Bilongwa bya Mafuku wa Bubidi

29 Hezekia+ wabikele na myaka 25, wabikele myaka 29 mu Yelusalema. Dijina dya inandi i Abidya mwanā Zekadia.+ 2 Wadi ulonga nyeke byoloke ku meso a Yehova+ na mwalongēle mukulutuba wandi Davida.+ 3 Mu mwaka mubajinji wa bulopwe bwandi, mu kweji mubajinji, washitula milango ya njibo ya Yehova weilongolola.+ 4 Penepo wasela babitobo ne bene Levi webabungila mu kīkwe dya kutunduka. 5 Webanena’mba: “Banwe bene Levi, ngivwanei. Pano mwipandulei+ ne kupandula njibo ya Yehova Leza wa bakulutuba benu, kadi talulai bintu bya disubi mu kifuko kijila.+ 6 Mwanda batata kebadipo na kikōkeji kadi balongele bibi ku meso a Yehova Leza wetu.+ Bamulekele ne kuvundamina kipema kya Yehova kadi bamwela nyuma.+ 7 Bashita ne milango ya kibidi kya pa kibelo,+ babula ne binanu+ bine. Baleka kusōka ensense+ ne kulambula bitapwa bisōkwe+ kudi Leza wa Isalela mu kifuko kijila. 8 O mwanda Yehova wafītyīlwe Yuda ne Yelusalema+ mutyima, webalamuna ke kintu kya nzuba ne kya kutulumuka ne kya kwidilwa muluji,* monka momumwenine na meso enu.+ 9 Talai, bakulutuba betu baponene ku kipete,+ kadi betu bana bana-balume ne bana-bakaji, ne betu bakaji baselelwe bu misungi pa mwanda wa kino’ki.+ 10 Pano mutyima wami ubasake kusamba kipwano na Yehova Leza wa Isalela,+ amba bulobo bwandi budyendyemuka bwitushile kyaba. 11 A bami bana, kino ke kitatyipo kya kulengwa’ko,* mwanda Yehova wemutonge mwimane ku meso andi, mwikale bengidi bandi,+ kadi mufitule mwishi wa bitapwa byandi.”+

12 Ponkapo bene Levi baimana: Mahate mwanā Amasai ne Yoela mwanā Azadia ba ku bene Kohata;+ ku bene Meladi+ nako, Kishi mwanā Abedi ne Azadia mwanā Yehalele; ku bene Ngelashona+ nako, Yoa mwanā Zima ne Edena mwanā Yoa; 13 ku bana ba Edizafana nako, Shimidi ne Yeuele; ku bana ba Asafa+ nako, Zekadia ne Matania; 14 ku bana ba Hemana+ nako, Yehiele ne Shimei; ku bana ba Yedutuna+ nako, Shemaia ne Uziele. 15 Penepo babungila banababo pamo, bepandula kupwa baiya kutōkeja njibo ya Yehova,+ monka mwasoñaninye’kyo mulopwe mwendele binenwa bya Yehova. 16 Ebiya babitobo batwela mu njibo ya Yehova mwanda wa kwiitōkeja, batambija bya disubi byonso byobatene mu tempelo ya Yehova, bebiselela ku kipango+ kya njibo ya Yehova. Bene Levi nabo bebisela, bebilupwila panja mu Musanza wa Kidelone.+ 17 Penepo bashilula kwiipandula mu difuku dibajinji dya kweji mubajinji, kadi mu difuku dya mwānda dya kweji’wa bafika ku kibidi kya pa kibelo kya Yehova.+ Bapandula njibo ya Yehova mafuku mwānda, ebiya bapwa mu difuku dya 16 dya kweji mubajinji.

18 Kupwa batwela kudi Mulopwe Hezekia kebanena’mba: “Tubatōkeja njibo yonso ya Yehova, ne kisōkelo kya byamulambu bisōkwe+ ne bipungwa byakyo byonso,+ ne meza a mikate mitentakanye*+ ne bipungwa byao byonso. 19 Kadi bipungwa byonso byatalwile Mulopwe Ahaza mu bulopwe bwandi pawadi ulonga bintu pampikwa kikōkeji,+ tubebilongolola ne kwibipandula,+ pano bidi kumeso kwa kisōkelo kya Yehova.”

20 Ebiya Mulopwe Hezekia wabūka lubanga bwē, wakongakanya bamfumu ba kibundi, kupwa bakanda ku njibo ya Yehova. 21 Basela bañombe basamba-babidi, ne mikōko milume isamba-ibidi, ne twana twa mikōko tulume tusamba-tubidi, ne bambuji balume basamba-babidi bu kyamulambu kya bubi mwanda wa bulopwe, ne mwanda wa kipandulwe, ne mwanda wa Yuda.+ Kupwa wanena babitobo, lutundu lwa Alone, bebilambule pa kisōkelo kya Yehova. 22 Penepo batapa bañombe,+ babitobo bayata mashi beakusa pa kisōkelo;+ kupwa batapa mikōko milume, bakusa mashi pa kisōkelo, kadi batapa twana twa mikōko tulume, bakusa mashi pa kisōkelo. 23 Ebiya baselela bambuji balume ba kyamulambu kya bubi ku meso a mulopwe ne a kipwilo, bebatenteka makasa. 24 Babitobo bebatapa, balambula kyamulambu kya bubi ne mashi abo pa kisōkelo, mwanda wa kupūta bubi bwa Isalela ense, ke-pantu mulopwe wanenene amba kyamulambu kisōkwe ne kyamulambu kya bubi kikekala kya Isalela ense.

25 Mu kine kitatyi’kya, waimika bene Levi ku njibo ya Yehova na membo, ne byombanwa bya myonji, ne nsense,+ mwendele musoñanya wa Davida+ ne wa Ngade+ mumoni wa bimonwa wa mulopwe, ne wa Natana+ mupolofeto, mwanda musoñanya watambile kudi Yehova kupityila kudi bapolofeto bandi. 26 Ebiya bene Levi baimana na byombanwa bya Davida, babitobo nabo na bimpungidi.+

27 Penepo Hezekia wasoñanya balambule kitapwa kisōkwe pa kisōkelo.+ Abo bashilula’tu kulambula kyamulambu kisōkwe, lwimbo lwa Yehova nalo lwashilula pamo ne bimpungidi, balondeja byombanwa bya Davida mulopwe wa Isalela. 28 Ebiya kipwilo kyonso kekivukwila padi pembwa lwimbo ne padi pavuma bimpungidi—byaendelela’nka namino kufika ne byapwile kyamulambu kisōkwe. 29 Kadi abo bapwa’tu kulambula, mulopwe ne bonso baadi nabo bafukata kebevukwila. 30 Penepo Mulopwe Hezekia ne bamfumu banena bene Levi batendele Yehova na binenwa bya Davida+ ne bya Asafa+ mumoni wa bimonwa. Ebiya baimba mitendelo na nsangaji mikatampe, kupwa bafukata kebevukwila.

31 Penepo Hezekia wanena’mba: “Pano pomwatūlwa pa bula* mwanda wa Yehova, iyai ku njibo ya Yehova na bitapwa ne byamulambu bya kufwija’ko.” Penepo kipwilo kyashilula kuleta bitapwa ne byamulambu bya kufwija’ko, kadi yewa ense wa mutyima uswile waleta byamulambu bisōkwe.+ 32 Byamulambu bisōkwe byaletele kipwilo i bañombe 70, mikōko milume 100, twana twa mikōko tulume 200—bino byonso bu kyamulambu kisōkwe kudi Yehova+— 33 byamulambu bijila nabyo i bañombe 600 ne mikōko 3 000. 34 Ino kekwadipo babitobo babwane ba kusaya biseba bya byamulambu bisōkwe, ebiya banababo bene Levi bebakwasha’ko+ kufika ne byapwile mwingilo kadi kufika ne byepandwile+ babitobo, mwanda bene Levi badi na mutyima* wa kwipandula kupita ne babitobo bene. 35 Kadi kwadi byamulambu bisōkwe+ bivule, ne biseso bya māni bya bitapwa bya kipwano+ ne byamulambu bya bitomibwa bya byamulambu bisōkwe.+ Enka nenki mingilo ya ku njibo ya Yehova yajoka* monka. 36 Penepo Hezekia ne bantu bonso basangela byobya byobatūdīle’ko bantu+ kudi Leza wa bine, mwanda bino byonso byalongekele mu kitulumukila.