Kusokwelwa Kudi Yoano

4 Bino’bi pa kupita’po namwene, na’mba ntale! kibelo kishituke mūlu, kadi diwi dibajinji dyonaivwene dyadi bwa kimpungidi, kedisambe nami, amba: “Kanda kuno, nkulombole bintu bifwaninwe kulongeka.” 2 Kupwa bino’bi, ponka na ponka naselwa mu bukomo bwa mushipiditu, na’mba ntale! lupona lumo lwikele mūlu, kadi kwadi muntu umo wadi ushikete pa lupona’lwa.+ 3 Kadi Yewa wadi ushikete’po wadi umweka pamo bwa dibwe dya yasepe+ ne dibwe dya saladwane,* kadi lupona lwadi lujokolokwe na nkongolo umweka bwa emelode.+

4 Lupona lwadi lujokolokwe na mpona 24, kadi pa mpona’ya namona pashikete bakulumpe 24+ bavwele bivwalwa bitōka tō, kadi ku mitwe yabo bilukwa bya olo. 5 Ku lupona’lwa kwadi kutamba mapeni+ ne mawi ne mikungulo;+ kwadi ne binanu bisamba-bibidi bya mudilo bitēma kumeso kwa lupona, bino byelekeja mishipiditu isamba-ibidi ya Leza.+ 6 Kumeso kwa lupona kwadi kintu kimo kiifwene na dijiba didi bwa dikalashi,+ pamo bwa dibwe dya kidisale.*

Mu bukata mwa lupona* ne kufulakufula kwa lupona kwadi bipangwa byūmi biná+ byadi na meso mayule kumeso ne kunyuma. 7 Kipangwa kyūmi kibajinji kyadi bwa ntambo,+ kipangwa kyūmi kya bubidi nakyo kyadi bwa kyana kya ñombe,+ kipangwa kyūmi kya busatu+ nakyo kyadi na mpala bwa ya muntu, ne kipangwa kyūmi kya buná+ nakyo kyadi bwa mukebo wipapa.+ 8 Ino bipangwa byūmi biná’bya, kimo ne kimo kyadi na mapapa asamba; mayule meso konsokonso ne munshi mwine.+ Kadi dyuba ne bufuku, binena’nka kunena’mba: “Ujila, ujila, ujila i Yehova*+ Leza, Mwinē Bukomo Bonso, wādi’ko ne udi’ko ne ukāya’ko.”+

9 Ponso padi bipangwa byūmi biná bitumbija ne kupa bulēme ne kufwija’ko Yewa ushikete pa lupona, Yewa mūmi nyeke ne nyekeke,+ 10 bakulumpe 24+ badi bapona panshi ku meso a Yewa ushikete pa lupona, kebatōta Yewa mūmi nyeke ne nyekeke, ne kwela bilukwa byabo kumeso kwa lupona kebanena’mba: 11 “A Yehova* Leza wetu, abe wi mufwaninwe kupebwa ntumbo+ ne bulēme+ ne bukomo,+ mwanda wapangile bintu byonso,+ kadi pa mwanda wa kiswa-mutyima kyobe byaikele’ko ne kupangibwa.”