Batyibi

11 Inoko Yefeta+ mwine Ngileade wadi wa bulwi mukomokomo; wadi mwana wa mwana-mukaji ndumba, Ngileade ye wadi shandya Yefeta. 2 Ino mukaja Ngileade nandi wamubutwidile bana bana-balume. Bana ba wandi mukaji pa kutama, bapanga Yefeta kebamunena’mba: “Kusapo kupyana kintu nansha kimo mu njibo ya tata, mwanda wi mwanā mwana-mukaji ungi.” 3 Ebiya Yefeta wanyema banababo wakashikata mu ntanda ya Tobe. Kadi bantu bazeuluka bapwana na Yefeta kebamulonda.

4 Kitatyi pa kupita’po, bene Amone balwa na Isalela.+ 5 Bene Amone pa kulwa na Isalela, bakulumpe ba Ngileade baenda ponka na ponka kukajokeja Yefeta wadi mu ntanda ya Tobe. 6 Banena Yefeta amba: “Iya wikale mukatampe wetu wa basola, amba tulwe na bene Amone.” 7 Ino Yefeta watentulula bakulumpe ba Ngileade amba: “Mwene i banwe baunshikilwe bikatampe mwampanga mu njibo ya tata?+ Mwanda waka mubaiya kondi pano pomudi mu tusua?” 8 Penepa bakulumpe ba Ngileade balondolola Yefeta amba: “O mwanda mwine otwajokela pano kodi. Shi wende netu ulwe na bene Amone, usa kwikala muledi wetu pa bekadi bonso ba Ngileade.”+ 9 Ebiya Yefeta watentulula bakulumpe ba Ngileade amba: “Shi mubaunjokeja mwanda wa kukalwa na bene Amone kadi Yehova anekenenye’bo, nabya bine nkekala muledi wenu!” 10 Bakulumpe ba Ngileade banena Yefeta amba: “Yehova ekale kamoni* pa bukata bwetu shi ketulongelepo mowanenena’mo.” 11 Penepa Yefeta waenda na bakulumpe ba Ngileade, bantu bamutūla ke wabo muledi ne mukatampe wa basola. Kadi Yefeta wapituluka mu binenwa byandi byonso ku meso a Yehova mu Mizipa.+

12 Kupwa Yefeta watuma mikendi kudi mulopwe wa bene Amone+ amba: “Le udi nami mwanda’ka* oila kutamba ntanda yami bulwi?” 13 Ebiya mulopwe wa bene Amone wanena mikendi ya Yefeta amba: “I mwanda Isalela wayete ntanda yami pobadi bakanda kutamba mu Edipito,+ tamba ku Alenona+ kufika ne ku Yaboko kutūla ne ku Yodano.+ Pano jokejai’yo mu biyampe.” 14 Ino Yefeta watuma monka mikendi kudi mulopwe wa bene Amone 15 bamulombole amba:

“Mo mwanenena Yefeta amba: ‘Isalela kayetepo ntanda ya bene Moabu+ ne ntanda ya bene Amone,+ 16 mwanda pobakandile kutamba mu Edipito, Isalela wapityile mu ntanda mutuputupu kutūla ne ku Dijiba Dityila,+ kupwa baiya ku Kadesha.+ 17 Penepa Isalela watuma mikendi kudi mulopwe wa Edoma+ amba: “Tubakwisāshila tupite’po bidi mu ntanda yobe,” ino mulopwe wa Edoma kwivwana mpika. Batumina ne mulopwe wa Moabu+ musapu, ino nandi kaitabijepo. O mwanda Isalela washikete’nka mu Kadesha.+ 18 Abo pa kupita mu ntanda mutuputupu, bakonkolokele ntanda ya Edoma+ ne ntanda ya Moabu. Baenda dya kutunduka kwa ntanda ya Moabu+ batūla nkambi mu ntanda ya Alenona; kebatwelelepo mu mukalo wa Moabu,+ mwanda Alenona o wadi mukalo wa Moabu.

19 “‘Kupwa Isalela watuma mikendi kudi Shihone mulopwe wa bene Amole, mulopwe wa Heshebone, Isalela wamunena’mba: “Tubakwisāshila tupite’po bidi mu ntanda yobe twende ku kifuko kyetu.”+ 20 Ino Shihone kakulupilepo Isalela amba atyibuluke ntanda yandi, penepa Shihone wakongela bantu bandi bonso pamo watūla nkambi mu Yahaza ne kulwa walwa Isalela bulwi.+ 21 Penepa Yehova Leza wa Isalela wapāna Shihone ne bantu bandi bonso mu kuboko kwa Isalela, nabo bebanekenya, kupwa Isalela wayata ntanda yonso ya bene Amole, bekadi ba ntanda’ya.+ 22 Enka nenki bayata ntanda yonso ya bene Amole tamba ku Alenona kufika ne ku Yaboko, ne tamba mu ntanda mutuputupu kufika ne ku Yodano.+

23 “‘I Yehova Leza wa Isalela wapangile bene Amole ku meso a Isalela bantu bandi,+ ino banwe kemusake kwibapanga? 24 Mwene mwayete bintu byo-byonso byemupēle leza wenu Kemoshi+ ke byenu? Nanshi muntu yense wapangwa na Yehova Leza wetu ku meso etu ye otusa kupanga.+ 25 Le banwe mutabukile Balaka+ mwanā Zipole mulopwe wa Moabu? Lelo kashā kadi mwipotomeje na Isalela, nansha le kashā ke mulwe nabo? 26 Padi pashikete Isalela mu Heshebone ne bibundi bidi mu bwendeji* bwakyo,+ ne mu Aloele ne bibundi bidi mu bwendeji bwakyo, ne mu bibundi byonso bidi ku mungo ya Alenona mu myaka 300, mwanda waka kwailepo nansha dimo kwibajokeja mu kine kitatyi’kya?+ 27 Ami nkikupilepo mambo, ino ubaluba pa kuntamba bulwi. Yehova Mutyibi+ ekale mutyibi dyalelo pa bukata bwa bantu ba Isalela ne bantu ba Amone.’”

28 Ino mulopwe wa bene Amone kaivwenepo musapu wamutumine Yefeta.

29 Mushipiditu wa Yehova watūkila Yefeta,+ nandi wapita mu Ngileade ne mu Manase waenda ku Mizipe wa Ngileade,+ kadi tamba ku Mizipe wa Ngileade walunguluka kufika ne ku bene Amone.

30 Kupwa Yefeta wapika mpiko+ kudi Yehova amba: “Shi upāne bene Amone mu kuboko kwami, 31 nabya muntu ense ukatamba pa kibelo kya yami njibo kwiya kuntundaila ponsa kujoka kudi bene Amone mu ndoe, ukekala wa Yehova,+ nami nkamupāna bu kyamulambu kisōkwe.”+

32 Ebiya Yefeta waenda kukalwa na bene Amone, Yehova nandi webapāna mu kuboko kwandi. 33 Webatapa, ke kutapa i kukunya, tamba ku Aloele kufika ne ku Minite—bibundi 20—kutūla ne ku Abele-Kelamimi. Enka nenki bene Amone banekenibwa ku meso a bene Isalela.

34 Ku mfulo Yefeta wafika kwandi mu Mizipa,+ ino tala! wandi mwana mwana-mukaji watamba kumutundaila, omba ñoma koku uja! Aye ye wadi wandi mwana umo kete. Kadipo na mwana mukwabo mwana-mulume nansha mwana-mukaji. 35 Aye pa kumumona, wasana bivwalwa byandi kanena’mba: “Yō, a wami mwana! Ubantyumuna mutyima,* mwanda ubaikala muntu onapanga. Ino kendi mwasame kala kyakanwa kyami kudi Yehova, nkikibwanyapo kujokela kunyuma.”+

36 Ino wamutentulula’mba: “A tata shi kodi kala mwasame kyakanwa kyobe kudi Yehova, nongele enka molaile’kyo,+ mwanda Yehova walubwila balwana nobe kinongo pa mwanda obe, ke bene Amone kadi.” 37 Kupwa wanena shandi amba: “Kinongelwe namino: Ndeke ngikale kwa bunka mu myeji ibidi, ndeke ñende mu ngulu nkadile bujike bwami na bakwetu bana-bakaji.”*

38 Nandi wanena’mba: “Enda!” Ebiya wamutuma myeji ibidi, penepa waenda na bakwabo ku ngulu kukadila bujike bwandi. 39 Ku mfulo kwa myeji ibidi, wajokela kwa shandi, kupwa shandi wavuija mpiko yaamupikīle.+ Kalēlepo nansha dimo na mwana-mulume. Kyaikala ke kibidiji* mu Isalela: 40 Mwaka ne mwaka, bansongwakaji ba mu Isalela badi benda kukatendela mwanā Yefeta mwine Ngileade mafuku aná ku mwaka.