Divilu

34 Ebiya Yehova wanena Mosesa amba: “Sōnga bipāpo bibidi bya mabwe pamo na byobya bibajinji,+ nami nkalemba pa bipāpo’bya binenwa byadi pa bipāpo bibajinji,+ byowavingakenye’bya.+ 2 Wilongolole mwanda wa lubanga, ke-pantu ukakanda lubanga ku Lūlu lwa Shinai kadi ukemana ku meso ami kwine’kwa pa mutwe wa lūlu.+ 3 Ino kekwakekala muntu ukakanda nobe, kadi kekwakekala muntu wa kutanwa shi kwepi shi kwepi pa lolwa lūlu. Nansha ke mikōko nansha bañombe bene kebakadipo kumeso kwa lolwa lūlu’lwa.”+

4 Penepo Mosesa wasōnga bipāpo bibidi bya mabwe, pamo na byobya bibajinji, wabūka lubanga bwē wakanda ku Lūlu lwa Shinai, monka mwamusoñaninye Yehova, kadi wasela ne bipāpo bibidi bya mabwe mu kuboko kwandi. 5 Ebiya Yehova watūka+ mu dikumbi kaimene nandi kwine’kwa kadi wasapula dijina dya Yehova.+ 6 Yehova wapita ku meso andi kanena’mba: “Yehova, Yehova, Leza wa lusa+ ne kanye,*+ wija pa kukwatwa bulobo+ kadi muyule buswe bwa ndamatyidile*+ ne bubine,*+ 7 ulombola buswe bwa ndamatyidile ku tununu ne tununu,+ ulekela bilubo ne kujilula ne bubi,+ ino kakalekapo nansha dimo kupa kipya-mambo mfuto,+ upa bana ne bankana mfuto pa kilubo kya bashabo, ne ba ku lukongo lwa busatu ne lukongo lwa buná.”+

8 Mosesa wapēlakana, wafukata panshi kaevukwila. 9 Kupwa wanena’mba: “Pano nanshi a Yehova, nakwisāshila, a Yehova shi ubantōkelwa mutyima nabya wende netu umbukata mwetu,+ nansha byotudi bantu ba mitwe myūmu,*+ kadi witulekele bilubo ne bubi bwetu,+ wituyate bu kintu kyobe.” 10 Nandi wanena’mba: “Nasamba kipwano: Ku meso a bantu bobe bonso nkalonga bintu bya kutendelwa kebyalongelwe* kashā mu ntanda yonso nansha mu mizo yonso+ kadi bantu bonso bomushikete nabo bakamona mwingilo wa Yehova, ke-pantu kino kyonsa kulonga nobe, i kintu kilenga nzuba.+

11 “Tá mutyima ku bino byonkusoñanya dyalelo.+ Tala, nsa kupanga ku meso obe bene Amole, ne bene Kenani, ne bene Hiti, ne bene Pedizi, ne bene Hivi ne bene Yebushi.+ 12 Tadija kutyina’mba wakasamba kipwano na bekadi ba ntanda koenda’ko,+ kikokeja kwikala ke dikinga umbukata mobe.+ 13 Ino ukapomona bisōkelo byabo, ukavingakanya byabo bikomo bikola, kadi byabo bipanda bikola* ukebityumuna.+ 14 Kufwaninwepo kwivukwila kudi leza ungi,+ mwanda Yehova uyukene amba* usakanga kulamatwa bunka.* Bine, aye i Leza usaka kulamatwa bunka.+ 15 Tadija kutyina’mba wakasamba kipwano na bekadi ba ntanda’ya, mwanda kitatyi kyobalonga busekese na baleza babo ne kwela bitapwa kudi baleza babo,+ muntu ukakwita nobe wakadya ku kitapwa kyandi.+ 16 Nankyo bine ukayatyila’ko bobe bana bana-balume+ babo bana bana-bakaji, kadi babo bana bana-bakaji bakalonga busekese na baleza babo, kebalongeja ne bobe bana bana-balume busekese na baleza babo.+

17 “Kufwaninwepo kulonga baleza ba byuma bisungululwe.+

18 “Ufwaninwe kulama Masobo a Mikate Yampikwa Kiyujo.+ Ukadya mikate yampikwa kiyujo, monka monakusoñaninye; longa kino mu mafuku asamba-abidi pa kitatyi kitungwe mu kweji wa Abibu,*+ mwanda i mu kweji wa Abibu mowatambile mu Edipito.

19 “Umbedi ense mwana-mulume* i wami,+ kubadila’mo ne bimunanwa byobe byonso, ekale ñombe mulume mubajinji nansha mukōko mubajinji.+ 20 Kilala-ndá kya mpunda ukekikūla na mukōko. Ino shi kwikikūdilepo, nabya ukekityumuna nshingo. Ufwaninwe kukūla umbedi ense wa mu bobe bana bana-balume.+ Kekwakikala nansha umo ukamweka ku meso ami makasa bitupu.

21 “Mu mafuku asamba ukengila mingilo, ino mu difuku dya busamba-bubidi ukakōkolokwa.*+ Nansha ke mu kitatyi kya kudima ne kya mwangulo, ukakōkolokwa.

22 “Kadi ukasoba Masobo a Mayenga na bipa bibajinji byele bya mwangulo wa ñano, ne Masobo a Kukongakanya* dya ku mfulo kwa mwaka.+

23 “Misunsa isatu ku mwaka, bana-balume bobe bonso bakamweka ku meso a Mfumwetu wa bine, Yehova, Leza wa Isalela.+ 24 Mwanda nkapañanga mizo ku meso obe,+ kadi nkabaija ntanda yobe, kekudipo muntu ukabila ntanda yobe kitatyi kyokanda kukatala mpala ya Yehova Leza obe misunsa isatu ku mwaka.

25 “Kufwaninwepo kulambula mashi a kitapwa kyami pamo ne kintu kyelwe kiyujo.+ Kitapwa kya Masobo a Pashika kekikalamwapo bufuku bonso kufika ne ku lubanga.+

26 “Bilumbuluke bya mu bipa bibajinji byele bya mu ntanda yobe ufwaninwe kwibileta ku njibo ya Yehova Leza obe.+

“Kufwaninwepo kutēka kana ka mbuji mu mabele a inako.”+

27 Yehova wanena monka Mosesa amba: “Lemba ino myanda ino’i,+ mwanda mungya ino myanda ino’i, nasamba kipwano nobe ne na Isalela.”+ 28 Kadi badi na Yehova kwine’kwa, mafuku 40 dyuba ne bufuku. Kadilepo nansha mukate, kadi katomenepo nansha mema mene.+ Ebiya Aye walemba pa bipāpo binenwa bya kipwano, ke Mbila Dikumi* kadi.+

29 Penepo Mosesa watūka ku Lūlu lwa Shinai, kadi bipāpo bibidi bya Bukamoni byadi mu kuboko kwandi.+ Aye pa kutūka ku lūlu kadipo uyukile amba kikoba kya mpala yandi kyeñenyanga mwanda wadi wisamba na Leza. 30 Alone ne bene Isalela bonso pobamwene Mosesa, bajingulula’mba kikoba kya mpala yandi kyeñenyanga, bakwatwa moyo wa kumufwena pabwipi.+

31 Ino Mosesa webeta, ebiya Alone ne bamfumu bonso ba kitango, baiya kwadi, kadi Mosesa wesamba nabo. 32 Kupwa papo bene Isalela bonso bamufwena pabwipi, nandi webapa misoñanya yonso yamupēle Yehova ku Lūlu lwa Shinai.+ 33 Mosesa paadi upwa’tu kwisamba nabo wadi wipūta kilēnda mu mpala yandi.+ 34 Ino Mosesa paadi utwela ku meso a Yehova kukesamba nandi, wadi utalula kilēnda kufika ne byatamba.+ Kupwa watamba kasapwila bene Isalela misoñanya yaatambwile’ya.+ 35 Kadi bene Isalela bamwene’mba kikoba kya mpala ya Mosesa kyeñenyanga; ebiya Mosesa wepūta monka kilēnda mu mpala ne byatwela kukesamba na Leza.*+