Ñimbo ya Mitōto

37 Kokafītwa* pa mwanda wa bantu babi

Nansha kwabila banonga-bibi.+

 2 Bakafumba bukidibukidi pamo bwa biyombo+

Ne kūma pamo bwa biyombo bibishi.

 3 Kulupila mudi Yehova ne kulonga biyampe;+

Ikala mu ntanda’ya, kadi longa bintu na kikōkeji.+

 4 Loelelwa bininge* mudi Yehova,

Nandi ukakupa bisakasaka mutyima obe.

 5 Pāna dishinda dyobe kudi* Yehova;+

Mukulupile, nandi ukakulongela bintu.+

 6 Ukalengeja boloke bobe bweñenye pamo bwa kibangabanga,

Ne bululame bobe pamo bwa dyuba mu mitwe.

 7 Ikala talala ku meso a Yehova+

Kadi mukungile na nsangaji.*

Kokifītyijibwa mutyima na muntu

Ufikidija nkuku yandi.+

 8 Leka bulobo ne bukalabale;+

Kokifītwa mutyima ne kwalamuka kolonga bibi.*

 9 Mwanda bantu babi bakatalulwa’ko,+

Ino boba bakulupile mudi Yehova bakapyananga ntanda.+

10 Kubashala kakitatyi katyetye’tu, babi kebakekala’kopo monka;+

Ukatala pobādi,

Kebakekala’popo.+

11 Ino betyepeje bakapyananga ntanda,+

Kadi bakaloelelwanga bininge mu bungibungi bwa ndoe.+

12 Muntu mubi ukutyilanga moloke kitumba;+

Umushenkenyenya meno.

13 Ino Yehova ukamusepa,

Mwanda uyukile amba difuku dyandi dikāyanga.+

14 Babi abasomona bipete byabo ne kukana* mata abo a miketo

Mwanda wa kutūkija kimonya-malwa ne mulanda,

Mwanda wa kutapa boba ba dishinda dyoloke swā.

15 Ino kipete kyabo kikasaba mutyima wabo abo bene;+

Mata abo a miketo nao akatyumunwa.

16 Bintu bityetye bya moloke i biyampe

Kupita bintu bingi bya bantu babi bangi.+

17 Mwanda maboko a babi akatyumunwa,

Ino Yehova ukakwasha boba boloke.

18 Yehova uyukile senene momwa mupita bantu bampikwa kutopekwa,*

Kadi bupyani bwabo bukalādila nyeke.+

19 Kebakafwijibwapo bumvu mu kitatyi kya kimpengele;

Mu kitatyi kya kipupo kya nzala bakekala na bivule.

20 Ino babi bakonakanibwa;+

Balwana na Yehova bakajimina pamo bwa madyo matumbe;

Bakajimina pamo bwa mwishi.

21 Mubi wapulanga kwaluja mpika,

Ino moloke aye i wa buntu* kadi upānanga.+

22 Boba baesela bakapyananga ntanda,

Ino boba bafinga bakatalulwa’ko.+

23 Yehova uludikanga* matabula a muntu+

Shi wasangela dishinda dyandi.+

24 Nansha shi wapone, kakelwapo panshi,+

Mwanda Yehova umukwashanga na kuboko.*+

25 Nadi mwanuke pano natama,

Ino nkyamwene moloke mwelwe,+

Nansha bandi bana bakimba byakudya.+

26 Aye wapujanga nyeke bitupu,+

Kadi bandi bana batengele madyese.

27 Vundamina bibi ino longa biyampe,+

Nabya ukekalanga’ko nyeke.

28 Mwanda Yehova usenswe boloke,

Kadi kakelapo bantu bandi ba lulamato.+

Bakalamibwa nyeke;+

Ino lutundu lwa babi alo lukatalulwa’ko.+

29 Boloke bakapyananga ntanda,+

Kadi bakekalanga’po nyeke.+

30 Kyakanwa kya moloke kipānanga tunangu,*

Kadi ludimi lwandi lwisambanga myanda ya boloke.+

31 Bijila bya Leza wandi bidi mu mutyima wandi;+

Matabula andi keakashetemukapo.+

32 Mubi utalanga moloke,

Ukimba kumwipaya.

33 Ino Yehova kakamulekapo mu dikasa dya yao muntu+

Nansha kumuponeja kitatyi kyobamutyibila mambo.+

34 Kulupila mudi Yehova ne kulonda dishinda dyandi,

Nandi ukakuzunzula ukapyane ntanda.

35 Namone muntu mubi wampikwa kafuku

Wandabila pamo bwa mutyi muvwambile pa nshi yao.+

36 Ino wapite mu kitulumukila ne kwāya jimejime;+

Namukimbekimbe, ino kumusokola mpika.+

37 Tala muntu wampikwa kutopekwa,*

Kadi bandila+ muntu moloke swā,

Mwanda būmi bwa kumeso bwa yao muntu bukekala bwa ndoe.+

38 Ino bonso bajilula bakonakanibwa;

Babi bakatyibwa’ko.+

39 Lupandilo lwa boloke lutambanga kudi Yehova;+

Aye i nsakwa yabo mikomo mu kitatyi kya tusua.+

Ukebakūla ku babi ne kwibapandija,

Mwanda banyemenanga mwadi.+