Zekadia

8 Kinenwa kya Yehova wa bibumbo kyaiya monka’mba: 2 “Yehova wa bibumbo wanena namino amba, ‘Nkapyasakena Ziona bupyasakane bukatampe,+ kadi nkamupyasakena na bukalabale bukatampe.’”

3 “Yehova wanena namino amba, ‘Nkajokela ku Ziona+ ne kwikala mu Yelusalema;+ kadi Yelusalema uketwa bu kibundi kya bubine,*+ lūlu lwa Yehova wa bibumbo nalo, bu lūlu lujila.’”+

4 “Yehova wa bibumbo wanena namino amba, ‘Banunu bana-balume ne bana-bakaji bakashikata monka mu bīkwe bya Yelusalema, ense na mukombo wandi mu kuboko kwandi pa mwanda wa bununu bwandi.*+ 5 Kadi mu bīkwe bya kibundi mukayula bana bana-balume ne bana bana-bakaji bakaila’mo.’”+

6 “Yehova wa bibumbo wanena namino amba, ‘Nansha shi bikokeja kumweka bu bikomo bininge ku bashele’ko ba bano bantu mu oa mafuku, le bikamweka bu bikomo bininge ne kondi?’ i Yehova wa bibumbo unena.”

7 “Yehova wa bibumbo wanena namino amba, ‘Nsa kupandija bantu bami ku matanda a kutunduka ne kushika.*+ 8 Kadi nkebatweja, nabo bakekala mu Yelusalema;+ bakekalanga bantu bami, nami nkekalanga Leza wabo+ mu bubine* ne mu boloke.’”

9 “Yehova wa bibumbo wanena namino amba, ‘Komejai maboko enu,*+ banwe bevwana pano bino binenwa bitamba mu kyakanwa kya bapolofeto,+ binenwa bimo byonka byesambilwe difuku dyaadilwe kyalwilo kya njibo ya Yehova wa bibumbo mwanda wa kūbaka tempelo. 10 Mwanda kumeso kwa kyokya kitatyi, kekwadipo mfutwa yadi ifutwa muntu nansha nyema;+ kadi kebyadipo biyampe kwiya nansha kwenda pa mwanda wa walwana, mwanda nalengeje bantu bonso belwe abo bene na bene.’

11 “‘Ino pano nkikalongapo bashele’ko ba bano bantu pamo bwa mu mafuku a pa kala,’+ i Yehova wa bibumbo unena. 12 ‘Mwanda lukunwa lwa ndoe lukakunwa; muñanza ukapa bipa byao, ntanda nayo ikapa bipa byayo,+ kadi madiulu akaleta lumé lwao; nami nkalengeja bashele’ko ba bano bantu bapyane bino bintu byonso.+ 13 A njibo ya Yuda ne njibo ya Isalela, monka momwaikadile bu kintu kya mafingo mu mizo,+ ye monkemupandijija, kadi mukekalanga dyese.+ Kemwakikwatwai moyo!+ Komejai maboko enu.’*+

14 “Mwanda Yehova wa bibumbo wanena namino amba, ‘“Monka monasumininwe kwimuletela kyamalwa pa mwanda wa bakulutuba benu bamfītyije mutyima,” i Yehova wa bibumbo unena, “kadi nkyealakenyepo,+ 15 ye monasumininwa ne pano kulongela Yelusalema ne njibo ya Yuda kiyampe.+ Kemwakikwatwai moyo!”’+

16 “‘Bino byo bintu byomufwaninwe kulonga: Mwisambei bubine umo ku mukwabo,+ kadi butyibi bwa mu bibelo byenu bufwaninwe kukankamika bubine ne ndoe.+ 17 Kemwakekutyilai banwe bene na bene nkuku ya kyamalwa mu mityima yenu,+ kadi kemwakisanswai mutyipo o-onso wa bubela;+ mwanda bino bintu byonso nebishikilwe,’+ i Yehova unena.”

18 Kinenwa kya Yehova wa bibumbo kyaiya monka kondi amba: 19 “Yehova wa bibumbo wanena namino amba, ‘Kijila-nzala kya mu kweji wa buná,+ kijila-nzala kya mu kweji wa butano,+ kijila-nzala kya mu kweji wa busamba-bubidi,+ ne kijila-nzala kya mu kweji wa dikumi+ bikekala bu bitatyi bya kusepelela ne kusangala ku njibo ya Yuda—masobo ne nsangaji.+ Nanshi sanswai bubine ne ndoe.’

20 “Yehova wa bibumbo wanena namino amba, ‘Kikafika, bantu ne bekadi ba mu bibundi bivule bakāya; 21 kadi bekadi ba kibundi kimo bakenda kudi bekadi ba kibundi kikwabo kebanena’mba: “Twendei na kininga tukazenze Yehova etutōkelwe mutyima* ne kukakimba Yehova wa bibumbo. Nami nsa kwenda.”+ 22 Kadi bantu bavule ne mizo mikomokomo bakāya kukimba Yehova wa bibumbo mu Yelusalema+ ne kuzenza Yehova ebatōkelwe mutyima.’*

23 “Yehova wa bibumbo wanena namino amba, ‘Mu oa mafuku, bantu dikumi ba ndimi yonso ya mizo+ bakakwata, bine, bakakwata bininge ku munkukumba* wa Muyuda umo,* kebanena’mba: “Tusaka kwenda nenu,+ mwanda tubaivwana’mba Leza udi nenu.”’”+