mwa Mubuso wa Mulimu?

• Ki kabakalañi Mubuso wa Mulimu hauli omunde hahulu kufita mibuso ya batu?

• Jehova ubata kuli batu babaka busiwa ki Mubuso wahae baezeñi?

MUBONE LITABA ZEÑWI

Munyakisise litaba zanaalutile Jesu ka za koufumaneha Mubuso wa Mulimu.

“Kana Mubuso wa Mulimu U Mwa Pilu Yamina?” (Taba ya fa webusaiti)

Ki kabakalañi Lipaki za Jehova habaketanga kusepahala kwa Mubuso wa Mulimu kufita kusepahala kwa mibuso ya batu?

Kuyemela Mubuso wa Mulimu 1:43

Munyakisise zeibulela Bibele ka za ba 144,000 babaketilwe ki Jehova kuli bayo busa ni Jesu.

“Ki bo Mañi Babakaya Kwa Lihalimu?” (Taba ya fa webusaiti)

Kuziba kuli Mubuso wa Mulimu ki ona feela okona kufelisa matata a lifasi nekutusize cwañi musali yanaali mwa tolongo?

“Mone Nizibezi Yakafelisa Bumaswe fa Lifasi” (Muzuhe!, November 2011)

Mubuso wa Mulimu neukalile kubusa kwa lihalimu ka 1914. Mi mazazi a mafelelezo a lipuso za batu, naakalile ka silimo sesiswana seo. Luziba cwañi taba yeo? Mwa taba ye, lukanyakisisa bupolofita bwa mwa Bibele, lika zesweli kuezahala mwa lifasi, mane ni mikwa yebazwezipili kubonisa batu kuzwa feela ka 1914.

1. Bupolofita bwa mwa Bibele bubonisañi?

Buka ya mwa Bibele ya Daniele neipolofitile kuli Mubuso wa Mulimu neuka kala kubusa kwa mafelelezo a “linako ze 7.” (Daniele 4:16, 17) Hamulaho wa lilimo zeñata, Jesu naabizize nako yeswana yeo kuli neli “linako zetomilwe za macaba,” mi naabulezi kuli linako zeo nelisika fela. (Luka 21:24) Sina moluka itutela, linako ze 7 zeo nelifelile ka silimo sa 1914.

2. Ki lika mañi zezwezipili kuezahala mwa lifasi kuzwa feela ka 1914?

Balutiwa ba Jesu neba mubuzize kuli: “Ki sifi sesikaba sisupo sa kubateñi kwahao ni sa nako ya kufela kwa lifasi?” (Mateu 24:3) Jesu naabaalabile ka kubabulelela lika zeñata zeneka ezahala hanaaka kalisa kubusa kwa lihalimu sina Mulena wa Mubuso wa Mulimu. Zeñwi za lika zanaabulezi neli lindwa, kutaela kwa lico, ni lizikinyeho. (Mubale Mateu 24:7.) Bibele hape neipolofitile kuli mikwa ya batu mwa “mazazi a mafelelezo” neika tahisa “linako zetaata, zeziyeza.” (2 Timotea 3:1-5) Lika zeo lizwezipili kuba teñi sihulu kuzwa feela ka 1914.

3. Ki kabakalañi lika zemaswe haliekezehile hahulu kuzwa feela foukalela Mubuso wa Mulimu kubusa?

Hamulahonyana wa kuba Mulena wa Mubuso wa Mulimu, Jesu alwana ni Satani ni madimona ahae kwa lihalimu. Satani naatuzwi mwa ndwa yeo. Bibele ibulela kuli Satani “naanepezwi mwa lifasi, ni mangeloi ahae anepelwa hamoho ni yena mwa lifasi.” (Sinulo 12:9, 10, 12) Satani uhalifile hahulu bakeñisa kuli waziba kuli ukabulaiwa. Kacwalo, utahiseza batu babapila fa lifasi manyando. Kona libaka lika mwa lifasi halizwelapili kutatafala! Mubuso wa Mulimu ukafelisa lika kaufela zenyandisa batu.

MUBATISISE

4. Litaba za mwa Bibele lilutusa kuziba kuli Mubuso wa Mulimu neukalile kubusa ka 1914

VIDIO: Mubuso wa Mulimu Ukalile Kubusa ka 1914 (5:02)

Mulimu naatahisize kuli Mulena Nebukadenezare wa Babilona ya kwaikale abe ni tolo ya lika zeneka ezahala kwapili. Tolo yeo ni litaba zanaatalusize Daniele ka za yona, libonisa kuli neiama kwa mubuso wa Nebukadenezare ni kwa Mubuso wa Mulimu.—Mubale Daniele 4:17.a

Mubale Daniele 4:20-26, mi kihona mukaitusisa chati kualaba lipuzo zelatelela:

• (A) Nebukadenezare naaboniñi mwa tolo yahae?—Mubone litimana 20 ni 21.

• (B) Ki sika mañi sene sikaezahala kwa kota yeo?—Mubone timana 23.

• (C) Ki sika mañi sene sikaezahala kwa mafelelezo a “linako ze 7”?—Mubone timana 26.

Litaba Zeama Kota Yanaalolile Nebukadenezare Liswana Cwañi ni Litaba Zeama Mubuso wa Mulimu?

BUPOLOFITA (Daniele 4:20-36)

Bubusi

(A) Kota yetuna

Bubusi bwa lilimaniswa

(B) “Muleme kota,” mi “kufite linako ze 7”

Bubusi bwakutiswa sinca

(C) “Mubuso wahao ukakutela ku wena”

Kutalelezwa kwa makalelo kwa bupolofita bo . . .

• (D) Kota neiyemela mañi?—Mubone timana 22.

• (E) Bubusi bwahae nebulilimanisizwe ka mukwa ufi?—Mubale Daniele 4:29-33.

• (F) Nekuezaheziñi ku Nebukadenezare kwa mafelelezo a “linako ze 7”?—Mubale Daniele 4:34-36.

KUTALELEZWA KWA MAKALELO

Bubusi

(D) Nebukadenezare, Mulena wa Babilona

Bubusi bwa lilimaniswa

(E) Hamulaho wa silimo sa 606 B.C.E., Nebukadenezare wapulumuka mi upalelwa kubusa ka lilimo ze 7

Bubusi bwakutiswa sinca

(F) Nebukadenezare waiketa mwa munahano mi ukalisa kubusa hape

Kutalelezwa kwa bubeli kwa bupolofita bo . . .

• (G) Kota neiyemela bo mañi? —Mubale 1 Makolonika 29:23.

• (H) Bubusi bwabona nebulilimanisizwe ka mukwa ufi? Luziba cwañi kuli bubusi bo nebulilimanisizwe nihaiba ka nako yanaaliteñi fa lifasi Jesu?—Mubale Luka 21:24.

• (I) Bubusi bo nebukutisizwe lili sinca mi neli kakai?

KUTALELEZWA KWA BUBELI

Bubusi

(G) Malena ba Isilaele bane bayemela bubusi bwa Mulimu

Bubusi bwa lilimaniswa

(H) Jerusalema yasinyiwa, ili kutahisa kuli malena ba Isilaele basike babusa ka lilimo ze 2,520

Bubusi bwakutiswa sinca

(I) Jesu ukalisa kubusa sina Mulena wa Mubuso wa Mulimu kwa lihalimu

5. Miinelo mwa lifasi icincize hahulu kuzwa ka 1914

Mubuhe VIDIO.

VIDIO: Miinelo Mwa Lifasi Icincize Hahulu Kuzwa ka 1914 (1:10)

Jesu naapolofitile lika zeneka ezahala mwa lifasi hanaaka kalisa kubusa sina Mulena. Mubale Luka 21:9-11, mi kihona mukanyakisisa puzo yelatelela:

• Kwa lika zebulezwi zeo, ki lifi zemuiponezi kamba zemuutwile?

Muapositola Paulusi naatalusize mikwa yene bakaba ni yona batu mwa mazazi a mafelelezo a lipuso za batu. Mubale 2 Timotea 3:1-5, mi kihona mukanyakisisa puzo yelatelela:

• Kwa mikwa yeo, ki ifi yemulemuhile yebabonisa batu kacenu?

6. Kuziba kuli Mubuso wa Mulimu wabusa kuswanela kulususueza

Mubale Mateu 24:3, 14, mi kihona mukanyakisisa lipuzo zelatelela:

• Ki musebezi mañi wa butokwa obonisa kuli Mubuso wa Mulimu usweli wabusa?

• Mukona kutusa cwañi mwa musebezi wo?

Mubuso wa Mulimu usweli wabusa kwa lihalimu, mi utuha ubusa ni lifasi. Mubale Maheberu 10:24, 25, mi kihona mukanyakisisa puzo yelatelela:

• Luswanela kuezañi halunze lubona “kuli lizazi lisutelezi”?

LITABA KA BUKUSWANI

Bupolofita bwa mwa Bibele, kutatamana kwa likezahalo, ni miinelo ya mwa lifasi ki bupaki bwa kuli Mubuso wa Mulimu wabusa. Lubonisa kuli lwalumela taba yeo ka kukutaza za Mubuso wa Mulimu ni kufumanehanga kwa mikopano ya puteho.

Mulundulule

• Nekuezaheziñi kwa mafelelezo a linako ze 7 zenepolofitilwe mwa buka ya mwa Bibele ya Daniele?

• Ki lika mañi zemikolwisa kuli Mubuso wa Mulimu ukalile kubusa ka 1914?

• Mukona kubonisa cwañi kuli mwalumela kuli Mubuso wa Mulimu usweli wabusa?

MUBONE LITABA ZEÑWI

Munyakisise zebabulela licaziba ba litaba za kwaikale ni batu babañwi ka za licinceho zebile teñi mwa lifasi kuzwa ka 1914.

“Batu Hane Batuhezi Kulatelela Likuka za Muzamao” (Muzuhe!, April 2007)

Mubone mwanaatuselizwe muuna yomuñwi hamulaho wa kunyakisisa bupolofita bobu kwa Mateu 24:14.

“Nenilata Hahulu Mbola Kufita Nto Ifi Kamba Ifi!” (Tawala ya Mulibeleli No. 3 2017)

Luziba cwañi kuli bupolofita bobu kwa Daniele kauhanyo 4 bubulela za Mubuso wa Mulimu?

“Mubuso wa Mulimu Neukalile Lili Kubusa? (Kalulo 1)” (Tawala ya Mulibeleli, October 1, 2014)

Ki lika mañi zebonisa kuli “linako ze 7” zebulezwi kwa Daniele kauhanyo 4 nelifelile ka 1914?

“Mubuso wa Mulimu Neukalile Lili Kubusa? (Kalulo 2)” (Tawala ya Mulibeleli, November 1, 2014)

Mubuso wa Mulimu ukalile kale kubusa. Mubuso wo utuha ueza licinceho zetuna fa lifasi. Halunyakisiseñi zeñwi za lika zende zeuka peta Mubuso wa Mulimu.

1. Mubuso wa Mulimu ukatahisa cwañi kozo ni kuluka fa lifasi?

Jesu, yena Mulena wa Mubuso wa Mulimu, ukayundisa batu babamaswe ni mibuso ya lifasi fa ndwa ya Armagedoni. (Sinulo 16:14, 16) Ka nako yeo, sepiso ya mwa Bibele yelatelela ikatalelezwa: “Kusiyezi feela nakonyana, mi babamaswe habasana kubateñi.” (Samu 37:10) Ka nako yeo, Jesu ukatahisa kozo ni kuluka mwa lifasi kaufela.—Mubale Isaya 11:4.

2. Bupilo bukaba cwañi tato ya Mulimu haika eziwa fa lifasi?

Mubuso wa Mulimu hauka busa lifasi, “babalukile bakaluwa lifasi, mi bakapila ku lona kuya kuile.” (Samu 37:29) Nako yeo ikaba yende hahulu kakuli batu kaufela babaka pila fa lifasi bakaba babalukile, bakalatana, mi bakalata Jehova! Hakuna mutu yakakula, mi batu kaufela bakapila kuya kuile.

3. Ki lika mañi zeuka peta Mubuso wa Mulimu batu babamaswe hase bayundusizwe?

Batu babamaswe hase bayundisizwe, Jesu ukabusa sina Mulena ka lilimo ze 1,000. Ka nako yeo, Jesu ni ba 144,000 bakabusa ni bona, bakatusa batu kuba babapetahalile. Kwa mafelelezo a lilimo zeo, lifasi likaba paradaisi yende, fokuka pila feela batu babautwa milao ya Jehova. Hasamulaho, Jesu ukakutisa Mubuso ku Ndatahe, yena Jehova. Ka nako yeo, ‘libizo la Mulimu likakeniswa’ ka nzila yeipitezi luli. (Mateu 6:9, 10) Batu bakaiponela kuli Jehova ki Mubusi yomunde ili yalata batanga bahae. Jehova ukayundisa Satani, madimona, ni batu kaufela babaiketezi kumukwenuhela. (Sinulo 20:7-10) Lika zende zeuka eza Mubuso wa Mulimu likaina kuya kuile.

MUBATISISE

4. Mubuso wa Mulimu ukafelisa mibuso ya batu

‘Mutu ubile ni maata a kuhatelela yomuñwi, kumueza maswe.’ (Muekelesia 8:9) Ka kuitusisa Mubuso wahae, Jehova ukafelisa kusaluka.

Mubale Daniele 2:44 ni 2 Matesalonika 1:6-8, mi kihona mukanyakisisa lipuzo zelatelela:

• Ki lika mañi zakaeza Jehova ni Mwanaa hae, yena Jesu, kwa mibuso ya batu ni baba iyemela?

• Zemuitutile ka za Jehova ni Jesu limikolwisa cwañi kuli bakaatula ka kuluka?

5. Jesu ki Mulena yomunde

Ka kuba Mulena wa Mubuso wa Mulimu, Jesu ukaeza lika zeñata zekatusa batu fa lifasi. Mubuhe VIDIO kuli mubone mwaboniselize Jesu kuli unani takazo ni maata afilwe ki Mulimu a kutusa batu.

VIDIO: Jesu Naabonisize Zeuka Peta Mubuso wa Mulimu (1:13)

Hanaali fa lifasi, Jesu naaezize lika zebonisa zeuka peta Mubuso wa Mulimu kwapili. Ki limbuyoti lifi zemutabela fa mukoloko olatelela? Mubale mañolo azamaelela ni limbuyoti zebonisizwe.

6. Mubuso wa Mulimu ukaeza lika zende

VIDIO: Lika Zelutusa Kuziba Zebaka Ikola Batu Kwapili (4:38)

Mubale Samu 145:16, mi kihona mukanyakisisa puzo yelatelela:

• Muikutwa cwañi kuziba kuli Jehova ‘ukakulisa takazo ya zepila kaufela’?

LITABA KA BUKUSWANI

Mubuso wa Mulimu ukapeta tato yahae. Ukatahisa kuli lifasi libe paradaisi mokuka pila batu babande babaka lapela Jehova kuya kuile.

Mulundulule

• Mubuso wa Mulimu ukakenisa cwañi libizo la Jehova?

• Ki kabakalañi halukona kukolwa kuli Mubuso wa Mulimu ukataleleza lisepiso za mwa Bibele?

• Kwa limbuyoti zeuka tahisa Mubuso wa Mulimu, ki mbuyoti ifi yemunyolelwa hahulu?

MUBONE LITABA ZEÑWI

Mubatisise kuli Armagedoni ki nto mañi.

“Ndwa ya Armagedoni ki Nto Mañi?” (Taba ya fa webusaiti)

Munyakisise zekaezahala ka nako ya puso ya Jesu ya lilimo ze 1,000 ni kwa mafelelezo ayona.

“Ki Lika Mañi Zekaezahala fa Lizazi la Katulo?” (Tawala ya Mulibeleli, October-December, 2012)

Munyakisise zekona kutusa mabasi kunahanisisa limbuyoti zebaka ikola ka nako yeuka busa lifasi Mubuso wa Mulimu.

Muipone Mwa Paradaisi (1:50)

Mwa taba yeli, “Neninani Lipuzo Zeñata,” mubone mo muuna yomuñwi naafumanezi likalabo kwa lipuzo zanaanani zona.

“Bibele Yacincanga Bupilo Bwa Batu” (Tawala ya Mulibeleli, January 1, 2012)