Eseta

2 Bino bintu pa kupwa, bukalabale bwa Mulopwe Ahaswelusa+ pa kumutūka, wavuluka byalongele Vashiti+ ne butyibi bobamutyibīle.+ 2 Penepo bengidi ba mulopwe banena’mba: “Bakimbile’ko mulopwe bansongwakaji bajike* bayampe mpala. 3 Kadi mulopwe atonge bemaniji mu matanda andi onso a bubikavu,*+ bakongakanye bansongwakaji bonso bajike bayampe mpala ku Shushane* kibundi kya nsakwa,* ku njibo ya bana-bakaji.* Balamwe na Hekai+ ntungu wa mulopwe kadi mulami wa bana-bakaji, bebape ne bya kwineñenya nabyo.* 4 Nsongwakaji ukasangaja mulopwe bininge ye ukekala mukaja mulopwe pa kyaba kya Vashiti.”+ Uno mulangwe wasangaja mulopwe, kadi walongela monka.

5 Mu Shushane*+ kibundi kya nsakwa* mwadi mwana-mulume umo Muyuda, dijina dyandi i Modekai+ mwanā Yaila mwanā Shimei mwanā Kishi, mwine Benjemani,+ 6 waselelwe bu musungi ku Yelusalema ne bantu baselelwe pamo na Yekonia*+ mulopwe wa Yuda, waselelwe na Nebukaneza mulopwe wa Babiloni bu musungi. 7 Wadi mulami* wa Hadasa,* ko kunena’mba Eseta, mwanā mwanabo na shandi,+ mwanda kadipo na shandi nansha inandi. Uno nsongwakaji wadi muyampe kadi umweka biyampe, kadi pafwile shandi ne inandi, Modekai wamusela ke wandi mwana. 8 Kinenwa kya mulopwe ne kijila kyandi pa kusapulwa, ne paselēlwe bansongwakaji bavule ku Shushane* kibundi kya nsakwa* amba balamwe na Hekai,+ Eseta nandi waselēlwe ku njibo* ya mulopwe mu bulami bwa Hekai mulami wa bana-bakaji.

9 Ino pano uno nsongwakaji wamusangaja kadi nandi wamutōkelwa mutyima,* ponkapo wamulongolwela bya kwineñenya*+ nabyo ne byakudya byandi, wamupa ne bansongwakaji basamba-babidi batongwe, ba mu njibo ya mulopwe. Kadi wamutuma aye ne bengidi bandi bansongwakaji ku kifuko kilumbuluke mu njibo ya bana-bakaji.* 10 Eseta kanenenepo mwanda nansha umo wa bantu bandi,+ nansha wa babutule bandi, mwanda Modekai+ wamulombwele aleke kusapwila muntu nansha umo.+ 11 Modekai wadi wenda difuku ne difuku kumeso kwa kipango kya njibo ya bana-bakaji* amba ayuke mubūkile Eseta ne bine bimufikila.

12 Nsongwakaji ense wadi utwela kudi Mulopwe Ahaswelusa shi myeji 12 ya kwineñenya yadi itungīlwe bana-bakaji ibabwana, mwanda uno o muswelo obadi beneñenya*—badi balonga myeji isamba na māni a mpakwa,+ myeji isamba mikwabo na māni a balasome+ ne māni a kwishinga meshileshile mwanda wa kwineñenya.* 13 Ebiya nsongwakaji wadi ukokeja kutwela kudi mulopwe, kadi byonso byaadi ulomba byadi bimupebwa shi katambe ku njibo ya bana-bakaji* kaenda ku njibo ya mulopwe. 14 Wadi utwela’ko kyolwa, lubanga wajokela ku njibo ya bubidi ya bana-bakaji,* mu bulami bwa Shashikaze ntungu wa mulopwe,+ mulami wa bakaji ba pafula. Kadipo wenda monka kudi mulopwe poso’nka shi mulopwe wamusangela bininge ne kumwita pa dijina.+

15 Kadi pabwene kitatyi kya Eseta mwanā Abihaile, mwanabo na shandya Modekai, mwine wamuyete ke wandi mwana,+ kya kutwela kudi mulopwe, kalombelepo kintu poso’nka byobya byasoñenye Hekai ntungu wa mulopwe kadi mulami wa bana-bakaji. (Papo muntu ense wadi umona Eseta wadi umutōkelwa mutyima.) 16 Eseta waselēlwe kwa Mulopwe Ahaswelusa ku njibo yandi ya bulopwe mu kweji wa dikumi, ko kunena’mba kweji wa Tebete,* mu mwaka wa busamba-bubidi+ wa bulopwe bwandi. 17 Ebiya mulopwe wasanswa Eseta kupita bana-bakaji bakwabo bonso, kadi wamutōkelwa mutyima ne kumusangela* kupita bajike bakwabo bonso. Penepo wamuvwika kilongo* ku mutwe wandi, wamutūla ke mukaja mulopwe+ pa kyaba kya Vashiti.+ 18 Mulopwe wasobela bamfumu bandi bonso ne bengidi bandi bonso masobo makatampe, masobo a Eseta. Penepo waeleja lubila lwa kulekelelwa mu matanda a bubikavu,* kadi wadi upāna’nka kupāna byabuntu mungya kamweno ka mulopwe.

19 Ino pakongakanibwe bajike*+ musunsa wa bubidi, Modekai wadi ushikete pa kibelo kya mulopwe. 20 Eseta kanenenepo mwanda nansha umo wa babutule bandi ne bantu bandi,+ monka mwamulombwedile Modekai; Eseta wadi ulonga nyeke byadi bimunena Modekai, monka mwaadi ulongela paadi umulelele.+

21 Mu mene mafuku’a padi pashikete Modekai pa kibelo kya mulopwe, Bikitane ne Teleshe bengidi babidi ba bulēme ba mu kipango kya mulopwe, batulama ba pa kibelo, baloba ne kukuta kitumba kya kwipaya* Mulopwe Ahaswelusa. 22 Ino Modekai wekiyuka, ponkapo walombola Eseta Mukaja Mulopwe. Penepo Eseta walombola’byo mulopwe mu dijina dya Modekai.* 23 Ebiya balonda mwanda’wa bayuka’mba i wa bine, kadi bana-balume bonso babidi’ba bayeyekwa ku mutyi; bino byonso byalembwa ku meso a mulopwe mu mukanda wa mānga ya bitatyi.+