Mushipiditu sandu​—Bukomo bwa Leza bwingila

KUKWATAÑANA na lufundijo lwa Busatu-busantu, mushipiditu sandu i muntu wa busatu mu uno Leza, udingakene pamo na Tata ne Mwana. Dibuku dimo (Our Orthodox Christian Faith) dinenapo’mba: “Mushipiditu-Sandu i Leza mwine.”

Mu Bisonekwa bya Kihebelu, kishima kingidijibwe bininge mwanda wa kwisambila pa “mushipiditu” i ruʹach, kishintulula “lupepela; luvula; mushipiditu.” Mu Bisonekwa bya Kigreke, kishima kingidijibwe i pneuʹma, kidi na buluji bwa muswelo umo. Lelo bino bishima bilombolanga’mba mushipiditu sandu i kipindi kimo kya mu Busatu-busantu?

Bukomo bwingila

KISHIMA “mushipiditu sandu” kingidijibwe mu Bible, kilombolanga bukomo bwa Yehova Leza, bwaingidija mwanda wa kuvuija mpango yandi mu miswelo mishileshile. Mu muswelo mukwabo, tukokeja kwiudingakanya pamo bwa mudilo wa shinga, bukomo bukokeja kwingidijibwa mu miswelo mivule bininge.

Mu Ngalwilo 1:2 Bible ushilula’mba “mushipiditu wa Leza [“bukomo bwingila” (mu Kihebelu, ruʹach)] wādi ulelemba kūlu kwa bimema.” Pano, mushipiditu wa Leza i bukomo bwandi bwingila bwaashilwile kubumba nabo ntanda.

Leza wingidijanga mushipiditu wandi mwanda wa kumunikila bengidi bandi. Davida walombēle’mba: “Nombole ñeni ya kulonga kiswamutyima kyobe; ke-wi-muntu abe wi Leza wami; mushipiditu obe [ruʹach] i muyampe; nkunkuje mu ntanda ya boloke.” (Mitoto 143:10) Patongelwe bana-balume 70 mwanda wa kukwashako Mosesa, Leza wamunene’mba: “Nkayata ku mushipiditu [ruʹach] udi mobe, kadi nkabika’o mwabo.”​—Umbadilo 11:17.

Bupolofeto bwa Bible bwasonekelwe na bantu ba Leza “bakunkujibwe na mushipiditu sandu [mu Kigreke na pneuʹma].” (2 Petelo 1:20, 21, MN) Omwanda Bible i dibuku dya “kumushipiditu wa Leza,” mu Kigreke i The·oʹpneu·stos, kishintulula “kipepwilwe luvula na Leza.” (2 Temote 3:16, MN) Kadi mushipiditu sandu wapēle bantu bamo bamo bukomo bwa kumona bimonwa nansha bwa kulota bilotwa bitala pa bupolofeto.​2 Samwele 23:2; Yoela 2:28, 29; Luka 1:67; Bilongwa 1:16; 2:32, 33.

I onka mushipiditu sandu watonwene Yesu ende mu ntanda mutuputupu kupwa kwa kubatyijibwa’ye. (Mako 1:12) Mushipiditu sandu watukile bengidi ba Leza pamo bwa mudilo nansha bukomo bwādi bwingidila mobadi ne bwādi bwibapa buninge. Uno mushipiditu webakweshē besambe pakubulwa moyo ne na bukankamane.​—Mika 3:8; Bilongwa 7:55-60; 18:25; Loma 12:11; 1 Tesalonika 5:19.

Kadi Leza wingidijanga ne mushipiditu wandi mwanda wa kutyibila bantu ne mizo mambo. (Isaya 30: 27, 28; 59:18, 19) Kadi mushipiditu wa Leza ukokeja kufika mu byaba byonso, mwanda wa kamweno ka bantu nansha mwanda wa kwibal etela byamalwa.​—Mitoto 139: 7-12.

‘Bukomo bupityile bukomo bonso’

MUSHIPIDITU wa Leza ukokeja kadi kupa bengidi bandi “bukomo bupityile bukomo bonso.” (2 Kodinda 4:7, MN) Buno bukomo bwibakwashanga bominine mu matompo a mu lwitabijo lwabo, ne kwibakwasha bavuije bintu bikokeja kwibakomena kulonga.

Kimfwa, pamwanda utala Samishoni, Batyibi 14:6 unena’mba: “Mushipiditu wa Yahvé wamusungulukila padi ne, pakubulwa kintu mu makasa, Samishoni wasana ntambo tupeta tupeta.” (Jé) Lelo wādi muntu wa mudi Leza wasungulukile Samishoni ne kutwela munda mwandi na kumupa bukomo bwa kulonga uno muswelo? Mhm, bine bwādi “bukomo bwa MFUMWETU [bwa] pele Samishoni bukomo.”​—TEV.

Pa batyijibwe Yesu, Bible witulombola’mba mushipiditu wamutukile pamo bwa nkunda, ino kewādipo mu bu muntu. (Mako 1:10) Bukomo bwingila bwa Leza bwakweshe Yesu abelule ba mbá ne kusangula bafwe. Ye mwikilombwela Luka 5:17 amba: “Bukomo bwa Mfumwetu [Leza] bwādi bumukwasha [Yesu] abelule ba mbá.”​—Jé.

Mushipiditu wa Leza wapele ne bana-babwanga ba Yesu bukomo bwa kulonga bingelengele. Bilongwa 2: 1-4 witulombola’mba mu difuku dya Pentekosa bana-babwanga bādi bebungile pamo “ponkapo kwebapulumukile kitūta bwa luvula lukatampe lwa malwa lupukuma, . . . abo bonsololo bayulwa mushipiditu sandu, bashilula kwisamba ne ndimi ya mineneno ingi nayo, monka mo bapelelwe’byo kwisamba’byo kudi mushipiditu.”

Shi ke pano, mushipiditu sandu wapele Yesu ne bengidi ba Leza bakwabo bukomo bwa kulonga bintu byādi kebibwanya bantu babitupu kulonga.

Ke muntu po

INO lelo, mwene kudi bisonekwa bimo bimo bya mu Bible bisambila pa mushipiditu na kwingidija bishima na abyo bisambila padi muntu? Eyo, ino tala kinena’po mwifundi umo wa myanda ya Leza mwine katolika, Edmund Fortman mu dibuku dimo The Triune God, amba: “Nansha byobesambile pa mushipiditu pamo bwa muntu, ino i kimweke patoka’mba balembi bapandulwemo [ba Bisonekwa bya Kihebelu] kebādipo bafwatakanya nansha kulombola’mba uno mushipiditu i muntu binebine wa pabula.”

Mu Bisonekwa, mudi bimfwa bivule bilombwelwe pamo bwa bantu. Ibalete’mo kimfwa kinena’mba ñeni i mibutule bana. (Luka 7:35) Bubi ne lufu amba byabikele bulopwe. (Loma 5:14, 21) Bible wa mu Kiluba unena mu Ngalwilo 4:7 amba: “Bubi bulele pakibelo,” bubi ibutelwe pano bu muntu utengele pa kibelo, wa kukwata. Ino, tuyukile’mba bubi ke muntu po wa kumushipiditu; muswelo umo onka, mushipiditu sandu nao ke muntu po wa kumushipiditu nansha byobesambila po udi pamo bwa muntu.

Muswelo umo onka, mu 1 Yoano 5:6-8, ke enkapo mushipiditu kete, ino i ne “mema ne mashi” ye abo basapula “bukamoni.” Monka mwikadile mema ne manshi ke bantupo, mushipiditu sandu nao ke muntupo.

Pa kino, tubamone’mba mungya buluji, Bible kesambilangapo pa “mushipiditu sandu” pamo bwa muntu, utelanga pavule bu kintu bitupu mu ludingo lumo na mema ne mudilo. (Mateo 3:11; Mako 1:8) Bisonekwa bikankamikanga bantu bayulwe nansha kwikuta mushipiditu sandu, na kwiutela mu ludingo lumo na vinyu. (Efisesa 5:18) Bilombolanga’mba bantu bakokeja kuyulwa mushipiditu pamo ka na bayulwe ñeni, lwitabijo, nsangaji nansha ngikadilo mikwabo milumbuluke. (Bilongwa 6:3; 11:24; 13:52) Mu 2 Kodinda 6:6, mushipiditu sandu imutelwe pamo na ngikadilo mikwabo. Shi mushipiditu sandu wadi’mba i muntu, longa ketutanangapo divulevule bino bishima.

Pakwabo kadi, nansha binena Bisonekwa bimo bimo’mba mushipiditu wisambanga, ino bikwabo nabyo binenanga’mba bino byowisamba wisambilanga’byo kupityila mu bantu nansha mu bamwikeulu. (Mateo 10:19, 20; Bilongwa 4:24, 25; 28:25; Bahebelu 2:2) Mu bino bipindi, mushipiditu ukokeja kudingakanibwa pamo bwa nzangamina ya mu kinanda isela misapu ne mawi ne kwiisambakanya ku bantu besubwidile kyaba kilampe umo ku mukwabo.

Mu Mateo 28:19, ibatelemo kishima “mu dijina . . . dya mushipiditu sandu.” Ino, mu Kigreke nansha ke mu kiluba mwine, kishima “dijina” kekishintululapo’mba i enka dijina dya muntu, mhm. Potwikalanga tunena’mba “mu dijina dya kijila,” kino kekishintululapo’mba kijila i muntu, ino basakanga kulombola buluji bwimaninepo kijila kampanda. Dibuku dimo dya Robertson (Word Pictures in the New Testament) dinena’mba: “Uno muswelo obengidije kishima dijina (onoma) mu bwalamuni bwa septante, ne mu mivungo ya kala, kilombola mungya bukomo nansha lupusa.” Omwanda yewa yense ubatyijibwa mu ‘dijina dya mushipiditu sandu,’ wakokela ku lupusa lwa mushipiditu ne kwitabija’mba utambanga kudi Leza ne wingilanga kukwatañana na kiswamutyima kya Leza.

“Nsenga-mukwashi”

YESU waityile mushipiditu sandu bu “nsenga-mukwashi,” kadi wanena’mba wādi wa kukebafundija, kwibaludika ne kukanena. (Yoano 14:16, 26; 16:13) Kishima kya mu Kigreke kishintulwilwe bu nsenga-mukwashi (pa·raʹkle·tos) kidi mu-kilume. Kitatyi kyādi ulombola byādi bifwaninwe kukavuija uno nsenga, Yesu waingidije bishima bya mu-kilume. (Yoano 16:7, 8) Pa kwabo kadi, ponso pengidijibwe kishima kya mu Kigreke mushipiditu (pneuʹma) i kilondwe na kishima kyokebekalangapo bengidija pa kwisambila padi muntu (mu Angele kino kishima i “it”).

Mu ndimi idi na bishima byokebekalanga bengidija pa kwisambila pa muntu (kimfwa mu Angele) bashintuludi bavule bādi ku mutamba wa Busatu-busantu bekalanga bafya kuno kushiyañana, yemwikilombwela bwalamuni bumo bwa bene katolika (New American Bible), bwisambila pa Yoano 14:17 amba: “Kishima kya mu Kigreke kishintulwilwe bu ‘Mushipiditu’ kekishilakanyangapo shi besambilanga pa muntu nansha pa kintu, mhm. Batwe potwingidija bishima bya mu Angele (‘he,’ ‘his,’ ‘him’), bilembwa bivule bya Kigreke MSS [byasonekelwe ku makasa], abyo bingidijanga ‘it.’”

Pengidije Bible bishima bya mu-kilume mu Yoano 16:7, 8, pa pa·raʹkle·tos kafundijangapo lufundijo kampanda, uloñanga uno muswelo mwanda wa kulemeka bijila bya mulembelo wa ludimi lwa Kigreke.

Keudipo mu Busatu-busantu

MABUKU mashalañane anenanga’mba lufundijo lunena’mba mushipiditu i muntu wa busatu mu Busatu-busantu kelwa mu Bible po. Kimfwa:

Mu dibuku dimo dya bene katolika (The Catholic Encyclopedia) dinena’mba: “I kutupu nansha pamo mu Kipwanino Kyakala pasonekelwe senene’mba mushipiditu sandu i muntu wa busatu mu Busatu-busantu.”

Mwifundi wa myanda ya Leza Edmund Fortman unena’mba: “Bayuda kebādipo bakulupile nansha patyetye pene’mba mushipiditu i muntu ne kadi ikutupu bubinga nansha bumo bulombola’mba mu balembi ba Kipwanino Kyakala mwādi nansha umo wādi ukulupile ku uno mulangwe. . . . Mu [Evanjile] ne mu Bilongwa bya batumibwa mwine, Mushipiditu-Sandu imulombolwe bu bukomo bwa Leza kete.”

Dibuku dikwabo dya bene katolika (New Catholic Encyclopedia) dinena’mba: “I kimweke patoka’mba K[ipwanino] K[yakala] kekimwenepo mushipiditu wa Leza pamo bwa muntu . . . Mushipiditu wa Leza i bukomo bwandi bitupu. Shi pamo i mulombolwe bwa mwishile na Leza, i pamwanda luvula lwa Yahvé lwingilanga mingilo panja pandi.” Dino dibuku dibweja’ko amba: “Bisonekwa bivule bya mu K[ipwanino] K[ipya] bisambilanga pa mushipiditu wa Leza pamo bwa kintu kampanda ke pamopo wa muntu mhm; yekilombola patoka kukwatañana kudi pabukata bwa mushipiditu ne bukomo bwa Leza.”​—Bano i batwe batyityija.

Dibuku dimo bya bene katolike (A Catholic Dictionary) dinena’mba: “Kipwanino Kipya akyo kyonso kituntulu pamo ka na Kipwanino Kyakala, kilombolanga mushipiditu bu buninge nansha bukomo butamba kudi Leza.”

Shi ke pano, Bayuda nansha ke bakristu babajinji bene, i kutupu nansha umo umbukata mwabo wādi ukulupile’mba mushipiditu i muntu wa mu Busatu-busantu. Luno lufundijo lwalupukile kupwa kwa kupitapo kwa myaka mivule kunyuma kwabo. Ka na mwikinenena dibuku dimo dya bene katolika (A Catholic Dictionary) amba: “Mulangwe wa muntu wa busatu mudi Leza walupwilwe ku kitango kyalongelwe mu 362 ku Alexandrie . . . kupwa wanyingishibwa senene ku kitango kyalongelwe ku Constantinople mu 381”​—kunyuma kwa myaka tutwa tusatu ne kipindi tamba pa pungulwidilwe bana-babwanga mushipiditu sandu mu difuku dya Pentekosa!

Mhm, mushipiditu sandu ke muntu po, kadi kekipindi po kya mu buno Busatu-busantu. Mushipiditu sandi i bukomo bwa Leza bwingila, bwaingidija mwanda wa kuvuija kiswamutyima kyandi. Buno bukomo kebudingakenepo pamo na Leza; udinabo nyeke ne budi munshi mwa lupusa lwandi.

[Bushintuludi pa paje 22]

“Kipwanino Kipya akyo kyonso kituntulu pamo ka na Kipwanino Kyakala, kilombolanga mushipiditu bu buninge nansha bukomo butamba kudi Leza.”​—A Catholic Dictionary

[Bifwatulo pa paje 21]

Mu kyaba kimo, mushipiditu watukile pamo bwa nkunda. Musunsa mukwabo, wamweka pamo bwa mimbi ya mudilo. Inoko, kewamwekele kashaa mu kimfwa kya bu muntu