Batyibi

20 Ponkapo, bene Isalela bonso batamba ku Dani+ batūkila ku Bela-Sheba, ne ba ku ntanda ya Ngileade+ nabo batamba, kadi kitango kyonso kyekongela mu bumo* ku meso a Yehova ku Mizipa.+ 2 Ebiya bamfumu ba bantu ne bisaka byonso bya Isalela baimana pa bifuko byabo mu kipwilo kya bantu ba Leza—basola ba lwa nshi 400 000 belumbile bipete.+

3 Bene Benjemani baivwana’mba bana-balume ba Isalela abakanda ku Mizipa.

Kupwa bana-balume ba Isalela baipangula’mba: “Witulombole, lelo kino kintu kibikibi kyalongekele namani?”+ 4 Penepa mwana-mulume mwine Levi,+ mulumya mwana-mukaji waipailwe’wa, walondolola’mba: “Nafikile ku Ngibea+ wa Benjemani na wami mukaji wa pafula’mba tulāle’ko bufuku. 5 Ebiya bekadi* ba Ngibea bauntetukila bajokoloka njibo bufuku. Badi basaka kungipaya, ino balāla na wami mukaji wa pafula ku bukomo ne kufwa wafwa.+ 6 Penepa nami nayata umbidi wa mukaji wa pafula neusaya, kupwa natuma biseso mu kipindi ne kipindi kya bupyani bwa Isalela,+ mwanda balongele kilongwa kya mwiko kadi kya bumvu mu Isalela. 7 Shi ke pano banwe bantu bonso ba Isalela, letai milangwe ne madingi+ enu pano.”

8 Ponkapo bantu bonso baimana mwa kimo* kebanena’mba: “Kekudipo muntu nansha umo potudi’pa usa kwenda ku pema wandi nansha kujokela ku njibo yandi. 9 Bino byo byotusa kulonga Ngibea: Tusa kukanda kulwa nandi mungya bubale.+ 10 Tusa kuyata bana-balume 10 pa 100 mu bisaka byonso bya Isalela, ne 100 pa 1 000 kadi ne 1 000 pa 10 000 ba kukongakanya bidibwa bya kibumbo kya basola, mwanda wa bakatambe’dyo Ngibea wa Benjemani, pa mwanda wa kilongwa kya bumvu kyalongelwe mu Isalela.” 11 Enka nenki bana-balume bonso ba Isalela bakongakanibwa mu bumo* kukalwa na kibundi, pamo bwa bantu bekūkile.

12 Kupwa bisaka bya Isalela byatuma bana-balume kudi bana-balume ba mu bisaka bya Benjemani, kebanena’mba: “Lelo i kintu’ka kino kibikibi kyalongekele mu bukata mwenu? 13 Shi ke pano letai bana-balume ba bitupu ba mu Ngibea’ba,+ amba twibepaye tufundule kibi mu Isalela.”+ Ino bene Benjemani bapela kuteja banababo bene Isalela.

14 Kupwa bene Benjemani batamba mu bibundi bekongela pamo ku Ngibea mwanda wa kukalwa na bana-balume ba Isalela. 15 Mu dine difuku’dyo bene Benjemani babungakanibwa kutamba mu bibundi byabo, bana-balume 26 000 belumbile bipete, kutalula’mo bidi bana-balume 700 batongibwe mu Ngibea. 16 Mu kine kibumbo kya basola’kyo mwadi bana-balume 700 batongibwe ba kinkuso. Umo ne umo mu bano bana-balume wadi ubwanya kwasa dibwe dya mu topito pa kantu kadi bwa lunywene pampikwa kutupa.

17 Bana-balume ba Isalela kutalula’mo Benjemani, babungakenye bana-balume 400 000 belumbile bipete,+ umo ne umo wadi muntu wa bulwi wa bwino. 18 Bataluka bakanda ku Betele kukepangula Leza.+ Kupwa bantu ba Isalela baipangula’mba: “I ani usa kubadikila kukanda akalwe na bene Benjemani?” Yehova walondolola’mba: “Yuda ye usa kubadikila.”

19 Kupwa bene Isalela bataluka lubanga batūla nkambi mwa kulwila na Ngibea.

20 Penepa bana-balume ba Isalela batamba kukalwa na Benjemani; bepanga mu milongo ya bulwi ku Ngibea mwa kulwila nabo. 21 Ebiya bene Benjemani batamba mu Ngibea, baipaya bana-balume ba Isalela 22 000 mu dine difuku’dyo. 22 Inoko kibumbo kya bana-balume ba Isalela kyekankamika kyepanga monka mu milongo ya bulwi pantu pamo ponka pobepangīle dibajinji. 23 Kupwa bene Isalela bakanda bakadidila Yehova kufika ne ku kyolwa, kebepangula Yehova amba: “Lelo twende monka kukalwa na banabetu, bantu ba Benjemani?”+ Penepo Yehova walondolola’mba: “Kandai mukalwe nabo.”

24 Ebiya bene Isalela bafwena kwadi bene Benjemani mu difuku dya bubidi. 25 Penepo Benjemani nandi watamba mu Ngibea kwiya kwibasambakana mu difuku dya bubidi, baipaya monka bene Isalela 18 000,+ abo bonso belumbile bipete. 26 Ponkapo bana-balume bonso ba Isalela bakanda ku Betele. Badila bashikata konka ku meso a Yehova,+ bashikilwa na nzala+ mu dine difuku’dyo kufika ne ku kyolwa, balambula ne byamulambu bisōkwe+ ne byamulambu bya kipwano+ ku meso a Yehova. 27 Kupwa bana-balume ba Isalela baipangula Yehova,+ mwanda sanduku wa kipwano kya Leza wa bine wadi mwine’mwa mu oa mafuku. 28 Ebiya Finease+ mwanā Eleaza, mwanā Alone, wadi wingila* ku meso a sanduku mu mene mafuku’a. Baipangula’mba: “Lelo tutambe monka kukalwa na banabetu, bana-balume ba Benjemani, nansha tuleke kwenda?”+ Yehova walondolola’mba: “Kandai, mwanda kesha nsa kwibapāna mu makasa enu.” 29 Penepa Isalela watūla bana-balume ba kufyama+ kufulakufula konso kwa Ngibea.

30 Bene Isalela bakanda kukalwa na bene Benjemani mu difuku dya busatu, betunga mu mulongo wa kulwa na Ngibea monka mobetungīle misunsa mikwabo.+ 31 Bene Benjemani pa kutamba kusambakana kibumbo kya basola, bapalwilwa kulampe bininge na kibundi.+ Ebiya monka mobalongele misunsa mikwabo, bashilula kutamba ne kwipaya bana-balume bamo mu mashinda makatampe, dishinda dimo dyadi dyenda ku Betele ne dikwabo ku Ngibea, bashiya kintu kya bana-balume 30 ba Isalela bafwe mu ntanda.+ 32 Ebiya bene Benjemani banena’mba: “Tubebanekenya motwebanekeninye dibajinji.+ Ino bene Isalela banena’mba: “Tusa kunyema twibapalwile kulampe na kibundi mu mashinda makatampe.” 33 Penepa bana-balume bonso ba Isalela bataluka pa byaba byabo baketunga mu milongo ku Bāla-Tamala koku bene Isalela badi bafyeme’ba batamba pa byaba byabo kufulakufula kwa Ngibea. 34 Ponkapo bana-balume batongwe 10 000 ba mu Isalela ense baiya kampalampala na Ngibea, bulwi bwanana. Ino bene Benjemani kebadipo bayukile amba kyamalwa kibafwena.

35 Yehova wanekenya Benjemani+ ku meso a Isalela, mu dine difuku’dyo bene Isalela baipaya bana-balume 25 100 mu Benjemani, abo bonso belumbile bipete.+

36 Inoko bene Benjemani balangile’mba bana-balume ba Isalela basa kunekenibwa pobadi banyema Benjemani,+ ino banyemene mwanda badi bekulupile bantu badi bafyeme mwa kulwila na Ngibea.+ 37 Bantu badi batengele’ba balonga bukidibukidi, batūtyikila mu Ngibea. Kupwa bantu badi bafyeme’ba basalañana bakubija kibundi kyonso na kipete.

38 Ino bana-balume ba Isalela badi beivwanike amba bana-balume badi batengele kibundi’ba bafwaninwe kumwekeja kiyukeno kya mwishi ukanda mūlu kutamba kwine’kwa.

39 Bene Isalela pa kwalamuka mu bulwi, bana-balume ba Benjemani bashilula kwibatamba’dyo ne kwipaya kintu kya bana-balume 30 ba Isalela,+ kebanena’mba: “Na bubine tubebanekenya dikwabo motwebanekeninye mu bulwi bubajinji.”+ 40 Ino kiyukeno kyashilula kukanda mu kibundi pamo bwa dilenga dya mwishi. Bana-balume ba Benjemani pa kwalamuka kebatale, bamona kibundi kyonso kilakuka mimbi mūlu. 41 Penepo bana-balume ba Isalela bavundamuka, ino bana-balume ba Benjemani batuyuka, mwanda bamwene’mba kyamalwa kibebatana. 42 Ebiya banyema ku meso a bana-balume ba Isalela baenda dya mu ntanda mutuputupu, ino bulwi bwebalonda; bana-balume batamba mu bibundi belunga nabo mu kwibepaya. 43 Bajokoloka bene Benjemani ne kwibalonda pampikwa kukōka. Bebatukijija kampalampala’tu na Ngibea dya kutunduka. 44 Mfulo mfulō bana-balume 18 000 ba Benjemani bapona, bonso ba bulwi bakomokomo.+

45 Bana-balume ba Benjemani baalamuka kebanyemena mu ntanda mutuputupu ku kidibwe kya Dimōne,+ bene Isalela baipaya’mo* bantu 5 000 mu mashinda makatampe, baendelela kwibalonda kufika ne ku Ngidome; penepa baipaila’ko bana-balume 2 000 bakwabo. 46 Bonso ba mu Benjemani baponene mu dine difuku’dya badi bana-balume 25 000 belumbile bipete,+ bonso ba bulwi bakomokomo. 47 Ino bantu 600 banyemena mu ntanda mutuputupu ku kidibwe kya Dimōne, baikala ku kidibwe kya Dimōne myeji iná.

48 Bana-balume ba Isalela bajoka kobadi bakalwile na bene Benjemani, baipaya na kipete boba badi mu kibundi, ne bantu ne bimunanwa bine kumo, bonso bashele’mo. Kadi basōka na mudilo bibundi byonso byobadi bapita’mo.