Danyele

5 Ino Mulopwe Beleshazale,+ wasobela ba bulēme bandi kanunu masobo makatampe, kadi wadi utoma vinyu ku meso abo.+ 2 Beleshazale pa kukolwa vinyu, wasoñanya balete bipungwa bya olo ne ndalama byaselele shandi Nebukaneza ku tempelo mu Yelusalema,+ amba mulopwe ne ba bulēme bandi ne bakaji bandi ba pafula ne bandi bakaji bakwabo batomene’mo. 3 Penepo baleta bipungwa bya olo byaselelwe ku tempelo ya njibo ya Leza mu Yelusalema, ebiya mulopwe ne ba bulēme bandi ne bakaji bandi ba pafula ne bandi bakaji bakwabo batomena’mo. 4 Batoma vinyu, kebatendela baleza ba olo ne ndalama, ba mukuba, ba byuma, ba mityi, ne ba mabwe.

5 Enka mu kine kitatyi’kya minwe ya kuboko kwa muntu yamweka keilembe ku lubumbu lushinwine lwa njibo mikatakata ya mulopwe kampalampala na kitūlwa-binanu, mulopwe wamona nyuma ya kuboko pokwadi kulemba. 6 Penepo mulopwe watōkoloka,* milangwe yandi yamutuyula, kifuka kyandi kekizakala+ kadi manwi andi keeteme.

7 Mulopwe waela lubila na diwi dikatampe amba bete bampaki ba manga, bene Kaladea,* ne babuka na ñenyenye.+ Mulopwe wanena bantu ba tunangu ba Babiloni amba: “Muntu ense usa kutanga bino bilembwa ne kunombola nshintulwilo yabyo, ukavwikwa bityilakana, ukavwikwa mu nshingo yandi+ kamuyololo ka olo, kadi ukabikala bu muntu wa busatu mu bulopwe.”+

8 Penepo bantu bonso ba tunangu ba mulopwe batwela, ino kebabwenyepo kutanga bilembwa’bya nansha kulombola mulopwe nshintulwilo.+ 9 Ebiya Mulopwe Beleshazale waivwana moyo bininge kadi mpala yandi yatōkoloka; ba bulēme bandi nabo bavutakanibwa.+

10 Mukaja mulopwe watwela mu njibo ya masobo pa mwanda wa binenwa bya mulopwe ne ba bulēme bandi. Mukaja mulopwe wanena’mba: “A mulopwe, ikala’ko nyeke. Milangwe yobe keyakakutuyula, kadi mpala yobe keyakitōkoloka. 11 Kudi muntu* umo mu bulopwe bobe udi na mushipiditu wa baleza bajila. Mu mafuku a shobe, kitōkeji ne bujinguludi ne tunangu pamo bwa tunangu twa baleza byatenwe mwadi.+ Mulopwe Nebukaneza shobe wamutūdile bu mukata wa babitobo ba maleñanya, bampaki ba manga, bene Kaladea,* ne babuka na ñenyenye;+ shobe walongele namino, abe mulopwe. 12 Mwanda Danyele, wainikilwe na mulopwe bu Beleteshazale,+ wadi na mushipiditu utulumukwa ne buyuki ne bujinguludi bwa kushintulula bilotwa, kushintulula ntyonko, ne kupwija myanda mikutakane.*+ Shi ke pano ityija Danyele, nandi ukakulombola nshintulwilo.”

13 Ebiya baselela Danyele ku meso a mulopwe. Mulopwe waipangula Danyele amba: “Le abe ye Danyele wa mu misungi ya Yuda,+ obaselele ku Yuda kudi tata mulopwe?+ 14 Naivwana banena myanda yobe amba mushipiditu wa baleza udi modi+ ne amba kitōkeji ne bujinguludi ne tunangu tutulumukwa bitanwa modi.+ 15 Bantu ba tunangu ne bampaki ba manga baletelwe ku meso ami amba batange bino bilembwa ne kunshintulwila’byo, ino kebabwenyepo kunombola nshintulwilo ya musapu.+ 16 Ino naivwene myanda yobe amba ubwanya kushintulula+ ne kupwija myanda mikutakane.* Pano shi ubabwanya kutanga bilembwa ne kunshintulwila’byo, ukavwikwa bityilakana, ukavwikwa mu nshingo yobe kamuyololo ka olo, kadi ukabikala bu muntu wa busatu mu bulopwe.”+

17 Penepo Danyele walondolola mulopwe amba: “Lama byabuntu byobe kadi bintu byobe abila’byo bantu bakwabo. Inoko, ami nsa kutangila mulopwe bilembwa ne kumulombola nshintulwilo yabyo. 18 Ino abe, a mulopwe, Leza Mwine wa Peulu Mwine wapele shobe Nebukaneza bulopwe ne bukatampe ne bulēme ne bukatakata.+ 19 Pa mwanda wa bukatampe bwaamupele, bantu bonso, mizo, ne ndimi badi bazakala ku meso andi.+ Wadi wipaya nansha kushiya mūmi yewa ense wasaka, kadi wadi uzunzula nansha kutūkija yewa ense wasaka.+ 20 Ino pezunzwile mutyima wandi ne paumine mushipiditu wandi, kalonga bintu na ditatu,*+ watūkijibwa pa lupona lwa bulopwe bwandi, kadi bulēme bwandi bwamuyatwa. 21 Wapangilwe mu bantu, mutyima wandi waalamunwa pamo bwa wa nyema, kadi kīkalo kyandi kyadi pamo na bampunda ba ntanda. Wapelwe munamuna bu byakudya pamo bwa bañombe, ngitu yandi yabomba lumé lwa mūlu, kufika ne byaayukile amba Leza Mwine wa Peulu Mwine i Mulopwe mu bulopwe bwa bantu ne amba upanga’bo yewa ense wasaka.+

22 “Ino abe, Beleshazale wandi mwana, mutyima obe kewityepejepo, nansha byoyukile bino byonso. 23 Ino, abe ubezunzwila Mfumu wa madiulu,+ ubaseleja ne bipungwa bya njibo yandi.+ Ebiya abe ne ba bulēme bobe, bakaji bobe ba pafula ne bakaji bakwabo mubatomena’mo vinyu, kemutendela baleza ba ndalama ne ba olo, ba mukuba, ba byuma, ba mityi, ne ba mabwe, baleza kebamonangapo nansha kwivwana nansha kuyuka kintu.+ Ino kutumbijepo Leza mwine udi na umpuya obe+ ne mashinda obe mu kuboko kwandi. 24 O mwanda watume kuboko, kadi bino bilembwa bibalembwe.+ 25 Bilembwa byadi bilembelwe i bino: MENE, MENE, TEKELE, ne PALASINE.

26 “Nshintulwilo ya binenwa i ino: MENE, Leza wabala mafuku a bulopwe bobe ne kwibufudija.+

27 “TEKELE, ubapimwa pa kitompekejo ubamonwe amba kubwenepo.

28 “PELESE, bulopwe bobe bubaabanibwa kadi bubapebwa bene Mede ne bene Peleshia.”+

29 Penepo Beleshazale wasoñanya, ebiya bavwika Danyele bityilakana ne kumuvwika mu nshingo yandi kamuyololo ka olo; kadi bamwelela lubila amba abikale bu muntu wa busatu mu bulopwe.+

30 Enka bwine bufuku’bwa, Beleshazale mulopwe mwine Kaladea waipaibwa.+ 31 Ebiya Dadiusa+ mwine Mede wapebwa bulopwe; wadi na kintu kya myaka 62.