Balopwe wa Bubidi

10 Ahaba+ wadi na bana bana-balume 70 mu Samadia. Penepo Yehu walemba mikanda weituma ku Samadia, kudi bamfumu ba Yezelele, ne bakulumpe,+ ne baledi ba bana ba Ahaba* amba: 2 “Pasa kufika uno mukanda komudi, bana ba mfumwenu basa kwikala nenu, pamo ne makalo a bulwi, ne tubalwe, ne kibundi kikomejibwe, ne byabulwi. 3 Tongai mwanā mfumwenu mulumbuluke kadi mufwaninwe* mpata mumutūle pa lupona lwa shandi. Kupwa lwilai njibo ya mfumwenu.”

4 Ino bakwatwa moyo bininge kebanena’mba: “Talai! Shi balopwe babidi kebabwenyepo kwimana ku meso andi,+ le batwe tukemana’ko namani?” 5 Penepo mutadi wa njibo mikatakata,* ne mbikavu wa kibundi, ne bakulumpe, ne baledi batuma uno musapu kudi Yehu amba: “Twi bengidi bobe, kadi tusa kulonga byonso byowitulombola. Ketusapo kubikika muntu nansha umo. Abe longa byonso byomona bu biyampe ku meso obe.”

6 Kupwa webatumina mukanda wa bubidi amba: “Shi mwi bantu bami kadi mwitabije kunkōkela, selai mitwe ya bana ba mfumwenu mwiye kuno kesha pa kino kitatyi mu Yezelele.”

Ino bana ba mulopwe bana-balume 70 badi pamo na bantu balēmekibwe ba mu kibundi badi bebalela. 7 Mukanda ufika’tu kobadi, bayata bana ba mulopwe bebatapa, bana-balume 70,+ batūla mitwe yabo mu bisaku bamutumina’yo ku Yezelele. 8 Ebiya mukendi watwela kamusapwila’mba: “Abaleta mitwe ya bana ba mulopwe.” Nandi amba: “Mwiitūlei mu milwi ibidi ku ntwelelo ya kibelo kya kibundi kufika ne ku lubanga.” 9 Aye pa kutamba lubanga, waimana ku meso a bantu bonso kanena’mba: “Banwe kemudipo na mambo.* Bine, nakutyīle mfumwami kitumba namwipaya,+ ino i ani waipaya bano bonso? 10 Shi ke pano yukai amba i kutupu kinenwa kya Yehova nansha kimo kyanenene Yehova pa njibo ya Ahaba kikatunya kufikidila,*+ kadi Yehova walonga byaanenene kupityila kudi mwingidi wandi Ediya.”+ 11 Pakwabo kadi, Yehu waipaile bantu bonso bashele ba mu njibo ya Ahaba mu Yezelele, pamo ne bantu bandi balēmekibwe, ne bayukane bandi, ne babitobo bandi,+ kamushidilepo muntu nansha umo mūmi.+

12 Kupwa wataluka waenda ku Samadia. Njibo ya bakumbi ya kukutyila’mo banyema* yadi mu dishinda’dya. 13 Kwine’kwa Yehu wetana na banababo na Ahazia+ mulopwe wa Yuda, webepangula’mba, “Le mwi bāni?” Nabo amba: “Twi banababo na Ahazia, twendanga kukepangula shi bana ba mulopwe ne bana ba lolo mfumu* badi biyampe.” 14 Ponkapo wanena’mba: “Mwibakwatei bōmi!” Penepo bebakwata bōmi bebatapila pa kyumbu kya njibo ya kukutyila’mo banyema, bana-balume 42. Kashilepo muntu nansha umo mūmi.+

15 Aye pa kutaluka kwine’kwa, wetana na Yehonadaba+ mwanā Lekaba+ wadi wiya kumusambakana. Aye pa kumwimuna,* wamunena’mba: “Le mutyima obe onso* udi nami, enka mwikadile mutyima wami na mutyima obe?”

Yehonadaba walondolola’mba: “I amo.”

“Shi i amo, mpe kuboko kobe.”

Penepo wamupa kuboko, Yehu nandi wamukokela mu dikalo mwaadi. 16 Kupwa wamunena’mba: “Twaya, tala monkisakilangapo muntu kwitāka* na Yehova.”+ Penepo bamukandija pamo nandi mu dikalo dyandi dya divita. 17 Ebiya wafika ku Samadia, waipaya bantu bonso bashele ba ku njibo ya Ahaba mu Samadia enka ne byaebatukije,+ mungya kinenwa kya Yehova kyaasapwidile Ediya.+

18 Kupwa, Yehu wakongakanya bantu bonso pamo kaebanena’mba: “Ahaba watōtele Bāla bityetye,+ ino Yehu usa kumutōta kutabuka. 19 Shi ke pano ngityilei bapolofeto bonso ba Bāla,+ ne batōtyi bandi bonso, ne babitobo bandi bonso.+ Kekwakibulwa nansha umo, mwanda nsa kulambula Bāla kitapwa kikatampe. Ense kakāyapo kakashalapo mūmi.” Ino Yehu wadi ulonga bya bukosoke mwa kwipaila batōtyi ba Bāla.

20 Yehu wanena monka’mba: “Kongakenyai* Bāla kitango kikola.” Nabo bekyelela lubila. 21 Kupwa papo Yehu watuma musapu mu Isalela ense, penepo batōtyi bonso ba Bāla baiya. Kekwadipo nansha umo washele kwiya mpika. Batwela mu njibo* ya Bāla,+ penepo njibo ya Bāla yayula mfulo na mfulo. 22 Wanena yewa wadi utala kokwa kulamwanga bisandi amba: “Lupula bivwalwa bya batōtyi bonso ba Bāla.” Nandi webalupwila bisandi. 23 Kupwa Yehu ne Yehonadaba+ mwanā Lekaba batwela mu njibo ya Bāla. Penepo wanena batōtyi ba Bāla amba: “Kimbai senene mujingulule amba kemudipo batōtyi ba Yehova muno, poso enka batōtyi ba Bāla.” 24 Ku mfulo batwela kulambula bitapwa ne byamulambu bisōkwe. Ino Yehu wadi wimikile bana-balume bandi 80 panja, webanena’mba: “Shi kunyeme muntu nansha umo mu bana-balume bonemupa mu makasa enu, nabya būmi bwenu bukapingakena pa bwandi.”*

25 Yehu upwa’tu kulambula kyamulambu kisōkwe, wanena balami* ne basola bakwashi amba: “Twelai mwibatape! Kemwakinyemejai muntu nansha umo!”+ Penepo balami ne basola bakwashi bebatapa na kipete bebēla panja, bebalondelela’nka ne mu kipandulwe kya munda* kya njibo ya Bāla. 26 Ebiya batambija bikomo bikola+ bya njibo ya Bāla basōka kimo ne kimo.+ 27 Kupwa batūta kikomo kikola+ kya Bāla, batūta ne njibo ya Bāla+ mine beyalamuna ke misalani, e moikadile ne dyalelo dino’di.

28 Enka nenki Yehu watukija fututu Bāla mu Isalela. 29 Inoko, Yehu kafundukilepo ku bubi bwa Yeloboame mwanā Nebata bwaalubije Isalela mu mwanda utala byana bya ñombe bya olo byadi mu Betele ne mu Dani.+ 30 Penepo Yehova wanena Yehu amba: “Byowalonga biyampe ne kulonga byoloke ku meso ami pa kufikidija byonso byadi bisaka mutyima wami kulonga ku njibo ya Ahaba,+ nkongo iná ya bobe bana ikashikata pa lupona lwa Isalela.”+ 31 Ino Yehu katelepo mutyima ku kunangila mu Bijila bya Yehova Leza wa Isalela na mutyima wandi onso.+ Kafundukilepo ku bubi bwa Yeloboame bwaalubije Isalela.+

32 Mu mene mafuku’a Yehova washilula kutyiba’ko* Isalela kipindikipindi. Hazaele wadi wibatamba’nka kwibatamba bulwi mu ntanda yonso ya Isalela,+ 33 tamba ku Yodano dya kutunduka, ntanda yonso ya Ngileade—ya bene Ngade, bene Lubeni, ne bene Manase+—tamba ku Aloele, kibundi kidi dya ku Musanza wa Alenona,* kutūla ne ku Ngileade ne Bashane.+

34 Kadi myanda mikwabo ya mānga ya Yehu, byonso byaalongele ne bukomokomo bwandi bonso, mwene i milembwe mu mukanda wa mānga ya bitatyi bya balopwe ba Isalela? 35 Kupwa Yehu walādikwa mwanda wa kukōkolokwa na bakulutuba bandi, bamujīka mu Samadia; ebiya wandi mwana Yehoahaze+ wabikala pa kyandi kyaba. 36 Yehu wabikele pa Isalela mu bula* bwa myaka 28 mu Samadia.