Bilongwa bya Mafuku wa Bubidi

31 Abo bapwa’tu bino byonso, bene Isalela bonso badi’po baenda mu bibundi bya Yuda, balalakanya bikomo bikola,+ batyumuna bipanda bikola,*+ batūta ne mitenta+ ne bisōkelo+ mu Yuda ne mu Benjemani monso, ne mu Efelaimi ne mu Manase,+ kufika ne byobebyonakenye fututu, kupwa bene Isalela bonso bajokela ku bibundi byabo, muntu kwandi muntu kwandi.

2 Penepo Hezekia watūla babitobo mu bibumbo byabo+ ne bene Levi mu bibumbo byabo,+ kibumbo ne kibumbo kya babitobo ne kya bene Levi na mwingilo wakyo,+ wa byamulambu bisōkwe ne bitapwa bya kipwano, amba bengile ne kufwija’ko ne kutendela mu bibelo bya bipango* bya Yehova.+ 3 Kipindi kya bintu bya mulopwe kyaletelwe mwanda wa byamulambu bisōkwe,+ mwadi ne byamulambu bya lubanga ne kyolwa,+ ne byamulambu bisōkwe bya Masabato,+ ne bya makweji katenta,+ ne bya masobo,+ mwendele byobya bilembelwe mu Bijila bya Yehova.

4 Kadi, wasoñenye bantu bekalanga mu Yelusalema balete kipindi kifwaninwe kupebwa babitobo ne bene Levi,+ mwanda wa balamate bininge* ku bijila bya Yehova. 5 Ao musoñanya usambakana’tu, bene Isalela baleta byangulwa bibajinji bingi bya miseke, ne vinyu mipya, ne māni,+ ne būki, ne bipa byonso bya mu budimi;+ baleta kipindi kimo kya pa bipindi dikumi bya bintu byonso, bebileta bingi.+ 6 Kadi bantu ba Isalela ne ba Yuda bekalanga mu bibundi bya Yuda nabo baleta kipindi kimo kya pa bipindi dikumi bya bañombe ne mikōko ne kipindi kimo kya pa bipindi dikumi bya bintu bijila+ byapandwilwe kudi Yehova Leza wabo. Bebitūla milwi mingi. 7 Mu kweji wa busatu,+ bashilula kubunga byabuntu byabo milwi milwi; bapwa mu kweji wa busamba-bubidi.+ 8 Paile Hezekia ne bamfumu bamona milwi’ya, batendela Yehova ne kwesela bantu bandi, bene Isalela.

9 Hezekia waipangula babitobo ne bene Levi pangala pa milwi’ya, 10 penepo Azadia kitobo mukulu wa ku njibo ya Zadoki wamutentulula’mba: “Tamba kitatyi kyobashilwile kuleta byabuntu mu njibo ya Yehova,+ bantu badyanga baikuta kadi kwashala ne bikwabo bivule, mwanda Yehova waesela bantu bandi, kadi bino bivule’bi i byashala’ko.”+

11 Ponkapo kala Hezekia webanena bateakanye’ko byumba bya bibīko*+ mu njibo ya Yehova, nabo bebiteakanya. 12 Badi baleta’nka kuleta byabuntu na kikōkeji, bipindi bya dikumi,*+ ne bintu bijila; Konania mwine Levi ye wadi utala bino byonso bu mutadi, mwanabo Shimei ye wadi umulonda. 13 Yehiele, ne Azazia, ne Nahate, ne Asahele, ne Yedimote, ne Yozabada, ne Ediele, ne Isemakia, ne Mahate, ne Benaya badi bakwashi ba Konania ne mwanabo Shimei, mungya musoñanya wa Mulopwe Hezekia, kadi Azadia nandi wadi utala njibo ya Leza wa bine. 14 Kadi Kole mwanā Imanahi, mwine Levi kalama wa ku kibelo bukila bwa kutunduka,+ wadi utala byamulambu bya kwilanga+ bya Leza wa bine, kadi wadi wabanya byabuntu byatūdīlwe Yehova+ ne bintu bijila nakampata.+ 15 Wadi wendeja ba Edena, ne Miniamine, ne Yeshua, ne Shemaia, ne Amadia, ne Shekania, mu bibundi bya babitobo,+ mu mwingilo wabo wa bantu bakulupilwa, mwanda wa kwabanya’byo muswelo umo ku banababo mu bibumbo,+ ne bakatampe ne batyetye bene. 16 Kadi, baabile bino bintu ne boba balembelwe mungya misuku yabo, ko kunena’mba, bantu badi bāya difuku ne difuku kwingila mu njibo ya Yehova mwanda wa kuvuija mingilo ya bibumbo byabo, pamo ne babo bana bana-balume ba myaka isatu kokanda.

17 Babitobo balembelwe mungya misuku yabo mwendele njibo ya shabo,+ na mwalembelwe ne bene Levi ba myaka 20 kokanda,+ mungya mingilo ya bibumbo byabo.+ 18 Balembelwe mungya misuku yabo pamo ne babo bana bonso, ne babo bakaji, ne babo bana bana-balume ne bana-bakaji, kipwilo kyabo kyonso kituntulu, mwanda badi bepandula pa mwanda wa mwingilo ujila pangala pa mwingilo wabo wa bantu bakulupilwa, 19 pamo ne lutundu lwa Alone, babitobo badi bekele mu matanda a madyo ajokolokele bibundi byabo.+ Mu bibundi byonso, bantu batelelwe pa majina mwanda wa kwabanya byakudya ku bana-balume bonso mu babitobo ne ku yewa ense walembelwe mungya musuku wa bene Levi.

20 Hezekia walongele namino mu Yuda monso, kadi walongele nyeke biyampe, byoloke, ne bya kikōkeji ku meso a Yehova Leza wandi. 21 Kadi mingilo yonso yaadi wingila mwanda wa kukimba Leza wandi, wikale mwingilo wa njibo ya Leza wa bine+ nansha utala Bijila ne mbila, waingile’o na mutyima onso, kadi byadi bimwendekela biyampe.