Musapu Otufwaninwe Kusapula

MYAKA mivule kumeso kwa bwine Kidishitu, Yehova wālombwele Abalahama mpangiko ya kusaka “mizo yonso ya panopanshi” ikeesele dyese. (Ngal. 22:18) Kadi wāpa Solomone mushipiditu, nandi wāsoneka kisakibwa kya kyalwilo kifwaninwe kulamwa na bantu bonso, amba: “Akamwa Leza ne kulama bijila byandi, mwanda yo mingilo mituntulu ya muntu.” (Mus. 12:13) Ino bantu ba mu mizo yonso badi ba kuyuka namani bino bintu?

Shako kwādi nyeke bantu bādi betabija mwanda wa Leza, ino Bible ulombola amba bukamoni bukatampe bukasapulwa ntanda yonso, bwa kutwadila mizo yonso myanda miyampe bwādi bwa kusapulwa mu “difuku dya Mfumwetu.” Dino difuku dyāshilwile mu 1914. (Kus. 1:10) Kusokwelwa 14:6, 7 wisambila pa kino kitatyi amba busapudi buludikwa na bamwikeulu bukasapwilwa “mizo yonso, ne bisaka byonso, ne ndimi yonso, ne bantu bonso bēne kumo.” Bakasoñanibwa amba: “Akamwai Leza mumutumbike ntumbo; ke-kintu kitatyi kya kidye kyandi kibafika; mutōtei wāpangile diulu, ne ntanda, ne mema, ne pansulo pa mema.” Bine Leza usaka uno musapu usapulwe. Batwe bo badi na madyese a kwingila uno mwingilo.

‘Leza wa bine.’ Kitatyi kyānene Yehova amba, “Mwi bami batumoni,” i kitatyi kyādi kisambilwa pa mwanda wa Buleza. (Is. 43:10) Nanshi musapu ufwaninwe kusapulwa ke wa kusakilapo’tu bantu kwikala mu mutōtelo kampanda nansha kwitabija mudi leza kamukaya. Ino kwibapa mukenga wa kuyuka amba Umpangi wa diulu ne ntanda ye Leza wa bine umo kete. (Is. 45:5, 18, 21, 22; Yoa. 17:3) Enka Leza wa bine kete ye ulaya bintu bikulupilwa bya kwiya kumeso. Nanshi tudi na madyese a kulombola bantu amba kufikidila kwa mwanda wānene Yehova pa kala kyo kyalwilo kikomo kitukulupija amba bya kumeso byonso byalaile bikafikidilanga.​—Yos. 23:14; Is. 55:10, 11.

Eyo, bavule botusapwilanga bukamoni batōtanga bilezaleza, pakwabo ne kutōta leza nansha umo mpika. Pa kusaka bevwane, tufwaninwe kushilula na kintu kyotwitabije batwe bonso. Tukokeja kuboila ñeni ku kimfwa kisonekelwe mu Bilongwa 17:22-31. Jingulula amba mutumibwa Polo wādi shandi unena na bunwa, ino wālombwele patōka amba bantu bonso banenwe kwishintulwila kudi Leza Umpangi wa diulu ne ntanda.

Kuyukanya Dijina dya Leza. Kokaleka kutela Leza wa bine pa dijina dyandi. Yehova uswele dijina dyandi. (Div. 3:15; Is. 42:8) Usaka bantu bayuke dino dijina. O mwanda wasakile dino dijina dya ntumbo dilembwe misunsa 7 000 ne kupita mu Bible. Pano i kiselwa kyetu kya kuyukija bantu dino dijina.​—Kup. 4:35.

Būmi bwa kumeso bwa muzo wa muntu bwimanine pa kuyuka Yehova ne kumwita na lwitabijo. (Yoe. 2:32; Mal. 3:16; 2 Tes. 1:8) Ino bantu bavule kebayukilepo Yehova. Mu bano bantu mudi ne kibalwa kikatampe kya betela bu batōtyi ba Leza wa mu Bible. Nansha byobadi na Bible ne kutanga’ye, pakwabo kebayukangapo dijina dya Leza dya bunka bwandi mwanda i ditalulwe mu malamuni mavule a panopano. Kintu kiyukilwe na bamo kete pa dijina dya Yehova i enka kyokya kibalombola bendeji ba bipwilo byabo amba baleke kutela’dyo.

Le tukayukija bano bantu dijina dya Leza namani? I kutupu kipityile buya na kwibalombola’dyo mu Bible​—mu wabo Bible shi bibwanika. Mu malamuni amo dino dijina ditanwa’mo misunsa tununu ne tununu. Ino mu makwabo ditanwa padi enka mu Mitōto 83:18 nansha mu Divilu 6:3-6, pakwabo kunshi kwa dyani pa kisonekwa dya Divilu 3:14, 15 ne 6:3. Mu Mabible amo basonekanga na musonekelo wa pa bula bitenta pamo bwa “Leza” ne “Mfumwetu” ponso patanwa dijina dya bunka dya Leza mu bisonekwa bya ludimi lubajinjibajinji. Shi balamuni ba panopano i batalule dijina dya Leza ponso, ukokeja kunyemena ku bwalamuni bwa kala bwa Bible mwanda wa kulombola bantu modifundwidilwe. Mu matanda amo ukokeja kulombola patelelwe dijina dya Leza mu ñimbo imo ya mitōtelo nansha pa bilembwa bya ku mobo a pa kala.

Nansha ke boba batōta bilezaleza nabo, Yelemia 10:10-13 mu Bible Traduction du monde nouveau ukokeja kwibakwasha biyampe. Katelelepo enka dijina dya Leza bitupu, ino ushintulula patōka ne mwaikadile.

Kokifya dijina dya Yehova na kutela bishima amba “Leza” ne “Mfumwetu,” pamo na mufila’dyo Bipwilo bya Kine Kidishitu. Ino ke kunenapo amba dino dijina dyo ke dya kushilula nadyo mīsambo yo-yonso, mhm. Nabya bamo, pa mwanda wa mfwatakani, bakaleka kwisamba nobe. Ino shi ubapu kwala kyalwilo kya mīsambo, kokafwa bumvu bwa kutela dijina dya Leza.

I kimweke patōka amba Bible utelanga dijina dya bunka dya Leza divule dine kutabuka ne misunsa itelwa bishima pamo bwa “Mfumwetu” ne “Leza” abyo byonso kikonge. Nansha nankyo, balembi ba Bible kebādipo balemba dijina dya Leza mu mulongo ne mulongo. Ino bādi batela’dyo pa ntelelo, mobyendele, ne na bulēme. Uno o muswelo mulumbuluke wa kulonda.

Mwine Utelwa pa Dino Dijina. Eyo, kutela dijina dya bunka dya Leza i bubinebine bwa mvubu mpata, inoko ino i ngalwilo’tu.

Pa kusaka kuswa Yehova ne kumwita na lwitabijo, bantu bafwaninwe kumuyuka aye i Leza wa muswelo’ka. Yehova paāyukenye dijina dyandi kudi Mosesa ku Lūlu lwa Shinai, kānenepo’tu upituluka kishima “Yehova.” Ino wākokele ñeni ya Mosesa pa ngikadilo Yandi ya kwanwa. (Div. 34:6, 7) Kino kyo kimfwa kyotufwaninwe kwiula.

Shi usapwila bapya basangela musapu nansha shi unena dishikulu ku meso a kipwilo, shi wisambila pa byabuyabuya bikaleta Bulopwe, lombola bino bintu mobikwatañenine na Leza ulaile ino milao. Shi wisambila pa mbila yandi, nena ukoma tunangu ne buswe bumweka mu mine mbila’ya. Yukija senene amba bisakibwa bya Leza ke kiselwapo kilema kotudi, ino i bitūlwe’ko pangala pa kamweno ketu. (Is. 48:17, 18; Mik. 6:8) Lombola muswelo onso umwekeja Yehova bukomo mousokwela’ko bumuntu bwandi, misoñanya yandi, ne mpango yandi. Kokela milangwe pa bujalale bumweka mu muswelo ulombola Yehova ino ngikadilo. Leka bantu bamone muswelo olombola malango obe padi Yehova. Buswe boswele Yehova bukokeja kulangula buno buswe mu bantu bakwabo.

Musapu wa kampeja-bukidi mu ano mafuku witanga bantu bonso bakamwe Leza. Tukimbei kutamija kuno kwakamwa Leza na byotunena. Kuno kwakamwa o moyo mufwaninwe, kityino kya kutyina Yehova, ne kalēmo kakatampe ka kumulēmeka. (Mit. 89:7) Kuno kwakamwa i ne kuyuka kotuyukile amba Yehova ye Mutyibi mukatakata ne amba būmi bwetu bwa kumeso bwimanine pa kwitabijibwa na aye. (Luka 12:5; Loma 14:12) Nanshi kuno kwakamwa kwendelanga pamo na kumuswa buswe bwa mushike, bufikija muntu ku kusaka’nka kumusangaja. (Kup. 10:12, 13) Kadi kwakamwa Leza kwitutononanga tushikwe bibi, tukōkele mbila ya Leza, ne kumutōta na mutyima mukunkane. (Kup. 5:29; 1 Bil. 28:9; Nk. 8:13) Kwitukiñanga ku mutyima wa kutompa kwingidila Leza koku kadi tuswele bintu bya ino ntanda.​—1 Yoa. 2:15-17.

Dijina dya Leza​—“Kitēba Kikomokomo.” Bantu bafikila pa kuyuka Yehova bya binebine bakiñwanga bikatampe. Ke mwandapo’tu batelanga dijina dya bunka dya Leza ne kutela ngikadilo yandi imoimo, mhm. Ino i mwanda batūdile kikulupiji kyabo mudi Yehova mwine. Nkindi 18:10 wisambila pobadi amba: “Dijina dya Yehova i bu-kitēba kikomokomo: Moloke unyemenamo ne kupanda wapanda.”

Kimba mikenga ya kukankamika bakwenu bakulupile mudi Yehova. (Mit. 37:3; Nk. 3:5, 6) Kino kikulupiji kilombola lwitabijo lwitabije muntu mudi Yehova ne mu milao yandi. (Bah. 11:6) Shi bantu ‘beta pa dijina dya Yehova’ mwanda bamuyukile amba ye Mubikadi wa diulu ne ntanda, baswele mashinda andi, ne kukulupila na mutyima umo amba lupandilo lwa bine lutamba enka kwadi, nabya bakapanda, monka mwitukulupijija’kyo Kinenwa kya Leza. (Loma 10:13, 14) Ponso pofundija bakwenu, wibakwashe batamije lwitabijo lwa uno muswelo mu bintu byonso byobalonga mu būmi bwabo.

Bantu bavule i batyintyidilwe na makambakano ebatana. Padi kebayukile ne kwa kunyemena kwine. Wibalombole befunde mashinda a Yehova, bamukulupile, ne kulonda bintu byobafunda. (Mit. 25:5) Wibakankamike batakamane mu kulomba Leza wa kwibakwasha ne kumufwija’ko pangala pa madyese aebesela. (Fid. 4:6, 7) Shi abayuka Yehova, ke enkapo na kutanga myanda ibala-inga mu Bible, ino i ne na kwimwena kufikidila kwa milao yandi mu būmi bwabo, nabya bakashilula kwikala na mutyima-ntenke utamba ku kwivwanija bya binebine buluji bwine bwa dijina dya Yehova.​—Mit. 34:8; Yel. 17:7, 8.

Kwatakanya senene mukenga o-onso wa kukwasha bantu bajingulule tunangu tudi mu kwakamwa Yehova, Leza wa bine, ne mu kulama mbila yandi.

YESU KIDISHITU pa kupwa kusanguka ne kumeso kwa kujokela mūlu, wāpele bandi bana ba bwanga ino misoñanya’mba: “Mukēkale basapudi bami bakusapula . . . ne kulampe kwine kumfulo kwa ntanda.” (Bil. 1:8) Bengidi ba dikōkeji ba Leza ba mu ano mafuku batelwanga bu bantu ba “kulamata ku busapudi bwa Yesu.” (Kus. 12:17) Le nobe usapulanga’bo na kininga?

Bantu bavule basumininwe na bubine amba i betabije Yesu, ino kuyuka’bo mpika amba wādi’ko kumeso kwa kubutulwa’ye bu muntu. Ne kadi kebayukilepo amba wādi muntu wa mashi ne mema paādi pano panshi. Pakwabo ne kwivwanija kwine mpika buluji bwaityilwa bu Mwanā Leza. Kebajingulwilepo biyampe mwingilo wandi mu kufikidija mpango ya Leza. Kebayukilepo byalonga dyalelo, nansha kujingulula byakalonga mu mafuku āya kumeso mobikekadila na lupusa pa būmi bwabo kwine mpika. Pakwabo balanga’nka ne kulanga bya bubela amba Batumoni ba Yehova kebetabijepo mudi Yesu. Nanshi tudi na madyese a kulonga bukomo bwa kuyukanya bubinebine pa ino myanda.

Kudi kadi bantu bakwabo kebetabijapo amba muntu pamo bwa Yesu utelelwe mu Bible wāikele’ko binebine. Bamo bamona Yesu bu muntu’tu mukatampe kete. Bavule bapelanga kwitabija kutelwa kwatelwa amba i Mwanā Leza. O mwanda “kulamata ku busapudi bwa Yesu” mu bantu ba uno muswelo kulomba kwielela’ko, kutūkija mutyima, ne bunwa.

Nansha shi bemvwaniki bobe badi na milangwe’ka, bafwaninwe kwifunda kuyuka Yesu Kidishitu shi basaka kumwena mu mpango ya Leza ya kupāna būmi bwa nyeke. (Yoa. 17:3) Kiswa-mutyima kya Leza kilombwelwe patōka i kino: myuya yonso myūmi “īmwitabije’mba: Yesu Kidishitu i Mfumwetu” ne kukōkela ku lupusa lwandi. (Fid. 2:9-11) Nanshi ketukepukapo kusapula uno mwanda shi tubatana bantu badi na milangilo yobakwete nkwatyidile, ayo’ko mifwe nansha ya mfwatakani ya patōkelela. Mu byaba bimo tukokeja kunena pambulwa kwikaka myanda itala padi Yesu Kidishitu​—nansha ke mu bupempudi bubajinji​—ino mu byaba bikwabo, biketulomba padi kunena na bwino mwanda wa bemvwaniki bashilule kumona Yesu biyampe. Tukokeja ne kulanga miswelo ya kushilula myanda mikwabo yotukesambila’po mu bupempudi bulonda’po. Inoko, padi i bikomo kwisambila pa myanda yonso enka ne byotukashilula kifundwa kya Bible na muntu’wa.​—1 Tem. 2:3-7.

Mwingilo wa Mvubu Wingila Yesu mu Mpango ya Leza. Tufwaninwe kukwasha bantu bayuke amba Yesu byadi “dishinda” ne ‘byokekudi nansha umo wa kukafikila kudi Tata poso ponka padi aye,’ kebibwanikapo nanshi kupwana na Leza pampikwa kwikala na lwitabijo mudi Yesu Kidishitu. (Yoano 14:6) Shi muntu kayukilepo mwingilo wa mvubu obapele Mwanā umbedi kudi Yehova, kabwanyapo kwivwanija Bible. Mwanda waka? Mwanda Yehova utūdile uno Mwana bu lufungulo lwa kufikidija mpango Yandi yonsololo. (Kol. 1:17-20) Bupolofeto bwa mu Bible bwimanine pa uno mwanda. (Kus. 19:10) Yesu Kidishitu ye muntu umo kete ukapwija makambakano onso alupwilwe na butomboki bwa Satana ne na bubi bwa Adama.​—Bah. 2:5-9, 14, 15.

Pa kusaka muntu evwanije mwingilo wa Kidishitu biyampe, ufwaninwe kuyuka amba bantu badi mu ngikadilo ya mwiko mokebakokejapo kwinyongolola abo bene. Batwe bonso tubutwidilwe mu bubi. Kino kituletelanga bikambija mu miswelo mishileshile mu būmi bwetu. Dyakadilwe kantu dino, tukafula ku lufu. (Loma 3:23; 5:12) O mwanda ufwaninwe kulanguluka pa kino na boba bosapwila. Kupwa wibalombole amba i kupityila ku kitapwa kya kikūlwa kya Yesu Kidishitu kwikele Yehova kwitunyongolola na buswe ku bubi ne ku lufu shi bine tubalombola lwitabijo mu ino mpangiko. (Mako 10:45; Bah. 2:9) Kino kyo kishitwile mukenga wa kukamona būmi bwa nyeke mu bubwaninine. (Yoa. 3:16, 36) Kekudipo kadi dishinda dikwabo. (Bil. 4:12) Kitatyi kyofundija, shi muntu umo, shi mu kipwilo, kokemanina enka pa bino bintu kete. Ino tamija na kanye ne kitūkijetyima mityima ya bemvwaniki bobe ya kufwija’ko pa uno mwingilo wingila Kidishitu bu Mukūdi. Mutyima wa kufwija’ko pangala pa ino mpangiko ukekala na lupusa pa mulangilo, mwiendelejo, ne bitungo bya mu būmi bwa muntu.​—2 Kod. 5:14, 15.

Eyo, Yesu wāelele būmi bwandi bu kitapwa dimo dyonka kete. (Bah. 9:28) Inoko, pano wingilanga bu Kitobo Mukatampe. Kwasha bakwenu nabo bemvwanije buluji bwa kino kintu. Lelo badi na njia, na mutyima mutyumuke, badi mu masusu nansha mu makambakano alupuka ku bantu bambulwa kanye bebajokolokele? Yesu paādi muntu pano panshi wātenwe na bino bikoleja byonso. Nanshi uyukile motususukila. Byotudi bampikwa kubwaninina, le tusakanga Leza etufwile lusa? Wivwane tulombe Leza etulekele bubi bwetu pa kitapwa kya Yesu, nabya Yesu uketwingidila bu “Nsenga-Mukwashi udi kudi Tata.” Ye “wakwitusengela” na lusa lonso. (1 Yoa. 2:1, 2; Loma 8:34) Nanshi kupityila ku kitapwa kya Yesu ne ku mingilo yaingila bu Kitobo Mukatampe, tubwanya kufwena ku “lupona lwa buntu” lwa Yehova ne kutambula bukwashi pa kitatyi kifwaninwe. (Bah. 4:15, 16) Bukwashi bwa bu Kitobo Mukatampe bwitukwasha Yesu bo bwitupa muswelo wa kwingidila Leza na mutyima wa mundamunda utōka nansha byotudi bakubulwa kubwaninina.​—Bah. 9:13, 14.

Ne kadi Yesu udi na lupusa lukatampe mwanda ye utongelwe na Leza bu Mutwe wa kipwilo kya bwine Kidishitu. (Mat. 28:18; Ef. 1:22, 23) Byadi Mutwe, witupanga bwendeji bonso botusakilwa bukwatañene na kiswa-mutyima kya Leza. Shi kofundija bakwenu, wibakwashe bemvwanije amba Yesu Kidishitu ye Mutwe wa kipwilo, ke muntupo ungi, mhm. (Mat. 23:10) Tamba’tu pomwimona dibajinji na boba basangela musapu, wibete bāye ku kupwila pa kipwilo kya komudi, kwine kotwifunda Bible na bukwashi bwa mabuku alupulwa na “umpika wa binebine ne wa manwa.” Kokebashintulwila enka uno “umpika” kete, mhm, ino i ne Mfumwandya uno umpika mwanda wa nabo bayuke bumutwe bwa Yesu. (Mat. 24:45-47, NW) Wibayukanye ku bakulumpe, ne kwibashintulwila bisakibwa bya mu Bisonekwa byobafikīle’po. (1 Tem. 3:1-7; Tet. 1:5-9) Wibasapwile amba kipwilo ke kya bakulumpepo, ino abo bo betukwasha tunangile mu matabula a Yesu Kidishitu. (Bil. 20:28; Ef. 4:16; 1 Pet. 5:2, 3) Kwasha bano bantu basangela musapu bamone amba kudi bantu badi mu bulongolodi bwa ntanda yonso buludikwa na Kidishitu mutwe wabo.

Tutanga mu Maevanjile amba pātwelele Yesu mu Yelusalema kumeso’tu kwa lufu lwandi, bandi bana ba bwanga bādi bamwelela tubobo amba aye ye “Mulopwe wakwiya mu dijina dya Yehova”! (Luka 19:38) Shi bantu bafunda Bible na mushike mukatampe, bakayuka amba Yehova pano i mupe Yesu lupusa lwa kubikala pa bantu ba mizo yonso. (Dan. 7:13, 14) Shi konena dishikulu mu kipwilo nansha shi wendeja bifundwa, kwasha bantu bajingulule bine bikalongela buludiki bwa Yesu bantu bonsololo.

Nena ukoma amba mwikadilo wetu wa umbūmi o ulombola shi bine twitabije Yesu Kidishitu amba ye Mulopwe ne shi ukōkelanga na mutyima tō ku buludiki bwandi. Lombola patōka mwingilo wāikele Yesu kupa balondi bandi pa kupwa kushingwa māni bu Mulopwe. (Mat. 24:14; 28:18-20) Wisambile pa byānene Yesu, Mudingidi Wakwanwa, amba byo bya kubadikija mu būmi. (Is. 9:6, 7; Mat. 6:19-34) Kokela milangwe pa mushipiditu wānene Mwanā Mulopwe wa Ndoe amba o ukekala nao balondi bandi. (Mat. 20:25-27; Yoa. 13:35) Tadija kutyina amba wakatyibila bakwenu mambo pa byobalonga shi bivule shi bityetye, ino abe wibakankamike batale shi bilongwa byabo bilombola amba bakōkele ku buludiki bwa Kidishitu. Mu byonso byolonga, lombola amba nobe ufwaninwe kwibukōkela.

Ala Kidishitu bu Kyalwilo. Bible udingakanya mwingilo wa kulonga mwanā bwanga mwine Kidishitu pamo na lūbako lūbakilwe padi Yesu Kidishitu bu kyalwilo. (1 Kod. 3:10-15) Pa kufikila pa kino, kwasha bantu bayuke Yesu monka mwalombwedilwe mu Bible. Ta mutyima kutyina amba bakakumona bu muntu obafwaninwe kulonda. (1 Kod. 3:4-7) Kokela milangwe yabo kudi Yesu Kidishitu.

Shi kyalwilo i kyalwe senene, befundi bakevwanija amba Kidishitu ye ushile kitompekejo kya ‘kumulonda mu māyo andi.’ (1 Pet. 2:21) Shi usaka kūbaka na kino kyalwilo, kankamika befundi batange Maevanjile, ke kwiatangapo’tu bu mānga ya bine, ino i ne bu kimfwa kya kulonda. Wibakwashe balame mutyima ne ngikadilo yādi ilombola Yesu bininge. Wibakankamike bate mutyima ku muswelo wādi umona Yesu Shandi, mwaādi ulongela mu matompo ne byongo, mwaādi ulombwela kikōkeji kudi Leza, ne mwaādi ushikatyila na bantu mu ngikadilo mishileshile. Nena ukoma mwingilo mwine wāingile Yesu mu būmi bwandi bonso. Ebiya shi mwifundi watanwa mu matompo nansha usaka kutyiba mbila kampanda, ukeipangula’mba: ‘Le Yesu wādi ubwanya kulonga namani pa uno mwanda? Lelo byonsa kulonga bikalombola amba mufwijanga’ko pa byonso byaunongēle?’

Kitatyi kyowisamba ku meso a kipwilo, kokilanga amba banabetu byobadi kala na lwitabijo mudi Yesu, kekudipo kinsakila kadi kukokela mpata milangwe yabo padi. Bine byokanena bikekala na mushike shi utamija lwitabijo lobetabije uno mwanda. Shi konenena pa kupwila, kwatañanya byonena na mwingilo wa Yesu wa bu Mutwe wa kipwilo. Shi kowisambila pa mwingilo wa budimi, kokela milangwe pa mutyima wādi na Yesu paādi wingila mwingilo wandi, ne kadi lombola mwingilo wa dyalelo moukwatañenine na byobya bilonga Kidishitu bu Mulopwe, bya kukongakanya bantu mwa kwibatwejeja mu ntanda impya.

I kimweke patōka amba kudi bivule bya kwifunda padi Yesu kupita’ko’tu kuyuka myanda ya kyalwilo. Pa kwikala bene Kidishitu ba binebine, bantu bafwaninwe kulombola lwitabijo mwadi ne kumuswa bya binebine. Buno buswe bo bupa bantu mutyima wa kumukōkela ne pa mfulo. (Yoa. 14:15, 21) Bo bwibakwasha bemanije mu lwitabijo pobadi mu byamalwa, bendelele na kunangila mu mayo a Kidishitu mafuku onso a būmi bwabo, ne kwilombola bu bene Kidishitu bapye ‘bashimatyijibwe bwa miji, ne kuningijibwa’ pa kyalwilo. (Ef. 3:17) Uno mwiendelejo o upeja Yehova, Leza ne Shandya Yesu Kidishitu ntumbo.

YESU wālaile kitatyi kyaādi ushintulula myanda pala pala ibadilwa mu kiyukeno kya kwikala’po kwandi ne kya kuvuika kwa ngikadilo ya bintu amba: “Kadi Myanda Miyampe ino’i ya Bulopwe ikasapulwa panopantanda ponso, amba ikale bu kiyukeno ku mizo yonso, penepa mfulo keifika shayo.”​—Mat. 24:14, MB.

Le na bubine i musapu’ka umo ufwaninwe kwelelwa lubila pi na pi? I musapu wa Bulopwe bwāfundije Yesu kulomba’bo kudi Leza amba: “Bulopwe bobe bufike.” (Mat. 6:10) Kusokwelwa 11:15 wibutela bu bulopwe “bwa Mfumwetu [Yehova], ne bwa Kidishitu wandi,” mwanda lupusa lwa kuludika i lutambe kudi Yehova, kupwa lubapebwa Yesu ubikikilwe bu Mulopwe. Ino yuka amba uno musapu wānene Yesu amba ufwaninwe kusapulwa mu ano mafuku i mupite owa wāsapwile balondi bandi mu myaka katwa kabajinji. Abo bādi basapwila bantu amba: “Bulopwe bwa Leza bubemufwenenena pa bwipi.” (Luka 10:9) Mwanda Yesu, mwine wāshingilwe māni bu Mulopwe, wādi umbukata mwabo. Ino mungya mokisonekelwe mu Mateo 24:14, Yesu wālaile kusapulwa ntanda yonso kwa kinkumenkume kikwabo kya mvubu mu kufikidija mpango ya Leza.

Mupolofeto Danyele wāpelwe kimonwa kya kino kinkumenkume. Wāmwene “umo wifwene’nka na mwana muntu,” Yesu Kidishitu, utambula kudi “Kafulamoba,” Yehova Leza, “bufumu, ne ntumbo, ne bulopwe, amba bantu bonsololo, ne mizo, ne ndimi, bakamwingidile.” (Dan. 7:13, 14) Kino kinkumenkume kya kamweno mu madiulu ne ntanda kyālongekele mūlu mu mwaka wa 1914. Kupwa Dyabola ne bademona bandi bāelwa pano panshi. (Kus. 12:7-10) Ngikadilo ya bintu ya kala yāshilula mafuku ayo a mfulo. Inoko, kumeso kwa kufundulwa’yo lonso, kusapulwanga bidi busapudi bwa ntanda yonso amba Meshiasa Mulopwe ubikikilwe na Yehova pano utentamine pa lupona momwa mūlu. Bantu ba pi na pi badyumunwanga. Mwitabilo wabo o ulombola mobamwena Mwine Mukatakata Mwine, Muludiki “ubikala mu bulopwe bwa bantu.”​—Dan. 4:32.

Bine, kukidi bivule bīya kumeso​—bivule bine! O mwanda netu tukilomba’mba, “Bulopwe bobe bufike,” ke kunenapo’mba kushimikwa kwa Bulopwe bwa Leza kukidi kumeso, mhm. Ino i mwanda tutengele kumona Bulopwe bwa mūlu bufikidija ne pa mfulo bupolofeto, kimfwa bobwa budi mu Danyele 2:44 ne mu Kusokwelwa 21:2-4. Busa kwalamuna ntanda ke paladisa ishiketwe na bantu baswele Leza ne bantu nabo. Potusapulanga “Myanda Miyampe ino’i ya Bulopwe,” tulombolanga bino byepelo byobukaleta. Ino kadi tuyukijanga bantu na kusumininwa amba Yehova ke mupwe kala kupa wandi Mwana lupusa lonso lwa kubikala. Le unenanga ukoma ino myanda miyampe kitatyi kyosapula bukamoni bwa Bulopwe?

Shintulula Bulopwe. I muswelo’ka otukokeja kuvuija mwingilo wa kusapula Bulopwe bwa Leza otupelwe? Tukokeja kulangula kusepelela kwa bantu na kushilula mīsambo pa myanda mishileshile, ino tufwaninwe kulombola patōka amba musapu wetu i wa kusapula Bulopwe bwa Leza.

Kintu kya kamweno mu uno mwingilo i kutanga ne kupituluka binenwa bya bisonekwa bīsambila pa Bulopwe. Kitatyi kyowisambila pa Bulopwe, jingulula shi bolombola’ba bevwanije bulopwe i bika. Kukalomba padi kwisamba bivule kupita’ko’tu kunena amba Bulopwe bwa Leza i umbikalo. Bamo padi bakokeja kukomenwa kufwatakanya kintu kekimwekapo amba i umbikalo. Ukokeja kulanguluka nabo mu miswelo pala pala. Kimfwa, bukomo bukokela bintu byonso panshi kebumwekangapo, ino budi na lupusa lukatampe mu būmi bwetu. Ketukokejapo kumona Yewa wālongele buno bukomo, ino i kimweke patōka amba udi na bukomo bukatampe. Bible umutela bu “Mulopwe wa nyeke.” (1 Tem. 1:17) Padi ukanena monka amba shi ntanda i mikatampe, bantu bavule kebamonangapo kashā mwipata mwayo nansha kumona mulopwe mpala na mpala. Ino bayukilanga’byo ku misapu isapulwa. Ne Bible nandi mo monka, byalupwilwe mu ndimi 2 200 ne kupita, witulombola Bulopwe bwa Leza; wituyukija i ani upelwe lupusa ne i bika bilonga buno Bulopwe. Kiteba kya Mulami, kilupulwa pano mu ndimi mivule kupita majulunale onso, “Kisapula Bulopwe bwa Yehova,” monka mokinenena pangala pa kibalu.

Shi usaka kukwasha bantu bayuke Bulopwe i bika, tela’ko bintu bimobimo byobasakanga umbikalo wibalongele: kupa bantu misokwe miyampe, ndoe, kwibanyongolola mu bya bupolapola, kupwija mboloji ya tubila, masomo, ne bundapi. Lombola amba enka Bulopwe bwa Leza bo bukavuija bino byonso ne bisakibwa bikwabo’nka ne pa mfulo.​—Mit. 145:16.

Longa buninge bwa kulangula kyumwa kya bantu bekale babikalwa ba buno Bulopwe, bubikelwe na Yesu Kidishitu bu Mulopwe. Tela bingelengele byaālongele bu ntompejo ya bintu byasa kulonga pano padi bu Mulopwe wa mūlu. Wisambile nakampata pa ngikadilo miyampe yaālombwele. (Mat. 8:2, 3; 11:28-30) Shintulula amba wāelele būmi bwandi pa mwanda wetu, ne amba Leza wāmusangwile, wāmupa būmi bwakubulwa kufwa dikwabo momwa mūlu. Mo amo mwābikadile bu Mulopwe.​—Bil. 2:29-35.

Nena ukoma amba Bulopwe bwa Leza pano bubikele mūlu. Ino yuka amba bavule kebayukilepo amba ngikadilo yobakamba nayo ino bo bukamoni bwa kubikala kwa buno bulopwe. Itabija kino, ino wibepangule shi bayukile byānene Yesu Kidishitu amba byo bikekala bukamoni bwabo. Kupwa lombola patōka bintu bimobimo bya mu kiyukeno kya bintu bivule kitanwa mu Mateo shapita wa 24, Mako shapita wa 13, ne Luka shapita wa 21. Penepa ipangula mwanda waka kubikala kwa Kidishitu mūlu kunenwe kuleta ino ngikadilo pano panshi. Ebiya kokela milangwe ku Kusokwelwa 12:7-10, 12.

Pa kulombola bukamoni bumwekelele bwa byobya bilonga Bulopwe bwa Leza, tanga Mateo 24:14, kupwa lombola mpangiko ya bufundiji bwa Bible bwa ntanda yonso ilondwa dyalelo. (Is. 54:13) Lombola bantu masomo meshileshile amwena’mo Batumoni ba Yehova​—onso ano emanine pa Bible, afundwa ku bitupu. Shintulula amba, kutentekela pa mwingilo wetu wa ku njibo ne njibo, tufundijanga kadi bantu ne bisaka bufundiji bwa Bible ku mobo kadi ku bitupu mu matanda 230 ne musubu. Le kudi umbikalo wa bantu ubwanya kutūdila babikalwa babo ne bantu ba ntanda yonso ino mpangiko ya bufundiji bukatakata namino? Ita bantu bāye ku Njibo ya Bulopwe, batanwe ku kubungakana ne ku bitango bya Batumoni ba Yehova, bemwene abo bene buno bufundiji mobwalamwina būmi bwa bantu.​—Is. 2:2-4; 32:1, 17; Yoa. 13:35.

Ino le mwisambi nobe ukayuka namani mumutadila ino myanda mu būmi bwandi? Padi ukamulombola na bunwa amba kyoidile kumupempula i kwisambila pa mukenga upelwe bantu bonso wa kutonga būmi bu babikalwa ba Bulopwe bwa Leza. Muswelo’ka? Na kwifunda byobya bilomba Leza ne kwikala na būmi bukwatañane nabyo tamba’nka pano.​—Kup. 30:19, 20; Kus. 22:17.

Kwasha Bakwenu Babadikije Bulopwe Kumeso. Nansha shi muntu waitabija musapu wa Bulopwe, ino kudi butyibi bwafwaninwe kutyiba. Le i pa kifuko’ka pakatūla Bulopwe bwa Leza mu būmi bwandi? Yesu wāsoñenye bana bandi ba bwanga ‘babadikile bidi kusaka bulopwe.’ (Mat. 6:33) Le tukakwasha namani bene Kidishitu netu balonge kino? I na kuleta kimfwa kiyampe batwe bene ne na kwisambila pa mikenga ya kulonga uno muswelo. Kyaba kimo, i na kwipangula muntu shi ke mubandaule miswelo imoimo ya kulonga kino kintu nansha kumusekunwina bilongele bantu bakwabo. Na kwisambila pa nsekununi ya mu Bible mu muswelo utamija munda mwandi buswe bwaswele Yehova. Na kunena ukoma’mba Bulopwe i kintu kya bine. Na kutyityija mvubu mine ya mwingilo wa kusapula Bulopwe. Ukalupula divule bipa biyampe kutabuka shi kulombolapo bitupu bantu byobafwaninwe kulonga, ino i na kwibapa mutyima wa kwibilonga.

Ne kutatana kwine mpika, musapu wa būmi otufwaninwe batwe bonso kusapula wimanine bidi padi Yehova Leza, padi Yesu Kidishitu, ne pa Bulopwe. Buno bubinebine bwa kamweno bufwaninwe kukomwa ponso potusapula bukamoni ku bantu bonso, mu bipwilo byetu, ne mu būmi bwetu. Shi tulonge namino, nabya tubelombola amba bine tumwenanga byabuyabuya mu bufundiji bwa Masomo a Mwingilo wa Kiteokratike.