Shapita 21

Difuku dya Kidye ne bikalondapo

LELO ufwatakanyanga’mba Difuku dya Kidye dikekalanga pamo bwa kika? Bakwabo bafwatakanyanga’mba bakatulanga kityi kikatampe kya bulopwe kumeso kwa mulongo mulampe wa bantu bavule bakasangulwa mu lufu. Amba muntu ne muntu ukapitanga kumeso kwa kino kityi ne kutyibilwa mambo kukwatañana na bilongwa byandi byonso byalongele pa kala, byandikilwe mu kitabo kikatampe kya Butyibi. Amba mungya bilongwa byalongēle, ukokeja kukatumwa mūlu nansha kukelwa mu kalunganyembo ka mudilo.

² Ino Bible aye ushintululanga buluji bwa Difuku dya Kidye mu muswelo mukwabo. Ke difukupo dilengeja moyo. Tala kinena Bible kitala padi Leza, amba: “Utungile ne mu difuku dyākatyibilamo mambo a ba pano pantanda umboloke monka mudi yewa muntu wātongele.” (Bilongwa 17:31) Eyo, uno Mutyibi utudilweko na Leza, i Yesu Kristu.

³ Tukokeja kukulupila’mba Kristu ukatyibanga mambo na boloke ne na bubwaninine. Ye mwikilombwela bupolofeto bumo bumutala bulembelwe mu Isaya 11:​3, 4. Eyo, kwishila na milangwe ya bantu bonso, aye kakatyibilangapo bantu mambo mungya bubi bwabo bobalongele pakala, bwalongele bavule pakubulwa kuyuka. Bible ushintululanga’mba shi muntu wafu, wanyongololwa mu bubi bonso bwālongele. Amba: “Aye wafwile wapu kubinga bubinga ku bubi.” (Loma 6:⁠7) Kino kishintulula’mba bakasanguka bakatyibilwanga mambo kukwatañana na bilongwa byobakalonga umbula bwa Difuku dya Kidye, kebyobālongelepo kumeso kwa kufwa kwabo, mhm.

⁴ Shi ke pano, Difuku dya Kidye ke difukupo dya nsaa 24, mhm. Bible wikishintululanga senene kitatyi kyaesambila pa boba bakengidila pamo na Yesu Kristu mu buno butyibi. (1 Kodinda 6:​1-3) Mulembi umo wa Bible wanene’mba: “Kadi namwene ne bipona, ne bashikete ponka bapelwe’mba, batyibe mambo.” Bano batyibi i bana-babwanga ba Kristu bashingwe-māni, Bible ubwejako’mba kadi abo “bekēle bōmi babikala pamo na Yesu myaka kanunu.” Kino kishintulula’mba Difuku dya Kidye dikekalanga na bula bwa myaka 1 000. I enka mubula bwa ino myaka 1 000 mukabikala Kristu ne bandi bana-babwanga bakikokeji 144 000 bashingwe-māni bu “madyulu mapya” pa “ntanda mipya.”​—⁠Kusokwelwa 20:​4, 6; 2 Petelo 3:⁠13.

⁵ Tala bino bifwatulo. Bilombolanga mukekadila Difuku dya Butyibi ku muzo wa muntu. Mulembi-wamitoto wasonekele myanda itala pa kino kitatyi kya kutendelwa amba: “Ntanda isangale, ne bintu byonso bidi monka; penepo mityi yonso ya muntanda īkembanga pa mwanda wa tusepo, ku meso a Yehova, ke-muntu wiyanga; ke-muntu wiyanga kutyiba mambo pano panshi umboloke, ne bantu mwendele bu-binebine bwandi.”​—⁠Mitoto 96:​12, 13.

⁶ Mu Difuku dya Kidye, boba bakapanda ku Hamakedona bakalamunanga ntanda bu Paladisa. I mu ino paladisa mobakatundaidila boba bakasanguka. (Luka 23:43) Ikekalanga nsangaji mikatampe ku boba bajimije ba mu kyabo kisaka pamwanda wa lufu, bakasepelelanga bininge pa kukekala kadi nabo monka! Kikekalanga kya nsangaji mikatampe mpata pa kukashikata mu ndoe, kwikala pakubulwa misongo, ne kufundijibwa mpango ya Leza! Bible unena’mba: “Madingi obe po adi pano panshi, bekadi ba pano pantanda balombolwa boloke.” (Isaya 26:⁠9) Mu Difuku dya Kidye, bantu bonso bakefundanga kuyuka Yehova, kumukokela ne kumwingidila.

⁷ Yesu Kristu ne balopwe 144 000 bakengidila nandi pamo, bakatyibilanga bantu mambo mu ngikadilo ya uno muswelo, mu paladisa. Boba bakatonga kwingidila Yehova bakatambulanga būmi bwanyeke. Inoko, nansha mu ino ngikadilo milumbuluke uno muswelo, ino kukekalanga ne bakapela kwingidila Leza, ka na mwikilombwela Bisonekwa’mba: “Nanshi shi kiyampe kilaijibwa kudi mubi, ino kakalombolwapo boloke; mu ntanda ya buluji ukalonga bibi.” (Isaya 26:​10) Babi ba uno muswelo bakonakanibwanga, mwanda baikele kupebwa kitatyi kilampe ne kilumbuluke senene mwanda wa balamune mashinda abo ne kwifunda boloke. Bakwabo bakonakanibwanga Difuku dya Kidye kedyafikile ne kumfulo kwine. (Isaya 65:20) Kebakokejapo kukebaleka na būmi, bakaboleje ntanda ikekala ke paladisa.

⁸ Bine kikekalanga kya nsangaji mikatampe kukasangulwa pano pantanda mu Difuku dikatampe dya Kidye dya Yehova. Inoko, Bible ulombolanga’mba ke bonso po bakapebwa dino dyese. Tubandaulei kimfwa kya bekadi ba mu kibundi kya Sodoma wakala. Bible unena’mba bana-balume ba mu Sodoma bādi kebasake kulala na “bana-balume” bafikīle kwa Lota. Ngikadilo yabo ya kusaka-saka kulonga bilongwa bya munyanji yādi mitabuke kubipa na kampata, omwanda nansha byobebasabile meso mu kingelengele, ino ‘bādi bafufukuta bakimba kibelo kya kunjibo mwanda wa batwele bakalale na bēni bādi bafikile kwa Lota.’​—⁠Ngalwilo 19:​4-11.

⁹ Bano bantu babi uno muswelo, lelo bakokeja kukasangulwa mu Difuku dya Kidye? Bisonekwa bikilombolanga patōkelela’mba kebakasangulwangapo. Yude mwana-bwanga wa Yesu, kupityila ku bukomo bwa mushipiditu wa Leza, wesambīle bidi dibajinji pa bamwikeūlu bashīle bikalo byabo bya kokwa kūlu mwanda wa kwiya kulonga busekese na bana-bakaji bana ba bantu. Kupwa kadi wabwejako’mba: “Vulukai kadi ne bene Sodoma ne Ngomola ne ba mu bibundi byadi pabwipi nabyo. Nabo balongele bibi’ka bwa boba bamwikeūlu’ba. Bepene umbusekese ne kulondalonda bya bungitu bikobakane bya bumvu. Basusuka mu mudilo wa nyeke, ke kilombwejo kya kudyumwina bonso.” (Yude 6, 7, MB; Ngalwilo 6:​1, 2) Eyo, pamwanda wa bilongwa byabo byamunyanji bipite kipimo, bantu ba mu Sodoma ne Ngomola ne ba mu bibundi byādi pabwipi nabyo, baikele konakanibwa.​—⁠2 Petelo 2:​4-6, 9, 10a.

¹⁰ Kadi Yesu nandi walombwele’mba bekadi ba mu Sodoma, padi kebakasangulwangapo. Pa kwisambila pa kibundi kya Kapanama, kimo kya mu bibundi byalongele’mo bingelengele, wanene’mba: “Byobya byalongelwe mobe [mu Kapanama] bya buleme, shi byo byalongelwepo mu Sodoma, longa kidi monka ne ku dyalelo dino’di. Ino nemunena’mba, oa malwa a ntanda ya Sodoma i matyetye mu dyodya difuku dya kidye, ino ōbe akatabukamo bukatampe.” (Mateo 11:​22-24) Yesu wādi usaka kulombola pano’mba bubi bwa bekadi ba mu Kapanama, bwādi bukatampe bininge kutabuka bwa bene Sodoma, bādi bayukilwe senene na bene Isalela bonso bu banonga-bibi bakumeso fututu, bakubulwa kufwaninwa lusangukilo mu Difuku dya Kidye.

¹¹ Shi ke pano, twiendejei mu muswelo mulumbuluke bu bantu bakokeja kukasangulwa. Ino padi ukokeja kwiipangula’mba: Bamo bamo ba mu bakasanguka, lelo bakakolelwanga kwifunda ne kwibidila bolole kutabuka bakwabo? Pa kino, jingulula uno mwanda: Bantu “boloke” kimfwa Abalahama, Isake, Yoba, Debola, Luta ne Danyele, pobādi bakidi bōmi, bādi batengele kwiya kwa Meshiasa. Bakekalanga na nsangaji mikatampe mpata pa kukefunda myanda mivule itala pādi, kadi bakasepelelanga bininge pobakevwana’mba ubikele momwa mūlu! Pa kino, kikekalanga kipēla ku bano bantu “boloke” kunangila umboloke kupita’ko boba “bampikwa kōloka” bakasangulwa.​—⁠Bilongwa 24:⁠15.

LUSANGUKILO LWA “KU BŪMI” NE LWA “KU KIDYE”

¹² Pa kwisambila pa bikapita mu Difuku dya Kidye, Yesu wanene’mba: “Bonso badi mu bibundu [bikavulukwa] bakēvwana diwi dyandi. Ne kukatamba bakatambemo, ino boba balongele biyampe bakasangukila ku būmi, nanshi boba balongele bibi bakasangukila ku kidye. . . . Monka mo naivwanina nami mo monka mo nketela mambo, ne kuketa kwa mambo kwami nako i koloke bitupu swā! Mwanda amiwa nkisakile kiswa-mutyima wami, mhm, poso kyonka kiswa-mutyima wa Tata wantumine.” (Yoano 5:​28-30) ‘Lusangukilo lwa ku būmi’ ne ‘lusangukilo lwa ku kidye,’ lelo i lusangukilo’ka? Ne i ba ani bakasangulwa uno muswelo?

¹³ Twādi kala tubapu kumona’mba bafu bakasanguka, kebakatyibilwangapo mambo kukwatañana na bilongwa byobalongele pakala. Ino, bakatyibilwanga mambo kukwatañana na byobakalonga umbula bwa dino Difuku dya Kidye. Yesu pa kutēla “boba balongele biyampe” ne “boba balongele bibi,” wādi wisambila pa bilongwa biyampe ne bibi byobakalonga umbula bwa Difuku dya Kidye. Pamwanda wa bilongwa byabo biyampe byobakalonga, bavule mu boba bakasanguka bakendelelanga bityebitye kufikija’nka ne po bakekala ke bantu babwaninine senene kumfulo kwa Difuku dya Kidye dikalonga myaka 1 000. Mu uno muswelo, kujokela kwabo ku būmi kukekalanga bu ‘lusangukilo lwa ku būmi,’ mwanda bakafikidilanga pa būmi bubwaninine bwakubulwa bubi.

¹⁴ Ino lelo kikekalanga namani ku “boba balongele bibi” mubula bwa Difuku dya Kidye? Kujokela kwabo ku būmi kukekalanga pamo bwa ‘lusangukilo lwa ku kidye.’ Kino kishintulula kika? Bakatyibilwanga mambo a lufu. Bakonakanibwanga umbula nansha kumfulo kwa Difuku dya Kidye. Buluji i buno, mwanda baikele kulonga bibi; baūmije shingo yabo pototo na kupela kwifunda ne kwibidila boloke.

KITATYI KIKASHILULA DIFUKU DYA KIDYE

¹⁵ Mutumibwa Yoano wamwene mu kimonwa bintu byādi bifwaninwe kubadikila kumeso kwa Difuku dya Kidye. Wasonekele’mba: “Penepo namwene ne lupona lukatakata lutōka tō, ne wadi ushiketepo nandi ntanda ne diulu binyema mpala yandi; . . . Ebiya namwene ne bafu, bakatampe ne batyetye, bēmene pa lupona’lwa . . . ne bafu batyibilwe mambo.” (Kusokwelwa 20:​11, 12) Kumeso kwa kushilula kwa Difuku dya Kidye, ino ngikadilo imbi ya bintu ‘ntanda ne diulu’ bikabadikilanga bidi kupita. Enka boba bengidila Leza kete, ye abo bakapanda, banongabibi bonso bakonakanibwanga ku Hamakedona.​—⁠1 Yoano 2:⁠17.

¹⁶ Inoko, ke enkapo “bafu” bakasangulwa kasuku kabo bakatyibilwa mambo mu Difuku dya Kidye. “Bōmi” bakapanda ku Hamakedona ne babo bana bobakabutula bene, nabo bakatyibilwanga mambo. (2 Temote 4:⁠1) Mu kimonwa kyandi, Yoano wamwene ne muswelo obakaketelwa mambo mwine. “[Ne mivungo ya] mikanda yaputulwa,” ye mwasonekēle. “Ne bafu batyibilwe mambo ku bintu bisonekwe mu mikanda’ya, monka mwendele mingilo yabo. Kadi kalunga ka mema kalubula bafu badi monka; ne lufu ne Kalunganyembo nabo balubula bafu badi monka, ino batyibilwa mambo bantu bonso monka mwendele mingilo yabo, wa yandi, wa yandi.”​—⁠Kusokwelwa 20:​12, 13.

¹⁷ Ino “mivungo ya mikanda” yaputwilwe mwanda wa kutyiba mambo a “bōmi” ne a “bafu” ino, lelo i mikanda’ka? I kintu kampanda kikwabo kikatentekelwa ku uno wetu Bible. I bilembwa nansha mikanda ya ku bukomo bwa mushipiditu wa Leza mudi bijila ne misoñanya ya Yehova. Pa kwiitanga, bantu bonso ba pano pantanda bakamonanga muswelo wa kuyuka senene kiswamutyima kya Leza. Ebiya, bantu bonso ba pano pantanda bakatyibilwanga mambo kukwatañana na bijila ne misoñanya ya mu ino “mivungo ya mikanda.” Boba bakakokela ku myanda isonekelwe’mo bakamwenanga kamweno mu kinkulwa kyatudile Kristu, ne bakendelelelanga bityebitye, kufikija’nka ne po bakafikidila pa bu bantu babwaninine.

¹⁸ Kumfulo kwa myaka 1 000 ya Difuku dya Kidye, i kutupu muntu nansha umo pano pantanda ukekala mu ngikadilo ya lufu lwa pamwanda wa bubi bwa Adama. Eyo, mungya buluji bwabinebine muntu yense ukajokelanga ku būmi. Ye mwikishintulwila Bible amba: “Ino bafu bakwabo basheleshelepo [kutalulamo boba ba 144 000 bakenda mūlu], abo kebadipo bōmi, poso’mba yoya myaka kanunu’ya īpwe.” (Kusokwelwa 20:⁠5) Kishima “bafu bakwabo basheleshelepo” kekishintululangapo’mba kukekalanga bantu bakwabo bakasangulwa kumfulo kwa myaka 1 000 ya Difuku dya Kidye, mhm. Ino kino kishintulula’mba bantu bonso bakajokelanga ku būmi na kufikila pa ditabula dyamfulo-konko dya bu bantu babwaninine kupita. Bakekalanga mu ngikadilo ya bubwaninine bwa muswelo umo, pamo ka na bwādi na ba Adama ne Eva mu budimi bwa Edena. Ino lelo i kika kikapitapo?

BIKAPITA KUNYUMA KWA DIFUKU DYA KIDYE

¹⁹ Pa kupwa kulonga byonso byamunēne Leza kulonga, Yesu Kristu “ukafikija bulopwe kudi Leza, ke Shandi kadi.” Kino kikalongwanga kumfulo kwa myaka 1 000 ya Difuku dya Kidye. Kufikija mu kino kitatyi, balwana bonso bakekalanga kebapwe kala konakanibwa. Wamfulo umbukata mwabo i lufu lotwapyene kudi Adama. Lukatukilanga! Penepo, Bulopwe bukekala ke bwa Yehova Leza kete. Ye aye kete ukabikala bu Mulopwe kasuku kandi.​—⁠1 Kodinda 15:​24-28.

²⁰ Yehova ukayukanga namani amba i majina a ba ani asonekelwe mu “muvungo wa mukanda wa būmi,” nansha mu “kitabo kya būmi”? (Kusokwelwa 20:​12, 15) I kupityila ku matompo akatompwa bantu. Vulukai’mba ba Adama ne Eva bakomenwe kūminina mu matompo, ino Yoba aye washēle mwimanije. Inoko bantu bavule bakekalako kufikija ne kumfulo kwa myaka 1 000, lwitabijo lwabo kelukatompwangapo. Po bādi kebasangwilwe, kebādipo bayukile mpango ya Yehova. Bādi bakwatañene na ngikadilo imbi ya Satana; bādi “bampikwa koloka.” Ino, pa kupwa kusangulwa, bakapelelwanga kwingidila Yehova mwanda bakekalanga mu Paladisa pakubulwa kukambakanibwa na Dyabola. Pa kupwa kufikidila pa bubwaninine, tuno tununu ne tununu twa bantu, lelo bakokeja kukendelela na kwingidila Yehova shi Satana akapebwe kyaba kya kwibakankaja kulonga uno muswelo? Lelo Satana ukokeja kukabwanya kwibabombola pamo na mwaongwedile ba Adama ne Eva?

²¹ Pa kusaka kulondolola senene ku bino bipangujo, Yehova ukalekanga Satana ne bandemona bandi bakakutululwe mu lupongo lulālulā lwa kubulwa mfulo mobakakutwa umbula bwa myaka 1 000. Penepo i kika kikapitapo? Bible ulombolanga’mba Satana ukabwanyanga kwalamuna bantu bamo bamo bakavundamine Yehova. Bakekalanga ka na pamo bwa “misenga ya kudijiba dya mema,” kushintulula kokunena’mba buvule bwabo kebukabadikapo. Pa kupwa kufikidija dino ditompo, Satana ne bandemona bandi, kutentekelapo ne bonso bakakomenwa kupita ku dino ditompo, bakalundwilwanga abo bonso mu “dijiba dya mudilo,” kyelekejo kya lufu lwa bubidi (nansha lwa lonso). (Kusokwelwa 20:​7-10, 15) Inoko, boba badi na majina abo mu “mukanda wa būmi” bakendelelanga na kwikala mu ntanda ya ntumbo ikekala ke paladisa. Kwandikwa kwa majina abo mu “mukanda wa būmi” kishintulula’mba Yehova webatyibila mambo bu boloke mu mityima yabo, mu ñeni yabo ne ku ngitu, ne bu bafwaninwe kwikala na būmi bwanyeke mu paladisa pano panshi.

DIFUKU DYA KIDYE DYA DYALELO

²² Ye mu uno muswelo mwitulombwela Bible myanda ikalongeka mubula bwa myaka 1 000 ikaya’ko. Kadi witulombolanga’mba ketufwaninwepo kukwatwa moyo pamwanda utala kitatyi kikaya kumeso. Inoko, kipangujo i kino: Lelo nobe ukatanwangako ukasepelele mu bintu bilumbuluke bitutudile’ko Yehova? Kino kikemaninanga pa kupanda kobe ku difuku dya kidye dikabadikila kumeso, kushintulula kokunena’mba ‘difuku dya kidye dya dyalelo ne ku konakanibwa kwa boba bakubulwa kwakamwa Leza.’​—⁠2 Petelo 3:⁠7.

²³ Eyo, tamba pa kujoka kwa Kristu ne kushikata kwandi pa lupona lwandi lwa momwa mūlu, bantu bonso batyibilwanga mambo. Dino “difuku dya kidye” dya dyalelo, didi kumeso kwa Difuku dya Kidye dya myaka 1 000. Mu buno butyibi bwa dyalelo, bantu basansanibwanga, “bambuji” ku lukunso lwa Kristu, “mikōko” ku lundyo. Bano “bambuji” bakonakanibwanga mwanda kebakwashangakopo “bana babo” na Kristu bashingwe-māni na kumwingidila Leza. Bano “bambuji” belombolanga kumfulo bu banonga-bibi bakubulwa kwisāsa, bakulonga bubi, bomije mityima yabo mu kulonga bintu byamunyanji. Ku mutamba mukwabo nao, ino “mikōko” ikeselwanga dyese na kukapebwa būmi munshi mwa uno umbikalo wa Bulopwe, mwanda bakwashangako “bana babo” na Kristu mu miswelo yonso.​—⁠Mateo 25:​31-46.

[Bipangujo]

1. I milangwe’ka idi na bantu bavule pamwanda utala Difuku dya Kidye?

2. (a) I ani wateakenye mulangwe wa kutulako Difuku dya Kidye? (b) I ani utudilwe bu mutyibi?

3. (a) Mwanda’ka tukokeja kukulupila’mba Kristu kakekalangapo na mankufi mu kutyiba kwandi kwa mambo? (b) Bantu bakatyibilwanga mambo kukwatañana na kika?

4. (a) Difuku dya Kidye dikekalanga na bulá bwa mafuku anga? (b) I ba ani bakatyiba mambo pamo na Kristu?

5, 6. (a) Mulembi-wamitoto wa mu Bible, wesambile kika kitala pa Difuku dya Kidye? (b) Būmi pano pantanda bukekalanga muswelo’ka mu Difuku dya Kidye?

7. Mu Difuku dya Kidye, i kika kikafikila boba bengidila Leza ne boba bapela kumwingidila?

8. Ngikadilo ya bantu ba mu Sodoma yādi muswelo’ka?

9, 10. Mungya Bisonekwa, bantu babi ba mu Sodoma lelo bakokeja kukasangulwa?

11. Mwanda’ka mu Difuku dya Kidye kikekalanga kipēla ku “boloke” kupitako ku “bampikwa koloka”?

12. Kukwatañana na Yoano 5:​28-30, i ba ani “bakasangukila ku būmi” ne “bakasangukila ku kidye”?

13. ‘Kusangukila ku būmi’ kishintulula kika?

14. ‘Kusangukila ku kidye’ kishintulula kika?

15. I kika kikalongeka mafuku matyetye kumeso kwa Difuku dya Kidye?

16. (a) Kutentekela pa bafu, i ba ani bakwabo bakatyibilwa mambo mu Difuku dya Kidye? (b) Bakatyibilwanga mambo kukwatañana na kika?

17. Yoya “mivungo ya mikanda” ikaputulwa mwanda wa kutyiba mambo a “bōmi” ne a “bafu” lelo i mikanda’ka?

18. (a) Ngikadilo ikekalanga muswelo’ka kumfulo kwa Difuku dya Kidye? (b) I muswelo’ka ukajokela “bafu” ku būmi kumfulo kwa myaka 1 000?

19. I kika kikalonga Kristu kumfulo kwa Difuku dya Kidye?

20. (a) I kika kikalonga Yehova mwanda wa kuyuka i majina a ba ani asonekelwe mu “mukanda wa būmi”? (b) Mwanda’ka matompo amfulo akatompwa bantu i mafwaninwe?

21. (a) I muswelo’ka ukaleka Yehova bantu batompwe? (b) Pa kapita ano matompo, lelo kikekalanga namani ku bonso bakatompwa?

22. Pa kusaka’mba tukatanwe ku dino Difuku dya Kidye ne kukatanwa ku matompo amfulo akatompwa bantu, tufwaninwe bibi kupanda ku kika tamba pano?

23. (a) Pano bantu basansanibwanga mu bibumbo’ka bibidi? (b) Kikekalanga namani ku kibumbo ne kibumbo, ne mwanda waka?

[Kapango pa paje 178]

Mwanda’ka Yesu wanene’mba mu Difuku dya Kidye kikekala kipēla ku bekadi ba mu Sodoma?