Mwendele Mako

5 Kupwa bafikile bobwa bukila bwa dijiba mu ntanda ya bene Ngelaze.+ 2 Ponka na ponka Yesu pa kupwa kwabuka mu bwato, muntu umo uludikwa na mushipiditu wa disubi wamusambakana utamba mu bibundu.* 3 Wadi wikalanga mu bibundu, kadi kufika ne pa kyokya kitatyi, i kutupu muntu wadi ubwanya kumukuta mbū, nansha ke na muyololo mwine. 4 Wadi ukutwanga divule mu nkano ne mu miyololo, ino wadi utyibanga miyololo ne kukanununa nkano; kadi i kutupu muntu wadi na bukomo bwa kumunekenya. 5 Kadi kyaba kyonso, bufuku ne mwinya, wadi wela ñanji mu bibundu ne mu ngulu ne kwitapa aye mwine bilonda na mabwe. 6 Aye pa kumona Yesu kulampe, wanyemena lubilo kwadi wevukwila kwadi.+ 7 Kupwa waela lubila na diwi dikatampe amba: “Le ndi nobe mwanda’ka, abe Yesu, Mwanā Leza Mwine wa Peulu Mwine? Nakutyipija ne Leza amba kokamwesha malwa.”+ 8 Mwanda wadi wiulombola’mba: “Tamba mu uno muntu, abe mushipiditu wa disubi.”+ 9 Ino Yesu wamwipangula’mba: “Le dijina dyobe wi ani?” Nandi amba: “Dijina dyami ne Kibumbo kya Bulwi, mwanda tudi bungi.” 10 Kadi wadi wisāshila Yesu aleke kutuma mishipiditu panja pa yoya ntanda.+

11 Ebiya, kwadi luombe lukatampe lwa bangulube+ badi badya ku lūlu.+ 12 Penepo mishipiditu keimwisāshila’mba: “Witutume mu bangulube, tukatwele’mo.” 13 Nandi weileka ikatwele’mo. Penepo mishipiditu ya disubi’ya yatamba yakatwela mu bangulube, ebiya luombe lwanyemena ku nenekelo ya lupongo* lwaponena mu dijiba, badi kintu kya 2 000, penepo bonso bafwa mema mu dijiba. 14 Ino balami babo banyema bakasapula’byo mu kibundi ne mu madimi, penepa bantu baiya kutala byobya byalongekele.+ 15 Ebiya baiya kudi Yesu, bamona ne muntu mukwatwe na bandemona, wadi dibajinji na kibumbo kya bulwi’wa, ushikete uvwele bisandi kadi ne ñeni mimubwane’tu senene, penepa moyo webakwata bininge. 16 Kadi, boba bamwene’byo kebebasapwila mwapityile myanda ya yewa muntu wadi mukwatwe na bandemona ne ya bangulube. 17 Byobiya kebazenze Yesu atambe mu yabo ntanda.+

18 Ebiya pawadi kaikila mu bwato, muntu wadi mukwatwe na bandemona’wa kamuzenze amba bende nandi.+ 19 Aye wamupelela, ino wamunena’mba: “Enda kwinjibo ku babutule bobe, ukebalombole byonso byakulongela Yehova* ne lusa lwaakufwila.” 20 Penepo waenda kasapula mu Dekapodi* bintu byonso byamulongēle Yesu, kadi bantu bonso batendela.

21 Yesu pa kupwa kwabukila monka bukila bukwabo lwa bwato, kibumbo kikatampe kyaungwila kwadi, aye papo kufula kwa dijiba.+ 22 Mwendeji umo wa shinankonka, wa dijina dya bu Yelusa, waiya, pa kumumona, wapona ku maulu andi.+ 23 Kamuzenze divule dine amba: “Wami mwana mwana-mukaji ubela bininge.* Iya’po ukamutenteke makasa+ akome ne kwikala mūmi.” 24 Ponkapo Yesu waenda nandi, kadi kibumbo kikatampe kyadi kimulonda ne kumutyinya koku na koku.

25 Ino, kwadi mwana-mukaji umo wadi na muyeye wa mashi+ ke myaka 12.+ 26 Wasusukile mpata* ku bamuñanga bavule, wapwa byonso byaadi nabyo, ne kumwena’mo mpika, ino po pene wenda ubelela’ko. 27 Aye pa kwivwana myanda ya Yesu, waiya dya kunyuma mu kibumbo wamutenga ku kivwalwa kyandi kya pangala,+ 28 mwanda wadi unena’nka kunena’mba: “Shi ntenge’tu ku bivwalwa byandi bya pangala, nsa kukoma.”+ 29 Ponka na ponka muyeye wandi wa mashi waketeka, kadi weivwana mu ngitu yandi amba wakoma ku luba lusansa’lwa.

30 Ponka na ponka, Yesu weivwana munda mwandi amba bukomo+ bubamutambe’mo, penepo waalamukila ku kibumbo kaipangula’mba: “I ani wantenga ku bivwalwa byami bya pangala?”+ 31 Ino bandi bana ba bwanga kebamunena’mba: “Abe mwine umwene’tu kibumbo kikutyininye’ki, penepo koipangula’mba, ‘I ani wantenga?’” 32 Inoko, watala koku ne koku amba amone mwine walonga kino. 33 Mwana-mukaji’wa waivwana moyo kazakala, pa kuyuka byobya byamufikila, waiya wapona ku meso andi, kamulombola bubine bonsololo. 34 Nandi wamunena’mba: “A mwanami, lwitabijo lobe lubakukomeja. Enda mu ndoe,+ kadi beluka ku luba lobe lusansa.”+

35 Aye ukinena, bana-balume bamo ba ku njibo ya mwendeji wa shinankonka baiya kebamusapwila’mba: “Obe mwana mwana-mukaji wafu! Le kyokambakenya monka Mufundiji i kika le?”+ 36 Ino Yesu waivwana kala binenwa byabo, nandi kanena mwendeji wa shinankonka’mba: “Kokakwatwa moyo,* abe lombola’tu lwitabijo.”+ 37 Ebiya, kasakilepo muntu nansha umo amulonde poso enka Petelo, Yakoba ne Yoano mwanabo na Yakoba.+

38 Penepo bafika ku njibo ya mwendeji wa shinankonka, wamona bantu balenga lunwa ne boba badila bayoyokota miyoa mikatampe.+ 39 Aye pa kutwela’mo, webanena’mba: “I kika kyomudidila ne kulenga lunwa? Uno mwana kafwilepo ino ulēle.”+ 40 Penepo kebamusepa bya kibengo. Ino aye pa kupwa kutambija bonso panja, wasela ba shandya mwana ne inandya mwana ne boba baadi nabo, watwela mwadi mwana. 41 Penepo wakwata mwana ku kuboko, wamunena’mba: “Talita kumi,” kushintulula ko kunena’mba: “A nsongwakaji, nakunena’mba, imana!”+ 42 Ponka na ponka nsongwakaji walanguka kaenda. (Wadi na myaka 12.) Ponkapo babezemuka bya mwiko na nsangaji ya kashā. 43 Ino webanena wibakoma’mba* muntu nansha umo kakiyuka uno mwanda,+ kupwa webanena’mba mupei’ko byakudya.